දොළොස්වන පරිච්ඡේදය | උළුක්කුව

 සැඟවුණු කඩු මණ්ඩපයේ සිදුවීමෙහි සත්‍යය හෙළි වීම ක්‍රමයෙන් පමා වත් ම, ගෙවෙන දිනයන්හි ක්‍රමක්‍රමයෙන් සාමය ස්ථාපිත විය.

මතුපිටින්, ගුරුතුමා සහ ගෝලයා සමඟිව සහජීවනයෙන් හිඳිනා බවක් පෙනුණ ද, මේ කුඩා ඉත්තෑවා සිය කූරු සඟවාගෙන සිටින බවත්, විදින්නට සුදුසු ම මොහොත එළඹුණු විට තමන්ට එයින් විදින බවත් ශෙන් ජිෂියෑන් දැන හුන්නේ ය.

යැන් ජින්ගේ උදෑසන පන්ති නිම වන තුරු, ශෙන් ජිෂියෑන් සහ තෘණ පොහොට්ටුව එක්ව සයනයෙහි වැතිරී ගිමන් හැරියහ. සුසුමක් සමඟින් ශෙන් ජිෂියෑන් අලස ලෙස යහනෙහි පෙරළී ගියේ ය.

යැන් ජින් හට පන්ති සඳහා යාම කළ යුතු වූයේ මන්දැයි සිතා ගත නොහැකි වූ තෘණ පොහොට්ටුව ද ශෙන් ජිෂියෑන්ගේ සුසුම දෝංකාර දෙන ලෙසින් සුසුම් ලෑවේ ය.

ශෙන් ජිෂියෑන් එහි සිහින් පත්‍රයක් හා සෙල්ලම් කරමින් " අ'ජින් සැනසීමට ඉතා අපහසුයි " යනුවෙන් මිමිණුවේ ය.

තෘණ පොහොට්ටුවට ඔහු පැවසූව වැටහී එකඟතාවයට එළඹෙමින් වහා ම සිය පත්‍ර සෙලවූයේ ය. සැනසවීමට ඉතාමත් ම අපහසුයි. එය ඉතා ම විනීත ලෙස හැසිරී තිබුණේ, යැන් ජින්ගේ කබා අත්වල පැද්දෙන්නට ඇති දුර්ලභ අවස්ථාව උදෙසා ය.

එක් පුද්ගලයෙක් සහ එක් තෘණ පැළයක් බොහෝ වේලාවක් තිස්සේ මුහුණට මුහුණලා එකිනෙකා දෙස බලා හුන් අතර, එක හඬින් සුසුමක් හෙළූහ.

තෘණ පැළය මොහොතකට යහන මත විහිද ගොස් පසුව හිරු රැස් ස්නානය සඳහා පිටතට ගියේ ය. ශෙන් ජිෂියෑන් යහන මත හිඳගෙන සැනසිලිදායකය තුරුලු කර ගත්තේ, එදින සිදු වූ සිදුවීම යළි සිහියට ඒම නොවැළැක්විය හැක්කක් විය.

මද වේලාවකින් සාමාන්‍ය තත්ත්වයට පත් වූ නමුදු, යැන් ජින්ගේ දෑස් රත් පැහැ ව තිබූ බැව් ශෙන් ජිෂියෑන් පැහැදිලිව ම දුටුවේ ය.

එම සීතල මෙන් ම සුන්දර පැහැය, ඔහුගේ අසිපත් හරඹය මෙන් ම නිර්දය සහ උදාසීන විය.

ඒ අවස්ථාවේ දී ශෙන් ජිෂියෑන් බෙහෙවින් කලබලයට පත්ව සිටි බැවින් ඒ පිළිබඳ ව වැඩි අවධානයක් යොමු නොකළත් පසුව ඔහු සන්සුන් වූ විට සිහිපත් වූයේ, යැන් ජින් යක්ෂයෙකු වූ පසු සැමවිටම ඔහුගේ දෙනෙත් රත් පැහැයට හැරුණු බව පොතේ සඳහන් ව තිබූ බවයි.

පොතෙහි සඳහන් වූයේ, යැන් ජින්ගේ ආත්මීය මූලය ඉවත් කළායින් පසුව ඔහුට තවත් අමරණීය මාර්ගයේ ධ්‍යාන වඩා අමරණීයයෙකු විය නොහැකි බැවින් ඔහු වෙනත් මාර්ගයක් සොයා ගෙන යක්ෂයෙකු බවට පත් වූ බවයි. නමුත්, ඔහුගේ ආත්මීය මූලය සුරක්ෂිතව තිබිය දී පවා හදිසියේ ම ඔහු තුළ යක්ෂ මාර්ගයේ සලකුණු පවතින්නේ කෙසේ ද?

