දහ හත්වන පරිච්ඡේදය : අන්තර් සම්බන්ධ වීම

 මෙම රාත්‍රියේ වූ සිදුවීම දෙදෙනා ම බලාපොරොත්තු නොවූවක් විය.

කුමක් සිතන්නදැයි යැන් ජින් නොදැන සිටියේ ය. ඔහු ශෙන් ජිෂියෑන් දෙස බැලූ මොහොතේ දී, ඔහුගේ බැල්ම සන්සුන් වූව ද, සිදු වූ මෙම අනපේක්ෂිත සිදුවීමෙන් ඔහුගේ හදවත විස්මයට පත් ව තිබිණි. ශෙන් ජිෂියෑන් ද තමන් සිතිය යුත්තේ කුමක්දැයි දැන නොසිටියේ ය. ඔහුට හැකි වූයේ සන්සුන් බවක් මවාපාමින් දොරෙන් පිටතට ඇවිද ගොස් ඔහුට පිටුපසින් තදින් දොර වසා දැමීම පමණි. සිය සිරුරෙහි වූ දුර්වල බව කෙමෙන් පහවන තුරු යැන් ජින් හිස් බැල්මෙන් එදෙස බලා හුන්නේ ය.

දෙනෙතෙහි වූ මීදුම ක්‍රමයෙන් පහව යන තුරු  හෙතෙම සියතෙහි වූ අසිපත දෙස හැඟීම් විරහිතව බලා හුන්නේ ය. සිය හැඟීම් උච්චාවචනයට හේතු වෙමින් ඔහු යළිත් සිය අතීත දිවිය පිළිබඳ සිහින ය දුටුවේ. ඔහු දෙනෙත් විවර කළ විට යථාර්ථයත් සිහිනයත් වෙන් කර හැඳිනීමට නොහැකි විය.

කිනම් මොහොතක දී ශෙන් ජිෂියෑන් සිය නිල නිවස්නයට ඇතුළු වූවා ද යන්නවත්, ඇතුළු වීමෙන් අනතුරුව ඔහු කළේ කුමක් ද යන්නවත් යැන් ජින් දැන නොසිටියේ ය..... නමුත්, මේ දැන් ශෙන් ජිෂියෑන් දැක්වූ ප්‍රතික්‍රියාවට අනුව දැනට ඔහු කිසිවක් ම සොයා නොගන්නට ඇත. බොහෝ විට යැන් ජින් තමන් අතීතයේ විඳි ගැහැට සිහිනෙන් දුටුවා යැයි ඔහු සිතන්නට ඇත.

ශෙන් ජිෂියෑන්ගේ අත්ලෙහි උණුසුම තවමත් ඔහුගේ පිටිඅල්ලට දැනෙන්නාක් මෙනි. සිය අසිපත නැවත කොපුවෙහි ලූ යැන් ජින් යහන ආසන්නයට එය විසි කළේ ය.

ක්ලිං හඬ නගමින් එය යමක ගැටිණි. එදෙස බැලූ යැන් ජින් දුටුවේ ඒ කුඩා ජේඩ් බෝතලයක් බවයි.

ඒ, ඖෂධ පෙත්ත බහාලීමට ශෙන් ජිෂියෑන් යොදා ගත් බෝතලයයි. ඔහු පැමිණි මොහොතේ දී එය මෙහි විසි කර දැමූ අතර යළි ගෙනයන්නට අතපසු වී ඇත.

යැන් ජින් එය අසුලාගෙන සෙලෙව්වේ, ඉන් කිසිදු හඬක් නොනැඟිණි. එය හිස් එකකි.

බෝතල් පියන තදින් සවි වී නොතිබුණු අතර සියුම් ඔසු සුවඳක් කුඩා විවරයෙන් පිටතට ගලා ආවේ ය. යැන් ජින් දෙතොල් තද කරගත්තේ, හදිසියේ ම වැටහී ගියේ එය හුරුපුරුදු සුවඳක් බවයි.

