හත්වන පරිච්ඡේදය | ඔබටත් මා මෙන් අන්ධ වීමට අවශ්‍යද?

ප්‍රතිචාරයක් දැක්වීමට පෙර චෙන් ගොං බොහෝ වේලාවක් තුෂ්නිම්භූතව සිටියේ අදහාගත නොහැකි දෙයක් දුටුවාක් මෙන් ය. “මේවා ගෙනාවේ ඔබද?”

ෂෙන් ච්‍යාඕ හිස වැනුවේ , “ආපසු එන විට බූරු මස් බර්ගර් තුනක් ගෙන එන ලෙසට ඔබ කිව්වෙ නැද්ද?”

අනෙක් පුද්ගලයා පෙර දින ඇඳ සිටි ඇඳුම වෙනුවට අලුත්ම නිල් පැහැති වස්ත්‍රයකින් සැරසී ඇති ඇති බව චෙන් ගොං දුටුවේ මේ මොහොතේ ය. ඔහු මුලින් ඇඳ සිටි අළු පැහැති වස්ත්‍රය දැන් ඇඳ ඇතිරිල්ලක් ලෙස යටින් විහිදී ඇත. මිනිසා පෙර පරිදිම පිරිසිදුව හා පිළිවෙලට සිටියේය.ආපසු පැමිණීමට පෙර කොහේ හෝ ස්ථානයකින් ස්නානය කොට පිළිවෙළකට හැඳ පැළඳ පැමිණෙන්නට ඇතැයි චෙන් ගොංට සිතුණි.

"ඔබට මුදල් කොහෙන්ද?" චෙන් ගොං සැකය මුසු වූ පැනයක් විමසුවේය.

ෂෙන් ච්‍යාඕ සිනාසෙමින්, “සදාචාරාත්මක මාර්ගයකින්. පොඩ්ඩක් බලන්න මගේ තත්වය දිහා. ඔබ සිතන්නේ මට සොරකම් කිරීමට හෝ මංකොල්ලකෑමට හැකි වනු ඇතැයි කියාද?"

චෙන් ගොං කොඳුරමින්, "කවුද හරියටම දන්නේ?"

එසේ වුවද, ඔහු ඒ ගැන වැඩිදුර නොසිතා බර්ගර් එකක් අතට ගත්තේ ය. ඔහු එය ස්පර්ශ කරන විට එහි උණුසුම් හා මෘදු බවක් දැනුනි. ඒවා පැහැදිලිවම ස්වල්ප මොහොතකට පෙර උඳුනෙන් බා ගත් නැවුම් ඒවා විය යුතු ය. ඔහු කඩදාසි එතුම විවෘත කර පහසුවෙන්ම එහි කැබැල්ලක් කටට ගත්තේය. බර්ගර් හැපෙනසුළු වනතුරුම පුළුස්සා ඇත; ස්වලයක් ආහාරයට ගත් විට එය ඇතුළත තිබූ හොදි බිංදු පිටව ගියේ කටට කෙළ උනන සුවඳක් වටපිටාව පුරාම විහිදුවමිනි.

චෙන් ගොංගේ තෘෂ්ණාව කොතරම් ඇවිස්සී තිබුණේද යත් ඔහු ඒවායින් දෙකක් එක හුස්මට මුවට ඔබා ගත්තේ ය. ඉතිරි එක, ඔහුට එතරම් ඉක්මනින් අවසන් කිරීමට අවශ්‍ය නොවූ නිසා මොහොතක් කල්පනාවේ යෙදුණු ඔහු, එය හෙට උදේ ආහාරය සඳහා ඉතිරි කරගැනීමට තීරණය කළේය. එවිට ඔහුට වැඩට යාමට පෙර එය අනුභව කළ හැකිය.

පසුව ඔහු ෂෙන් ච්‍යාඕ දෙස බැලීමට හිස හරවා ගත්තේය.දෙවැන්නා තවමත් උණ බම්බු සැරයටිය අතේ තබාගෙන කකුල් දෙක හරස් කොටගෙන එරමිණිය ගොතාගෙන භාවනා කරන ඉරියව්වෙන් වාඩි වී සිටියේය. ඔහුගේ දෑස් සැහැල්ලු ලෙස පියවී තිබුණි. චෙන් ගොංට, මොහු ඇත්තෙන්ම ඇස් පියාගෙන විවේක ගන්නවාද, එසේත් නැතිනම් යමක් ගැන කල්පනා කරනවාද යන්න ගැන නිශ්චිතවම සිතාගැනීමට පවා නොහැකි විය.

"ඒයි, ඔහේ කොහෙන්ද ආවේ?"