ශෙන් ජිෂියෑන් ඉමහත් බියට පත් වූ අතර, කුඩා ඉත්තෑවා තනි අතින් තමන් මරා දමා සංදර්ශනයක් පෙන්වනු ඇතැයි කනස්සල්ලට පත් විය. 

මද වේලාවකින් හදිසියේ නැගිට ගත් ඔහු පුහුණුවීම් සඳහා සිය අසිපත අතට ගත්තේ ය.

මෑත දින කිහිපයේ දී ඔහු මුල් හිමිකරුගේ ගබඩා පරිශ්‍රය උඩු යටිකුරු කළේ, මුල් හිමිකරු විසින් රචිත අසිපත් පුහුණු අත්පොතක් සොයා ගත්තේ ය. එහි ප්‍රතිඵලයක් ලෙස ඔහු සිය අසිපත් හරඹය වැඩිදියුණු කර ගැනීමට බෙහෙවින් වෙහෙස වෙමින් පුහුණුවෙහි නිරත වීය.

ඔහු ගුරුවරයා යන නම භාවිතා කරන බැවින්, ඔහු ඉගැන්වීමට තරම් සුසුස්සෙකු විය යුතු ය. ඇතැම් විට, යැන් ජින් ඔහුගේ කැපවීම දැක ඔහුට සමාව දෙන්නට ද පෙළඹෙනු ඇත.

පුහුණුවෙහි යෙදෙන තරමට ම ඔහුට මුල් හිමිකරු කෙතරම් දක්ෂ ද යන්න වටහා ගත හැකි විය. පෙර හුන් නිකාය නායකතුමා මෙතරම් ම ඔහුව අගය කිරීම මෙන් ම නිකායේ හොඳ ම අසිපත් ධ්‍යානවේදියා ලෙස ඔහුව පත් කිරීම පුදුමයක් නොවිණි. ඔහුගේ තත්ත්වය දුර්වල වීමට බොහෝ කලකට පෙර, දුර්ලභ සහ තීක්ෂණ බුද්ධියෙන් යුතු වූ අසිපත් පුහුණු අත්පොත් නිර්මාණය කරන්නට ඔහුට හැකියාව ලැබී තිබිණි.

ශෙන් ජිෂියෑන්, සිය අසිපත් පුහුණුවෙහි යෙදුණු සැම විට ම ඔහුට දැනුණේ තමන් සම්පූර්ණයෙන් ම අසිපත හා ඒකාබද්ධ වූ බවකි. බොහෝවිට එය මාංශපේශීන්ගේ මතකයන් විය හැකිය.

අසිපත් චලනයන් මාලාවක් සම්පූර්ණ කිරීමෙන් අනතුරුව, ශෙන් ජිෂියෑන් කඳු මුදුනක් ආසන්නයේ සිටියේ ය. ඔහු සුසුමක් හෙළූ අතර, ඔහුගේ හද පතුලේ වූ අඳුරු බව පහව ගොස් සැනසිල්ලේ සහ තෘප්තියේ හැඟීමක් පමණක් ඉතිරි විය. එය ඔහුට ලෝකය පුරවා දැමීමට මෙන් ම සිය අසිපත රැගෙන දුරබැහැර බිම්වල සංචාරය කරන්නට ද ආශාවක් ඇති කළේය.

මුල් හිමිකරු ද ආත්ම ශක්තිය ඇති තරුණයෙකු විය යුතු ය. අවාසනාවන්ත ලෙස ඔහුගේ හෘදයාබාධය මතු වීමෙන් පසු, ඔහුගේ සිහින දූවිලි බවට පත් විය.

කඳු මුදුන ආසන්නයේ සුළඟ රළු වූයේ, ශෙන් ජිෂියෑන්ගේ සිවුරෙහි සාය ඔහු වටා ගසාගෙන යමිනි. ශෙන් ජිෂියෑන් මද වේලාවක් සිටගෙන සිටියේ, සිය උණුසුම් වූ රුධිරය සිසිල් වන තුරු ය. අවසානයේ දී ඔහු පතුලක් නොපෙනෙන කඳු බෑවුම දෙස වරක් නෙත් හෙළා අඩියක් පසුපසට ගෙන නිවසට යාමට ආපිට හැරුණේ ය. යැන් ජින් සිටිනු දුටු වහා ම ඔහු නැවතුණි. යැන් ජින් එහි පැමිණියේ කිනම් වෙලාවේ ද, කොපමණ කාලයක් තිස්සේ ඔහු තමන් දෙස බලා සිටියා ද යන්න පිළිබඳව ඔහු සතුව කිසිදු දැනීමක් නොතිබිණි.

