සිව්වන පරිච්ඡේදය | ෂෙන් ච්‍යාඕගේ ත්‍රි අංක දැක්ම [1] ලකුණු 100ක විවේචනාත්මක පහරක් ලැබීය.

ෂෙන්ග්‍යාන් ෂෙන් චියාඕව පිටතට රැගෙන ආවත් ඔහු ඔවුන්ගේ ගමනේ අරමුණ ගැන තවමත් ඔහුට පැහැදිලි කොට තිබුණේ නැත.

චී රටේ අගනුවර වන යේ නගරය සහ ෆනින් නගරය අතර බොහෝ දුරක් නොවීය. යූ ෂෙන්ග්යාන්ගේ වේගයත් සමඟ ඔහුට දින තුනක් වැනි කෙටි කාලයකින් එහි යාමට හැකි විය. නමුත් ෂෙන් චියාඕගේ තත්වය සැලකිල්ලට ගත් ඔහු හිතාමතාම වේගය අඩු කර දින හතකින් යේ නගරය වෙත පැමිණියේය.

නමුත් ඔවුන් කෙතරම් සෙමින් ගමන් කළද, ෂෙන් ච්‍යාඕගේ ශරීරයේ වර්තමාන තත්ත්වය තවමත් එතරම් දිගු හා දුෂ්කර ගමනකට ඔරොත්තු දුන්නේ නැත. ඔවුන් යේ නගරයට පැමිණි විගස, ඔහු උණක් වැළඳී රෝගාතුර විය.

පවිත්‍ර චන්ද්‍ර නිකායේ ගෝලයන් ස්වල්ප දෙනෙක් සිටියත් ඔවුන්ට මුදල්වලින් කිසිම අඩුපාඩුවක් තිබුණේ නැත. එබැවින් යූ ෂෙන්ග්‍යාන්ට සහ ෂෙන් ච්‍යාඕට නැවතී සිටීමට යේ නගරයේ වාසස්ථානයක් දැනටමත් තිබුණි. එම නිවසෙහි හිමිකරු වූයේ යැන් වුෂි ය. එබැවින් සේවකයෝ යූ ෂෙන්ග්යාන්ව සහ ෂෙන් ච්‍යාඕව දුටු විට ඔවුන්ට තරුණ ස්වාමිවරුන් ලෙස ආමන්ත්‍රණය කළ අතර ඔවුන්ට අවශ්‍ය සියල්ල ලබා දෙමින් හොඳින් සංග්‍රහ කටයුතු සිදු කළහ.

ගමන පුරාවටම ෂෙන් ච්‍යාඕ සිටියේ ඉතා නිහඬවයි. ඔහු, යූ ෂෙන්ග්‍යාන් ඇවිදින ලෙස ඉල්ලා සිටියොත් ඇවිදිමින් ද, නවතින ලෙස පැවසුවොත් නවතිමින් ද කීකරු ලෙස ගමන් කළේය. ඔහුගේ අසනීපය ගැන පවා ඔහු වචනයක්වත් කීවේ නැත. යූ ෂෙන්ග්‍යාන් එය සොයාගන්නා තුරුම ඔහු නිහඬ පිළිවෙත අනුගමනය කරමින් සංවර ලෙස සිටියේය. යූ ෂෙන්ග්‍යාන් ඒ ගැන ඇසූ විට, ෂෙන් ච්‍යාඕ සිනාසුණේය, “මම දන්නවා ජ්‍යෙෂ්ඨ සටන් සහෝදරයාගේ මෙවර ගමනේ අරමුණ ගුරුතුමාගේ කාර්යයක් කියලා. මගේ ආබාධිත ශරීරය නිසා, මට උදව් කිරීමට නොහැකි වීම ගැන මම දැනටමත් ඉන්නේ වරදකාරී හැඟීමෙන්. මම කොහොමද ජ්‍යෙෂ්ඨ සටන් සහෝදරයාට තවත් කරදර කරන්නේ?”

ඔහු මෙම වචන පවසන විට ඔහුගේ මුහුණ සීතල වී සුදුමැලි වී තිබුණි. නමුත් ඒ මත මෘදු සිනහවක් රැඳී තිබුණු නිසා එයින් ඔහුට තරමක් අනුකම්පාසහගත පෙනුමක් ආරෝපණය වී තිබුණි.නමුත් එක්වරම එහි සුන්දර බවක්ද පෙනෙන්නට විය.

ඇත්ත වශයෙන්ම, යූ ෂෙන්ග්‍යාන් යනු යැන් වුෂි නොවේ. එය ඔහුට තිබූ දුර්ලභ ගුණයක් වුවද ඔහුගේ හදවත තවමත් තරමක් මෘදු විය.