ෂෙන් ච්‍යාඕ ඔහුගේ හිස සෙලවී ය: "මම දන්නේ නැහැ. ගමන අතරතුරදී බිම වැටීම නිසා මගේ හිසට තුවාල වුණා. ඒ නිසා මට මතක නැති දේවල් බොහෝමයක් තිබෙනවා.”

“ඔබට ඒ ගැන කතා කිරීමට අවශ්‍ය නැත්නම්, කතා කරන්න එපා! නිදහසට කරුණු ඉදිරිපත් කිරීමට වෙහෙසෙන්නේ ඇයි! ඔබ හිතන්නේ මාව රවට්ටන එක ලේසියි කියලද?" එය පිළිතුරක් ලෙස නොපිළිගත් චෙන් ගොංට සංවාදය කෙරෙහි ඇති උනන්දුව නැති වූ නිසා බිම වැතිර විවේක ගන්නට විය.

කෙසේ වෙතත්, සමහර විට ඔහු ඕනෑවට වඩා කෑ ගැසූ නිසා විය හැකිය, පෙරළී ගිය නමුත් චෙන් ගොංට නිදා ගැනීමට නොහැකි විය. ඔහු නැවතත් ඒ ගැන නොඅසා වෙනත් ක්‍රමයකින් ඇසුවේ, “ඒයි!

ඇත්තටම, ඔබ දවල්ට කොහෙද හිටියේ? ඔබ මුදල් ඉපයුවේ කෙසේද? ”

අනෙක් පසින් සිහින් කටහඬක් ඇසුණි: "අත මඟින් අනාවැකි කීමෙන්."

චෙන් ගොං, විස්මය මුසු වූ ශබ්දයක් මුවින් නිකුත් කරමින් ඔහු අසළින් වාඩි විය: " අත බැලීමෙන් වාසනාව කියන්නේ කෙසේදැයි ඔබ දන්නවද?"

ෂෙන් ච්‍යාඕ තවමත් එහි කකුල් හරස් කොටගෙන වාඩි වී සිටි අතර, සිනාසෙමින්, “මම එය ඇත්තටම 'කියනවා' කියලා අදහස් කරන්නේ නැහැ. මිනිසෙක් පොහොසත් හෝ දුප්පත් වුවත්, ඒ සෑම දේකටම කෙනෙකුගේ අතේ යම් යම් ඉඟි තිබෙනවා. එය පැවසීමට කුඩා උපක්‍රමයක් පමණයි. ”

චෙන් ගොං උනන්දු විය, "එසේ නම්, අනාගතයේදී මා පොහොසත් වේදැයි බැලීමට ඔබට හැකිද?"

ෂෙන් ච්‍යාඕ පිළිතුරු දුන්නේ, "මට ඔබගේ අත දෙන්න."

චෙන් ගොං ඔහුට ඔහුගේ දෑත් දුන් අතර, ෂෙන් ච්‍යාඕ මොහොතකට ඒවා හරහා ඔහුගේ ඇඟිලි දිවෙව්වේ ය. "ඔබ බර භාණ්ඩ රැගෙන යාමට පුරුදු වී සිටින නිසා ඔබට සහල් මෝලක හෝ තොටුපලක තාවකාලික රැකියාවක් තිබිය යුතුයි..එය නිවැරදියි නේද?"

"වෙන මොනවාද?" චෙන් ගොං මෝඩයෙකු නොවී ය. ඔහුගේ අත්වල ඝන සමක් ඇති බව ඔහු දැන සිටි අතර අනෙක් පුද්ගලයා ඒ මත පදනම්ව උපකල්පනයක් කළ බව ඔහුට සිතුණි.

“ඔබ මුරණ්ඩුයි. පරාජය ලේසියෙන් පිළිනොගන්නා, නොසැලෙන ස්වභාවයක් තිබෙන කෙනෙක්. එහෙත්, ඔබ තරමක් සැක සහිත කෙනෙක්; ඔබ කුඩා කාලයේදීම ඔබේ පවුලේ අය සමඟ අමනාප වෙන්න ඇති. සමහරවිට ඔබට ගෙදර සිටින්නේ සුළු මවක් හෝ සුළු පියෙක් විය හැකියි.”

චෙන් ගොංගේ දෑස් විසල් වූයේ "තව මොනවාද?"

ෂෙන් ච්‍යාඕ සිනාසෙමින්, “දැන් වගේ කරදරකාරී කාලවල් ඇත්ත වශයෙන්ම බොහෝ අවස්ථාවලදී තිබෙනවා. ඔබේ කෝපය නිසා, ඔබ හමුදාවට බැඳුනහොත්, අනාගතයේදී ඔබට විශාල ජයග්‍රහණ පවා අත්කර ගැනීමට හැකි වනු ඇති."

චෙන් ගොං ඇසුවේ, "ඔබ මේ සියල්ල තේරුම් ගත්තේ කෙසේද?"