දිවෙන් දෙතොල් ලෙවකමින් ඔහු අවශේෂිත ඔසුවේ ඉඟියක් රස වින්දේ ය. මොහොතක දෙගිඩියාවකින් පසු ඔහු සෙමෙන් බෝතල් පියන ඔසවමින් විවරය නැහැය ආසන්නයට ගෙන ආවේ සිය අනුමානය තහවුරු කරගනිමිනි.

සියුම් ඔසු සුවඳ විඳගනිමින් බොහෝ වේලාවක් යැන් ජින් නිහඬව ම හුන්නේ ය. ඉක්බිති පියන වසමින් නිරුවත් දෙපයින් යහන හැර දමා කැබිනෙට්ටුව අසලට ගිය යැන් ජින් එතුළ වූ කුඩා පොදියක් පිටතට ගත්තේ ය.

කලාතුරකින් පිටතට ගත් නිසාවෙන් ම එය පෙන්වූයේ නැවුම් බවකි. ඔහු එය විවර කොට කුඩා ජේඩ් බඳුන එතුළට දමා පොදිය යළි ගැට ගසා යළිත් කැබිනෙට්ටුව තුළට දැමුවේ ය.

කුඩා පාර්සලය යලි තැබීමේ දී එතුළ වූ ජේඩ් බෝතල් එකිනෙක ගැටී ඝෝෂාකාරී හඬක් නැඟිණි.

බිඳෙනසුළු හා රසවත්.

එම රාත්‍රියෙන් අනතුරුව කිසිවක් ම සිදු නොවූවාක් මෙන් විය.

මෝඩ ගුරුවරයා සහ ගෝලයා මතුපිටින් සාමකාමී සම්බන්ධතාවයක් දක්වමින් කටයුතු කළහ.

යැන් ජින් තවදුරටත් අල්පව ම කතාබහ කිරීමෙහි නිරත විය. ඔහු සැලසුම් කර ඇත්තේ මොනවාදැයි දැන නොසිටි ශෙන් ජිෂියෑන්, කිසිත් සිදු නොවූවාක් මෙන් ම ක්‍රියා කළේ ය. ඔහු සුපුරුදු පරිදි යැන් ජින් හට සැලකුම් කළේ ය. කරුණු මේ දක්වා පැමිණ ඇති හෙයින්, ඔහු මෝඩයෙකු මෙන් පෙනී සිටින්නට කැමති විය. හැරත්, වෙනත් අයුරකින් හැසිරීමට වඩා මෙය ඔහුට එල්ල විය හැකි හානියන්ගේ බර අඩු කරනු ඇත.

අඩු තරමින්, ඔහු සිය හෘදයාබාධය සුව කරගන්නා තෙක් වත් මෝඩයෙකු මෙන් හැසිරිය යුතු විය.

මත්ස්‍ය කොරලය, ආහ්... එය මතකයට පැමිණි විගස ම ඔහු රහසිගත ව කුමන්ත්‍රණය කරන්නට වූයේ ය. එය ඉතා වටිනා, දුර්ලභ දෙයක් වූ අතර, සියල්ලට ම වඩා ඔහුගේ දිවිය හා බැඳී පවතින්නක් විය. සෙස්සන් කෙරෙහි විශ්වාසයක් තැබිය නොහැකි වූ හෙයින් ම තමන් මත ම යැපෙන්නට ඔහුට සිදුවිය.

අවාසනාවට, එය ක්‍රියාවට නැංවීම, ඒ ගැන සිතීමට වඩා අසීරු විය. ඒ රහසිගත ක්ෂේත්‍රය පිහිටියේ කොහිදැයි ඔහු දැන නොසිටියේ ය. ඔහු දැන සිටි එක ම දෙය නම්, අනාගතයේ දී යැන් ජින් එම රහසිගත ක්ෂේත්‍රයට ඇතුළු වීමට ඉඩක් ඇති බව පමණි.

