හත් වන පරිච්ඡේදය : සැඟවුණු දාරය

අවට වායුගෝලයේ අමිහිරි අපහසු බවක් ඇති විය.

ඒ මොහොතේ දී යැන් ජින් හට සිය කලබල, කෝපී ස්වභාවය යටපත් කර ගත නොහැකි විය. ශෙන් ජිෂියෑන් හට තමන් මිනිස් වෙසින් හිඳිනා නරුමයෙකැයි සිතීමට මෙය ම ප්‍රමාණවත් වූ අතර, මෙය වදනින් පැවසිය නොහැකි යමක් කරන්නට කුඩා දැරියකට බල කරනවාක් මෙන් විය.

තියුණු උල් පිහි සිය හෘදයෙන් හිස වෙත සංක්‍රමණය වූ අතර ඒවා එහි සංගීත කණ්ඩායමක් පිහිටුවා ගත්හ.

ශෙන් ජිෂියෑන් දැඩි සිනහවක් පවත්වා ගත් අතර, තමන් අවංක සහ දයානුකම්පිත ගුරුවරයෙකැයි ඔහු තීරණය කළේ ය. නමුත්, කුඩා ඉත්තෑවා යැන් තවමත් ඔහුගේ කාරුණිකභාවය ප්‍රතික්ෂේප කළේය.

ඔහු සුසුමක් හෙළුවේ ය.

ඔවුන් සම්මුතියක් ඇති කර ගත් අතර, යැන් ජින්ගේ වස්ත්‍ර අඩක් පමණක් ඉවත් කර දමනු ලැබිණි. ඇත්ත වශයෙන් ම, සිරුරේ ඉහළ ප්‍රදේශය කෙතරම් පෑරී තිබුණේ ද යත්, පැරණි තුවාල සහ නව තුවාලයන් අතිච්ඡාදනය වන්නාක් මෙන් දිස් වූ ඒ දසුන දුටුවන් ක්ලාන්ත කරන සුලු වූයේ ය. එහි රුධිර පැල්ලම් වූ අතර, එම දසුන ශෙන් ජිෂියෑන් මදක් කලබලයට පත් කරන්නට සමත් විය.

ඔහු තවදුරටත් බලපෑම් නොකළේ ය. අඩි කිහිපයක් පසුපසට ඇදුණු හෙතෙම " මද වේලාවකින් සිව්වන වැඩිහිටියාගේ ගෝලයෙකුට මෙහි පැමිණ ඔබව පිරික්සන්නැයි දන්වා සිටින්නම්. " යි පැවසුවේ ය.

සිව්වන වැඩිහිටියා අභ්‍යන්තර කටයුතු භාර වූවා වුවත්, ඔසු සම්බන්ධ කටයුතුවල ද නිපුණත්වයක් දැක්වීය. ඔහුගේ ගෝලයින් අතරින් බොහෝ දෙනෙක් සුව කරන්නේ කෙසේද යන්න දැන සිටි අතර නිකායේ තුවාල ලැබූවන්ට නිතර නිතර ප්‍රතිකාර කළහ.

යැන් ජින් ඔහු හා එකඟ වූයේ හෝ නොවූයේ නොවේ. ඒ වෙනුවට ඔහු ඉතිරි ව ඇති ඔසු බඳුන් දෙස හිස පහත් කොට බලා නික්මෙන ශෙන් ජිෂියෑන් දෙස නිහඬව ම බලා සිටියේ ය.

ඉක්බිති ඔහු සියතේ පිටුපසින් එම ඔසු බඳුන් සයනයෙන් පහළට තල්ලු කර දැමුවේ ය. එම ජේඩ් බඳුන් මැනවින් නිමවා තිබූ අතර, දැඩි ස්වභාවයක් ගත්තේ ය. බිම වැටුණු ඒවා නොකැඩුණු අතර නැවතෙනා තුරු ශබ්ද නගමින් බිම දිගේ රෝල් වී ගියේ ය.

කවුද දන්නේ, මෙමගින් ශෙන් ජිෂියෑන් කුමනාකාරයේ දරුණු උපක්‍රම සැලසුම් කරනවා ද කියා.... ඔහු ඒවා භාවිතා කිරීමට එඩිතර නොවීය.

සුදුමැලි තරුණයා අතේ තිබූ බෑගය උදාසීන ලෙස විවර කළේ ය. එහි ඇතුළත වූ රළු හා ගෙවී ගිය බෝතල් අතරින් සමහර ඒවා ඉරිතැලීමට පවා බඳුන් වී තිබිණි.