ෂෙන් ච්‍යාඕ පැහැදිලි කළේ ය,“ඔබට දේශීය උච්චාරණයක් තිබෙන්නේ. එබැවින් ඔබ සාගතය නිසා වෙනත් ස්ථානයකින් මෙහි පැමිණි සරණාගතයෙකු විය නොහැකියි.

ඔබේ පවුලට යමක් සිදු වුවහොත් මිස, නැතිනම් ප්‍රදේශවාසීන් සියලු දෙනාටම සාමාන්‍යයෙන් නිවාස තිබෙනවා. ඔබගේ ගතිගුණ සලකන විට මම දැන් පවසපු තත්වය නිසා ඔබගෙ ගෙදර අයත් සමඟ ඔබ විරසක වෙන්න ඇති. නමුත් ඔබ ඔබේ පවුලේ අය සමඟ අමනාප වී සිටියත්, ඔබේ ජීව විද්‍යාත්මක පියා හෝ මව තවමත් සිටින්නේ නම්, ඔවුන්ට ඔබව සුළඟට සහ වැස්සට එළිමහනේ අතරමං වන අයුරු දෙස බලා සිටින්න හැකි වනු ඇතැයි සිතිය නොහැකියි. ඒ නිසා ඔබේ පියා කෲර සුළු මවක් විවාහ කර ගැනීම හෝ ඔබ තරුණ වියේදීම ඔබේ දෙමාපියන් දෙදෙනාම මිය ගොස් තිබීම සිදු වන්නට ඇති."

ෂෙන් ච්‍යාඕ ඉවසීමෙන් යුක්තව තර්ක එකින් එක විස්තර කරනු අසා සිටි චෙන් ගොංට අවසානයේදී තරමක් වැටහුණි.

ඔහු නැවතත් ඇසුවේ, “එසේ නම්, හමුදාවේ සේවය කිරීමෙන් මට යමක් කළ හැකි බව ඔබ පැවසුවේ කෙසේද?”

ෂෙන් ච්‍යාඕ පැවසුවේ, “ඔබේ සුළු මවගෙන් හිරිහැර විඳීමට ඔබට නොහැකියි. එබැවින් අමනාපයෙන් නිවසින්  නිවසින් පිට වුණු ඔබ මෙහි ජීවත් වීමට තීරණය කළා. අනෙක් කාරණය, ඔබ ඊයේ රාත්‍රියේ බූරු මස් බර්ගර් එකක් වෙනුවෙන් හිඟන්නන් සමඟ රණ්ඩු උනා. ඔබ අන් අයට මෙන්ම ඔබටත් අනුකම්පා විරහිත කෙනෙක් බව පැහැදිලියි. මෙවැනි කෝපයක් ඇති නිසා, ඔබට හමුදා පරිසරයට හොඳින් අනුගත වීමට හැකි විය යුතුයි." 

චෙන් ගොං කෑ ගසමින්, “ඉතින්, ඔබ මා වැනි අය දෙස පහත් කොට බලනවාද? බඩ පුරවගන්න බැරි මම වගේ අය ඔබලාව මංකොල්ලකන්න කොහොමත් සැලසුම් කරනවා. ඔබට මාව පේන්නේ විහිළුවක් ලෙසද!”

ෂෙන් ච්‍යාඕ සිනාසෙමින්, “මමත් මේ වගේ අවාසනාවන්ත දේවල් අත්විඳලා තිබෙනවා. මම කෙසේද අනෙක් මිනිස්සුන්ට විහිළු කරන්නේ? ඔබ දැන් මගෙන් ඇහුවේ නැද්ද අනාවැකි පැවසීම ගැන? ඔබ ගැන පැහැදිලි කිරීමට උදාහරණයක් ලෙසයි මම එය භාවිතා කළේ.  එය තරමක් නිවැරදියි, එසේ නේද? එයින් විශාල මුදලක් උපයන්න බැරි වුණත් අඩුම තරමින් කෑම වේලක් සඳහාවත් මුදලක් උපයාගැනීමට එය ප්‍රමාණවත්.”

චෙන් ගොං පැවසුවේ, “ඔබ සෑම දෙයක් ගැනම දන්නවානම් ඇයි ඔබ තවමත් මෙතරම් පහත් තත්වයක සිටින්නේ?අතරමඟදී කොල්ලකරුවන් ඔබගේ භාණ්ඩ සොරකම් කළාද?"