...... අවසානයේ දී, තවදුරටත් කතා නායකයාගේ කලවයෙහි එල්ලී සිටීමට සිදුවේ.

ශෙන් ජිෂියෑන් ශෝකයෙන් සුසුම් ලෑවේ ය. රහසිගත ක්ෂේත්‍රය සහ මත්ස්‍ය කොරළය සොයා ගනු වස් ඔහුට තවදුරටත් යැන් ජින්ව සැනසීමට සිදුවන බවක් පෙනෙන්නට තිබිණි.

මෙය අවසන් වූ පසු දෙදෙනාට විවෘතව සහ අවංකව එකිනෙකා සමඟ කතා කළ හැකි වනු ඇත. ප්‍රතිඵලය කුමක් වේ ද යන්න..... එය අමතක කරන්න. ඔහු ඒ පිළිබඳව පසුව සිතා බලනු ඇත.

....................

ශීත ඍතුව ක්‍රම ක්‍රමයෙන් ඈතට ඇදී ගියේ කාලගුණය යළිත් ක්‍රමයෙන් උණුසුම් කරමිනි. සිව්වන වැඩිහිටියාගේ සුපරික්ෂාකාරී රැකවරණය යටතේ ශෙන් ජිෂියෑන්ගේ හෘද රෝගී තත්ත්වය බොහෝ දුරට ස්ථාවර වී තිබිණ. එය ඔහුට අවැසි අවස්ථාවන්හි දී කුඩා ප්‍රමාණයේ අධ්‍යාත්මික බලයක් භාවිතයට ඉඩ හරිමින් පහසුවෙන් මතු නොවුණි.

මේ අතර, චින්‍යුන් නිකාය බෙර වයමින් චන්ද්‍ර වර්ෂයේ පළමු මස ආරම්භය සනිටුහන් කළ අතර සාමාන්‍යයෙන් පස් වසරකට වරක් පවත්වනු ලබන අසිපත් තරඟ සම්මේලනයෙහි සැලසුම් කිරීම් ඇරඹිණ.

" මෙය සුළු දෙයක් පමණයි. නැතිනම් සොන් මින් සිතාවි මම අලස යැයි කියා.... ඒකට කමක් නැහැ. තවමත් මට අ'ජින් සිටිනවානෙ. අහ් "

යැන් ජින් කුටියට ඇතුළු වන්නා හා ම ශෙන් ජිෂියෑන් සිව්වන වැඩිහිටියාගේ වදන් කපා හැරියේ ය. අවසන් දෙවැකිය සවන් වැකුණු හේ පසෙකින් සිට ගෙන සිටියේ කිසිත් නොදොඩමිනි.

ඔහු පැවසූව යැන් ජින් හට ඇසුණු බව ශෙන් ජිෂියෑන් නොසලකා හැරියේ ය. තවමත් ඔහුට විශාල අධ්‍යාත්මික බලයක් භාවිතා කළ නොහැකි වූ හෙයින් යැන් ජින් හට වැඩ අධික විය. මෙම සිදුවීම නිමා වූ පසුව ......

සිය සිතිවිලි ඉවත ලූ ශෙන් ජිෂියෑන් ඔහුට පවසා සිටියේ, " අසිපත් තරඟ සම්මේලනයට තවත් මාස කිහිපයක් පමණයි. ෂිලියන් කන්ද බොහෝ කලකින් පිරිසිදු කර නැහැ.
දින කිහිපයකින් පසු, ඔබ සුදානම් වූ පසු, ඔබට හැකියි මා සමඟ එහි ගොස් බලන්නට. "

යැන් ජින් එකඟතාවෙන් පිළිතුරු දුන්නේ ය.

ශෙන් ජිෂියෑන් ඔහුට තවත් කෙටි නියෝග කිහිපයක් ලබා දුන්නේ ය.

