අටවන පරිච්ඡේදය | අංකුර පැළය

 " අංකුර පැළය? අංකුර පැළය! "

ගෙවුණු දින කිහිපය ශෙන් ජිෂියෑන් හට මහත් වෙහෙසකර විය.

යැන් ජින් සමඟ ගනුදෙනු කිරීමට සිදුවුවත්, සොන් මින් සමග ආචාරශීලීව කටයුතු කරන්නට සිදු වුවත් ඒවා එතරම් ම වෙහෙසකර නොවීය. අඩු තරමින් ඔවුන් තමන්ට තේරුම් ගත හැකි, තමන් හා සන්නිවේදනය කළ හැකි  හුස්ම ගන්නා ප්‍රාණය සහිත අයවලුන් වූහ.

"  චර්ප්! "

තද කොළ පැහැ, තණපත් මෙන් වූ පත්‍ර සහිත කුඩා පොහොට්ටුව, ඔහුගේ හිස් මුදුනින් දළුලා එන්නාක් මෙන් විය. එය උද්‍යෝගයෙන් ශෙන් ජිෂියෑන් දෙස බලා කුඩා තෘණ පත්‍රිකාවක් සිය හිස දෙසට යොමු කළේ අවුල් ව පැටලුණු ස්වභාවයක් ගත් සිය තෘණ හිසකෙස් සියුම් ව පීරන ලෙස ඉල්ලන්නාක් මෙනි.

ශෙන් ජිෂියෑන් ගැඹුරු හුස්මක් ගෙන අංකුර පැළයේ හිසින් අල්ලා එසවූයේ ය. ඒ කුඩා දෙය ඩම්ප්ලින් එකක් කර ඉවතට විසි කිරීමට තරම් ඇති වූ ආශාව මැඩපැවැත්වූ ඔහු නපුරු ලෙස දිස් නොවෙන සේ සිය මුහුණේ ඉරියව් පාලනය කරගත්තේ ය. දත්මිටි කමින් ම ඔහු පැවසූවේ "මින් පසු කිසි ම දවසක මගේ හිස මුදුනේ නුඹේ කූඩුව තබන්නට ඉල්ලන්නට එපා. "

ඔහු සාමාන්‍ය තරමේ වැඩුණු මිනිසෙකු වූ අතර එම හරිත පැහැ දෙය හිස මත තබාගෙන සිටින්නට ඔහුට කිසිසේත් ම අවැසි නොවීය!!

අත්ල මත හුන් ඒ කුඩා පොහොට්ටුව, කීකරු දරුවෙකු මෙන් සිය තණපත් සොලවමින් අහිංසක ලෙස කිචිබිචි ගෑවේය.

" කොයිවෙලේත් ඔබ කරන්නේ කිචිබිචි, කිචිබිචි, කිචිබිචි. ඔබ කුඩා ගේකුරුල්ලෙක් ද.... " ශෙන් ජිෂියෑන් අවට පිරික්සමින් මිමිණුවේය. සියතෙහි වූ දෙය පෝසිලේන් බඳුනකට මාරු කළ ඔහු අවවාද කළේ ය. " මම පුහුණුවීම් සඳහා යනවා. ඔබට පිටතට පැමිණීම තහනම්. "

" චර්ප්, චර්ප් චර්ප්! " තමන් ගේ කුරුල්ලෙකුට සම කිරීම කුඩා අංකුර පැළය නොරිස්සූ බවක් පෙනෙන්නට තිබුණි. එය වහා ම සිය ස්වරය වෙනස් කරගෙන පෝසිලේන් බඳුන තුළ ඇඹරුණේන්, බඳුනෙහි මද පැල්මක් ඇති වී එය කැබලිවලට බිඳී ගියේ ය.

යළිත් නිදහස ලබා ගත් අංකුර පැළය සතුටින් හඬක් නගා සිය සිහින් මුල් ශෙන් ජිෂියෑන් දෙසට පැද්දුවේ ය. ඔහුගේ වස්ත්‍ර අල්වාගනිමින් ඉතා නම්‍යශීලී ව ඉහළට නැග්ගේ, එය නිරත වුණු සෑම චලනයකදී ම ඒ කුඩා සිහින් මුල් පැද්දුණි.

ශෙන් ජිෂියෑන් : "..."

ඔහු හැඟීම් විරහිත ව කුඩා තෘණ පොහොට්ටුව අහුලාගෙන, හැඟීම් විරහිතව ම දොර විවර කර දොර අසල මිදුලේ කුඩා වළක් සෑරුවේ ය.