බෝතල් මූඩිය විවර කළ පසු නැඟුණු ගන්ධය තියුණු නොවූ නමුදු එය එතරම් ප්‍රසන්න ද නොවීය.

යැන් ජින් සිය උඩුකය වස්ත්‍ර ඉවත් කළේ ය. හැඟීම් විරහිතව ම මදක් ඇලෙනසුලු වූ කළු පැහැති දියරය තුවාල මතට වත් කිරීමට පෝසිලේන් බඳුන මදක් ඇල කළ ඔහු, සිය සිරුරෙහි තුවාලවලට තමන් ම ඔසු යෙදීමට අපහසුවෙන් උත්සාහ කළේ ය.

...........

යන් ශෙන් එහි පැමිණෙන විට දී සිව්වන වැඩිහිටියාගේ ගෝලයින් දෙදෙනෙකු කුටියෙන් පිටත සිටිනවා දුටුවේ ය.

ඔහු දුටු කනිටු ගෝලයින් දෙදෙනාගේ දෙනෙත් දිදුළන්නට වූයේ, ඔහුව තදින් අල්වා ගත්හ. " අනේ යන් ශෙන් ජ්‍යේෂ්ඨ සහෝදරයා, ඔබ ආවේ නියම වේලාවට. යැන් ජින් ජ්‍යේෂ්ඨ සහෝදරයාගේ තුවාල පිරික්සන්නැයි වැඩිහිටි ශෙන් අපෙන් ඉල්ලා සිටියත් යැන් ජින් ජ්‍යෙෂ්ඨ සහෝදරයා අපට ඇතුළු වන්නට ඉඩ දුන්නේ නැහැ. ඔහු දරුණු ලෙස තුවාල ලබා ඇති බවකුයි පෙනෙන්නට තිබුණේ. "

යන් ශෙන් සිනාසුණි. " මම මගේ ජ්‍යෙෂ්ඨ සහෝදරයා ගැන කනස්සල්ලෙනුයි ඔහුගේ සුව දුක් පිරික්සන්නට පැමිණියේ. මම ඔහුව හොඳින් බලා ගන්නා බවට ඔබට සහතික විය හැකියි. "

" හොඳයි !" කුඩා ගෝලයා කුඩා ඔසු මල්ලක් සහ ගෝස් ඔහු අත තබා " මේ වැඩිහිටි ශෙන් එවූ ඒවා " යි පැවසීය.

යන් ශෙන් ඔවුනට ස්තුති කොට සමුගත්තේ ය. කුඩා පාර්සලය අත දරමින් ම සිරිතට අනුව දෙවරක් දොරට තට්ටු කළ ද  පිළිතුරක් බලාපොරොත්තු නොවීම ඔහු දොර හැර ගෙන ඇතුළට පිවිසුණි.

යැන් ජින් යහන මත හිඳගෙන සිය ඇඟලුම් වත ලා ගනිද්දීත් අවුල් සහගත ලෙස විසිර තිබූ ජේඩ් බඳුන් එලෙස ම පොළොව මත විසිරී තිබිණි. නොයෙකුත් පුද්ගලයින් අනාරාධිතව ම සිය කුටියට ඇතුළු වීම ඔහුට හුරුපුරුදු බවක් පෙනෙන්නට තිබිණි. ඔහු සිය දෙනෙත් එසවූයේ යන් ශෙන් දෙසට සීතල බැල්මක් පා කරමිනි. එම අඳුරු පැහැ දෙනෙතෙහි කිසිදු හැඟීමක් ලියැවී නොතිබිණි.

යන් ශෙන් ඔහුගේ එම " කිසිදු කරුණක් නිසාවත් නොසැලෙන" දෙනෙතෙහි හැඟීම් ප්‍රකාශනයට වෛර කළේය. වහාම එම සන්සුන් වෙස් මුහුණ ඉරා දමා බිමට විසි කොට පාගා කැබලි කර දැමීමට ඔහුට අවැසි විය. ඔහු දත්මිටි කමින් ව්‍යාජ සිනහවක් මවා පෑවේ ය. " ජ්‍යෙෂ්ඨ සහෝදරයා පරාවර්තන කන්දෙන් බැස ඒම පිළිබඳ ව මට සුබ පතන්නටවත් නොහැකි වුණා. ජ්‍යෙෂ්ඨ සහෝදරයා ඉතාමත් ම වාසනාවන්තයි, එතරම් විශාල වරදක් කළා වූවත් සමාව ලැබීමට තරම්ම. "

යැන් ජින් උදාසීන ලෙස පැවසූවේ " ඊළඟ වතාවේ දී එවන් වාසනාවක් ලැබීමට කනිෂ්ඨ සහෝදරයාට හැකියාවක් ලැබෙන්න කියා මම ප්‍රාර්ථනා කරනවා. "

යැන් ජින් ඇත්ත වශයෙන් ම ඔහුට ආපිට කතා කිරීම ගැන මද විස්මයක් දැනුණු යන් ශෙන් ගේ ඇඟිලි කුඩා පාර්සලය මත තද විය. අතීතයේ දී නම් යැන් ජින් ඔහුව නොසලකා සිටියා පමණි.