නිකායේ සාමාන්‍ය ගෝලයින්ට විවෘත වීමට අමතරව අසිපත් තරඟ සමුළුව, නිකායට ඇතුළු වීමට කැමැත්ත දක්වන්නන්ගේ සහභාගිත්වයට ද උනන්දු කළේ ය.

ප්‍රථම ස්ථාන තුන දිනාගන්නා ගෝලයින් තිදෙනා හට, සැඟවුණු කඩු මණ්ඩපයෙන් අසිපතක් ලබා ගැනීම හැරෙන්නට නිකාය වැඩිහිටියන්ගේ හෝ ඊටත් වඩා නිකාය නායකතුමාගේ පෞද්ගලික ගෝලයා ලෙස පිළිගැනීමේ අවස්ථාවක් ද විය. පෞද්ගලික ගෝලයකු ලෙස පිළිගැනීම, සැතපුම් දහස් ගණනක ගමනක ඇරඹුමක් මෙනි.

එහෙයින් ම බොහෝ අය ලියාපදිංචි වීමට පමණක් ම මහත් වෙහෙසක් ගත්හ.

ශෙන් ජිෂියෑන් හට පැවරී තිබූ කාර්‍යය වූයේ, කන්ද පරීක්ෂා කිරීමත්, ගෝලයින් හා තරඟකරුවන් සඳහා අත්හදා බැලීම් සැකසීමත් ය.

සාමාන්‍ය ගෝලයින්ට මෙල්ල කළ හැකි තරමේ යක්ෂාවේශිත මෘගයෝ රැසක් ම සාමාන්‍යයෙන් කන්දෙහි වූහ. කෙසේනමුත්, පස්වසරක් ම ඉක්ම ගොස් තිබුණේ, ශෙන් ජිෂියෑන් එම ස්ථානය පරීක්ෂා කොට වඩාත් භයානක රාක්ෂයින් ඉවත් කොට පිරිසිදු කොට අවැසි පරිදි කුඩා රාක්ෂයින් එකතු කිරීම නුවණට හුරු විය.

සිය හෘද රෝග තත්ත්වයේ උත්සන්න වීම සඟවාගෙන සිටි හෙයින්, කිසිවෙකුත් විසින් නොකළ යුතුව තිබූ උපකල්පනයන් ගොඩ නැගීම වළක්වාලනු වස් ශෙන් ජිෂියෑන් හට මෙම කටයුත්ත සඳහා කැටුව යා හැකි වූයේ යැන් ජින් පමණි. යැන් ජින් ප්‍රධාන බලය වූ අතර ම බැරෑරුම් වැඩ බොහෝමයක් මේ වනවිටත් ඔහු අතින් සිදු වී තිබිණි. මෘගයින් ඉවත් කොට පිරිසිදු කරන්නට යොදාගත් දිනයේ පමණි, ශෙන් ජිෂියෑන් ඔහු හා එක් වූයේ.

ශිලියන් කන්ද අවශ්‍යයෙන් ම විශාල වපසරියක පැතිර තිබූ දිගු කඳු පන්තියක් වූ අතර, කෙතරම් විශාල ද යත් දහසකට ආසන්න පිරිසකට එකවර එහි ඇතුළුවන්නටත්, එකිනෙකා හා මුණනොගැසෙමින් පුහුණුවන්නටත් හැකියාවක් විය.

අභ්‍යන්තරයෙහි අධ්‍යාත්මික බලය මුද්‍රා තබන අරාවක් වූ අතර, එය ක්‍රියාත්මක වූ කල ගෝලයින්ගේ අධ්‍යාත්මික බලය යටපත් කරන්නට හැකියාවක් තිබිණි. මෙම විභාගය, අධ්‍යාත්මික බලයෙන් තොරව ගෝලයින්ගේ ශක්‍යතාව මනින්නට යැයි කියනු ලැබේ.

