තුන්වන පරිච්ඡේදය | මෘදු ය; සුනම්‍ය ය; සුන්දර ය; කරුණාවන්ත ය.

 “ඔබේ නම ෂෙන් ච්‍යාඕ. මුලින් අපේ පවිත්‍ර චන්ද්‍ර නිකායේ ගෝලයෙක්. ඔයාට හොඳටම තුවාල වෙලා තිබුණා. ඒත් වාසනාවකට, මම ඒ අසළින් යද්දි මට ඔබව හමුවුන නිසා මෙතැනට ඔබව රැගෙන එන්න පුලුවන් වුනා. ඔබට රිදවූ සතුරන් අයිති සුසංයෝග නිකායට. මටත් ඔවුන් සමඟ සටන් කරන්න තරම් ශක්තියක් නැති නිසා මුලින්ම ඔබව ආරක්ශා කිරීමට සිදු වුනා. ඔබ යථා තත්ත්වයට පත් වී ඔබේ සටන් කුසලතා නැවත ලබා ගත් පසුව ඔබට ඔවුන්ගෙන් පළි ගන්න හැකියි."

යූ ෂෙන්ග්‍යාන් බැරෑරුම් ලෙස කතා කරමින් සිටි අතර, ෂෙන් ච්‍යාඕද ඔහුට අවංකව සවන් දුන්නේය.

අවසානයේදී ඔහු ඇසුවේ, "එසේ නම්... මා ඔබට ආමන්ත්‍රණය කළ යුත්තේ කෙසේද?"

“මගේ පවුලේ නම යූ. යූ ෂෙන්ග්‍යන්. මමයි ඔබගේ ජ්‍යෙෂ්ඨ සටන් සහෝදරයා ”

මෙම වාක්‍යය හෘදය සාක්ෂියකින් තොර වූ සත්‍යයක් විය. යූ ෂෙන්ග්‍යන්ට මේ වසරේ අවුරුදු විස්සක් විය. ෂෙන් ච්‍යාඕගේ පෙනුම ගත් කල, ඔහුගේ වයස නිශ්චිතවම නොපෙනුනද ඔහු චි ෆංගගේ ගෝලයෙකු ලෙස මෙන්ම වසර පහක් ෂුඅන්දූ කන්දේ ප්‍රධානියා ලෙසද සිටි බැවින්, ඔහු යූ ෂෙන්ග්‍යන්ට වඩා බාල විය නොහැක.

යූ ෂෙන්ග්‍යාන් ඔහුගේ අන්ධභාවය නිසා ආමන්ත්‍රණයේ ආකාරය වෙනස් කොට හිතාමතාම වාසි ලබා ගත් බව පැහැදිලිය.

නමුත් ෂෙන් ච්‍යාඕ යටහත් ලෙස ඔහුට ආචාර කළේය: "ජ්‍යෙෂ්ඨ සටන් සහෝදරයා."

“...”ඔහුගේ අහිංසක මුහුණ දෙස බලා සිටි යූ ෂෙන්ග්‍යාන්ට වරදකාරී හැඟීමක් ඇති විය.

පසුව ඔහුගේ මුහුණ සිනහවකින් මුවහත් විය: “ඉක්මනින් සුව වන්න. තවමත් නැගිටීමට නොහැකි නිසා ඇඳට වෙලා විවේක ගන්න. ඔබ සම්පූර්ණයෙන් සුව වූ පසු ගුරුතුමාට ගෞරව දැක්වීමට මම ඔබව රැගෙන යන්නම්"

ෂෙන් ච්‍යාඕ පිළිතුරු දුන්නේ, "හරි"

ඔහු දෑස් පියාගත් නමුත් ඉක්මනින්ම ඒවා නැවත විවෘත කළේය. අවධානය යොමු නොවීම නිසා ඔහුගේ දෑස් මඳක් බොඳ වී ඇති අතර ඒවායේ සුපුරුදු දීප්තියද පහව ගොස් ඇත. "ජ්‍යේෂ්ඨ සටන් සහෝදරයා..?"

"තව මොනවහරි කියන්න තියෙනවද?"  සුන්දරත්වය දුටු විට තම හදවත මුදු වෙනවාක් මෙන් යූ ෂෙන්ග්‍යාන්ට දැනෙන්නට විය. ෂෙන් ච්‍යාඕව දුටු ඔහුගේ හදවත නැවත වරක් 'අනුකම්පාවෙන්' බර වුනු අතර ඔහුට සිතුණේ :  'වරක් සියලුම දාඕවාදි නිකායන්වල තේජාන්විතව සිටි නායකයා මේ ආකාරයට පත් වීම කෙතරම් දුකක්ද.. එදා ඔහු යුධ බලය සහිතව නිකාය භාරව සිටින විට, ඔහුට කුමන ආකාරයේ හැසිරීමක් තිබෙන්නට ඇද්ද?'

"මට ජලය ස්වල්පයක් පානය කිරීමට අවශ්‍යයි..."

“දැනට ජලය පානය කරන්න එපා. ඔබේ ඖෂධ ඉක්මනින්ම සූදානම් වෙයි. දැන් ඔබ ජලය ලෙස සැලකිය යුත්තේ ඔබේ ඖෂධයයි".

ඔහු පවසා අවසන් වෙනවාත් සමඟම මෙහෙකාරියක් ඇගේ අතේ කසායක් රැගෙන පැමිණියාය. සමහරවිට ෂෙන් ච්‍යාඕගේ ඉතිහාසය ගැන ව්‍යාජ තොරතුරු පැවසූ නිසා යූ ෂෙන්ග්‍යාන්ට දුර්ලභ වරදකාරී හැඟීමක් ඇති වන්නට ඇත. එනිසා ඔහු සුප් බඳුන අතට ගෙන, ෂෙන් ච්‍යාඕගේ බෙල්ල පිටුපසින් අත තබා හිස ඔසවාගෙන  සිටින්නට හැකි ලෙස ඔහුගේ හිස ඔසවා ගෙල පිටුපසින් කොට්ටයක් තබන ලෙස සේවිකාවගෙන් ඉල්ලා සිටියේය. පසුව ඔහුට හැන්දෙන් කසාය පොවන්නට විය.