ඔහු පියවරක් ඉදිරියට තැබුවේ පා ඇඟිල්ලක වැදී ජේඩ් බෝතලයක් මදක් සෙලවුණි. හිස මදක් පහත් කළ ඔහු දුටුවේ එය ශෙන් ජිෂියෑන්ට පමණක් ම හිමි ඔසු බඳුනක් බවයි.

ඒ කුඩා ගෝලයින් දෙදෙනාගේ වදන් දෙසවන නින්නාද වෙද්දී කෝපයෙනුත් ඊර්ෂ්‍යාවෙනුත් ඔහුගේ හද දැවෙමින් පුපුරා ගියේ ය. ඔහු නැවී කුඩා බෝතලය අතට ගත්තේ, සිය මහපටැඟිල්ලෙන් එහි සීතල සිනිඳු මතුපිට පිරිමැද්දේ ය. " ජ්‍යෙෂ්ඨ සහෝදරයා, ඔබට මෙම ඔසු අවැසි නොවන නිසා, මේවා මට ත්‍යාග වශයෙන් දුන්නොත් කෙසේද? මෑතක දී පටන් මම අසිපත් පුහුණු වීමේ දී නිතර නිතර තුවාල වීම්වලට ලක් වෙනවා නේ. "

යැන් ජින්ට ඔහුව නොසලකා හැරීමට අවැසි වූව ද අනෙකා අත වූ බෝතලය දුටු විට ඔහු එක්වර ම නැවතී අනපේක්ෂිත යමක් පැවසීය. " ඔබ අසිපත් පුහුණුවෙහි දක්ෂ නොවේ නම්, මා නැවත මාස්ටර් හමු වූ මොහොතක ඔබ වෙනුවෙන් ඔසු ඉල්ලා සිටින්නම්. "

" නුඹ!" යන් ශෙන්ගේ කෝපවත් මුහුණ පළමුව කොළ පැහැයටත් දෙවනුව රතු පැහැයටත් අනතුරුව කළු පැහැයටත් හැරි ගියේය.

මද වේලාවක් ඔහු යන් ශෙන්ගේ වතෙහි වෙනස්වන පැහැය අගය කළේ ය. අතීතයේ දී නම් යන් ශෙන් සහ අනෙකුත් ගෝලයින් ඔහුට කරදර කිරීමට පැමිණෙද්දී ඔහු උදාසීන ව සිටියේ ය. නමුත් අද දිනයේ දී ඔහු වටහා ගත්තේ ඉඳහිට හෝ පෙරළා වාද කිරීමෙන් ඉතා රසවත් ප්‍රතිඵලයක් දැකිය හැකි බවයි.

ශෙන් ජිෂියෑන් වටා ඔහුට දැනුණු පීඩනය දුමාරයක් මෙන් ක්‍රමයෙන් පහව ගියේ ය.

ඔහු, ඔවුන් බොහෝ දෙනෙකුගෙන් කරදර නොවන නිහඬ, හුදෙකලා අයෙකු වීම ඇත්තෙන් ම නරක ය. ඔහු සිය මැණික් කටුව පෙරළා අනෙකාට නික්ම යන්නැයි ඇඟවීය.

ඖෂධ අඩංගු බෝතලය රැඳුණු අතෙහි නිය තුඩු සුදු පැහැ වනතුරු තද විය. අද දින යැන් ජින්ගේ ප්‍රතිචාරය අපේක්ෂා නොකළකි. ගුරුතුමා ඔහුට කුමක් හෝ පැවසූවාවත් ද?

"ඔබට අවැසි බෙහෙත් ෂිෆුගෙන් ඉල්ලා ගන්නම්" යනුවෙන් පැවසීමෙන් යැන් ජින් කුමක් නම් අදහස් කළා ද යන්න වටහා ගැනීමට ඔහුට නුපුලුවන් විය. මොහොතක ඇවෑමෙන් ඔහු වෛරී සහගතව පැවසූවේ " ජ්‍යේෂ්ඨ සහෝදරයා තවමත් කරුණු කාරණා හොඳින් විමසා බැලිය යුතුයි. ෂිෆුට සැඟවුණු කඩු මණ්ඩපය පිළිබඳ සිදුවීම නැවත සලකා බැලීමට අවැසි බවක් අසන්නට ලැබුණා. ජ්‍යෙෂ්ඨ සහෝදරයා තමන්ගේ වැරදි මුලදී ම පිළිගත්තොත් හොඳයි, අවසානයේ දී ලැජ්ජාවට පත් නොවී. "

ඒ අවසන් වැකිය මෘදු සහ මන්දගාමී විය, පැහැදිලි තර්ජනයක් අන්තර්ගත වූ.