“ඔබට අසනීපයක් දැනුනොත් මට කියන්න. ගුරුතුමා පවරන ලද කාර්යය අවසන් කිරීමට අප තවමත් වග බලා ගත යුතු වුවත් මම අසාධාරණ පුද්ගලයෙක් නොවෙයි. අපිට පවරපු කාර්යය ගැන මම දැනටමත් විමසලා ඉවරයි. යාන් ෂිවන්, සමඟි නිකායේ ගෝලයෙක් වුනත් ඔහුගේ බිරිඳ සහ දරුවන් සටන් කලා ගැන කිසිවක් දන්නේ නැහැ. අනෙක් කාරණය, යාන් ‍ෂිවන් නිකායේ සිටින දෙවන මට්ටමේ විශේෂඥයෙක් පමණයි.ඊට අමතරව, යාන් පවුල අනාරක්ෂිතයි. එබැවින් මට එය තනිවම අවසන් කළ හැකියි. කෙසේ වෙතත්, ගුරුතුමාට ඔහුගේ මුළු පවුලම නැති කිරීමට අවශ්‍ය වූ නිසා කාලය පැමිණි විට මම ඔබව මා සමඟ රැගෙන යන්නම්. මම යාන් ෂිවන්ව මරණයට පත් කළාට පසු, ඔබට අවසන් කිරීමට හැකි ගැහැනියක් හෝ දරුවෙක් ඔබ වෙත එවන්නම්.”

යැන් වුෂි පවරන ලද සැබෑ කාර්යය ගැන ෂෙන් ච්‍යාඕට පැවසූ පළමු අවස්ථාව මෙය විය. ඔහු පුදුමයෙන් බලා සිටියේය. “මට දැනගන්න පුළුවන්ද ජ්‍යෙෂ්ඨ සටන් සහෝදරයා,  සමඟි නිකායේ ඉතිහාසය ගැන? යාන් ෂිවෙන් කෙරෙහි අපට ඇති අමනාපය කුමක්ද? "

ෂෙන් ච්‍යාඕ තවමත් කිසිවක් නොදන්නා බව යූ ෂෙන්ග්‍යාන්ට සිහිපත් විය. එබැවින් ඔහු ඔහුට පැහැදිලි කළේය, “අපගේ පවිත්‍ර චන්ද්‍ර නිකාය, සමඟි නිකාය සහ කලා කැඩපත යන සියලුම නිකායන් ආරම්භ වුණේ ෆීනික්ස්-චිලින් දූපතේ සූර්ය සඳ නිකායෙන්. පසුව සූර්ය සඳ නිකාය අසමගිය නිසා වෙන් වෙලා මෙම නිකායන් තුනට බෙදී ගියා. 

අපි සියලු දෙනාටම එකම මූලයක් තිබෙන නිසා ශුද්ධ වූ නිකාය [2]නැවත එක් කිරීමට අවශ්‍ය වූයේ නම්, වෙනත් බලවේගයන්ට එරෙහිව අපි එකා මෙන්ව එක්සත් විය යුතුයි. අපේම සීමාවන් යටතේ සිටියත් සමගි නිකාය වඩාත් අභිලාෂකාමී එකක් විය. ඔවුන්ගේ නායිකාව යුවාන් ෂුෂු. එහි සිටින ගෝලයන්ද ඇය හා සමානයි: ඔවුන් සියල්ලෝම ඔවුන්ගේ අලංකාරය, ඔවුන්ගේ අරමුණු සාක්ෂාත් කර ගැනීම සඳහා මාධ්‍යයක් ලෙස භාවිතා කිරීමට කැමති අය. කොහොම වුනත්, ඔවුන්ගේ සටන් කුසලතා හොඳයි, එබැවින් ඔබට අනාගතයේදී ඔවුන්ව හමු වුණොත්, ඈත් වෙලා ඉන්න එක ඇඟට ගුණයි."

“යුආන් ෂුෂුට, සැන් ජින්ෂින් නමින් සල්ලාලයෙක් ඉන්නවා. ඔහු වරක් කුයි යූවන්ගේ ගෝලයෙක්. මේ ලැජ්ජාවක් නැති වේශ්‍යාව සහ ඇය ජරා අපරාධයේ හවුල් කරුවෝ. දවස පුරාම එහෙට මෙහෙට පනිමින් කපටිකම් කරනවා. මේ ගෙවී ගිය දස වසර තුළ ගුරුතුමා භාවනාවේ සිටින අවස්ථාවෙන් ප්‍රයෝජන ගනිමින්, අපගේ පවිත්‍ර චන්ද්‍ර නිකාය අත් කර ගැනීමට ඔවුන් කිහිප වතාවක්ම උත්සාහ කළා."

ෂෙන් ච්‍යාඕ හිස සැලුවේ ය: “නමුත් යාන් ෂිවන් යනු සමඟි නිකායේ සිටින දෙවන මට්ටමේ ප්‍රධානියෙකු පමණයි. ඔහු චී රාජ්‍යයේ නිලධාරියෙකු ලෙසද සේවය කරන නිසා, කිසිවිටෙකත් පවිත්‍ර චන්ද්‍ර නිකායට කරදරයක් කර නැතැයි මම අනුමාන කරමි. ගුරුතුමා ඇයි ඔහුව මරන්න තීරණය කළේ?"