ඔහු තෘණ පොහොට්ටුව එහි දමා පස් දමා වට කළා පමණක් නොව පහසුවෙන් ඉවතට ඒමට හැකි නොවන සේ මැතිරුමක් යොදන්නට තරම් දුර ගියේ ය.

ඉන්පසු දොර වසා දැමූ ශෙන් ජිෂියෑන් පුහුණුවීම් සහ කල්පනා කිරීම් සඳහා යළිත් සිය කුටියට ගියේ ය. මෑතක දී ඔහුට පොත් රාශියක් ලැබුණු අතර හොඳින් පුහුණුවීම සඳහා දැනුම ලබා ගනු පිණිස ඒවා හොඳින් කියවමින් සිටියේ ය.

කුඩා තෘණ පොහොට්ටුව වළ තුළ මද වේලාවක් දැඟලුවේ ඉවතට යාම සැබවින් ම නොකළ හැක්කක් බැව් වැටහුණි. එය තිගැස්සී ගොස් සිය අරගල වැඩි කළේ, එයින් පලක් නොවිණි.

එය කෝපයෙන් මුමුණමින් මඩ තැවරුණු සිය පත්‍රවලින් සිය මුල් පස්වලින් ඉවතට අදින්නට විය.

කුටියෙන් පිටත් හුන් එය කෝපයෙන් මුමුණණු ඇසුණු ශෙන් ජිෂියෑන් හට හාස්‍යජනක බවක් මෙන් ම මද අසරණ බවක් ද දැනිණි.

එදා ඔහුගේ අක්ෂ්‍ර වින්‍යාසයකින් පණ ලබා  පරාවර්තන කන්දෙහි තැබූ ඒ තෘණ පොහොට්ටුවට මේසා විශිෂ්ඨ හැකියාවක් ලැබේවියැයි ඔහු නොසිතුවේ ය. කන්ද මත අධික සීතලෙන් පහර ලැබ මිය යනවාට වඩා එය ඔහු සොයා ගෙන පැමිණියා පමණක් නොව හැර යාම පවා ප්‍රතික්ෂේප කළේ ය.

තෘණ පොහොට්ටුවක් ඇයි? එකල බිඳෙනසුළු මැරුණු පත්‍රවලට අමතරව ශෙන් ජිෂියෑන් හට පාලනය කළ හැකි වූයේ මෙම තෘණ පොහොට්ටුව පමණි.

දිගට ම කියවමින් පුහුණුවීම් කරගෙන යද්දී වැටහුණේ පිටතින් කිසිදු හඬක් නොඇසෙන බවයි.

මෙම කුඩා තෘණ පොහොට්ටුව ඉන්ද්‍රජාලික වූ අතර විවිධාකාරයේ ශබ්ද නිකුත් කරනු ඇත. එය නින්දට වැටෙනා තුරු ම නොයෙකුත් හඬ නංවයි. නමුත් ඇයි දැන් එහි කිසිදු හඬක් නෑසෙන්නේ?

මෙහි බිම පස් පවා අධ්‍යාත්මික බලයෙන් යුතු ය. එය එහි පැළකිරීමෙන් කිසිදු හානියක් නොවේ. එය අරගල කර අවසානයේ දී එයට ම රිදවා ගත්තාවත් ද?

ශෙන් ජිෂියෑන් මදක් කලබල විය. ලියවිල්ල පහත් කොට නිහඬව ම එය පරීක්ෂා කරන්නට දොර අසලට ගියේ ය. ඒ මොහොතේ දී ඔහු දුටුවේ කුඩා තෘණ පොහොට්ටුව සිය අවසාන මුල් ද  ඉවතට ඇද ගැනීමට දඟලන අයුරුයි. එය ඔහු දෙස කෝපයෙන් බැලුවේ ය.

එය සිය පත්‍රිකා දිගු කළ අතර හමා ආ සුළඟකින් එය ඉහළට එසවී ගසාගෙන යන්නට විය. ශෙන් ජිෂියෑන් කම්පනයට පත් වූ අතර එය අන් අයට නිරාවරණය නොකරනු කැමති ව "තණකොළ පැළය" යි හඬ නගමින් ඒ පසු පස්සේ දිව ගියේ ය.