ෂෙන් ච්‍යාඕ පිළිතුරු දුන්නේ, “මට එය ගැන මතකයක් නොමැති නිසා ඔබට එලෙස පැවසිය හැකියි. සමහර අවස්ථාවල මගේ මොළය හොඳින් ක්‍රියා කළත්, තවත් අවස්ථාවල එතරම් හොඳ නැහැ. බොහෝ දේවල් මට පෙනෙන්නේ අපැහැදිලි මතකයන් ලෙස පමණයි. වාසනාවකට ඔබ මට මෙහි සිටීමට ඉඩ දුන්නා. එසේ නොමැතිනම් මේ රාත්‍රීන් ගත කරන්නේ කොහේදැයි මම දන්නෙ නැහැ. ඇත්තෙන්ම, මම ඒ සඳහා ඔබට බොහෝ ස්තුතිවන්ත විය යුතුයි! ”

එවැනි ප්‍රශංසා කිරීමකින් පසු, චෙන් ගොංට වඩා හොඳ හැඟීමක් ඇති වූයේ, තමාට ලැබුණු බූරු මස් බර්ගර් තුන පවා ඔහු වෙනුවෙන් කළ දේ සමඟ සැසඳූ කළ සාමාන්‍ය දෙයක් බවට පත් කරමිනි. ඔහුට සිතුනේ ඔහු සැබවින්ම ෂෙන් ච්‍යාඕව ආරක්ෂා කළ බවයි.

“හොඳයි, හෙටටත් බර්ගර් තුනක්! මාත් එක්ක මෙපමණ වෙලා කතා කරමින් හිටියට ඔබට එයින් ගැලවෙන්න පුළුවන් වෙයි කියලා හිතන්න එපා!”

"හරි."

පසුදා සවස චෙන් ගොං නැවතත් අබලන් වූ පන්සලට පැමිණි විට දකින්නට ලැබුණේ පෙර දින මෙන්ම තබා තිබුණු බූරු මස් බර්ගර් තුනකි. අනෙක් පස සිටි ෂෙන් ච්‍යාඕගේ අතේ පවා එකක් තිබුණි. ඔහු එය අනුභව කරමින් සිටියේ බූරු මස් බර්ගර් එකකට වඩා විදේශීය ප්‍රණීත ආහාරයක් අනුභව කරන ආකාරයකිනි.

'මොනතරම් හැකියාවක්ද!' කැරලිකාර වයසේ සිටි චෙන් ගොංට ඔහුගේ මනසසෙහි කැළඹීමක් ඇති නොකරගෙන සිටීමට අපහසු විය. ඔහු කඩදාසි එතුම විවෘත කිරීමට හිස හරවා ගත් අතර, පසුව දරුණු ලෙස එය ආහාරයට ගන්නට විය.

ඊට පසුදා සවස ද චෙන් ගොං පැමිණි විට කලින් පරිදිම බර්ගර් තුනක් දක්නට ලැබුණි. චෙන් ගොං විසින් අසන ලද සෑම ප්‍රශ්නයකටම ෂෙන් ච්‍යාඕ පිළිතුරු සැපයූ අතර ඉතා හොඳ කෝපයක් තිබුණු චෙන් ගොං හට පවා ඔහුත් සමඟ සංවාදයෙන් කෝපයක් ඇති කළ හැකි දෙයක් සොයාගැනීමට නොහැකි වූ අතර, එම සංවාද ඔහුට වැටහුණේද නැත.අනෙක් පුද්ගලයා පැවසූ දෙය ඔහුට නොතේරෙන දෙයක් වූ නිසා ඔහුගේ රුදුරුකම සහ හිරිහැර කිරීම් ෂෙන් ච්‍යාඕ කෙරෙහි නිෂ්ඵල දෙයක් විය. ෂෙන් ච්‍යාඕට බලය පෙන්වීම පුළුන් ගොඩකට ගැසුවාක් මෙන් විය. එයින් ලැජ්ජාවට පත් වූයේ ඔහුම ය.

ෂෙන් ච්‍යාඕ සරල මිනිසෙක් නොවන බව ඔහුගේ බුද්ධිය ඔහුට පැවසුවේ ඔහුගේ ඇඳුම් නිසා පමණක් නොව, මේ කාලය පුරාම පිරිසිදුව හා පිළිවෙලට තිබූ ඔහුගේ මෘදු හා දුර්වල පෙනුම නිසා ෂෙන් ච්‍යාඕ බොහෝ විද්වතුන්ට සමාන විය. ඔහුව තේරුම් ගැනීම දුෂ්කර, අපැහැදිලි හැඟීමක් ජනිත කළේ ය.

දෙදෙනාටම මේ ජරාජීර්ණ පන්සල් සෙවණේ එකට ජිවත් වීමට සිදු වුනත් චෙන් ගොංට දැනුණේ අනෙක් කෙනා ඉදිරිපිටදී තමන් පහත් වැනි හැඟීමකි.

චෙන් ගොං මෙම හැඟීමට කැමති වූයේ නැත. එබැවින් ඔහු ෂෙන් ච්‍යාඕටද කැමති නොවීය.