ඔහුගේ මුහුණේ සිහින් සිනහවකින් යූ ෂෙන්ග්‍යාන් පැවසුවේ, “කනිෂ්ඨ සටන් සහෝදරයා, ඔබට තුවාල වූ පසු ඔබ කුඩා සුදු හාවෙක් වගේ වෙලා! යාන් ෂිවන්ගේ තත්වය තරමක් විශේෂයි. ඔහු චීවල නිලධාරියෙක් නිසා, ඔහු සැබවින්ම සමගි නිකායට අයත් බව දන්නේ ඉතා සුළු පිරිසක් පමණයි. අපි ඔහුව මරා දැමුවොත්, ඔහුගේ මරණය නිසා අපේ සතුරන් බියගන්වන්න පුලුවන්. දෙවනුව, සමගි නිකාය ඔවුන් ගැන සෑම දෙයක්ම දන්නා බව වටහා ගත් පසු, ඔවුන් නැවත කරදරයක් කිරීමට තරම් එඩිතර වෙන්නේ නැහැ. තෙවනුව,ගුරුතුමා නොසිටි කාලයේදී ඔවුන් අපට බොහෝ කරදර ඇති කළා; දැන් ගුරුතුමා නැවත පැමිණි නිසා අපි ඔවුන්ට පාඩමක් ඉගැන්වූයේ නැත්නම්, පවිත්‍ර චන්ද්‍ර නිකාය වැරැදිකරුවන්ට ගැලවෙන්න පහසු නිකායක්යැයි අන් අය සිතන්නේ නැද්ද? එකල, කුයි යූවන්ගේ මරණයෙන් පසුව, පවිත්‍ර චන්ද්‍ර නිකාය නිකායන් තුන අතර බලවත්ම නිකාය වූ නිසා ශුද්ධ වූ නිකාය නැවත එක් කිරීමට පවා බොහෝ දුරට හැකි වුණා."

“කලා කැඩපත ගැන කුමක් කිව හැකිද? ඔවුන් කවදාහරි අපට කරදරයක් කරලා තියෙනවද? ”

“ඇත්ත වශයෙන්ම, මෙම නිකාය තුන අතර, බොහෝ දෑත් තිබෙනවා. වඩාත් ආක්‍රමණශීලී වන්නේ සමගි නිකාය පමණයි. කලා කැඩපත නිකායත් පවිත්‍ර චන්ද්‍ර නිකාය වගේ. එහි ගෝලයන් සෑම තැනකම විසිරී සිටිනවා. සෑම කෙනෙකුම තමන්ගේම කාර්යයක් කරනව. නිතර රැස් වෙන්නේ නැහැ. ගුරුතුමා භාවනාව අවසන් කළාට පසු එය දැන්වූයේ මට පමණයි. ඒ නිසා මම ඉක්මනින් පැමිණියා. ඔබ සම්බන්ධයෙන් කිව්වොත්..." ඔහු පැවසුවේ, "ඇත්ත වශයෙන්ම ඒ ඔබ තුවාල ලැබූ නිසයි. සාරාංශගත කළොත් නිකාය තුනම එකිනෙකා සමඟ නොගැලපෙන බව සත්‍යයක් වුනත් සමඟි නිකාය පමණක් නිරන්තරයෙන් කරදර අවුස්සමින් ප්‍රමාණය ඉක්මවා දුරදිග යනවා."

ෂෙන් ච්‍යාඕ සුසුම්ලමින්, “සෑම වරදකටම හේතුවක් ඇත. සෑම ණයකටම ණයගැතියෙක් ඇත.යුවාන් ෂුෂු යනු සමඟි නිකායේ නායිකාව. ගුරුතුමා ඇයත් සමඟ කෙලින්ම ගනුදෙනු නොකරන්නේ ඇයි? ඔහු යාන් ෂිවන් දෙසට හැරුණත්, ඔහුගේ බිරිඳ සහ දරුවන් සටන්කාමී ලෝකයට අයිති නැති නිසා ඔවුන්ව සම්බන්ධ කර ගැනීමේ අවශ්‍යතාවය කුමක්ද? ”

යූ ෂෙන්ග්‍යාන් ඔහුගේ වදන් බැරෑරුම් ලෙස සැලකුවේ නැත. යහන ඉදිරිපිට සිටි ඔහු, “මෙය ගුරුතුමාගේ නියෝගයක් බැවින් අපි එය පිළිපැදිය යුතුයි. මෙතරම් ප්‍රශ්න ඇසීමේ තේරුම කුමක්ද? ඔබ මුල්වලින්ම උදුරා නොගෙන තණකොළ පමණක් කපා දැමුවොත්, ඊළඟ වසන්ත සුළඟ පැමිණි විට ඒවා නැවත වර්ධනය වෙනවා. එලෙසින්ම යාන් ෂිවන්ගේ බිරිඳ සහ දරුවන් මරා නොදැමුවොත් අනාගතයේදී ඔවුන් අපෙන් පළිගැනීමට එනවා. අපි ඒ වනතුරු බලා සිටිය යුතුද?”

ඒ වචන කිහිපය අවසන් කළ ඔහු නැඟී සිටියා. "එය ප්රමාණවත්. 