කුඩා තෘණ පොහොට්ටුව ඇත්තෙන් ම කෝපවත් විය. එය සිය පත්‍රිකා හා අංකුරවල උපකාරයෙන් සුළඟ සමඟ ඉතා වේගයෙන් පියාසර කළේ ය. එයට මිනිසුන්ගේ දැකුමට හසු නොවන්නේ කෙසේද යන්න පිළිබඳ මනා අවබෝධයක් තිබිණි, මූලිකව ම තරුණ ගෝලයන් එය පිළිබඳව දැන ගන්නවාට සහ එය හඹා එනවා මගහැරීමට.

ඉදිරියේ කුඩා ගෝලයින් කිහිප දෙනෙකු දුටු ශෙන් ජිෂියෑන් නැවතුණි. ඔහු කඩිමුඩියේ ගෝලයින්ගේ ආචාරශීලීත්වය සමඟ ක්‍රියා කරන අතරතුරේ දී තෘණ පොහොට්ටුව කොනකට ලිස්සා ගොස් තිබිණි.

සාමාන්‍ය අයුරින් එදෙස බැලීම හැර වෙනත් විකල්පයක් නොතිබුණු ඔහු ඉදිරියට යද්දී ඔහුට මෙම මාර්ගයේ යම් හුරුපුරුදු බවක් දැනුණි. මේ යැන් ජින්ගේ නවාතැන ආසන්නයේ නොවේ ද?

පස්වන වැඩිහිටියා වශයෙන් ශෙන් ජිෂියෑන් හට ඔහුගේ ම ප්‍රධාන කඳු මුදුනක් තිබිණි. එහි ඉහළ ම ඔහු සිටි අතර ක්‍රමයෙන් පහළට ඔහුගේ පෞද්ගලික ගෝලයින් ඉන්පසු සාමාන්‍ය ගෝලයින් වශයෙන් විය.

මෙම ස්වයං-ශික්ෂිත සාමාන්‍ය ගෝලයෝ ඍජුව ම ශෙන් ජිෂියෑන්ගේ නාමයට ගෞරව කළ අතර ඔහුගෙන් පෞද්ගලිකව උගැන්මට ප්‍රිය වූහ. නමුත් සත්‍ය වශයෙන් ම ඔවුන් ගෝලයින් වූයේ නමට පමණි. විශේෂ ප්‍රතිකාර හෝ උපදෙස් නොමැති ව කණ්ඩායම් වශයෙන් ඔවුහු පුහුණුව ලැබූ අතර සාමාන්‍යයෙන් නොයෙකුත් රාජකාරිවල ද නිරත වූහ. චින්‍යුන් නිකායේ, ගෝලයින් තමන් විසින් ම සිය අවශ්‍යතා සපුරා ගත යුතු විය.

ජලය ගලා යන හඬක් කන වැකුණු ශෙන් ජිෂියෑන් වටහා ගත්තේ මේ ගෝලයින් සිය ජල අවශ්‍යතා සපුරා ගන්නා ස්ථානය බවයි.

ශෙන් ජිෂියෑන් එතරම් ඒ ගැන නොසිතුවේ, දෙනෙත් ඔසවා ශීත බැල්මක් ගත්තේ ය.

ඉරුණු, පැහැය වියැකුණු, සඳවන් සුදු පැහැ වස්ත්‍රයකින් සැරසුණු කෙට්ටු යෞවනයෙක් ශෙන් ජිෂියෑන්ට පිටුපා සිටගෙන සිටියේ ය. ඔහු, වතුර පිරුණු බර බාල්දි එකින් එක පුරවමින් දිය අදිමින් හුන්නේ ය.

ඉක්බිති ඔහු ශෙන් ජිෂියෑන්ගේ මුහුණට මුහුණ හැරුණි.

ඇදහිය නොහැකි වතින් ඔහු දෙස බැලූ ශෙන් ජිෂියෑන් දෙවනුව ඔහු ගෙන යමින් සිටි දිය බඳුන් දෙස බැලුවේ ය. සාමාන්‍යයෙන් මේවා සිදු කළ යුතු වූයේ සාමාන්‍ය ගෝලයින්ය. සිය පෞද්ගලික ගෝලයකු ද වූ යැන් ජින්ට තනිව ම මේවා කරන්නට සිදු වූයේ ඇයි?

ඔවුන් එකිනෙකා දෙස නිහඬව බලා සිටියේ හරිත පැහැ දිලිසුමක් මතු වී කුඩා තෘණ පොහොට්ටුව ශෙන් ජිෂියෑන් සමීපයේ වූ පඳුටු අතරින් නැගී සතුටින් යැන් ජින් දෙසට දිව යෑම ඇරඹෙන තුරු පමණි.