" අ'ජින් නැවත පැමිණිලා. " ශෙන් ජිෂියෑන් ආචාර කළේය. ඔහු අතෙහි අසිපතක් තිබෙනු දුටු ඔහු " ඒ කඩුව සුදුසුදැ "යි සැහැල්ලුවෙන් එකතු කළේ ය.

යැන් ජින් පුහුණුවීම් සඳහා භාවිතා කළ අසිපත කැබලිවලට කැඩී ගිය බැවින් ශෙන් ජිෂියෑන් ඔහුට මෙම නව අසිපත ලබා දී තිබිණි.

යැන් ජින් ඇසිපිය හෙළා, දැල්වුණු සැකය ඒ අතර සැඟවීය. ඔහු ගෞරවණීය ලෙස ආචාර කළේ ය. " ස්තුතියි ෂිෆු, මේ කඩුව මට තෑගි කළාට. එය ඉතාමත් ම හොඳයි. "

යැන් ජින්ගේ හැසිරීමෙහි සුපරික්ෂාකාරී බවක් හෝ ආරක්ෂාකාරී බවක් නොදුටු ශෙන් ජිෂියෑන්ගේ මුවෙන් සිනහවා විහිදෙන්නට ඉතාමත් ම ආසන්න විය. අධිශ්ඨානශීලී ව තමන්ට ම මුමුණාගත් ඔහු, නිකට ඔසවා කෙළින් ම පැවසුවේ ය. " මට දැකීම සඳහා චලනයන් දෙකක් පුහුණුවෙන්න. "

ශෙන් ජිෂියෑන් යහපත් මානසිකත්වයක සිටින අයුරක් දිස් විය. ඔහුගේ වත්මන් සිනාමුසු මුහුණ, ඔහුගේ සුපුරුදු සන්සුන් සරල බවින් මදකට මිදී තිබිණි. ඔහුගේ අසිපත් හරඹය සීමා විරහිත වූ අතර පුරාවෘත්තයක සඳහන් ජියැන්ගුහි අම‍රණීය වීරයෙකු මෙන් පහසු නමුත් අභිභවා ගියේ ය.

යැන් ජින්ට දැනුණේ තමන් පළමු වතාවට ඔහුව පැහැදිලිව දකින්නාක් මෙනි. තමන් ඉදිරියේ මේ සිටින තැනැත්තා ශෙන් ජිෂියෑන් නොවන බවක් මොහොතකට ඔහුට සිතුණි. එවන් සීතල අඳුරු මිනිසෙකුට මෙතරම් නිදහස් හා පහසු කඩු හරඹයක් තිබුණේ කෙසේ ද?

නමුත් පැහැදිලිව ම මේ ශෙන් ජිෂියෑන් ම විය. ශෙන් ජිෂියෑන් කෙරෙහි ඔහු සිත වූ වෛරය පහව නොගිය ද ඔහුගේ ලක්ෂණයන් අලංකාර සහ අමතක නොවන සුලු බව නොසලකා හැරිය නොහැකි විය. කිසිවෙකුටවත් ඒ කඳුළක හැඩැති උපන් ලපය අනුකරණය කළ නොහැකිය.

දෙහෝරාවක පුහුණුවීමෙන් පසුවත් ශෙන් ජිෂියෑන් හට අසිපත ඉවත හෙළීමට සිතක් නොවුණි. කෙසේ වුවත්, ඔහුට වැඩිකලක් එක දිගට ආධ්‍යාත්මික බලය භාවිතා කළ නොහැකි විය. ඔහුට කරගෙන යන්නට කෙතෙක් අවැසි වූවත්, ඔහුගේ හෘද රෝගය පිටතට පැමිණ ඔහුට දඬුවම් කරනු ඇත.

" එය ඇත්තෙන් ම ඉතා හොඳයි. " ඔහු ප්‍රශංසා කළේය. යැන් ජින් සිය අසිපත ඉවත දැමීමට සැරසෙනු දුටු ශෙන් ජිෂියෑන්, වහාම ඔහුව නැවැත්වීය. " කලබලයක් නැහැ. දැනට ඔබ දන්නේ චලනයන් කිහිපයක් පමණයිනෙ. තවත් කිහිපයක් ඔබට ඉගැන්වීමට මට හැකියි. "

යැන් ජින් හට අසිපත් පුහුණුවෙහි මග කීමට මුල් හිමිකරු කිසිසේත් ම උනන්දු නොවීය. එහි ප්‍රතිඵලය වූයේ සෙසු සාමාන්‍ය ගෝලයින් සමඟ ඔහුටත් පන්ති සඳහා සහභාගී වන්නට සිදු වීමයි. කෙසේවුවත් ඒ සාමාන්‍ය ගෝලයින් ඔහුව හුදෙකලා කරන්නටත් පීඩාවට පත් කරන්නටත් රහසිගත ව, ඒකමතිකව කුමන්ත්‍රණය කළා පමණක් නොව, ඔහුව පන්තිවලින් අසමත් කරන්නට නරක ම කඩුව පවා ඔහුට ලබා දී තිබිණි.

