පූර්වකථනය IV

 ⚠️After reading this gore,abusive content if you get seizures, faint or even ascend to heaven do not sue me for you've been warned and let's get real, I can't afford a lawyer.

ගැටවරයාගේ හා මිනීමරුවාගේ දෑස් එකිනෙක හමුවිය.කුඩා වෘකයාගේ දත් තවමත් මොටවූ නමුත් ප්‍රචණ්ඩත්වය  උපතින්ම ලැබී තිබෙන බව මොනවට පෙනීමට තිබුනි.

මෙය ස්වභාවීය මනඃප්‍රකෘතියක් විය හැක. මිනිසුන් මාරකාවස්ථාවක සිරවී සිටියදී දෙවර්ගයක් ඒ හා සටන්කලෝය. පළමු කාණ්ඩය ඉතා සැලසුම් සහගත ලෙස ගණනය කෙරුවන්ය, එසේත් නොමැතිනම් සදාචාරය,රාජකාරිය,අවංකභාවය හේතුවෙන් හෝ වාසි සහ අවාසි නිසිලෙස කල්පනා කිරීමෙන් අනතුරුව එය ගැලවීමට හැකි අවසන් උපාය බව තීරණය කෙරූවන්.ඔවුන්ගේ හද බිය නොහඳුනන්නන් නොවේ,නමුත් තම හෘදයසාක්ෂිය  හෝ බුද්ධිය විසින් බිය ජයගත්තන්ය.මෙය සැබෑ ධෛර්‍යයයි.

මෙහි තවත් කාණ්ඩයක සිටි පුද්ගලයා කිසිවක් පිළිබඳ නොසිතුවේය.සියල්ල සිදුවූයේ ආශයිකවය. නෛසර්ගික කෝපය, ජම්මයෙන් ඇතිවන සටන් කිරීමට කෙරෙහි අධිෂ්ඨානය , ඔවුන්ගේ හදතුලින්මද මෙයින් ලැබෙන්නේ තවත් භයානක ප්‍රතිඵලයක් බව දැන දැනම තම සතුරා සපා කෑම නවතාගැනීමට ඔවුන්ට නොහැකිය.

මේ අවස්තාවේ නිරනුමානවම චං ගන් අයත් වූයේ දෙවනි කාණ්ඩයටය.සමහරවිට 'බියකරු' යන වචනයම ඔහු තුල කෝපයක් ඇතිකිරීමට සමත්විය.

පසුගිය වසර කිහිපය මෙනෙහි කිරීමේදී තම හෘදයසාක්ෂිය  හා සටන් කිරීමට වූයේ ශියු නියැං පමණක් නොවේ.චං ගංගේද තත්ත්වය එසේමය.අවසානයේ ශියු නියැං ඔහු මරා දැමුවේ නැත, සමහරවිට ඒ ඔහුගේ සිරුරේ දුවනා ලෙයින් අඩක් තම දෙටු සොයුරියගේ නිසා විය යුතුය. චං ගං ද ඇයව මරාදැමුවේ නැත්තේ මෙතරම් වධ වේදනා වින්දද අවසානයේ ඔහු හදාවඩා ගත්තේ ඇය නිසා විය හැක.

කැළැල් සහිත ගෝත්‍රිකයා ඔවුන්ගේ බැල්මෙන් තුවාල ලැබූ බවක් දැක්වීය.ඔහු කෝපයෙන් තම විශාල මුෂ්ටිය එසවූයේ චං ගං ගේ ලේ කෙසේ හෝ සෙලවිය යුතු බව සිතමිනි.

ඒ අවස්තාවේදීම දොරටුව දෙසින් විශාල ශබ්දයක් ඇතිවූ අතර ඒ ඉදිරිපිට මුරකරමින් සිටි ගෝත්‍රිකයා කුටියේ අඩක් සුන්නද්දූලි කරමින් විසිවී ගියේය.

පිටත වූ හිරු කිරණ කුටිය තුලට පෙරී විත් අඳුරු කුටිය එකවර ආලෝකමත් විය.චං ගං තම දෑස් වපරකලේය;ඔහු දෑස විවර කිරීමට පෙර ලේ සීතල වී යන කෑගැසීමක් ඇසුනි.

කැළැල් සහිත මිනිසා චං ගං අල්වාගෙන සිටි අත නිර්ධය ලෙස කඳින් වෙන්කර තිබුනි, චං ගං හට මීළඟට අඩිය තබන්නේ කොහිදැයි සිතාගැනීමට නොහැකිවිය.කරකියාගත දෙයක් නොහැකිව ඔහු අනෙක්පසට වැටෙන ඇසිල්ලෙහි තවත් සන්නාහ පැළඳි අතක් ඔහු තදින් වැළඳගත්තේය.