කොහොමත් මෙය හදිස්සියෙන් කළ යුතු කාර්යයක් නොවෙයි. 7 වැනිදා වීමට තව දින කිහිපයක් ඉතිරිව තිබෙනවා.  මේ දවස් කීපයේ, ඔබ හොඳ විවේකයක් ගත යුතුයි. ඔබ සුව වූ පසු, මම ඔබට නගරය වටා සංචාරයට උදව් කිරීමට හැකි කෙනෙකු සොයා දෙන්නම්. එවිට ඔබට නගරය වටා ඇවිදිමින් වටපිටාව ගැන නිරීක්ෂණය කළ හැකියි. මගේ මතය අනුව, දැන් සියලුම අගනගරවල් අතර, යේ නගරයේ තත්වය ජියැන්කාංවලට [3] වඩා අඩු නැහැ ; ඊට අමතරව, ජියැංකන්වලදි ලැබෙන තරමටත් වඩා වැඩි සතුටුදායක හැඟීමක්ද ඔබට මෙහිදී ලබා ගත හැකියි. සමස්තයක් ලෙස පැවසුවහොත්, එය වටපිටාව නැරඹීමට තරම් වටින නගරයකි. විශේෂයෙන්ම මෙහි රතු-පහන් දිස්ත්‍රික්කය [4]  ..."

යූ ෂෙන්ග්‍යාන් වයස අවුරුදු විස්සට වඩා යන්තම් මඳක් වැඩි නමුත් ඔහු සැබවින්ම දක්ෂ හා ආදරණීය මිනිසෙකි. ඔහුගේ අනන්‍යතාවය රහසක්ව තබා ගනිමින්, ඔහු චෙන්වල දක්ෂිණ ප්‍රදේශයේ කාව්‍ය හා සාහිත්‍යය ගැන සාකච්ඡා කළ අතර ප්‍රසිද්ධ විද්වතුන් සමඟ මිත්‍රත්වයක් ඇති කර ගත්තේය. එයින් ඔහු තරමක කීර්තියක්ද ලබා ගත්තේය. මේ වතාවේදී ද උද්යෝගිමත් ලෙස එහි යාමට සූදානම් වුවද, හදිසියේම ඔහුට ෂෙන් ච්‍යාඕගේ තත්වය සිහිපත් විය. ෂෙන් ච්‍යාඕ කැමති වුවද, ඔහුට එයට ශක්තියක් නොතිබෙනු ඇත. ඒ නිසා ඔහු මදක් නතර වී ෂෙන් ච්‍යාඕට අර්ථාන්විත සිනහවක් පෑවේය: “ඔබට දැන් සිහිය නැති වී ඇති නිසාත් ඔබේ අතීතයේ කිසිවක් මතක නැති නිසාත් ඒ ගැන ගැටලුවක් නැහැ. කොහොමත් අපේ පවිත්‍ර චන්ද්‍ර නිකායේ ඉන්න ගෝලයෝ වැඩි හරියක් තමන්ට කැමති විදියට ජීවිතය ගත කරන කීර්තිමත්, ආකර්ශනීය මිනිස්සු. ඒ නිසා ඔබට එය සෙමෙන් අත්විඳීමට අනාගතයේ ඕනෑ තරම් අවස්ථාවන් ලැබෙනු ඇත."

යැන් වුෂි පිටත ගමන් බිමන් යන විට යොදාගත් අනන්‍යතාවය වන "ෂිඑ" යන වාසගම, ධනවත් ව්‍යාපාරිකයෙකු සමඟ බැඳී තිබුණු බැවින් නිවසට ඉහළින් ඇති ලී පුවරුවේ ලියා තිබූ වචන "ෂිඑ නිවස" ලෙස සටහන් වී ඇත.

යූ ෂෙන්ග්‍යාන් බොහෝ අවස්ථාවල මෙහි නොසිට පිටතට ගොස් සිටි අතර, ඔහු ෂෙන් ච්‍යාඕව පිටතට රැගෙන ගියේද නැත. ෂෙන් ච්‍යාඕ සෑම කෙනෙකුටම මෘදු ලෙස සැලකුවේය. නමුත් ඔහු එක්වරම සෞඛ්‍ය තත්වය බිඳවැටීම නිසා පීඩා විඳිමින් සිටි අතර, මන්දිරයේ සේවකයින්ට ඔහු කෙරෙහි ඇති වුනු කුඩා අනුකම්පාවෙන් වැළකී සිටීමට නොහැකි විය.

විශේෂයෙන්ම ෂෙන් ච්‍යාඕගේ පෞද්ගලික සේවිකාවන් ලෙස පත් කර ඇති ගැහැණු ළමයින්. දින කිහිපයකට පසු, ඔහුගේ කම්මැලිකම වෙනතකට යොමු කිරීම සඳහා මේ සේවිකාවන් ඔහුට ෂිඑ වාසස්ථානය වටා ඇති සියලුම ආකාරයේ දර්ශන සහ දේශීය සිරිත් විරිත් ගැන  විස්තරාත්මකව පැවසූහ. මේ නිසා ඔහු සමඟ ඔවුන්ගේ සම්බන්ධතාවය දැනටමත් වඩාත් සමීප වී ඇත.