මෙම ස්ථානය රාත්‍රියේදී අධික ශීතල වූ අතර එහි සෑම පැත්තකින්ම සුළං හමා ආවේ ය. ජීවතුන් අතර සිටින මිනිසුන් දෙදෙනා හැරෙන්නට, මෙහි විශාලතම ජනගහනය මීයන් විය හැකියි. ඔහුගේ පාවහන් දිරා ගොස් ඇති නිසා මීයෙක් ඔහුගේ ඇඟිල්ල සපා කන්නට ඇත. චෙන් ගොං "අයියෝ!" යනුවෙන් කෑගැසුවේය. නමුත්, මීයෙකු කෙරෙහි පමණ කෝපය පිට කිරීමට නැගිටීමට අකමැති වූ ඔහු තව තවත් තදින් ගුලි විය.

විසිල් ගසනවාක් මෙන් හමන සුළඟට අමතරව පිටතින් අඩි ශබ්දයක් ද ඇසෙන්නට වූයේ මේ අතරතුරයි.

එහෙත් මෙවැනි සුලං ඇති රැයක මේ වගේ ජරාජීර්ණ තැනකට පැමිණෙන්නේ කවුද?

චෙන් ගොං නිද්‍රාශීලී වීමට ආසන්නව සිටියදී හදිසියේම ෂෙන් ච්‍යාඕගේ කටහඬ ඇසුණි: “කවුරුහරි එනවා."

ඔහු දෑස් විවර කරන විට ඔහු දුටුවේ, පොලු මුගුරු සහ සැරයටි අතැතිව හොර රහසේ ලිස්සා යන රූප කිහිපයකි. ප්‍රමුඛයන් දෙදෙනා ඉතා හුරුපුරුදු බවක් පෙනෙන්නට තිබුණි. ඔහු ඔවුන් දෙස නැවතත් හොඳින් බැලුවේ ය. එවිට ඔහුගේ දර්ශනය පැහැදිලි විය. ප්‍රමුඛත්වය ගෙන පැමිණියේ පසුගිය දිනක ඔහුත් සමඟ සටන් කළ යාචකයින් දෙදෙනා ය.

චෙන් ගොංගේ සිරුර හරහා වෙව්ලීමක් දිව ගිය අතර එය ක්ෂණිකව ඔහුව සම්පූර්ණයෙන්ම අවදි කළේය. ඔහු ඉක්මනින් දෙපයින් නැඟිට: "ඔහේට මොනවද ඕනෙ?!"

ඔවුන්ගෙන් එක් අයෙක් සිනාසෙමින්, “වැඩිමහල් චෙන්,ආහ්.. හහ්..

වැඩිමහල් චෙන්..ඔබ එදා අපිව එළියට දානකොට තිබුණු උඩඟුකම තවමත් තිබෙනවාද? අද අපි නගරයේ යාචක නිකායේ සහෝදරයන්ට කතා කළා.. තවමත් ඔබ අහංකාර ලෙස ක්‍රියා කරන්න එඩිතරද කියලා බලමු! ”

චෙන් ගොං බිමට කෙළ ගැසුවේ ය.“මොන යාචක නිකායද?! යාචකයින් පිරිසක් එකට ගැවසුණ පළියට එය යාචක නිකාය ලෙස හඳුන්වන්න තරම් ඔබ ලැජ්ජාශීලීද? ”

අනෙක් පුද්ගලයා කෝපයෙන් කෑගැසුවේය, “තමුන් මරණයේ දොරකඩදි පවා කතා කරනවාද? පසුව, සමාව ඉල්ලන්න එපා! සහෝදරවරුනි, මේ අවජාතකයා තමයි අපේ තැන ගත්තේ! මෙතන තව අලුත් එකෙකුත් ඉන්නවා.ඔහු ළඟ මුදල් තිබෙනවා. අපි ඔවුන්ව එකට ගෙන ගොස්, ඔවුන්ගේ දේවල් එකතු කරගෙන, ඒවා සෑම කෙනෙකුම සමානව බෙදාගමු!”

බැලූ බැල්මට වුවද, චෙන් ගොං සතුව පැහැදිලිවම සතයක්වත් තිබුණේ නැත. ඔහු ළඟ මුදල් තිබුනේ නම්, එය බොහෝ විට බනිස් කිහිපයකට පමණක් ප්‍රමාණවත් විය හැකිය. කෙසේ වෙතත්, අනෙක් පුද්ගලයා වෙනස් විය. ඔහුගේ ඇඳුම් කෙතරම් පිරිසිදු හා පිළිවෙලට පෙනුණේද යත් එම ඇඳුම් පමණක්, ඔහුගෙන් ඉරා ගන්නට හැකි වුවහොත් ඒවා අඩුම තරමින් තඹ දුසිම් ගණනකටවත් අලෙවි වනු ඇත.