ෂෙන් ච්‍යාඕගේ අස්ථි සියල්ලම බිඳී ගොස් තිබුණේ නැත. නමුත් එය ඊට වඩා අඩු හානියක්ද නොවීය. හානි වූ මෙරිඩියන් වලටත් වඩා, ඔහුගේ දිවි ගලවා ගැනීමේ අවස්ථාවද සීමිතව තිබුණි.නමුත් ඔහුගේ සෞඛ්‍යය තත්වයේ හොඳ අඩිතාලම නිසා ඔහුට මාසයක් ඇතුළත අවදි වීමට හැකි විය. දැන්, අවම වශයෙන් තවත් මාස තුනක්වත් ඇඳට වී සිටිය යුතු අතර, එතෙක් එහා මෙහා යාමට හැකි වනු ඇතැයි අපේක්ෂා නොකළ යුතුය.

යැන් වුෂිගේ ගෝලයෙකු වූ දා සිටම යූ ෂෙන්ග්‍යාන් පුහුණුවීම් අතරතුර දැඩි දුෂ්කරතා වින්දද, අසුර නිකායේ ජීවන රටාව සෑම විටම අධික ලෙස සුඛෝපභෝගී ආකාරයට පැවති බැවින්, ඔහුගේ එදිනෙදා ආහාර සහ ඇඳුම් පැළඳුම් උසස් පවුල්වල තරුණ ස්වාමිවරුන්ට වඩා ප්‍රමිතියෙන් කිසිසේත් පහත් නොවීය. මේ නිසා තමාගේ අතින්ම අන් අයට කසාය පොවන්නට, කෙතරම් පරිස්සම් සහගත ලෙස උත්සාහ කළත්, ෂෙන් චියාඕගේ සිවුරට ඉඳහිට කසාය බිඳුවක්, දෙකක් වැටුණි. නමුත් ෂෙන් ච්‍යාඕ, තමා පෝෂණය වූ සෑම හැන්දක්ම කිසිදු අතෘප්තියක් නොමැතිව පානය කළේය. ඔහු පානය කර අවසන් වූ පසු, ෂෙන් ච්‍යාඕ යූ ෂෙන්ග්‍යාන්ට මඳ සිනහවක් පාමින් කෘතඥපූර්වකව පැවසුවේ, “ස්තුතියි, ජ්‍යෙෂ්ඨ සටන් සහෝදරයා” යනුවෙනි.

මෘදු යි; සුනම්‍ය යි; සුන්දර යි;  කරුණාවන්ත යි.

එය මද සිනහවක් වුවද, ඔහුගේ සුදුමැලි මුහුණට උණුසුම් පැහැයක් ගෙන ඒමට එය ප්‍රමාණවත් විය. පසෙකින් නිහඬව රැඳී සිටි සේවිකාව රතු වූ අතර වහා දෑස් වසන් කරගත්තාය.

ඔහු කිසිවක් ගැන ඇසුවේ නැත. ඒ නිසා සැබවින්ම යූ ෂෙන්ග්යාන් පුදුමයට පත් විය. කිසිදු මතකයක් නොමැතිව, අන්ධ දෑස් ඇතිව, ඇඳෙන් බැසීමටවත් නොහැකි තරමට බරපතළ තුවාල ලැබූ ඔහු වැන්නෙක් අවදි වීමෙන් පසුව මානසිකව කඩා නොවැටුනත් අවම වශයෙන් ඔහුගේ සන්සුන්කමවත් නැති විය යුතුයි. නමුත් ෂෙන් ච්‍යාඕ සිටි ආකාරය හාත්පසින්ම වෙනස් විය.

"ඇයි ඔබ මගෙන් අහන්නෙ නැත්තෙ ඔබ සම්පූර්ණයෙන් සනීප වෙන්නෙ කවදාද කියලා?"

"ගුරුතුමා සහ ජ්‍යෙෂ්ඨ සටන් සහෝදරයා මා නිසා බොහෝ සෙයින් ශාරීරිකව සහ මානසිකව වෙහෙසට පත්වෙන්න ඇති." ෂෙන් ච්‍යාඕ කිහිප වතාවක්ම කැස්සේය. ඔහුගේ තුවාල වටා ඇති මාංශ පේශි ඇදී ගොස් ඔහුගේ ඇහි බැම රැලි ගැන්වුනි. “මම එලෙස ඇසුවොත් එය ඔබටත්, ගුරුතුමාටත් තවත් දුකක් එකතු කරන්නේ නැද්ද?”

අන් අය කෙරෙහි මෙතරම් අවධානයෙන් හා සැලකිල්ලෙන් කටයුතු කරන කෙනෙකු ඔහු කිසි දිනෙක දැක නොතිබුණ නිසා හෝ එසේත් නැත්නම් ෂෙන් ච්‍යාඕගේ  මුහුණ දැකීමෙන් පහසුවෙන්ම වරදකාරි හැඟීමක් ඇති වූ නිසා විය හැකියි, යූ ෂෙන්ග්‍යන් මොහොතකට ගොළු විය. ටික වේලාවකට පසු ඔහු අවසානයේ පැවසුවේ “එහෙනම් හොඳින් විවේක ගන්න. මම අදට යනවා, නමුත් මම හෙටත් ඔබට ප්‍රතිකාර කිරීමට උදව් දීමට පැමිණෙන්නම්"

“ස්තුතියි, ජ්‍යෙෂ්ඨ සටන් සහෝදරයා. කරුණාකර මා වෙනුවෙන්  ගුරුතුමාට මගේ ස්තූතිය දෙන්න."

"මම කියන්නම්." තමන් තවදුරටත් රැදී සිටියහොත් එයින්, අපහසුව තවත් වැඩි විය හැකි බව එක්වරම යූ ෂෙන්ග්‍යාන්ට අවබෝධ විය. කිහිප වතාවක්ම නහය පිරිමදිමින් සිටි ඔහු වාක්‍යය පිටතට දැමූ  විගස පිටව  ගියේය.

මුලදී ඔහුට, ෂෙන් ච්‍යාඕගේ සිහිමුර්ජාව උපක්‍රමයක්ද යන්න ගැන මද සැකයක් ඇති විය. නමුත් ඔහු එදින සිට දිනපතාම ෂෙන් ච්‍යාඕ වෙත පැමිණි අතර එය නතර කළේ නැත. ඔහු පළමු වරට අවදි වූ ආකාරයටම, ච්‍යාඕද යූ ෂෙන්ග්‍යාන් කෙරෙහි අහිතක් නොමැතිව, මෘදු ලෙස සහ ඔහු ගැන ශුභවාදී ලෙස සිතුවේ අතිශයින් කෘතඥපූර්වක ලෙසය.