ඔහු සුව වීමට පටන් ගත් පසු, නිදහස් වේලාවක ඔහුව ඇවිදීමට ගෙන යන ලෙස ෂෙන් ච්‍යාඕ ඔවුන්ගෙන් අවස්ථා කීපයකම ඉල්ලා තිබුණි.යේ නගරයද යූ ෂෙන්ග්යාන් පැවසූ ආකාරයටම විය: වීදි සුදු ජේඩ් වලින් සකස් කර ඇති අතර වහලවල් වීදුරු උළු වලින් ආවරණය කර තිබුණි. චී රටේ සිටි ගාඕ පවුල පව්කාර ෂියන්බයි [5]  මිනිසුන් වූ බැවින්, ඔවුන්ගේ නගර බිත්ති, ගොඩනැගිලි, ඇඳුම් පැළඳුම් සහ සිරිත් විරිත් ස්වභාවිකවම ඔවුන්ගේ මුතුන් මිත්තන්ගේ විලාසිතා මෙන් විය. දකුණේ අලංකාරය හා සසඳන විට, මෙම නගරයේ අලංකාරකරණය පවා තරමක් වැඩි විය. එකම වයින් වර්ගයක් වුවද, යේ නගරයේ තැබෑරුම්වල විකුණන ඒවා, ජියැන්කාං නගරයේ විකුණන ඒවාට වඩා මිහිරි රසයක් ඇති බව කියනු ලැබේ.

අතිවිශිෂ්ට ඇඳුම් පැළඳුම්, ලස්සන කාන්තාවන්, ඔවුන් වාඩි වී සිටි සුඛෝපභෝගී මැදිරි ... ෂෙන් ච්‍යාඕට මෙය ඔහුගේ දෑසින් දැකීමට නොහැකි වුවද, ඔහුට තවමත් මෙම අගනගරයේ සෞභාග්‍යය සහ තේජස පිරි වාතයේ, උණුසුම් සුවඳ වාතයත් සමඟ මිශ්‍ර වී දැනෙන්නට විය. එයින් යේ නගරයේ සෑම වීදියක්ම සහ මංතීරුවක්ම පිරී ගියේය.

ඔහුට ඖෂධසලට ඇතුළු වීමට මෙහෙකාරියක් උදව් කළාය. ඔහු විවේක ගැනීම සඳහා පැති සාලයේ වාඩි වූ අතර සේවිකාව ඖෂධ  වට්ටෝරුවේ ඖෂධ ලබා ගැනීමට ඇතුලට ගියාය.

ඖෂධ වට්ටෝරුව ලියා ඇත්තේ ෂෙන් ච්‍යාඕ සඳහා ය. මේ වන විට, ඔහුට සෑම දිනකම අවම වශයෙන් එක් වතාවක් හෝ  විශාල කසාය බඳුනක් ලබා ගැනීමට අවශ්‍ය වූ බැවින්, ඔහු ඖෂධ පැළෑටි බඳුනකට වඩා බොහෝ සෙයින් වෙනස් නොවීය. යැන් වුෂිට ඔහුගේ සටන් කුසලතා යථා තත්ත්වයට පත් කිරීම සඳහා උදව් කිරීමට කිසිදු අදහසක් නොතිබුණද, ඔහු ෂෙන් චියාඕට අඩක් මිය ගොස් සිටි මිනිසෙකු මෙන් ජීවත් වීමට ඉඩ දුන්නේ නැත. ඔහු දැනට ගන්නා සියලුම කසාය ප්‍රධාන වශයෙන්ම ඔහුට අත්‍යවශ්‍ය වූ ශක්තිය, රුධිරය සහ මෙරිඩියන් නැවත ලබා ගැනීමට උපකාර කරන අතර, ඔහුගේ අස්ථි ශක්තිමත් වී,  ඔහුගේ යැන් ශක්තිය උණුසුම් වීමටද උපකාරී වේ.

ෂෙන් ච්‍යාඕගේ වර්තමාන තත්වය සම්බන්ධයෙන් ගත් කල, ඔහුගේ අභ්‍යන්තර චීවල එක හෝඩුවාවක්වත් ඉතිරි නොවී සම්පූර්ණයෙන්ම හිස් වී තිබුණි. ඇම්නේෂියාවට අමතරව, ඔහු ඉක්මනින්ම තම සටන් කුසලතා නැවත ලබා ගැනීමට අපේක්ෂා නොකළ යුතුය. කෙසේ වෙතත්, ඔහුට මේ මොහොතේ සුමටව ගමන් කිරීමට හැකිවීම ඇත්ත වශයෙන්ම මෙම මාස කිහිපයක සුවවීමේ ප්‍රතිඵලයකි.

සේවිකාවට ඖෂධ වට්ටෝරුව ගැනීමට අවශ්‍ය වී තිබූ බැවින්, ෂෙන් ච්‍යාඕ ඇය සමඟ නැවුම් වාතය ලබා ගැනීමට එළියට ආවේය. කෙසේ වෙතත් අන්ධ හා රෝගාතුර වුවද, ඔහුගේ අවධානයට ඒවා බාධාවක් නොවීය. ඔහුට හැකි වූයේ විශාල අවධානයකින් යුතුව බෙහෙත් ඖෂධසළ තුළ වාඩි වී සිටීම පමණි.

ෂෙන් ච්‍යාඕගෙ කලින් තිබූ අලංකාර මුහුණ දැන් තරමක් කෙට්ටු වී ඇති බවක් පෙනුනද, ඔහුගේ පෙනුමට හා හැසිරීමට එයින් සුළු හානියක්වත් ඇති නොවීය. සාමාන්‍ය උණ බම්බු ලීයක් අසළ තබාගෙන, කොළ පැහැති සිවුරකින් සහ හිස කෙස් ආරක්ෂා කරන හිස් ආවරණය වෙනුවට ලී ගාංචුවකින් පමණක් සැරසී සිටි ඔහු විවේකීව එහි වාඩි වී, සේවිකාව සහ ඖෂධසල් කළමනාකරු සමඟ සිදු වූ සංවාදයට නිහඬව සවන් දුන්නේය. සිහින් සිනහවක් ඔහුගේ මුව කොනකින් නැගුණි.