ඇදුරු ශන් ගේ අංගනයෙහි නිතරම කොටස් ගලවනු ලැබූ ලෝහ සන්නාහ කිහිපයක් එහෙ මෙහෙ දමා තිබෙනු දැකීම සුලබ දසුනකි.නමුත් බර සන්නාහ මිළ අධික වූ අතර සාමාන්‍ය මිනිසුන්ගේ යන්ත්‍රශිල්පීන් හට ඒවා නඩත්තු කිරීමට අවසරයක් නොවීය. මේ කටයුතු හා නිතරම සම්බන්ධ වන ෂූ බායිහු ටද මෙය මෙසේම විය.

එක්වරක් සම්පූර්ණයෙන්ම අබලන්වූ බර සන්නාහයක් විනාශකර දැමීම සඳහා සේනාධිනායක ගොඩැල්ලට රැගෙන ඒමට නියමිතව තිබූ අතර ඇදුරු ශන් තම මිතුරන්ගේ මාර්ගයෙන් තම නිවසට එය රැගෙන විත් කොටස් සීරුවෙන් වෙන් කරමින් ඒ පිළිබඳ සියලු දේ චං ගං හට ඉගැන්වීය.

යමෙක් බර සන්නාහය පැළඳි පසු හමුදා දහසක බලය ලැබෙන බවත්, යුධ අශ්වයන් තලා දැමිය හැකි ශක්තියක් ලැබෙන බවත්, අවට ඇති තාප්ප හා බිත්ති සුනු විසුණු කල හැකි බවත් නිසිලෙස උගතහොත් කුඩා දරුවකුට වුව එය හැසිරවිය හැකි බවත් ඔහුට සිහිපත් විය.

නමුත් අපහසුම කාරණය නම් කන්දක් එසවීමෙන් වැළකී සිටීමය.

ශක්තිමත්ම බර සන්නාහධාරියන් වූයේ එය පැළඳි පසුත් ඉඳිකට්ටකට සිහින් නූලක් දැමීමට හැකි අයවලුන්ය.

මේ දැන් පැමිණි මිනිසාගේ බර සන්නාහය ගෝත්‍රික භටයන්ගේ ඒවාට වෙනස් විය.එය මදක් ප්‍රමාණයෙන් කුඩා බවක් පෙණිනි.එහි පිටත ඉතා දීප්තිමත් රිදී පැහැයකින් යුක්ත නොවූ අතර ඉතා තද ඇසට විගසින් නොපෙණෙන වර්ණයක් එය සතු විය. ඔහු චං ගංගේ පිටට තට්ටු කර බර සන්නාහයේ උරහිස මත ඔහුව තබාගත්තේය. ඔහු ඉතා නිශ්ශබ්ද හඬකින් චං ගං ඇමතීය.
"බිය නොවන්න."

ලෝහ මුව ආවරණය තුලින් පිටතට පැමිණි හඬ මදක් විකෘතව තිබුණි.චං ගං ඉතා හොඳින් ඒ ආවරණය ව තිබූ මුව දෙස බලාහිඳීමට විය.

දොරටුව අසල සිටි ගෝත්‍රිකයන් ප්‍රතික්‍රියා කිරීමට පටන් ගත්තේ ඉන්පසුවය ; ඔවුන් ඇවිස්සුනු මී වදයක් මෙන් විය. කැළැල් සහිත මිනිසා ඔවුන්ගේ කේන්ද්‍රය කර කෘෂණ සන්නාහයෙන් සැරසි මිනිසා හා චං ගං වටා ඔවුන් මිනිස් කවයක් නිර්මාණය කලහ.

කෘෂණ සන්නාහය පැළඳි පුද්ගලයා එක් අතකින් චං ගං ආරක්ෂා කරමින් අනෙක් අතින් අනලංකෘත 'ලෝහ යෂ්ටියක්' දරාසිටියේය. මේ දැකීමට ප්‍රිය නොවුපදන ‍රිටෙහි කෙළවරින් වාෂප පිටවෙමින් තිබුනි.

ඔහු මේ ටික මොහොතකට පෙර එල්ල කල ප්‍රහාරය ඉතා දරුණු හා වේගවත් විය. චං ගං එය නිසිලෙස දුටුවේද නැත- සැබවින්ම ඔහුගේ එකම ආයුධය මේ ගෙවී ගිය යකඩ කූරද?