රූප පහක් හයක් එකවරම චෙන් ගොං වෙතට කඩා වැදුණි. චෙන් ගොංට කුරිරු බලයක් සහ නිර්දය ධෛර්යයක් තිබුණද, ඔහු තවමත් විස්සට අඩු නව යොවුන් වියේ පිරිමි ළමයෙකු වූ අතර, ඔහු ශරීරය අතින්ද විශාල පුද්ගලයෙකු නොවී ය. අනෙක් පාර්ශවය සතුව සිටි පුද්ගලයින් සංඛ්‍යාව වඩා විශාල වූ අතර, ඔහුගේ මුහුණට මෙන්ම ශරීරයටද දැඩි පහරවල් එල්ල කරමින් වචන හුවමාරු කිහිපයකින් පසු ඔහුව බිම හෙළන්නට ඔවුන් සමත් විය. ඔහුගේ ජීවිතය නැති කිරීමට අදහසක් නොතිබුණද, ඔවුන් තවමත් මුළු ශක්තියෙන්ම ඔහුට පහර දෙමින් සිටියේ චෙන් ගොංගේ කට කොනකින් පවා ලේ ගලාගෙන යන අතරතුරදී ය. ශරීරයේ අවදානමට ලක්විය හැකි කොටස් ඔවුන්ගේ ප්‍රහාරවලින් හැකිතාක් ආරක්ෂා කර ගැනීමට උත්සාහ කිරීම හැර වෙනත් විකල්පයක් ඔහු සතුව ඉතිරි වී නොතිබුණි.

යාචකයෝ ම්ලේච්ඡ ලෙස චෙන් ගොංගේ ඇඳුම් සම්පූර්ණයෙන්ම සෝදිසි කළත් අවසානයේදී සොයා  ගත හැකි වූයේ වෙන් [1]  තිහක් පමණි. ඔවුන්ගෙන් එක් අයෙක් කෙළ ගසා මැසිවිලි නඟමින්, “මොන අවාසනාවක්ද! ඔහු එතරම් දුප්පත් කෙනෙක්ද! වැඩිමහල් ලායි, ඔහුට අඩුම තරමින් වෙන් පනහක්වත් ඇතැයි ඔබ කිව්වා නේද?

වැඩිමහල් ලායි සමාව අයැද සිනාසෙමින්, “සමහරවිට ඔහු ඒ සියල්ල වියදම් කරන්න ඇති නේද? බලන්න, තව කෙනෙක් අතන ඉන්නවා නේද?”

සියල්ලෝම ෂෙන් ච්‍යාඕ දෙසට දෑස් යොමු කළ අතර ඔහු තවමත් නිහඬව වාඩි වී සිටිනු දුටුවේය. උණ බම්බු ලීයක් අතේ තබාගෙන සිටි ඔහු කිසිසේත් නොසෙල්වී සිටියේ බියෙන් තොර වූවාක් මෙනි.

එක් පුද්ගලයෙක් සැක සහිත ලෙස ඇසුවේ, "ඔහුගේ දෑස්වල යම්කිසි වැරැද්දක් ඇති බවක් මට පෙනෙන්නේ කෙසේද? ඔහු අන්ධයිද? ”

ඔහුට සිටි මිනිසුන් ගණන මත විශ්වාසය තබමින්, වැඩිමහල් ලායි ෂෙන් ච්‍යාඕට කෑගැසුවේ, “ඒයි! මට ඔහේගෙ මුදල් දෙනවා! අපි, ඔබේ වැඩිමහල්ලෝ. පහර දීමකින් තොරව ඔහේව ගලවගන්න පුලුවන්! ඔහේට මාව ඇහෙනවාද?"

ෂෙන් ච්‍යාඕ ඔහුගේ හිස අතගාමින්, “මම මගේ සියලු මුදල් උපයා ගත්තේ වෙහෙස මහන්සි වී වැඩ කිරීමෙන්.මට එය ඔබට දීමට නොහැකියි.”

වැඩිමහල් ලායි, “ඔහෝ? ඔහේට එච්චර හයියක් තියෙනවද! කමක් නෑ එහෙනම් ඔහේ ළඟම තියාගන්නවා! ඔහේ දවස් දෙකකට පෙරත් අපිට බූරු මස් බර්ගර් එකක්වත් දුන්නේ නැහැ. අද, ඔහේගෙ වැඩිමහල්ලා එයට ගෙවිය යුතු මුදල් ලබා දෙයි! ”

ඔවුන් චෙන් ගොංට කළාක් මෙන්, එකට එක්ව ෂෙන් ච්‍යාඕ වෙත පහර දෙන්නට සූදානම් වූහ.

ඔවුන් මේ දුර්වල පෙනුමක් ඇති විද්වතාව කිසිසේත් බැරෑරුම් ලෙස සැලකුවේ නැත.