පිටතට ගිය විට ෂෙන් ච්‍යාඕ හඳුනාගනු ඇතැයි කනස්සල්ලට පත් නොවූවාක් මෙන්, යැන් වුෂි ඔහුට ඔහුගේ මුහුණ වසා ගන්නා ලෙස අණ නොකර ප්‍රසිද්ධියේ පෙනී සිටීමට ඉඩ දුන්නේය.

මෙයට හේතුව වූයේ ෂෙන් ච්‍යාඕ ෂුඅන්දූ කන්දේ නිකාය නායකයා වීමට පෙර වුවද පසු වුවද, ඔහු කන්දෙන් පිටත පෙනී සිටියේ ඉතා කලාතුරකින් වීමයි. ෂුඅන්දූ කන්දේ සිටි ගෝලයන්ට පවා ඔවුන්ගේ නව නායකයා හඳුනා ගැනීමට නොහැකි වූ බව පැවසේ. මහජනයා අතර වඩාත් ප්‍රසිද්ධ වූ ගෝලයන් කිහිප දෙනාගෙන් කිසිවෙක්වත් නිකායේ නායක තනතුරට පත් නොවීය . ඒ වෙනුවට පත් කෙරුණේ කිසිවෙකුත් නොදන්නා ෂෙන් ච්‍යාඕවයි. සමහර විට, මේ සියල්ල පිටුපස ඇති හේතුව දැන සිටියේ දැනටමත් ස්වර්ගයට නැගී සිටි චි ෆංග පමණයි.

දෙවනුව, කුන්යේ  විසින් ෂෙන් ච්‍යාඕට අභියෝග කළ දිනයේදී, අර්ධ පියවර කන්දෙහි ඉඩ ඉතා සීමිත වූ අතර එය ඔවුන් දෙදෙනාට පමණක් යන්තම් ප්‍රමාණවත් වීය. ප්‍රේක්ෂකයින් සියල්ලෝම රැස්ව සිටියේ පසුතැවුම් කඳු මුදුනේය. එහෙයින් ඔවුන් අතර තිබුණු දුරස්ථභාවය නිසා, අනෙක් අයට ෂෙන් ච්‍යාඕගේ පෙනුම හොඳින් මතක තබා ගත නොහැකි වනු ඇත. බරපතල රෝගාබාධයේ බලපෑම් නිසා ඔහුගේ සමද පෙර මෙන් නොවීය.

නමුත් මේ සියල්ල යූ ෂෙන්ග්‍යාන් සිතූ උපකල්පනයන් විය.

පුද්ගලිකව, ඔහුගේ ගුරුතුමාගේ සිතුවිලිවලට අනුව ෂෙන් ච්‍යාඕ යනු බොහෝ විට ආවේගයක් පමණක් බවත් හීලෑ කොටගෙන සෙල්ලම් කළ හැකි කෙනෙකු බවත් ඔහුටද හැඟී ගියේය.

“තරුණ ස්වාමිණි, ඖෂධ වට්ටෝරුව  ලබාගෙන අවසන්. අපි පිටත් වෙමුද?"

ෂෙන් ච්‍යාඕ හිස සැලූ අතර සේවිකාව ඔහුට පිටතට යාමට උදව් කළාය. ඔවුන් දෙදෙනා ඖෂධසළේ දොරකඩට ළඟා වන විට කවුරුහරි කියනු ඇසිණි, “මේ මහත්මයා බොහෝ ලස්සනයි වගේම කඩවසම්, මට ඔබව මීට කලින් මුණගැහිලා නැහැ. ඔබේ ගෞරවනීය නම පැවසීමට හැකිද?"

ඒ තුළ වූ පුදුමය වසා ගැනීමට කටහඬට නොහැකි විය. සේවිකාව තත්පරයකට නැවතුණාය. ඇය ආමන්ත්‍රණය කොට ඇත්තේ ඔහුට බව ෂෙන් ච්‍යාඕට බව ඔහුට පසුව අවබෝධ විය.

"මගේ නම ෂෙන් ච්‍යාඕ."ආ..ඔබ ෂෙන් මහත්මයාද." කාන්තාවගේ කටහඬ පැහැදිලි සහ සජීවී විය. කන්වලට ඉතා ප්‍රසන්න විය. “ ෂෙන් මහත්මයා අගනුවර පදිංචිකරුවෙක්ද? එසේ නොවේනම් ඔබ පැමිණියේ කුමන උතුම් පවුලකින්දැයි මට ඇසීමට හැකිද?"

සේවිකාව ෂෙන් ච්‍යාඕගේ කනට කොඳුරමින්, “ඇය ප්‍රධාන සේවක හැන්ගේ පවුලේ තරුණ දුව වන හැන් අ'යිං” යැයි කීවාය.