යූ ෂෙන්ග්යාන් කුමක් කීවත්, ඔහු ඒ සියල්ල එකදු සැකයක්වත් නොමැතිව විශ්වාස කළේය. සුදු කඩදාසි කැබැල්ලක් මෙන් ඔහු අහිංසක සහ පිරිසිදු විය.

ඔහුට ඇඳෙන් බැස මඳක් එහා මෙහා ඇවිදීමට හැකි වූ පසු, ඔහු වෙනුවෙන් වෙහෙස වූ “ඔහුගේ ගුරුතුමා” වන යැන් වුෂි හමුවී පෞද්ගලිකව ස්තූතිය ප්‍රකාශ කිරීමට පවා ෂෙන් ච්‍යාඕ යෝජනා කළේය.

…

යූ ෂෙන්ග්‍යාන් මතක් නොකළේ නම්, යැන් වුෂිට දැනටමත් ෂෙන් ච්‍යාඕ ගැන අමතක වී තිබෙන්නට ඇත .

ඔහු භාවනා කළ දස වසර තුළ ලෝකයේ බොහෝ දේවල් වෙනස් විය. එය වාක්‍ය කිහිපයකට සාරාංශ කළ හැකි දෙයක් නොවීය.

මේ ලෝකයේ බොහෝ නිකායන් සිටි අතර, ඒ සෑම කෙනෙකුටම ඔවුන්ගේම කණ්ඩායම් සහ ඒවාට පිටුබලය දෙන දේශපාලන බලවේග තිබුණි.

චීවල වාසය කළ ගාඕ පවුල ඔවුන්ගේ විකාර සහ අසාධාරණ හැසිරීම් සඳහා ප්‍රසිද්ධයට පත් වී තිබුණි. එබැවින් එහි අධිරාජ්‍යයාගේ සිට සෑම පරම්පරාවක්ම අසුර නිකාය සමඟ වැඩි වශයෙන් සම්බන්ධ වීමට නැඹුරු විය. දැන් ඔවුන්ගේ පරම්පරාව සමඟි නිකාය සමඟ ඉතා සමීප සබඳතාවක් පැවැත්වීමට යොමු වී තිබුණි. එබැවින් චී රට තුළ සමගි නිකායේ බලපෑම විශාල ලෙස ඉහළ ගොස් තිබුණි.

ෂෝ රටේ, යුවන් හූ මීට පෙර ප්‍රධාන තනතුර භාරව සිටි අවධියේදි, බුදුදහමට ගරු කළේය. එබැවින් සෙන් මාස්ටර් ෂුඑටින් වරක් "ෂෝ"හි මහා නායක තනතුරෙන් ගෞරවයට පත් විය. කෙසේ වෙතත්, යුවන් යොන් බලයට පත්වීමෙන් පසුව, මෙය වෙනස් විය. මෙම නව අධිරාජ්‍යයා දාඕවාදය හෝ බුදුදහම විශ්වාස කළේ නැත. ඔහු රට පුරා පැතිර තිබූ එම පාසල් දෙවර්ගයම තහනම් කළේය. එබැවින් වර්තමාන ෂෝවල බුදුදහමේ බලපෑම අතීතයට සාපේක්ෂව බෙහෙවින් දුර්වල වී තිබුණි.

දකුණේ චෙන් රාජවංශය සම්බන්ධයෙන් ගත් කල, එහි ප්‍රධානියා වූයේ කොන්ෆියුසියස්වාදය ඇදහූ ලින්චුවන් ආයතනයයි. භාරකාරීත්වය දැරූ නායකයා වූ රුයන් ක'හුයි මුළු හදවතින්ම, රට පාලනය කිරීම සඳහා චෙන් අධිරාජ්‍යයාට සහාය වූ අතර එම නිසා ඔහු ගෞරවයට පාත්‍ර වූ අතර ඔහුද අධිරාජ්‍යයා මත දැඩි ලෙස විශ්වාසය තැබීය.

යැන් වූෂි භාවනාවට ඇතුල් වීමට පෙර, ඔහු වෙනත් අනන්‍යතාවයක් යටතේ ෂෝවල නිලධාරියෙකු ලෙස සිටියේය. එකල "ලූ"හි ආදිපාදවරයා ලෙස යුවන් යොන්ට සහය දුන්නේ ඔහුය. පසුව යැන් වුෂි, කුයි යුවාන් සමඟ ඇති වූ සටනේදී තුවාල ලබා බොහෝ ඈතට පලා ගිය නමුත් පිටත්ව යාමට පෙර ඔහු තම වැඩිමහල් ගෝලයා වන බියන් යැන්මෙයි හට යුවන් යොන්ගේ පැත්තේ සිටින ලෙස නියෝග කළේය.

දැන් ඔහු භාවනාව අවසන් කොට ඇති බැවින්, නිසැකවම ඔහු ෂෝ රටට සංචාරය කොට, එකල සිටි අධිරාජ්‍යයා වූ යුවන් හූගෙන් බලය ලබාගෙන මේ වන විට සිංහාසනයට පැමිණ සිටි, යුවන් යොන්ට ආචාර දැක්වීමට යනු ඇත.

මෙම වසරවලදී, උතුරු ෂෝ පියවරෙන් පියවර ශක්තිමත් වී තිබූ අතර එය අනෙක් රටවල්වලට ඇස්වලට කටු අනින්නාක් මෙන් විය. එපමණක් නොව, කොන්ෆියුසියස්, බුද්ධාගම සහ දාඕවාදය යන පාසල් තුන පවා මෙම ෂෝ අධිරාජ්‍යයා සමඟ සමීප සබඳතාවයක් නොතිබුණි. මෙයට හේතු වූයේ ඔහු බුද්ධාගම සහ දාඕවාදය තහනම් කොට, අනුගාමිකයින් ලබා ගැනීම සඳහා කොන්ෆියුසියස් පාසලට පොදු ඉගැන්වීම් පිහිටුවීමට ඉඩ නොදීමයි.