නිතර නිතර නොපැමිණි නිසාවෙන් යැන් ජින් සතු වූයේ ප්‍රාථමික දැනුමක් පමණි. වාසනාවකට මෙන් ප්‍රධාන චරිතයේ දැනුම අද්විතීය විය. ඉතාමත් ම සාමාන්‍ය අසිපතෙන් පවා ඔහු හොඳ කුසලතා ලබා ගැනීමට සමත් ව සිටියේ ය.

නමුත්, ඒ හොඳ කුසලතා පමණි.  එහි වැරදීම් රැසක් ම වූ අතර, ශෙන් ජිෂියෑන් එකින් එක නිවැරදි කළේය.

මද වේලාවක් කතාබහ කිරීමෙන් අනතුරුව ශෙන් ජිෂියෑන් හට ගුරුවරයා සහ ගෝලයා අතර ඇති විරසක වීම් අමතක විය. ඔහු යැන් ජින්ගේ අසිපත ගෙන ඉන් චලනයන් මාලාවක් පෞද්ගලිකව පෙන්වීය.

" උදාහරණයක් ලෙස තාවකාලික පිණි බිඳු තාක්ෂණය මේ ආකාරයෙන් භාවිතා නොකළ යුතු ය. එය තනි චලනයකින් අතීතයට පියාඹන මැස්සෙකු දකින්නට අසිපත්කරුවෙකු පිටතට ඇදෙනවා යැයි සිතන්න. එය තාවකාලිකයි මෙන් ම ක්ෂණිකයි. එනිසා, මෙම කඩු ශිල්ප ක්‍රමය විශිෂ්ඨ විය යුතුයි වගේ ම ඉක්මන් විය යුතුයි, හරියට අර පියාඹන මැස්සා වගේ. "

ඔහු අසිපත ඔසවා පහත හෙළුවේය, එය වාතය කපා යන විට දී තලයෙන් තියුණු හඬක් උත්පාදනය විය.

යැන් ජින් තුෂ්ණිම්භූත විය. ඔහු පියවරක් ඉදිරියට තබා තලය දෙස හොඳින් බලා සිටියේ ය.

" සුළඟ මනරම් ලෙස අසිපත්කරු පසු කර යන අතර අඳුරු වූ අහස බුද්ධත්වය ගෙන ආවා. සවස් වන විට මැරුණු කොළ මිය යමින් සිටින සූර්‍යයා පිළිඹිබු කරන අතර බටහිර සුළඟ අඳුරු ලෙස ගමන් කරනවා. ප්‍රතිවාදියෙකු හමුවේ දී සැකසහිත බවක්, අවිනිශ්චිතතාවයක් දැනීම, මරණයට තවමත් දුර බව දැනීමක්. "

නොපැහැදිලි රුවක් යැන් ජින්ගේ මනසෙහි ඇඳී ගියේ, සුදු වතින් සැරසුණු, මීට සමාන දෙයක් කියමින් සිය අසිපත් ශිල්පය විදහා දක්වන උසස් චිත්තවේගී මිනිසෙකුගේ නොපැහැදිලි රුවකට ඒකාබද්ධ විය. නමුදු එකල අසිපතක් වෙනුවට ඔහු අත තිබුණේ මැරුණු අතු කැබැල්ලකි.

යැන් ජින් බොඳ වූ හඬින් විමසා සිටියේ " ෂිෆු, ඔබට ඇත්තට ම තනි පහරකින් සුළඟ අනුකරණය කළ හැකි ද? "

" තනි පහරකින් සුළඟ අනුකරණය කරන්න? " ශෙන් ජිෂියෑන්ගේ අසිපත් තුඩ පහළට වැටුණේ, වැඩිදුර නොසිතා චලනය පෙන්වීම සඳහා සිය මැණික්කටුව සෙලවීය. කිසිත් නොසිතා ම ඔහු වහා ම පැවසූවේ " දැන්, පුරහඳ අඳුරු සන්ධ්‍යාවේ එල්ලී ඇති අතර බටහිර සුළඟ හමා යයි.... "

යැන් ජින්ගේ මතකය හදිසියේ ම විස්තාරණය විය. ඔහුගේ මනසෙහි ඇඳුණු රුවත්, ඔහු දෑස් ඉදිරියේ සිටින මේ මිනිසාත් තනි පුද්ගලයෙකු වශයෙන් අතිච්ඡාදනය වන බවක් පෙනෙන්නට තිබිණි. ඔහුගේ සිතෙහි තදින් ම කාවැදී තිබූ නමක් නැගී සිටි අතර ඔහු " සුයි - " කියා හඬ බොඳ කළේය.