ප්‍රධාන සේවකයැයි හැඳින්වුවත් හැන් යනු පවුලක ප්‍රධාන සේවකයෙකු නොවේ. චීවල හැන් ෆෙන් මාලිගාවේ "මාළිඟා පැමිණුම් නිලධාරියා" [6] විය. ඔහු රට තුළ ඉතා කීර්තිමත් මිනිසෙක් වූ අතර, ඔහුගේ පුතුන් කුමරියන් සමඟ විවාහ වූහ. ඔහු, මූ ටිපෝ සහ ගාඕ ඇනගොං යන තිදෙනා "වංශාධිපාතියන් තිදෙනා"[7] ලෙස සංධානගත වී  චීවල රාජ්‍ය පාලනය ඔවුන් යටතේ තබාගැනීමට හවුලේ කටයුතු කළහ. හැන් පවුලේ දියණිය ලෙස, හැන් අ'යින්ට ස්වභාවිකවම ඇය කැමති ඕනෑම දෙයක් කිරීමට හැකියාව තිබුණි.

ෂෙන් ච්‍යාඕ සිනාසුණේය: “මම හැන් ආර්යාවගේ නම බොහෝ කලකට පෙර සිටම අසා තිබුණා. මගේ දෑස්වල ආබාධය නිසා හැන් ආර්යාවගේ ශෝභන ඉරියව් දැකීමට නොහැකි වීම ගැන මට සමාව දෙන්න. මම යථා තත්ත්වයට පත් වූ පසු, දිනෙක හැන් ආර්යාවගේ නිවසට නිසැකවම පැමිණෙන්නම්.

ඔහුගේ ඇස්වල දීප්තිය හෝ හැඟීම් කිසිවක් නොතිබූ ආකාරය හැන් අ'යිංද ඒ වන විට දැක තිබුණි. ඒ ගැන යන්තම් අනුකම්පාවක් ඇති වූ ඇයට, මෙතරම් කඩවසම් තරුණ පුරුෂයෙකු අන්ධ වීම කොතරම් අනුකම්පාවක්දැයි සිතෙන්නට විය. ඇය පැවසුවේ, "ඒක හොඳයි. ඔබ හොඳ විවේකයක් ගත යුතුයි. ෂියාඕ ලියන්, [8] ගිහින් කළමනාකරුට කියන්න ෂෙන් මහතාට රැගෙන යාම සඳහා ජින්සෙන් ටිකක් එවන්න කියලා. සෑම වියදමක්ම මගෙන් අය කරගන්න! ”

ෂෙන් ච්‍යාඕ පිළිතුරු දුන්නේ, "හැන් ආර්යාව, ඔබගේ ත්‍යාගයට ස්තූතියි. යමෙකුට ලැබෙන වරප්‍රසාදයක් ආපසු නොදීම අශිෂ්ට ක්‍රියාවක් බැවින්, ඔබ වෙනුවෙන්ද දීමට මා සතුව යමක් තිබෙනවා. 

කරුණාකර මගේ මේ කුඩා ත්‍යාගය පිළිගන්න."

හැන් අ'යින්ගේ උනන්දුව තරමක් අවදි විය: "ඔහ්? එය කුමක් ද?"

ෂෙන් ච්‍යාඕ පැවසුවේ, “ ආ-මියාඕ [9] , එම කරත්තයේ තිබෙන පෙට්ටිය මා වෙත ගෙන එන්න.”

සේවිකාව ඉක්මනින් පිටත් වූයේ ෂෙන් චියාඕ පැවසූ පෙට්ටිය ගෙන ඒමටයි.

ෂෙන් ච්‍යාඕ අන්ධ වුවත්, ඔහු කතා කළ ආකාරය මෘදු වූ අතර, ඔහුගේ සංවාදයේ විලාසය මනාව සංවිධානය වූවක් විය. මේ නිසා ස්වභාවයෙන්ම මිනිසුන් ඔහුට ආදරය කරන ආකාරයේ ස්වභාවයකින් ඔහු යුක්ත විය. කඩවසම් පිරිමින් පාරේදී නවත්වා තමන්ට රිසි පරිදි ඔවුන් හා ආලවන්ත හැඟීම් පාන හැන් අ'යින් වැනි උතුම් දියණියක් පවා ඔහු ඉදිරියේ නොදැනුවත්වම තම ස්වරය මෘදු කර ගත්තාය.

සේවිකාව පෙට්ටිය ආපසු ගෙන එන විට, ෂෙන් ච්‍යාඕ සහ හැන් අ'යින් ඔවුන්ගේ කෙටි සංවාදය අවසන් කර එකිනෙකාගෙන් සමුගෙන තිබුණි. ෂෙන් ච්‍යාඕගේ ලිපිනය ඉල්ලාගත් හැන් අ'යින් වෙනත් දිනක ඔහුගේ නිවසට පැමිණෙන බව පවසමින් ඇගේ අශ්වයා පිට නැඟී පිටත්ව ගියාය.