පවිත්‍ර චන්ද්‍ර නිකායට යුවන් යොන් හට ළංවීමට සහ සහාය දැක්වීමට ඉඩ ලබා දුන්නේ මෙම පසුබිමයි. එමෙන්ම යුවෙන් යොන්ටද තම පාලනය පවත්වා ගැනීමට පවිත්‍ර චන්ද්‍ර නිකායේ සහය අවශ්‍ය විය.

යුවන් යොන් සමඟ හමුවෙන් පසු, යැන් වූෂි උතුරු ෂෝ වෙතින් පිටත්ව ගොස් ෂුඅන්දූ කන්ද වෙත සංචාරය කළ අතර, ෂෙන් ච්‍යාඕ පරාජය කළ තුජුයේ අංක එකේ විශේෂඥයා ලෙස හඳුන්වන කුන්යේ පරීක්ෂා කිරීමටද ගියේය.

කුන්යේ සමඟ සටන් කළ යැන් වුෂිට එක වටයකින්ම ඔහුව පරාජය කිරීමට හැකි වූ අතර කුන්යේ පරාජයට පත් විය. යැන් වුෂි "අසුර පරමාධිපත්‍ය" යන නාමය සමඟ නැවතත් මතු වූයේ මුළු සටන්කාමී ලෝකය පුරාම විශාල ආන්දොලනයක් ඇති කරමිනි. කුයි යුවාන්ට අමතරව අසුර නිකායෙන් තවත් බලගතු මෙන්ම බිහිසුණු මිනිසකු බිහිවනු ඇතැයි මිනිසුන් අතර කටකතා පැතිරෙන්නට විය.

මේ වතාවේ, චි ෆංග නොමැති වුවද, ඔහුට සමාන වීමට හැකි එක් පුද්ගලයෙකු සිටියේය.

යැන් වුෂිගේ මතය අනුව, කුන්යේගේ දක්ෂතා විශිෂ්ට වූ නමුත්, එකල සිටි  හූ ලුගු තරමටම ඔහු තවමත් දක්ෂ වී තිබුණේ නැත.දැනට පළමු දස දෙනාගේ ලැයිස්තුවේ සිටි අනෙක් අය සමඟ සැසඳුවත් ඔහු කැපී පෙනෙන දක්ෂයෙකු ලෙස සැලකිය නොහැකි විය. ඔහු වැන්නෙකුට ෂුඅන්දූ කන්දේ නිකාය නායකයාට දරුණු ලෙස තුවාල කළ හැකි වූ බව සිතීම තරමක් අමුතුසහගත දෙයක් විය.

නමුත් මෙය ඔහුට උනන්දු වීමට තරම් ප්‍රධාන කරුණක් නොවීය. ෂෙන් ච්‍යාඕගේ හානිය පිටුපස ඇත්තේ කුමක්ද, නැතහොත් එය කුන්යේ සමඟ සම්බන්ධයක් තිබේදැයි යන්න සොයා ගැනීමට ඔහුට උනන්දුවක් නොතිබුණි. ඔහු කුන්යේව ඔහුගේ පළමු ඉලක්කය බවට පත් කර ගත් එකම හේතුව වූයේ ඔහු නැවත පැමිණි පුවත සටන්කාමී ලෝකය තුළ පතුරුවා හැරීමයි. කුන්යේ මෑතකදී ෂුඅන්දූ කන්දේ නිකාය නායකයා පරාජය කර සෑම දෙනාගේම අවධානයට ලක් වූ බැවින්, ඔහුත් සමඟ සටන් කිරීම හොඳම තේරීම විය.

එහෙත් යැන් වූෂිට මෙවර සංචාරයෙන් ලැබුණු වඩාත්ම වැදගත් දෙය, නොඑසේනම් ලොකුම වාසිය වූයේ සටන්කාමී ලෝකයේ තමන්ගේ නමක් හදා ගැනීම හෝ කුන්යේ පරාජය කිරීම නොව "සූර්යවාදයේ" ඉතිරිව ඇති එක් පොතක් තිබුණේ කොහේදැයි දැනගැනීමට හැකි වීමයි.

පුරාවෘත්තයට අනුව, වසර පනහකට පෙර එම පරම්පරාවේ සිටි විශිෂ්ටාචාර්ය වූ තාඕ හොංජිංට, මාඕ කන්දේදී අමරණීය මිනිසෙකු හමු වූ අතර, ඔහු විසින් හොංජිංට "සත්‍යයට නැගීමේ යතුර" නමින් පොතක් ලබා දෙන ලදී . පොත සම්පූර්ණ කොටස් හතරකින් සමන්විත විය.තාඕ හොංජින් ඉන් තුනක් වෙනත් පොතක් ලෙස ප්‍රතිසංවිධානය කළ අතර එය "සත්‍යයට නැගීමේ රහස් යතුර" ලෙස නම් කළේය .

ඉතිරි වූ කොටස ගැන සඳහන් කළොත්, එහි අන්තර්ගතය අපැහැදිලි වූ නිසාත්, බොහෝ මිනිසුන් මිනිසා සහ ස්වර්ගය අතර ධ්‍යානවේදයට සම්බන්ධ වී සිටි නිසාත්, තාඕ හොංජිං එය වෙනම පොතක් ලෙස ප්‍රතිසංවිධානය කළේය. පසුව ඔහුගේ ජීවිත කාලය තුළම රැස් කළ, උගත්කමේ සහ අවබෝධයේ සාරයද මෙයට මිශ්‍ර කළේය. මෙය සුප්‍රසිද්ධ "සූර්යයවාදය" නම් පුස්ථකය බවට පත් විය.

මිනිසා සහ ස්වර්ගය අතර සම්බන්ධය ගැන තාඕ හොංජිං ගැඹුරින්ම අධ්‍යයනය කළේය. දාඕවාදී පූජකයෙකු වුවද, ඔහු පාසල් තුනේම සැබෑ විශේෂඥයෙකු වූ අතර, අමරණීය ගුරුවරු වූ දන්යැන් සහ සන් යූඒගේ සියලු ඉගැන්වීම්වලින්ද ආශිර්වාද ලත් අයෙකි. චි ෆංග පවා ඔහුට එරෙහිව සටනක් කළහොත් පරාජය කැමැත්තෙන්ම පිළිගන්නා තත්වයක් එකල ඔහුට තිබුණි. එතරම් පරිපූර්ණත්වයට පැමිණි සටන් කුසලතා ඇති මිනිසෙකු ලෙස, ඔහු සැබවින්ම මතභේදයකින් තොරව අංක එකේ සටන් කලාකරුවා විය.