වැඩිමහල් ලායි වේගවත්ම පුද්ගලයා විය. අනෙක් අතින් තම ප්‍රතිවාදියාගේ සළුවේ දාරය අල්ලා ගැනීමට උත්සාහ කරන අතරතුර ඔහු ඉතිරි අතින් කෙලින්ම ෂෙන් ච්‍යාඕගේ මුහුණට පහර දුන්නේය.

ඔහුගේ ඉරියව්ව අනුව, හස්තය මගින් ඔහුට පහර දිය යුතු අතර, ඔහුගේ ප්‍රතිවාදියා පසුපසට වීසි වී බිමට පෙරළී යා යුතුය. එවිට ඔහුට අනෙක් පුද්ගලයා මත මත හිඳ ගත හැකි විය යුතුය.

එහෙත් සිදු වූයේ කිසිසේත්ම බලාපොරොත්තු නොවූ දෙයකි. ඔහුගේ මැණික් කටුවෙන් හදිසියේම දරුණු වේදනාවක් පිට විය!

සිදුවූයේ කුමක්දැයි වටහා ගැනීමට පෙර, ඔහුගේ ඉණට නැවත වරක් පහර වැදී, අනිච්ඡානුගව ඔහු පැත්තකට වැටුනේ ඔහු අසල සිටි තවත් අයෙකුගේ සිරුරේ ගැටීමෙන් පසුව ය. දෙදෙනාම එකිනෙකාගේ සිරුරුවල ගැටීම හේතුවෙන් පාලනය නැති වූ දෙදෙනාම එකවර බිම ඇද වැටුනේ සිදුවූයේ කුමක්දැයි සිතාගැනිමටවත් කාලයක් ඉතිරි නොකරමිනි.

අබලන් වූ පන්සල තුළ ආලෝකයක් තිබුණේ නැත. මෙවැනි සුළං සහිත රාත්‍රියක, සඳ නොපැහැදිලි ලෙස දිස් වූයේ එය විටින් විට වලාකුළු තට්ටුවලින් වැසී ගිය නිසාවෙනි.

වැඩිමහල් ලායි බිම වැටුණු ආකාරය කිසිවෙකුට පැහැදිලිව දැකගත නොහැකි වූ අතර, ඒ නිසා ඔවුන් කිසිවෙක් ඔවුන්ගේ වේගවත් ගමන නතර කළේ ද නැත. ඔවුන් තවමත් ෂෙන් ච්‍යාඕ වෙතට දුවමින් සිටියේ ප්‍රහාරයක් දියත් කිරීමට ය.

එහෙත්, පහර කිහිපයක් ඇතුළත, තවත් කිහිප දෙනෙක් එකින් එක බිමට වැටුණේ කපා හෙලූ ගස් මෙන් ය.

"මේ මොන විජ්ජාවක්ද?" වැඩිමහල් ලායි අත්හැරීමට කැමති වූයේ නැත. ඔහු තම සමබරතාවය යථා තත්ත්වයට පත් කරගනිමින් කෑගසමින් ෂෙන් ච්‍යාඕ මතට නැවත කඩා පැනීමට උත්සාහ කළේය.

ෂෙන් ච්‍යාඕගේ දෑස් තරමක් සෙමින් යථා තත්ත්වයට පත් විය. රාත්‍රියේදී, ආලෝකය අඳුරු වූ විට, ඔහුට පෙනෙන්නේ නොපැහැදිලි සෙවනැල්ලක් පමණි.

නොසැලකිලිමත් මොහොතක, වැඩිමහල් ලායි විසින් ඔහුව බිමට තල්ලු කොට තිබුණි. පහරක් වහාම ඔහුගේ පපුව මත පතිත වූ අතර, එහි වේදනාව, සීතල වාතය තියුණු ලෙස ලබා ගැනීමට හේතු විය.

එකම එක පහරකින් බිමට ඇද දැමූ වැඩිමහල් ලායි කෙලින්ම ගියේ ෂෙන් ච්‍යාඕගේ අතේ තිබූ උණ බම්බු ලීය ගැනීමටයි. කෙසේ වෙතත්, ඔහුගේ ඉණ හදිසියේම හිරිවැටී ගියේය.

අනෙක් පුද්ගලයාගේ උණ බම්බු සැරමිටිය ඔහු වෙතට ඇදී ආවේ විදුලි වේගයෙනි. එය සරල ලෙස පෙනුනද, ඔහු අත දිගු කරන විට ඔහුට එය අල්ලා ගැනීමට නොහැකි වූ අතර, අවසානයේ ඔහුගේ නාසයේ පාලම මත තදින් ඇණ ඇත. වේදනාවෙන් හඬන්නට වූ ඔහු අත් දෙකෙන්ම නාසය වසාගෙන පැත්තකට ඇද වැටුණි.ඔහුගේ නාසයෙන් ගලා ආ ලේ ඔහුගේ ඇඟිලි අතරින් ගලා ගියේය.