ඔහු ෂිඑ වාසස්ථානය වෙත ආපසු පැමිණි පසු, මෙම සිදුවීම ගැන අසා, යූ ෂෙන්ග්‍යාන් පුදුමයෙන් යුතුව ඔහුගේ දිව "ක්ලික්" කළේය: “ඔබට ඇත්ත වශයෙන්ම බොහෝ දක්ෂතා ඇත. එක් වරක් පමණක් පිටතට ගොස් ඇතත්, ඔබට හැන් අ'යින් වැනි කෙනෙකුව හඳුනගන්න හැකි වුණා. ඇය තායි කන්දේ ජේඩ් ක්ලවුඩ් නිකායේ ෂාඕ චියින්ගේ සටන් ලේලියයි. ඇගේ සටන් කුසලතාව එතරම්ම හොඳ නැති වුවත් අගනුවර වටේටම කරදර ඇති කරන ඇයගේ හැසිරීමට බාධාවක් නොවන හොඳ පියෙකු සහ හොඳ නිකායක් ඇයට තිබෙනවා."

ෂෙන් ච්‍යාඕ සිනාසෙමින්: “මම අත්දැකපු දේවල්වලට අනුවනම්, ඇය හොඳ කෙනෙක්. මම එය හිරිහැර කිරීමක් ලෙස සලකන්නේ නැහැ. ”

යූ ෂෙන්ග්‍යාන් සිනාසෙමින් මෙසේ පැවසීය: “ඇත්තෙන්ම ඇය සුන්දරියක්, නමුත් ඇගේ පෞරුෂය දරාගත නොහැකි තරම් නරකයි. මේ අගනුවර එක්කෙනෙකුටවත් ඔබට මෙන් දැනෙන්නේ නැහැ. ඇය හොඳ කෙනෙක් බව පවසන්නේ ඔබ පමණයි!"

ෂෙන් ච්‍යාඕ සිනාසුනා මිස පිළිතුරක් දුන්නේ නැත.

පරිවර්තකගේ සටහන්:

[1] ත්‍රි අංක දැක්ම (දැක්මවල් තුන)  :  ලෝකය/ලෝක දර්ශනය, ජීවිතය පිළිබඳ දැක්ම සහ වටිනාකම පිළිබඳ දැක්ම

[2]  ශුද්ධ නිකාය : සූර්ය සඳ නිකායේ ශ්‍රාවකයන්/ගෝලයන් විසින් සූර්ය-සඳ නිකාය ආමන්ත්‍රණය කිරීමේ ගෞරවනීය ක්‍රමයක් වන අතර අනෙක් අය සාමාන්‍යයෙන් එය අසුර නිකාය ලෙස හඳුන්වයි.

[3]  Jiankang (建康):   දකුණෙහි පිහිටි චෙන් රාජධානියේ අගනුවර.

[4]  Red-lantern District (烟花巷 yanhua xiang):  පුරාණ චීනයේ රක්ත පහන් කූඩු දිස්ත්‍රික්කය හැඳින්වූ යෙදුමකි.

[5]  Xianbei (鲜卑): වර්තමාන නැගෙනහිර මොංගෝලියාව, අභ්‍යන්තර මොංගෝලියාව සහ ඊසානදිග චීනය බවට පත් වූ ප්‍රදේශවල පදිංචිව සිටි ප්‍රොටෝ-මොන්ගෝලියානුවන් ය. Xiongnu සමඟින්, ඔවුන් හැන් රාජවංශයේ සිට උතුරු චීනයේ ප්‍රධාන සංචාරක කණ්ඩායම් වලින් එකකි.

[6] Palace Attendance (侍中 shizhong) :  අධිරාජ්‍යයා විසින් ඔහුගේ රහස්‍ය උපදේශකයන් ලෙස තෝරාගත් මධ්‍යම රජයේ නිලධාරීන්ට පරිපූරක තනතුරු පිරිනමනු ලැබේ. ඔවුන් සමහරවිට මාලිගා උපස්ථායක අධ්‍යක්ෂවරුන් 4 දෙනෙකු යටතේ අධිරාජ්‍ය ආරක්ෂක බලකායේ නිලධාරීන් ලෙස ද සේවය කළ අතර පසුව කනිෂ්ඨ මහා මන්ත්‍රීවරුන් දක්වා ඉහළ ගියහ.

සිංහල භාෂාවට පරිවර්තනයේදී "මාළිඟා පැමිණුම්" නිලධාරියා ලෙස මින් ඉදිරියට හඳුන්වමි.

[7]  Qiහි වංශාධිපතියන් තිදෙනා (齐国三贵 qiguo sangui) :  නම විකි fandom වෙතින් ලබා ගන්නා ලදී.

[8]  Xiao-lian :  Xiao යනු "කුඩා" යන්නයි. තමාට වඩා කුඩා / පහළ තත්ත්‍වයේ සිටින අයව ආදරයෙන් ඇමතීමේ ක්‍රමයක්. බොහෝ විට බාල පරම්පරාවේ දරුවන් හෝ පුද්ගලික සේවකයන් අතර හැඳින්වීමට භාවිතා කරයි.

[9]  Ah-miao :  "Ah", "a" ලෙස අක්ෂර වින්‍යාසය යොදන්නේ මිනිසුන් ඇමතීමේ ආදරණීය ආකාරයක් ලෙසය. පුද්ගලික සේවකයන් ඇමතීමට හෝ සමීප සබඳතාවයක් ඇති වෙනත් පුද්ගලයින් ඇමතීම සඳහා අන්වර්ථ නාමයක් ලෙස භාවිතා කළ හැක.

පෙර පරිච්ඡේදය | සියලු පරිච්ඡේද | මීළඟ පරිච්ඡේදය