එවැනි සම්භවයක් තිබූ නිසා "සූර්යවාදය" කියවීමට මිනිසුන් තුළ වූ උනන්දුව ස්වභාවිකවම වැඩි විය. ඒ නිසා මෙය නිධාන පිටපතක් බවට පත් විය. යමෙකුට එහි පොත් පහම සම්පූර්ණයෙන් අවබෝධ කර ගත හැකි නම්, ඔවුන්ට අනාදිමත් කාලයක සිට ජීවත් වූ සටන් කලාකරුවන්ගේ සටන් කුසලතා සියල්ල දැක ගත හැකි බවත්, ස්වර්ගයට නැඟුනද, [1] ඔවුන්ට නව ක්ෂේත්‍රයකට ඇතුළු වීමට හැකි වනු ඇති බවත් පැවසේ.

අවාසනාවකට, තාඕ හොංජිං අමරණීයත්වයට පත් වූ පසු,  මාඕ කන්දේ ෂංචිං නිකාය දේශපාලනයට සම්බන්ධ වීම නිසා දේශපාලනික වශයෙන් බොහෝ දුර්භාග්‍යයන්ට මුහුණ දීමට සිදුවිය. එහිදී එක් එක් ගෝලයන් තම තමන්ගේ මතවල එල්බ සිටීමත්, මහජන කැලඹීමත් සමඟින් එය පසුව ල්‍යං රාජවංශය අත්පත් කරගත් අතර "සූර්යවාදය" පුස්තක ඒ මේ අත විසිරී තිබුණේ නැවත සොයා ගැනීමට නොහැකි වන අයුරිනි.

වසර දහයකට පසුව, චි ෆංග තමාගේ සටන් කලාවට, ෂුඅන්දූ කන්දේ උරුමයට අමතරව සූර්යවාදයත් උපකාර වූ බව තමන් විසින්ම පිළිගත් අතර වෙළුම් පහ ඇති තැන් එකින් එක සොයා ගැනීමට හැකි විය. එක් පිටපතක් ෂෝ රටේ නිධානයක් වූ බවත්, තවත් පොතක් ෂෙජියැං හි තියන්තයි නිකායට අයත් වූ බවත්, තවත් එකක් ෂුවාන්දූ කන්දේ තබා ඇති බවත් සනාථ විය. අනෙක් දෙක පැවති ස්ථාන දශක ගණනාවක් තිස්සේ අභිරහසක්ව පැවති අතර ඒවා කොතැනකවත් නොමැති බවට අද වනතුරුම කටකතා පැතිර ගියේය.

යැන් වුෂිට ඔහුගේ මුල් අවදියේදී ෂෝ අධිරාජ්‍ය මාලිගයේ නිදන් තැන්පත් කළ තැනැත්තා සමඟ සම්බන්ධ වීමට අවස්ථාව ලැබුණි. භාවනාවෙන් පසු ඔහුගේ ධ්‍යානවේදයේ සැලකිය යුතු වැඩි වීමට එම එක් පොතක උපාය මාර්ග උපකාරි විය.

එය තමන් විසින්ම අත්වින්දොත් මෙම උපායමාර්ගය කෙතරම් බලවත්ද යන්න සැබවින්ම වටහා ගත හැකි වනු ඇත. එකකින් පවා සමස්ත කුසලතා දිව්‍යමය තත්වයට පත් කරගත හැකි විය."සූර්‍යවාදය" සඳහා තාඕ හොංජිං මුළු ජීවිත කාලය පුරාම වෙහෙස මහන්සි වී කළ සටන් ක්‍රමවල ඵලද ඇතුළත් විය. එය පාසල් තුනේම සටන් කලාවන් සහ භාවනා ක්‍රම [2] එකට එකතු කර, ඒවා එකිනෙකට අනුපූරකව හා ඒකාග්‍ර කරමින් සකසා තිබූ පුස්ථකයකි. එබැවින් මෙය සැබවින්ම විස්තීර්ණ හා දෝෂ රහිත විය. ඉතිරි පොත් හතරද කියවීමට හැකි වූයේ නම්, සටන් කලාකරුවන්ගේ පරමාධිපත්‍යය කාලය පිළිබඳ ප්‍රශ්නයක් පමණක් වනු ඇතිවාක් මෙන්ම, දෙව්ලොව මාර්ග පවා විනිවිද ගොස් මිනිසා සහ ස්වර්ගය එක්සත්කමට පැමිණීම නැවැත්වීම පවා තවදුරටත් කළ නොහැකි වනු ඇත.

මෙවර යැන් වූෂිගේ ගමනේ අරමුණ වූයේ නායකයෙකු නොමැතිව කැළඹීමකට ලක්ව ඇති අවස්ථාවෙන් ප්‍රයෝජන ගනිමින් ෂුඅන්දූ කන්දට රිංගා, "සූර්යවාද" පිටපත සොයාගැනීමයි . කෙසේ වෙතත්, කුන්යේ සමග ඔහුගේ සටනින් පසු ඔහුට වැටහුණේ කුන්යේගේ සටන් කුසලතා බටහිර ප්‍රදේශවල සෘජු පෙළපත තුල සාර්ථක වුවද, ඔහුගේ අභ්‍යන්තර කලාවන් සහ චි තවමත් ශක්තිමත් නොවූ බවයි.  ඔහුගේ සටන් සම්භවය යැන් වුෂිගේ සම්භවයට සමාන වූවාක් මෙන් පෙනුණි. හු ලුගුට චි ෆංග සමඟ යන්තම් බලයට සමාන වීමට හැකි වූයේ බොහෝ දුරට මෙම සම්භවය විය හැකි බවට යැන් වුෂිට සැකයක් ඇති විය. අවසාන නිගමනය වූයේ ඔහුගේ එම සටන් කුසලතාවන්ට සූර්‍යවාදයේ උපකාරද ලැබෙන්නට ඇති බවයි. එසේ වූවානම් එය දැන් තිබිය යුත්තේ කුන්යේ ළඟයි.