" දිගුකාලීනව කෙනෙකුගේ ආධ්‍යාත්මික බලය මත ම පමණක් යැපුණොත්, ඔහුට මූලික කුසලතා අමතක වීම වැළැක්විය නොහැකී. " ශෙන් ජිෂියෑන් මෘග බහාලුම් බෑගය විවර කොට එහි වූ රාක්ෂ මෘගයින් පිටතට දමමින් පැවසූවේ " මේ පරීක්ෂණය ඉතාමත් සිත්ගන්නා සුළුයි. "

කුඩා යක්ෂ මෘගයින් වහා විසිර ගියේ, සියල්ලෝම සුදුසු විවේක ස්ථානයන් සොයමින් සිටියහ. මද වේලාවකට එම ප්‍රදේශය සජීවී බවින් පිරී ගියේ ය.

මෙම රාක්ෂ මෘගයින් බෙහෙවින් සුලබ උන් වූයේ, හඬ නඟන විශාල තාරාවන්, විශාල තියුණු දත් ඇති සාවුන්, පනින විශාල ගෙම්බන්, ගස් මත අලසව දරණ ගසා සිටින්නට කැමති, යාන්තමින් විෂ සහිත සර්පයින්, මහ හඬින් බිරුසන් දෙන කොබෙයියන් ආදීන්... සියල්ලෙන් ම ස්වල්පයක් බැගින් එහි විය.

මෙම මෘගයෝ රෞද්‍ර වූවන් නොවූහ. උන් සාපේක්ෂව විශාල වූහ. එබැවින් තිරිසන් ශක්තිය ප්‍රමාණවත් වනු ඇත. අධ්‍යාත්මික බලය කිසිසේත් ම අවැසි නොවේ.

ආත්ම අගුළු අරාව හැර සාමාන්‍ය හුදෙකලා කරන ව්‍යුහයන් සහ දුරස්ථකරණ ව්‍යුහයන් ද කඳුවැටියෙහි අන්තර්ගත විය. හුදෙකලා ව්‍යුහයන් මගින් සිදුකරනුයේ ෂිලියන් කන්දට සොරෙන් ඇතුළු වීමත් ඉන් පිටවීමත් වැළැක්වීමට ය. ඒ අතර ම, දුරස්ථකරණ  ව්‍යුහයන්, අනතුරකට මුහුණ පෑ විටක දී ටෝකනය කුඩු කර වහාම ආරක්ෂිත ස්ථානයකට ගෝලයින්ව රැගෙන යාම සඳහා යොදාගැනිණි.

ශෙන් ජිෂියෑන් ස්ථාන කිහිපයක් ම පරීක්ෂා කර බැලුවේ ය. උසස් ව්‍යුහයන් කෙරෙහි ප්‍රවීණයෙකු නොවුව ද, බොහෝ සාමාන්‍ය ඒවා හැසිරවිය හැකි විය.

කුඩා ගැටළු කිහිපයක් විසඳීමෙන් අනතුරුව ඔහු වටහා ගත්තේ යමක් නිවැරදි නොවන බවයි. " මෙහි අමතර ආත්ම ජේඩ් එකක් වළලා තියෙන්නේ ඇයි? එය අමුතුයි. " ඔහු මොහොතක් කල්පනා කළේ ය. " මෙය සාමාන්‍ය හුදෙකලා ව්‍යුහයක් වුණත් මේ අමතර ජේඩ් එකෙන් නිසියාකාරව ව්‍යුහය ක්‍රියාත්මක වීම වළකනවා. "

සාමාන්‍ය හුදෙකලා ව්‍යුහයක් මගින් පුද්ගලයින් ඇතුළු වීම හා පිට වීම පාලනය කළ ද, එය බාහිර ලොව හා ඇති සියලු ම සබඳතා අත්හිටුවන්නේ නැත. හැරත්, එය දුරස්ථකරණ ව්‍යුහයන්ට ද බලපෑම නොකරයි.