කැළැල් සහිත මිනිසා හිසේ සිට දෙපතුල තෙක් සිහින් දහදියෙන් තෙත්ව අඩි දෙකක් ප්‍රවේශමෙන් පසුපසට ගෙන සිහින් හඬින් කෙඳිරීමට විය: "කෘෂණ සන්නාහය,ග ෆං රෙන්.....උඹ අර යක්ෂ කාක්කෙක්."

චං ගං හට මුලින් කිසිවක් කරකියාගත නොහැකි විය, නමුත් එතරම් වේලාවක් ගතවීමට පෙර ඔහුගේ පසුපස තද විය - රකුස් කවුඩෙක්!

තුදුස් වසරකට පෙර උත්තර ගවේෂණයේදී, කෘෂණ ලෝහ කඳවුර එකවරම ගෝත්‍රිකයන්ගේ තැනිතලාවට කඩාවැදුනේ අඳුරු සුළිසුළඟක් මෙනි, ගෝත්‍රිකයන් ඔවුන්ට මහත් සේ බියක් දැක්වූ අතර එතරම්ම වෛරකලහ.ඔවුන් යක්ෂ කාක්කන් යන නාමය ඔවුන්ට ලබාදී තිබුනි.

කෘෂණ සන්නාහයෙන් සැරසී සිටි මිනිසා එය එතරම් ගණනකට නොගෙන සියුම චං ගං හට නැවතත් මතක් කලේය: "තදින් අල්වාගන්න."

කැළැල් සහිත මිනිසා මහ හඬින් බෙරිහන් දුන්නේය, ඔහු සමඟම තවත් හොඳින් පුහුණු වූ ගෝත්‍රිකයන් සතරදෙනෙකුන් සර්ජනය කලහ. සතර දිශාවෙන්ම කඩු පහර එල්ලවිය. කෘෂණ සන්නාහධාරියාගේ පාද යටින් තද දම්පැහැ ආලෝකධාරාවක් නිකුත්විය; ඔහු නිපුණ ලෙස කඩු පහර එල්ල නොවුණු ඉඩ අතරින් ඉදිරියට විදගෙන දැනටම කඩාවැටී තිබූ ෂූ නිවසේ වහල මතට පැන්නේය.ඔහු ඒ මත ගොඩබෑ වහාම චං ගං සිටි වම් උරහිස නොසෙල්වුනද දකුණු උරහිස එකවරම විදුළි වේගයෙන් අනෙක්පස හැරුණි, ඔහුගේ අතේ වූ 'ලෝහ යෂ්ටිය' දෘෂ්ටිමායාවක් මෙන් දිස්විය.

මේ කෘෂණ සන්නාහධාරියාගේ ලෝහ රිටෙහි අගිස්සෙහි පිහි තලයක් තිබෙන බව දුටු චං ගං ගේ දෑස විසල් විය.සුළිසුළඟක් බඳු තලය දරුණු ලෙස පහර පිට පහර එල්ලකල අතර ඉදිරියට පැමිණි ගෝත්‍රික සොල්දාදුවා හට එම පහර නවත්වා ගැනීමට නොහැකිවිය.ඔහුගේ පපුව සිදුරුව ඔහුගේ සන්නාහයේ රඳවා තිබූ රන් මංජුසා පිපිරීගියේ ඒ විශාල මෘගයා කුඩා කැබලිවලට පුපුරවා දමමිනි.

චං ගංගේ මුව රුධිරයෙන් වැසීගියේය  .ඔහු තම සියලු වෙර යොදා තමාව පාලනය කරගත්තේ නොසැලෙන බැල්ම යන්තම් රැකගනිමිනි.ඔහු එක් අතකින් කෘෂණ සන්නාහය දැඩිව අල්වාගෙන සිටියේය.

මේ...දහසකට එරෙහිව එකෙක් සිටියද ජයග්‍රහණය ලබන බවට පුරාවෘතගත කෘෂණ ලෝහ කඳවුරයි.

ගෝත්‍රිකයන් තමා හා තම ප්‍රතිවාදියා අතර වූ කුසලත්වයන්ගේ විශාල වෙනස හඳුනාගත්හ.ඔවුන් එකිනෙකාදෙස බලා එකවරම ශියු නියැංගේ කුටියෙන් පිටව විවිධ දිශාවන්ට විසිරී වහළය මතට නැංගහ.