ඔහු සැඟවුණු කඩු මණ්ඩපය ගැන සිහි කරත් ම යැන් ජින්ගේ හැඟීම් ප්‍රකාශනය විගසින් ම අඳුරු වූ අතර, දෑත් මිටි වූ අතර දෑසින් සීතල ආලෝකයක් පිළිඹිබු විය.

යන් ශෙන් සීතල හඬින් ගොරවමින් අත තිබූ කුඩා බෑගය සහ ජේඩ් බෝතලය යැන් ජින් හිඳ සිටි යහනට විසි කළේ ඒවා යැන් ජින්ගේ ගත වැදේ ද යන්න ගැන පවා තැකීමක් නොකොටම ය.ඔහුගේ පිටුපස දොරට තට්ටු කරමින් ඉක්බිති ඔහු නික්ම ගියේ ආපිට බැලීමට මදකුදු නොවෙහෙසෙමිනි. ඔහුගේ පා සටහන් රාත්‍රී අඳුර තුළ මැකී ගියේ ය.

සාමය යථා තත්ත්වයට පත් වූ පසු යැන් ජින් තවදුරටත් සිය නිධානය නොතිබූ නිරුවත් මැණික් කටුව ස්පර්ශ කළේ ය. 

ඔහුට එදා ද තමන්ව ආරක්ෂා කරගත නොහැකි විය. ඒ ලෙසින් ම, අදත්. අදත් ඔහුට තමන්ව ආරක්ෂා කරගත නොහැකි විය.

තව තවත් ශක්තිමත් වීමට, බලවත් වීමට ඔහු දැඩි ලෙස සිතත් ම ඔහුගේ සීතල දෙනෙත් අඳුරු පැහැ ගත්තේ ය. බිම විසිර තිබූ ඔසු අඩංගු බෝතල් දෙස නෙත් හෙළූ ඔහු ඒවා එකින් එක අහුලා ශෙන් ජිෂියෑන් විසින් එවන ලද කුඩා බෑගයට පුරවා කුටියේ කොනකට අහඹු ලෙස වැටෙන සේ විසි කළේ ය.

......

සිව්වන වැඩිහිටියාගේ ගෝලයින්ට යැන් ජින්ව පිරික්සන ලෙස දැන්වීමෙන් අනතුරුව ශෙන් ජිෂියෑන් යළි නිවසට පැමිණ වටපිටාවට බාධකයක් තැබීමට පමා වූයේ, මන්තර ගුරුකම්.... අහ්ම්.... මැජික් ශිල්ප ක්‍රම පුහුණු වීම ඇරඹුවේ ය.

ඇත්ත වශයෙන් ම ඔහුට විශ්වාසය තැබිය හැකි මතකයන් කිහිපයක් ඔහු සතුව තිබිණි. පොදු ශිල්ප ක්‍රමයක් වූ පිරිසිදු කිරීම් වැනි දේ වරක් හෝ දෙවරක් පුහුණු වීමෙන් අනතුරු ව සාර්ථක විය. ඔහුගේ සිරුර ධ්‍යාන වැඩීම සඳහා විශිෂ්ඨ විය. නමුත්, අවසනාවකට හෘද රෝගය ඔහුගේ බොහෝ හැකියාවන් කපා දමා තිබිණි.

ශෙන් ජිෂියෑන් සිය අසිපත මේසය මත තබා මනාව එය අධ්‍යයනය කළේ ය.

චින්යුන් නිකායේ බර කඩු ශිල්ප ක්‍රම මෙන් ම සැහැල්ලු කඩු ශිල්ප ක්‍රම ද ඉගැන්විණි. ශෙන් ජිෂියෑන් පුහුණු වූයේ දෙවන ක්‍රමයයි. එහි ප්‍රතිඵලය නම්, ඔහුගේ කඩු හරඹය ඉතා සැහැල්ලු සහ අතිශයින් ම වේගවත් වීමයි.