කෙසේවෙතත් කුඩා ගෝලයින් කණ්ඩායමට අවැසි තරම් ආධ්‍යාත්මික බලයක් නොමැති බැවින් මින් පැනගැනීම කළ නොහැකි වනු ඇත. ඒ අනුව, ඔවුන් සදාකාලිකව ම මෙහි සිරවනු ඇත!

ශෙන් ජිෂියෑන් ගෙරෙව්වේ ය. අසිපත් තරඟ සමුළුව හැරුණු කොට, කඳුවැටිය මුද්‍රා තබන ලදී. කිසිවෙකුටවත් මෙහි ඇතුළු වීමට අවකාශයක් නැත. එසේ තිබියදීත් මෙම ගැටළුව පැනනැඟුණේ කෙලෙස ද?

ආත්මීය ජේඩ් ගල, එය නොදැනුවත්වම විය නොහැකි තරම් අහම්බයක් වූ ස්ථානයක තැන්පත් කොට තිබිණි. එය සීමිත අධ්‍යාත්මික බලයක් සහිත කිසිදු කුඩා ගෝලයෙකුගේ ක්‍රියාවක් විය නොහැක. එමෙන් ම, එම සෘජු වෙනස් කිරීම පරිපූර්ණ ලෙස සමතුලිත වූ අතර, වෙනස් කරන විට දී මුල් සැකැස්ම බිඳ නොවැටෙන බව සහතික කළේ ය.

එම අමතර ආත්මිය ජේඩ් ගල ඉවත් කිරීමේදී ද එම සැලකිල්ල ගත යුතු වනු ඇත.

ශෙන් ජිෂියෑන් මොහොතක් කල්පනා කොට තීරණය කළේ ආත්මීය ජේඩ් ගල ඉවත් කිරීමට යැන් ජින්ගේ සහය ලබාගැනීමට ය. නමුත්, පසුපස බැලූ ඔහු දුටුවේ යැන් ජින් මීටරයක පමණ දුරින් සිටගෙන සිටින අයුරුයි. ඔහුගේ වත අතිශයින් ම සන්සුන් වූයේ, ශෙන් ජිෂියෑන්ගේ සිත අහේතුක ව කලබල කරමිනි.

ඔහු තමාව ම අස්වැසුවේ ය. " අ'ජින්, පැමිණ මට උදව් කරන්න. "

යැන් ජින් නිහඬව ම සිටගෙන සිටියේ, පැමිණෙන්නට කිසිදු චේතනාවක් නැතිවාක් මෙනි. හිස සෙලවූ ඔහු සෙමින් පැවසූවේ " ෂිෆු, සුබ ගමන්  "

ශෙන් ජිෂියෑන් හට හදිසියේ ම දැනුණේ නපුරක සේයාවකි. යැන් ජින් සෙමෙන් සිය අත ඔසවමින් ඇඟිලිවලින් ආත්මීය ගලක් බිඳ දැමුවේ ය. ශෙන් ජිෂියෑන්ගේ ආධ්‍යාත්මික බලය ඒ හා ම මැඬපැවැත්විණි. යැන් ජින්, ව්‍යුහය ක්‍රියාත්මක කර ඇත!

ඉහළ නැඟුණු ඝන මීදුමකින් ශෙන් ජිෂියෑන් මුළුමනින්ම වැසී ගියේ තත්පර කිහිපයකින් ම ය. ඔහු යාන්තමින් යැන් ජින්ගේ රුව දුටු අතර සහජයෙන් ම එදෙසට දිව ගියේ ය.

මෙම නොදන්නා අනතුරු හේතුවෙන්, පැවැත්ම සඳහා වූ ශෙන් ජිෂියෑන්ගේ ආශාව එහි උපරිමයට ම ළඟා විය. මෙම පියවර ඉතා බලවත් වූයේ, යැන් ජින් හට සමතුලිතතාව රඳවා ගැනීමට ඔහුව පියවර කිහිපයක් පසුපසට යවන තරමිනි.