" ආයි!"  යැන් ජින්ගේ වදන්වලට බාධා කරමින් ශෙන් ජිෂියෑන් හදිසියේ ම කෑගැසුවේ ය. ඔහුගේ මුහුණ තරමක් වෙනස් වූ අතර, චලනය අවසන් කිරීමට කරදර  නොවූ ඔහු එක් අතකින් අසිපත බිම සිටුවා අනෙක් අතින් සිය ඉණ අල්වා ගත්තේ ය. ඔහුගේ හැඟීම් ප්‍රකාශනය සියුම් හා අසරණ විය. " මගේ ඉණ..."

මුළු නිරූපණය පුරාවට ම ශෙන් ජිෂියෑන් ආධ්‍යාත්මික බලය යොදා නොගැනීමට වගබලා ගත්තේ යැන් ජින්ගේ අසිපත මත පමණක් ම රඳා පැවතුණි. කෙසේ නමුත් යැන් ජින්ගේ අසිපත ඉහළ ගුණාත්මක බවින් යුතු එකක් වූ අතර සැලකිය යුතු බරකින් ද යුතු විය. තාවකාලික පිණි බිඳු නැඟී එන සුළඟ ජය ගන්නට තැත් දරන්නාක් මෙන් වූ එම අවස්ථාව සඳහා ශක්තිය අවැසි ම විය. මෙම වැදගත් ම සංධිස්ථානයේ දී ඒ පිළිබඳව මනා අවධානයක් යොමු නොකළෙන්, අවසානයේ ඔහුගේ ඉණ තරමක් උළුක්කු විය.

යැන් ජින්: "..."

මුවින් පිට වන්නට ඉතා ආසන්නව තිබූ ඒ නම, යැන් ජින් නැවත ගිල ගත්තේ, ඔහුගේ සුපුරුදු නිහඬතාවයට ම පැමිණියේ ය. ශෙන් ජිෂියෑන්ගේ මඟපෙන්වීම මත, ඔහු ප්‍රවේශමෙන් සහ ස්ථාවර ලෙසින් ඔහුට නිවසට යාමට උපකාර වූයේ ය.

ශෙන් ජිෂියෑන් හට වාරුවක් වීම සඳහා, ඔහුගේ ඉණ මත ඔහුගේ අත තැබීමට යැන් ජින් ඉඩ දුන්නේ ය. සිය ගුරුතුමාගේ අතෙහි නිරෝගී මිනිසෙකු සතු විය යුතු උෂ්ණත්වය නොමැති බවත්, අත අයිස් මෙන් සීතල බවත් ඔහුට එක්වන ම වැටහිණි. එම හෘද රෝගය ඔහුගේ අනාගතය වළලා දැමූ අතර ඔහුව දුර්වල කළේ ය. ඔහුගේ සිරුර නාස්තියක් ම විය.

ඔහුගේ පෙර දිවියේ දී යැන් ජින්, ශෙන් ජිෂියෑන්ව බෙහෙවින් ඇගයූ අතර එහෙයින් ම ගරු නොකොට සිටින්නට නොහැකි විය. නමුත්, කවුද සිතුවේ එම ගරු කිරීම, ඔහුගේ මරණයට පවා හේතු වූ ආත්මීය මූලය සිඳීමෙන් කෙළවර වේ යැයි කියා.

ඔහු ශෙන් ජිෂියෑන් හට අනුකම්පා කළේ නමුදු එයටත් වඩා ඔහුට වෛර කළේ ය.

ඇස් යට වූ සංකීර්ණ හැඟුමන් වසා දමනු වස්, යැන් ජින් ඇසිපිය වැසු ඔහු, ඔහුට යහනේ වැතිරෙන්නට පහසුව සලසා, නිහඬව ම හිස නවා ආචාර කළේ, නිහඬව ම පිටව ගියේ ය.

පෙර පරිච්ජේදය | සියළුම පරිච්ජේද | පසු පරිච්ජේදය