අසිපතේ නිමැවුම්කරු වූයේ බොහෝවිට වසන්ත සුළඟක් වැනි මෘදු ස්වභාවයක් දරන කම්මල්කරුවෙකු විය හැකිය. මිටේ සිට කොපුව දක්වා වූ සියලු ම රේඛාවන් සියුම් සහ මෘදු විය. කොපුවෙන් ඉවතට ගත් කල අසිපත් බඳ, උණුසුම් ආලෝකයෙන් නැහැවුණු ජේඩ් මෙන් විය.

ශෙන් ජිෂියෑන් අසිපත කිහිප වතාවක් එහේ මෙහේ වැනුවේ, එය සියුම් ජේඩ් වැනි යැයි සිතුණි. නමුත්, මෙය සැබෑ සටනක දී භාවිතා කළහොත්..... ඔහු ඒ කරුණ සලකා බලා පසෙක වූ දෘඪ මේස දාරය ඉලක්ක කර ගනිමින් අසිපත පහත හෙළීය.

කොණ්ඩ කැබැල්ලක් කපා දමනවාක් මෙන් අනායාසයකින් ම මේස කොන හරහා ගොස් කපා දැමුවේ, කිසිදු ශක්තියක් අවැසි නොවීමය. බොල් හඬක් නගමින් මේස කොණ බිම පතිත විය. ශෙන් ජිෂියෑන් සියතෙහි වූ අසිපත දෙසත්, බිම වැටුණු මේස කොන දෙසත් බැලුවේ ය. කලබලයට පත් ඔහු ඉතා ප්‍රවේශමෙන් අසිපත ආපසු එහි කොපුවෙහි ලෑවේ ය.

මුල් හිමිකරු උගත් අසිපත් ශිල්පීය ක්‍රමයන් මතකයේ රැඳී තිබූ හෙයින් ශෙන් ජිෂියෑන් හට අවැසි වූයේ සිය පුහුණුවීම් සඳහා උචිත රහස් ස්ථානයක් සොයා ගැනීමටයි.

හදිසියේ ම මෙවැන්නක් සිතුණේ බාහිරින් අඳුරු, ඝෝෂාකාරී ශබ්දයක් කන වැකුණු වහාම ය. ධ්‍යානවේදියෙකුගේ සිරුරක් නිසාවෙන්, ඔහුගේ ශ්‍රවණ හැකියාව සාමාන්‍ය පුද්ගලයෙකුට වඩා වැඩි විය. එබැවින් එම කුඩා ශබ්දය ශ්‍රවණය පහසු වූ අතර නොසලකා හැරීම ඉතා අසීරු විය.

ඒ නිහඬ ශබ්දයෙන් පසු දොරට තට්ටු කරන හඬක් නැඟුණේ, සුළඟට ගසා යන ගසක අත්තක් දැව මතට පහර දෙනවාක් මෙනි.

එහි ශක්තිය ක්ෂය වූවාක් මෙන් හැඟෙන තුරු ම එම නීරස තට්ටු කිරීම මද වේලාවක් පැවතුණු අතර අවසානයේ දී එය නතර විය. නමුත්, මද විවේකයකින් අනතුරුව එම නොනවත්වා තට්ටු කිරීම යළි ඇරඹුණි.

ඔහුට නොපෙනී ඔහුගේ බාධකය හරහා ගමන් කළ හැක්කේ කුමනාකාරයේ පුද්ගලයෙකුට ද?

" කවුද ඔතන? " ශෙන් ජිෂියෑන් විමසා සිටිමුත් කිසිදු පිළිතුරක් නම් නොවීය. තට්ටු කිරීමත් මදකට නැවතිණි. යළි එය ඇරඹෙද්දී, තට්ටු කිරීම පෙරට වඩා වේගවත් සහ වැඩි හඬක් වූයේ, අනෙක් පස සිටින්නා තුළ ක්‍රමයෙන් කෝපයක් වැඩෙන්නාක් මෙනි.

ශෙන් ජිෂියෑන් තමාට ම මිමිණුවේ ය. එක් අතක් කබා අත තුළට යවා සිය ආරක්ෂාව පිණිස අත් මුද්‍රාවකට ඇඟිලි සකසා ගනිමින් අනෙක් අතින් දොර විවර කළේ ය.

එහි කිසිවෙකුත් නොවීය.

ඔහුගේ සිවුරේ වාටිය සොලවමින් දෙපා අතරින් සුළං රැළක් හමා ගියේ ය. හදිසියේ ම යමක් පිළිබඳ ඉව වැටුණු ශෙන් ජිෂියෑන් පහළ බැලුවේ ය.

හරිත පැහැ යමක් දර්ශනය විය. 

පෙර පරිච්ජේදය | සියළුම පරිච්ජේද | පසු පරිච්ජේදය