යැන් ජින් දෙසට තමන් ම විසිවූ වහා ම ඔහුගේ අතින් තද කොට අල්වා ගත්තේ, තවමත් ජීවතුන් අතර සිටින බවට තහවුරු කරගෙන ඉක්මනින් ම පසුපස බැලුවේ ය.

එක් බැල්මකින් ම ඔහු දුටුවේ ඝන බියකරු මිහිදුම උඩින් පාවෙමින් ඇති බවයි. එය යැන් ජින් පෙර හුන් ස්ථානය මඟහරිමින් ඉක්මනින් ම ඔවුන් ගිලගත්තේ ය.

යැන් ජින් !

කම්පනයක් සහිතව දුරස්ථකරණ ව්‍යුහය ක්‍රියාත්මක වීම ඇරඹිණ. එක්වරම ශෙන් ජිෂියෑන් සිදු වූ සියල්ල වටහා ගත්තේ ය. ස්වකැමැත්ත පරිදි ෂිලියන් කඳුවැටියට පුද්ගලයින්ට ඇතුළු වීම හෝ පිටවීම තහනම් කොට තිබිණි. නමුත්, දින කිහිපයකට පෙරාතුව....

දින කිහිපයකට පෙර, ඔහු යැන් ජින් හට අණ කළේ මෙහි පැමිණ පූර්ව නිරීක්ෂණයක් කරන්නට කියායි!

ආත්මීය ජේඩ් ගලක ආගමනයත්, ඝන මීදුම මඟහැර ආ කුඩා ඉඩ ප්‍රමාණයත් සියල්ල ම යැන් ජින් හට අදාළ විය!

පසුවූ දින කිහිපයෙහි පෙනුණු සාමයට, පතුලෙහි සැඟවුණු එදිරිවාදිකම් සැඟවිය නොහැකි විය.

ශෙන් ජිෂියෑන්ගේ අධ්‍යාත්මික බලය සම්පූර්ණයෙන් ම යටපත් විය. ඔහු හා යැන් ජින් එකිනෙකා අසල සිටගෙන හුන් අතර, යැන් ජින්ගේ ආධ්‍යාත්මික බලය ද වහ වහා විසිරුවා හරින බව ඔහුට දැනිණි. එහි අරුත, ව්‍යුහය යැන් ජින් මත ද බලපාන බවයි.

එය ඔහුට යම් තරමක සහනයක් අත්කර දුණි. අවම වශයෙන්, මෙමගින් යැන් ජින් හට පහසුවෙන් ඔහුව ඉවත් කළ නොහැකි වනු ඇත.

මිහිදුම, ඒ හරහා දැකිය නොහැකි තරමේ පාරාන්ධ බවකින් ඝන වූයේ, සිටිනවුන්ට ඔක්කාරය දනවන්නට සමත් වන අයුරින් එම පෙදෙස සෙලවෙන්නට විය. ශෙන් ජිෂියෑන්ගේ අත සෙමින් හා අවධානයෙන් පහළට ලිස්සා ගියේ ය. දත්මිටි කමින්, යැන් ජින්ගේ විරෝධය නොතකා ඔහු ඔහුගේ ඇඟිලි එකින් එක විවර කළේ ය.

ඉක්බිති ඔහු යැන් ජින්ගේ ඇඟිලි ඔහුගේ ම ඇඟිලි අතරට මිරිකා තදින් තද කළේ ය.

අන්තර් සම්බන්ධිත ඇඟිලි.

ශක්තිමත් ම, වෙන් කිරීම ඉතාමත් ම අපහසු පිහිටුම.

ඔවුන් විසිවී යද්දී, ශෙන් ජිෂියෑන් දත්මිටි කමින් කල්පනා කළේ, යැන් ජින් නම් මෙම කුඩා පැටියාට මෙවර නම් ඔහුව සොලවන්නට නොහැකි වනු ඇතැයි කියායි!

_____________________________

පෙර පරිච්ජේදය | සියළුම පරිච්ජේද | පසු පරිච්ඡේදය