තුජුයේවල නව පරම්පරාවේ විශේෂඥයෙකු ලෙස, ප්‍රමාණවත් කාලයක් ලබා දුන්නත් කුන්යේට හූ ලූගු සමඟ ශක්තියෙන් සමාන වීමට නොහැකි වනු ඇත. බටහිර කලාපවල භාවනා ක්‍රම [3] සහ "සූර්යවාදයේ" එක් පිටපතක් හු ලුගු රැගෙන එන්නට ඇති බව දැන් යැන් වුෂිට පසක් විය.

මෙය යැන් වුෂි කෙරෙහි විශාල උනන්දුවක් ඇති කළේය, එබැවින් ඊළඟ දිනවලදී, ඔහු සෑම තැනකම කුන්යේ පසුපස ගිය අතර ඔහුට අවශ්‍ය වූ අවස්ථාවේ ඔහුට සටනකට අභියෝග කළේය. ඔහුට දිනුම ලබාගැනීමට නොහැකි වූවත් ගැලවීමට අවස්ථාවක් නොතිබූ නිසා කුන්යේගෙ ගෞරවය වියැකී ගිය අතර අවසානයේ ඔහු නැවත තුජුයේ වෙත යාමට තීරණය කළේය.

යැන් වුෂිට මේ වන විට තුජුයේ දක්වා ඔහු පසුපස හඹා යාමට කිසිදු සැලසුමක් නොතිබූ නිසා ඔහු විවේකීව නැවත ෆනින් අමතර මන්දිරයට පැමිණියේය.

ඔහු ආපසු පැමිණි විගසම, ෂෙන් ච්‍යාඕ අවදි වී ඇති බවත්, දැන් ඇඳෙන් බැස ඇවිදින්නට හැකි බවත් ඔහුගේ ගෝලයාගෙන් ඔහුට දැනගන්නට ලැබුණි.

අතේ උණ බම්බු සැරමිටියක් සමඟ ෂෙන් ච්‍යාඕ පෙනී සිටියේය. පියවරෙන් පියවර ඔහු සෙමින්, නමුත් ස්ථාවරව ගමන් කළේය.

සේවිකාවක්, මැදුරේ විවිධ මංපෙත් ඔහුට මෘදු ලෙස පහදා දී ඔහුට සහය වෙමින් සිටියාය.

"ගුරුතුමාට මගේ ගෞරවය." ගැහැණු ළමයා ඔහුට දිශාව පෙන්වූ පසු, ෂෙන් ච්‍යාඕ යැන් වුෂි වාඩි වී සිටි ස්ථානය දෙසට හැරී ආචාර කළේය.

"වාඩිවෙන්න." යැන් වූෂි අතේ තිබූ චෙස් [4]  කැබැල්ල බිම තබමින් පැවසුවේය. ඔහුත් සමඟ ක්‍රීඩාවේ නියැලී සිටි යූ ෂෙන්ග්‍යාන් කොතරම් දුක්ඛිත ලෙස පෙනුනේද යත් ඔහුගේ ප්‍රකාශය කිසිවෙකුට දරාගත නොහැකි විය. නමුත් ඒ සමගම, ඔහු ඉතා ප්‍රීතියෙන්ද, ඔහුට දැන් සමාව ලබා ලැබුනාක් මෙන්ද දිස් විය. පැහැදිලිවම, ඔහු මේ වන විට ක්‍රීඩාව තුළ අවාසි සහගත තත්වයක සිට තිබුණි.

සේවිකාවගේ සහාය ඇතිව ෂෙන් ච්‍යාඕ වාඩි විය.

ඔහු අවදි වූ පසු, බොහෝ දේවල් ගැන ඔහුට තිබූ මතකයන් අපැහැදිලි වී ඇති බව පෙනෙන්නට තිබුණි. ඔහුට තමාගේ නම සහ ඔහු පැමිණියේ කොහෙන්ද යන්න පවා මතකයක් තිබුණේ නැත. යැන් වුෂි සහ යූ ෂෙන්ග්‍යාන් සම්බන්ධයෙන් ගත් විට ඔහුට ඔවුන් ගැන කිසිඳු හැඟීමක් තිබුණේ නැත.

"ඔබට දැන් දැනෙන්නේ කොහොමද?" යැන් වුෂි ඇසුවේය.

“ගුරුතුමනි, ඔබේ සැලකිල්ලට ස්තූතියි.මට දැන් ඇඳෙන් බැස ඇවිදින්න පුළුවන්. මගේ අත් සහ පාද තවමත් දුර්වල බවක් දැනෙනවා. මගේ සටන් කලාව... එය තවමත් යථා තත්ත්වයට පත් වෙලා නැහැ වගේ."

"අත."

ෂෙන් ච්‍යාඕ, ඔහුට කීකරු ලෙස අත දුන්නේය. යැන් වූෂිගේ ඇඟිලි වහාම ඔහුගේ ' ජීව ශක්ති දොරටු [5] ' ලක්ෂ්‍යයට ළං විය.

ඔහු මොහොතක් නාඩි පරීක්‍ෂා කළ අතර, කලින් නොසැලකිලිමත් වූ ඔහුගේ මුහුණේ විමතියක සේයාවක් දිස් විය.

ඔහු ෂෙන් ච්‍යාඕ දෙස අර්ථවත් ලෙස බැලීය. නමුත් ච්‍යාඕට පෙනීමේ හැකියාව නොමැති වූ නිසා හිස් බැල්මක් හා අහිංසක පෙනුමක් තිබුණි.

යැන් වුෂි, "ඔබට යම් අපහසුතාවයක් දැනෙනවාද?"

ෂෙන් ච්‍යාඕ මොහොතකට සිතුවේ: “සෑම දිනකම මධ්‍යම රාත්‍රියට පමණ, මගේ සිරුර සීතල සහ උණුසුම් වෙනවා. මගේ පපුවේ වේදනාවක් සමඟ, සමහර විට මට ඇවිදීමට අපහසු වන තරමටම එය නැවත නැවත සිදු වෙනවා.”

යූ ෂෙන්ගියන් තවදුරටත් මෙසේ පැවසීය: “මම දැනටමත් වෛද්‍යවරයාට එය බැලීමට සැලැස්වූවා. වෛද්‍යවරයා පැවසුවේ, කනිෂ්ඨ සටන් සහෝදරයාට බරපතළ තුවාල සිදුවී ඇති නිසා, යථා තත්ත්වයට පත්වීමට යම් කාලයක් ගතවනු ඇති කියලා.”