මෙය මෙතරම් පෙරළියක් කරාවි යැයි කිසිවකුත් බලාපොරොත්තු වන්නට නැත. ෂෙන් ච්‍යාඕ තම උණ බම්බු ලීයෙන් තනිවම එහෙට මෙහෙට පහර දෙමින් සිටියේය.ඔහුගේ චලනයන් සම්පූර්ණයෙන්ම අහඹු ලෙස පෙනුනද, යාචකයන්ට ඔහු අසලට පැමිණීමටවත් නොහැකි විය. ඒ වෙනුවට, ඔවුන් ඉක්මනින්ම ෂෙන් ච්‍යාඕගේ ප්‍රහාරයන්ට ගොදුරු වූයේ පන්සල පුරා විලාප හඬවල් සෑම පැත්තකින්ම දෝංකාර දෙන විටදී ය.

ෂෙන් ච්‍යාඕ සීතලෙන් පැවසුවේ, “මම දැනටමත් ඔබ සැමට කාරුණික වෙලා ඉන්නේ. නමුත් ඔබලා තවමත් පිටව යන්නේ නැහැ. මම ඔබේ ඇස්වලට අනිනකම්ද ඔබ බලා සිටින්නේ? එවිට ඔබලාත් මා මෙන් අන්ධ වනු ඇති."

ඔහුගේ කටහඬ පිහාටුවක් මෙන් සැහැල්ලූ වුවත්, සුළඟේ හඩ මධ්‍යයේ, එය අවතාරයකින් පැමිණෙනවාක් මෙන්, නැඟුණු බිහිසුණු හඬක් විය.

වැඩිමහල් ලායි සහ අනෙක් අය තවදුරටත් එහි සිටීමට එඩිතර වූයේ නැත. ඔවුන් දෙපයින් නැගිට වහාම පිටතට දිව ගියේ පසුපසවත් නොබලමිනි. මෙවර, ඔවුන් කිසිදු රුදුරු වෙන්වීමේ ප්‍රහාරයක් පවා කිරීමට එඩිතර වූයේ නැත. භීතියෙන් කලිසම තෙත් කරගත් ඔවුහු සැණෙකින් අතුරුදන් වූයේ හිරු දුටු පිණි මෙන් ය.

"ඔබ ඔවුන්ගේ ඇස්වලට පිහියෙන් ඇන ඔවුන් අන්ධ කළ යුතුයි!" චෙන් ගොං අමනාපයෙන් මැසිවිලි නඟමින්, “එවැනි මිනිසුන්ට ආචාරශීලී වීමට අවශ්‍ය නැහැ!”

ෂෙන් ච්‍යාඕ උණ බම්බු සැරමිටියෙන් තමාටම සහය වෙමින් සිටි අතර ප්‍රතිචාර නොදැක්වීය. ඔහු සැහැල්ලුවෙන් හුස්ම ගන්නාක් මෙන් ඔහුගේ උරහිස් ඉහළට හා පහළට චලනය වන බව කෙනෙකුට නොපැහැදිලි ලෙස දැකගත හැකි විය.

මේ මොහොතේ චෙන් ගොංට අවබෝධ වී තිබුණේ, ෂෙන් ච්‍යාඕට එම යාචකයින් සියල්ලන් සමඟ සටන් කිරීමට පවා හැකි වූ බැවින්, තමා ඔහුත් සමඟ සසඳන විට අල්පෙනිත්තක් තරම්වත් හැකියාවක් තමා සතුව නොමැති බවයි.

වාසනාවකට මෙන්, අනෙකා මෙයට පෙර එය පෙන්වා, ඒ ගැන පවසමින් නියෝග ලබා දී කරදර කළේ නැත, එසේ නොවේ නම් ...

මේ සිතිවිලි වලින් පසුව ඔහුට මද භීතියක් ඇති වූ අතර, ඔහු කතා කරන විට ඔහුගේ ස්වරය පවා ආචාරශීලී විය. ම්ම්, ෂෙන් ච්‍යාඕ? ෂෙන් මහත්මයා? ජ්‍යෙෂ්ඨ ෂෙන්?"

වචන පවසා අවසන් වෙනවාත් සමඟම ඔහු දුටුවේ, එකවරම පිටුපස තිබු කණුව දිගේ ලිස්සා ගොස් බිම ඇද වැටුණු ෂෙන් ච්‍යාඕව ය.

“…”

පරිවර්තකගේ සටහන්:

[1]  වෙන් (文) :  මුදල් ඒකකය, පෙරදී සඳහන් කළ තඹ.

පෙර පරිච්ඡේදය | සියලු පරිච්ඡේද | මීළඟ පරිච්ඡේදය