මොන මගුලක් ද?!!

යැන් ජින් ඔහු සිතන්නටත් පෙර ක්‍රියාත්මක වූයේ ය. ඔහු ඉක්මනින් අත එසවූයේ, අතෙහි වූ දිය බඳුන සම්පූර්ණයෙන් ම තෘණ පොහොට්ටුව මතට වැටුණෙන් එය එතන ම කම්පනයෙන් මුල් ඇදගත්තේ ය.

ජලයේ බලපෑමෙන්, සැලෙන පත්‍රිකා සහ තෘණ අංකුර සහිත ව එය බිම පතිත විය.

කුඩා පත්‍ර මඩින් නැහැවුණි. ඊටත් වඩා, අපිරිසිදු, දැන් කම්පනයට පත් ව සිටින කුඩා තෘණ පොහොට්ටුව තදින් බිම මත වැතිරී නිසොල්මන්ව සිටියේ ය.

ශෙන් ජිෂියෑන්, තෘණ පොහොට්ටුවේ කෝපවත් කුඩා මුහුණ දෙස බලා මද සිනාවක් පා කතා කරන්නට සූදානම් වෙද්දී ම එක්වර ම එහි කඩා වැදුණු ගෝලයෙක් කෝපයෙන් යැන් ජින් දෙසට ඇවිද ගියේ ය.

" යැන් ජින්, ඇයි ඔබ මෙතරම් ම ප්‍රමාද?! ලොකු සහෝදරයා යන් ශෙන් ඉන්නේ වතුර බලාපොරොත්තුවෙන් ඉතා හදිසියෙන්. අහ්! ඔබ කොහොමද මෙතන මෙතරම් අවුල් ජාලාවක් කළේ? ඔබ කුණු ගොඩක් ද?! "

තරුණ ගෝලයා හඬ ඇසී ශාප කරමින් යැන් ජින්ට හිරිහැර කරන්නට සූදානමින් ම වහ වහා මෙහි පැමිණියා විය යුතුය. අවුල් ජාලාවක් වූ බිම දුටු වහා ම කෝපය පාලනය කරගත නොහැකි වූ ඔහුට යැන් ජින්ට බැණ වැදීම නැවතිය නොහැකි විය. එක්වර ම සුළඟක් හමා ගියේ, හරිත පැහැ දිලිසුමක් සමඟම ය.

විශාල කම්මුල් පහරක හඬක් ඇසිණි.

මනා පහරක් එල්ල කිරීමෙන් අනතුරු ව කුඩා තෘණ පොහොට්ටුව ශෙන් ජිෂියෑන් වෙත පියඹා ගොස් ඔහුගේ කබා අත් අතර සැඟවුණේ, ඒ කලබලකාරී දසුන නැරඹීමට සිය පත්‍රිකා කොටසක් පමණක් බාහිරයට නිරාවරණය කරමිනි.

ගෝලයාගේ කම්මුල රත් පැහැ වී ඉදිමී ගියේ ය. දැඩි කම්මුල් පහරක් එල්ල වූ සෙයක් දැනුණු නමුදු ඔහු කිසිවෙකුත් නුදුටුවේ ය!

යැන් ජින් ඉදිරියේ අවුල් ජාලාවක් මෙන් දිස් වුණු ඔහුට සිය ආත්ම ගරුත්වය ගිලිහුණුබවක් දැනුණි. කෝපයෙන් වටේට ම කැරකුණු ඔහු " කවුද මෙතන සීමා නොමැති ව සිටින්නේ? බලන්න මට ඔබ හා ගණුදෙනු කරන්නට නොහැකී ද කියා-- "

කෝපාවිෂ්ඨ හඬ හදිසියේ ම අවසන් විය.

ශෙන් ජිෂියෑන් ඔහුගෙ බැල්ම එසවූයේ, තෘණ පොහොට්ටුව උඩු යටිකුරු කරමින් සන්සුන් ව  සිය කබා අත් සොලවා මැසිවිලි නැඟුවේ " මේ වැඩිහිටියාට කුමක් ද කරන්නට අවශ්‍ය? කියන්න. මම අහගෙනයි ඉන්නේ. "
_______________

පෙර පරිච්ජේදය | සියළුම පරිච්ජේද | පසු පරිච්ජේදය