යැන් වුෂි "කනිෂ්ඨ සටන් සහෝදරයා" ඇසුණත් ක්ලාන්ත වූ උපහාසයකින් යුතුව, තරමක් සුමට ලෙස එයට ලිස්සා යාමට ඉඩ දුන් බවක් පෙනෙන්නට තිබුණි. පසුව ඔහු ෂෙන් ච්‍යාඕට පැවසුවේ, "ඔබේ සටන් කලාව සම්පූර්ණයෙන්ම විනාශ වී නැහැ. දුර්වල බවක් පෙනන නමුත් ශක්තිමත් ලෙස ඇති ඔබේ ශරීරය තුළ තවමත් චිවල දුර්වල හෝඩුවාවක් තිබෙනවා. ප්‍රමාණවත් කාලයක් විවේක ගත් පසු ඔබේ සටන් කලාව යථා තත්ත්වයට පත් කිරීමට හැකි වනු ඇත. කෙසේ වෙතත්, අපගේ පවිත්‍ර චන්ද්‍ර නිකාය නොමිලේ යහපත් දේවල් සඳහා සහාය දක්වන්නේ නැහැ. මට ඔබගේ ජ්‍යෙෂ්ඨ සටන්කාමි සහෝදරයා සමඟ කළ යුතු වැඩක් තිබෙනවා. ඔහුට උදව් කිරීමට ඔහුත් සමඟ ඔබටත් යා හැකියි."

"ඔව්."

කාර්යය කුමක්දැයි ඔහු ඇසුවේ නැත. ඔහු යූ ෂෙන්ග්යාන්ට පැවසූ ආකාරයටම, ඔහු අනෙකා පවසන ඕනෑම දෙයකට එකඟ විය. ඉතිරි කාලයේදි ඔහු කිසිදු අධික චලනයකින් තොරව සන්සුන් ලෙස වාඩි වී සිටියේය.

එහෙත් ඔහුට සිදු වූ හානිවලින් පසු ෂෙන් චියාඕ අත්විඳිනු ලැබූ සියලු අපකීර්තියන් ගැන යැන් වුෂි කිසි ලෙසකින්වත් සැලුණේ නැත. ෂෙන් ච්‍යාඕගෙන් පෙනුණු දුර්වලකම නිසා ඔහුගේ ද්වේෂයක් වැඩි වී තිබූ අතර, ඔහුට මෙම හිම සුදු පැහැය වෙන කවරදාටත් වඩා නැති කිරීමට සහ අපවිත්‍ර කිරීමට තදබල ලෙස අවශ්‍ය විය.

“ඔබට දැන් ආපසු ගොස් විවේක ගත හැකියි,” ඔහු පැහැදිලි ලෙස පැවසීය.

ෂෙන් ච්‍යාඕ නිහතමානීව නැඟිට, පසුව සේවිකාවගේ සහාය ඇතිව සෙමින් පිටත් විය.

යැන් වුෂි ෂෙන් ච්‍යාඕගේ ගමන් මාර්ගය පිටුපසින් ඔහුගේ දෑස් යැවූ අතර යූ ෂෙන්ග්‍යාන්ට පැවසුවේ, "කෙලින්ම චී වෙත සංචාරයක් කර  අධිරාජ්‍ය කථන උපදේශක[6]  යාන් ෂිවන්ගේ මුළු පවුලම නැති කරන්න."

"ඔව්." යූ ෂෙන්ග්‍යාන් පැකිලීමකින් තොරව නියෝගය පිළිගත්තේය. “ඔහු කිසියම් ආකාරයකින් ගුරුතුමාගේ අප්‍රසාදයට පත් වුනාද?”

"ඔහු සමඟි නිකායේ ගෝලයෙක්. චීවල සමඟි නිකාය විසින් තොරතුරු දැනගැනීමට යොදාගෙන ඇති අයගෙන් එක්කෙනෙක්"

“ඔව්! සමගි නිකාය බොහෝ කලක සිට උඩඟු ලෙස ක්‍රියා කළා. යුවාන් ෂුෂු, ඔබගේ භාවනාවෙන් ප්‍රයෝජන ගනිමින් අපට බොහෝ කරදර ඇති කළා. අපි එතුමියට පාඩමක් කියා නොදුන්නොත් අපේ පවිත්‍ර චන්ද්‍ර නිකායෙන් වැඩක් නැහැ කියලා ඔවුන්ට පෙනෙන්න පුලුවන්.මම ඉදිරි දින දෙක ඇතුළත පිටත් වෙනවා!”

මොහොතකට නැවතී ඔහු තම මුහුණේ සිනහව රඳවාගෙන ව්‍යාකූල ලෙස ඇසුවේය, “ගුරුතුමනි, මම ෂෙන් ච්‍යාඕවත් එක්කගෙන යන්න ඕනද? ඔහුගේ සියලු සටන් කලාවන් අහිමි වෙලා. ඔහුට කිසිම දෙයකට උදව් කිරීමට නොහැකි වෙයි කියලා මට හිතෙනවා . ”

යැන් වුෂි සිනහවක සෙවණැල්ලක් සමඟ පැවසුවේ “දැන් ඔබ ඔහුට ඔබේ 'කනිෂ්ඨ සටන් සහෝදරයා' ලෙස ආමන්ත්‍රණය ක‍ළ නිසා, අවම වශයෙන් ඔබ ඔහුට ලෝකයවත් පෙන්විය යුතුයි. ඔහුගේ සටන් කලාව තවම යථා තත්ත්වයට පත්වී නැති බව සත්‍යක්. නමුත් එක්කෙනෙක් දෙන්නෙක් මැරීම ඔහුට තවමත් අපහසුවක් නොවිය යුතුයි.”

යූ ෂෙන්ග්‍යාන් අවසානයේ තේරුම් ගන්නට විය. ගුරුතුමා ෂෙන් ච්‍යාඕව සුදු කඩදාසි කැබැල්ලක් මෙන් සැලකූ අතර ඔහුව සම්පූර්ණයෙන්ම කළු පාට කිරීමට අවශ්‍ය විය. යම් දිනක ෂෙන් ච්‍යාඕ පියවි සිහියට පැමිණියද, එසේත් නැතිනම් ඔහුගේ මතකයන් නැවත පැමිණියද, කළ දේ නැවත ආපසු ගැනීමට ක්‍රමයක් නොතිබූ බැවින්, ඒ වන විට ඔහුට අවශ්‍ය වුවද දාඕවාදය පැත්තට යාමට නොහැකි වනු ඇත.