එක් අයකු කෘෂණ සන්නාහධාරියාගේ පාද දෙසට පහර එල්ල කලේය,තවත් අයෙක් ඔහුගේ හිසට පහරක් එල්ල කලේ ඔහුට පිටවීමට තිබූ මඟ අහුරවමිනි.අනෙකා ඔහුගේ කෘෂණ සන්නහයේ පපුවේ වූ රන් මංජුසාව ඉලක්ක කර පහර දුන්නේය.

එක් අතක් අහිමි වූ කැළැල් සහිත මිනිසා අඩි දහයක් පමණ පසුපසට ගෙන තම යාන්ත්‍රික අතේ ඉදිරිපස වූ එක් කොටසක් විවර කලේය. එහි මීළඟ මොහොතේ මුදාහැරීම සඳහා සූදානමෙන් තිබූ දුෂ්ට ඊ හිසක් මිනිසාගේ උරහිසෙහි වූ චං ගං දෙස එල්ල වී තිබුණි.

මේ ගෝත්‍රිකයන් කුඩාකල සිට එකට එක්ව දඩයමේ ගිය අයවලුන්ය . වටකර මරාදැමීම වැනි දෑ කෙරෙහි ඔවුන්ගේ කණ්ඩායම් සමායෝජනය කිසිවකුට දෙවනි නොවීය.

මිනීමරු චේතනාව අහස උසට නැගීතිබිණි.ඕනෑම අයකුට තම මවිල් කෙලින් වනු දැනිණ.

චං ගං හට අවසානයේ කෘෂණ සන්නාහධාරියාගේ  ලෝහ යෂ්ටිය පැහැදිලිව දැකගැනීමට හැකිවිය.අධි වේගයෙන් ප්‍රචාලනය කලවිට අඩි තුන හතරක් දිග ලෝහ තලය ලෝහ යෂ්ටියේ කෙලවරින් ඇදී ආවේ වාෂ්ප පිටකරමිනි.බලය කෙමෙන් අවම වන විට තියුණු තලය උපරිම වේගයෙන් ගමන්කර ආපසු අනෙක් පසට ඇදීඑයි. එකක් ඉදිරියට ඇදෙන අතර අනෙක ආපසු පැමිණෙයි.තලය සම්පූර්ණ රවුමක් කැරකෙමින් ඉතා භයානක මාංශ ඇඹරුම් යන්ත්‍රයක් සේ ක්‍රියාකලේය.

මේ අවස්තාවේ චං ගං එකවර කෘෂණ සන්නාහධාරියාගේ උරහිසේ සිට ඔහුගේ පපුවට තදින් වෙලී සිටින ලෙස සන්නාහධාරියා විසින් ඔහුව තම දෑතට රැගෙන ඒ හා නැමී සිටියේය.

චං ගං පුදුමයට පත්ව සිටියේය-ඔහුගේ බර ගණන් නොගෙන මේ බර සන්නාහය පමණක් සැලකූවිට එයම රාත්තල් සියයක් පමණ බරකින් යුක්තවිය.මෙවැනි ඉරියව්වකින් සිටින විට ඔහුගේ බරද කෘෂණ සන්නාහධාරියාගේ පහළ පසුපස මතින් දැරීමට සිදුවිය. තත්ත්වය මෙසේ වූ විට මොහුගේ කොඳු ඇට පෙළ යහතින් ඉතිරි වේවිද?

මිනිසා තම සිරුර හරවා නිවැරදි හා කදිම  බැමවීමක් කර චං ගංද සමඟින් වහළයෙන් පැන්නේ කැළැල් සහිත මිනිසා එල්ල කල හීය නිර්වද්‍යව වළකාලමිනි.

ග ෆං රෙන්හි ආලෝකය එක ඉරකට කැටිවිය, ඔහුගේ චලනයන් නිර්වද්‍ය හා වේගවත්ව එක් මිනිසකු මරාදමමින් හා අනෙකකුගේ කකුල් පසාරුකරමින් තම කකුල් ආවරණයේ  යාන්ත්‍රනය ක්‍රියාත්මක කර වාශ්ප රළක් නඟමින් ඇසිල්ලකින් අඩි දහයකටත් වඩා ගමන් කර තිබුණේය .

පඔහුට ගෝත්‍රික සොල්දාදුවන් පහසුවෙන්ම මෙල්ල කල හැකි බව පෙනුන නමුත් චං ගං හේතුවෙන් එක් අතක් අවහිරව තිබූ නිසා වැඩි වෙලා ඔවුන් හා සටන් නොකරන ලදී.