ඔවුන් හා සමාන වීම නරක දෙයක් වූයේ කෙසේද? ඔවුන් කිසිඳු බාධාවකින් හෝ දෘෂ්ඨියකින් තොරව කාරණා හසුරුවයි. ඔවුන් කැමති ඕනෑම දෙයක් කරයි. සමාජයේ සියලු නීතිරීතිවලින් නිදහස් විය. එපමණක් නොව, මිනිසාගේ ස්වභාවය නපුරු බවත් සෑම කෙනෙකු තුළම අඳුරු පැත්තක් ගැඹුරින් පවතින බවත් යූ ෂෙන්ග්යාන් තරයේ විශ්වාස කළේය. එය පෙන්වනවාද නැද්ද යන්න මත මිනිසුන්ගේ ස්වභාවය තීරණය විය. ඒ සියලුම බොරුකාර දාඕවාදී, බෞද්ධ සහ කොන්ෆියුෂියානු නිකායන්, සත්‍ය වශයෙන්ම තම ආත්මාර්ථකාමී ආශාවන් ධාර්මික හේතූන්වලින් වසන් කරමින් ගුණධර්ම ,සදාචාරය ,යමෙක් සැමවිටම කරුණාව වැළඳ ගත යුතු ආකාරය ගැන ඕනෑවට වඩා කතා කළහ.නමුත් ලෝකයේ සිංහාසනයට තරඟයක් පැමිණි විට, ජයග්‍රාහකයා ඒ සියල්ල ඉවත දමනවා. එවැනි තත්ත්වයක් යටතේ අත් ලේවලින් වැසී නොගිය රටක පාලකයෙක්වත් සිටියාද? අනෙක් අයට වඩා පිරිසිදුයැයි කිව හැක්කේ කාටද?

"ඔව්. කණිෂ්ට සටන් සහෝදරයාව හොඳින් මෙහෙයවීමට මම වග බලා ගන්නම්.”

පරිවර්තකගේ සටහන්:

[1] ස්වර්ගයට නැඟීම (飞升):  මෙම පදය සෘජුවම සඳහන් කරන්නේ මෙහි අමරණීයයෙකු බවට පත්වීමයි, නමුත් එය බොහෝ විට යමෙකු මිය ගොස් ඇති බව නොපවසා එය වෙනත් මාර්ගයකින් ප්‍රකාශ කිරීමක් ලෙස ඔවුන් අමරණීයත්වය අත්කර ගැනීමට ප්‍රාර්ථනා කරයි.

[2] භාවනා ක්‍රම (心法 xinfa):  වචනයේ පරිසමාප්ත අර්ථයෙන්ම  හදවත් කලාව හෝ මානසික වර්ධනයේ ක්‍රම වේ. එය චි සංසරණය සඳහා නිශ්චිත මාර්ගයක් වැනිය. භාවනා හරහා කෙනෙකුගේ අභ්‍යන්තර සටන් කලාවන් වර්ධනය කර ගැනීමේ විශේෂිත ක්‍රමයකි.

[3] බටහිර ප්‍රදේශ (西域 xiyu):   වර්තමාන මධ්‍යම ආසියාවේ Yumen Pass ට බටහිර දෙසින් පිහිටි ප්‍රදේශය ගැන පුරාණ චීනයේ භාවිතා කරන ලද යෙදුමකි.

[4] Weiqi (围棋):  පුරාණ චීනයේ ක්‍රීඩා කරන ලද චෙස් ක්‍රීඩාවක්, වර්තමානයේ එය "go" යන නමින්ද හැඳින්වේ. (එය AlphaGo විසින් ක්‍රීඩා කරන ක්‍රීඩාවයි.)

ඒ නිසා මෙතන Weiqi ලෙස ලියා තිබුණත් පහසුව පිණිස "චෙස්" යන්න භාවිතා කළෙමි. 

[5] Gate of Vitality (命门 mingmen):  චීන වෛද්‍ය විද්‍යාවේ ඉණ මත පිහිටා ඇති සත්‍ය acupoint ය. wuxia නවකතාවල මෙය කෙනෙකුගේ දකුණු අතේ මැණික් කටුවෙහි පිහිටයි. එය සටන් කලාකරුවන් සඳහා තීරණාත්මක ස්ථානයකි. මන්ද එය යමෙකුට බරපතල ලෙස තුවාල කිරීමට හෝ පහසුවෙන් මරා දැමීමට පවා භාවිතා කළ හැකිය.

[6] Grandmaster of Remonstrance (谏议大夫 jianyi dafu): Remonstrance  Officials හෝ කථන නිලධාරීන් ලෙස හැඳින්වෙන කීර්තිමත් නිලධාරීන්ගෙන් කෙනෙක්. ඔවුන්ගේ ප්‍රධාන කාර්යය වූයේ අධිරාජ්‍යයාට උපදෙස් දීම සහ විශේෂයෙන් ඔවුන් නුසුදුසු යැයි සලකන දේ ගැන ඔහු සමඟ නැවත සාකච්ඡා කිරීමයි.

My Note...

මෙහි සඳහන් පුස්ථකයේ නාමය වන "සූර්යවාදය" පරිවර්තනය කළේ "The Strategy of the Vermilion Yang" ඇසුරෙනි. සත්‍ය ලෙස මෙහි අර්ථය " වර්මිලියානු යැන්හි උපාය මාර්ග" විය යුතු වුවත් donghua හි මෙයට " Solarity" ලෙස තිබූ බැවින් පහසුව පිණිස මෙය "සූර්‍යවාදය" ලෙස හඳුන්වා ඇත. මේ පද දෙකම එකක් බව සලකන්න.

"Grandmaster" යන්නට "විශිෂ්ටාචාර්ය" යොදා ඇත..විශිෂ්ට + ආචාර්ය සන්ධි වී සෑදි ඇත.

පෙර පරිච්ඡේදය | සියලු පරිච්ඡේද | පසු පරිච්ඡේදය