"මා ඔබව මුලින්ම නගරයෙන් පිට කරන්නම්."මිනිසා නොවෙනස්වූ ස්වරයෙන් පැවසීය. "මේ ස්ථානය ඉතා නොසන්සුන්, ඔබේ මෑණියන් පිළිබඳ...කරුණාකර ඉවසන්න."

චං ගං ඔහුට හේත්තුවී මද වේලාවක් නිහඬව සිටියේය.ඉනපසු ඔහු පැවසූවේ : "මාගේ මෑණියන් විශ පානය කලේ ඇගේ කැමැත්තෙන්. ඇය  නිතරම ගෝත්‍රිකයන් හා සම්බන්ධකම් පැවැත්වූවා. සමහරවිට ඇය ඔවුන්ගේ ඔත්තුකරු විය හැකියි."

කෘෂණ සන්නාහධාරියා කිසිවක් නොපැවසීය: ඔහු එයින් පුදුමයට පත්වූ බවක් පෙනෙන්නට තිබුනේ නැත.

"නුඹ ගෝත්‍රික පුත්‍රයකු බේරාගත්තා.පාඩුව නුඹේයි-"චං ගං මදකට කතාව නැවතීය, ඉන්පසු අනෙක් පුද්ගලයාගේ අනන්‍යතාව සම්පූර්ණයෙන්ම හෙලිකලේය,
" ඇදුරු ශෙන්"

අඳුරු පැහැ සන්නාහධාරියාගේ කන අසලින් ශ්වේත පැහැ දුම් වළාවක් නැගිනි , ඉන්පසු ඔහුගේ මුව ආවරණය ඉහළට එසවී ගියේ ශෙන් යී ගේ උගත් මුහුණ අනාවරණය කරමිනි.

"උතුරු මුරසංචාර ඒකක යානාවේ කැරැල්ලක් " ශෙන් යී පැවසීය."මා මුලින් සිතුවේ ද්‍රෝහියා ෂූ බයිහු බවයි නමුත් දැන් ශියු නියැංගේ සියදිවි නසාගැනීමෙන් පෙනීයන්නේ ඇය තම ස්වාමිපුරුෂයා පිළිබඳ වූ පසුතැවීමෙන් එය සිදුකරගත් බවයි.සොයුරු ෂූ රට වෙනුවෙන් දිවිපුදන්නට ඇති, අවසානය තෙක්ම මෙය පිළිබඳ නොදැන සිටියත්...නුඹත් ...මේ අහිමිවීම දරාගතයුතුයි."

"පෙනෙන ආකාරයට නුඹ මෙය මුල සිටම දැන සිටින්නට ඇති" චං ගං රහසෙන් පැවසීය, "නුඹ කවරෙක්ද?"

ශන් යී : "මා කෘෂණ ලෝහ බළඇණියේ සේනාධිපති ගූ ගේ ඍජු විධානයන්ට අනුව ක්‍රියාකරන යටහත් පහත් සේවකයෙක් "

කෘෂණ ලෝහ බළඇණියේ සේනාධිපති ගූ ගේ ඍජු විධානයන්ට අනුව ක්‍රියාකරන යටහත් පහත් සේවකයෙක් .

චං ගං මේ වාක්‍ය පිළිබඳ නැවත නැවතත් සිතන්නට විය.ඔහු කෙතෙක් එය සිදුකලද එය සිහිනයක් පමණක් බඳු විය.ඔහු තම මෑණියන්ගේ දරුවා නොවන බව දැනගත්තේ මීට සුළු මොහොතකට පෙරයි . දැන් තමාගේ අසල්වැසි පැරණි මතධාරී , කිසිවිටකත් යන්ත්‍ර තෙල් වලින් තොර වූ දෑත් නොතිබූ ඇදුරුතුමන් කෘෂණ ලෝහ කඳවුරේ සෙනෙවියෙක් ලු...

එසේනම් ශීලියු ?

චං ගං දුක්බර සිනහවක් පා සිතන්නට වූයේ මේ අවස්තාවේ කවරකු හෝ තම ඊෆු සේනාධිපති  ගූ නොවේනම් අධිරජු බව පැවසූවද ඔහු තවදුරටත් පුදුමයට පත් නොවන බවයි.

"සේනාධිපති ගූ මෙවැනි දුශ්කර පළාතක සැඟව සිටින්නේ කුමක් නිසාද?ඇයි නුඹ ගෝත්‍රික පුත්‍රයකුගේ දිවි බේරාගත්තේ?"

මේ ප්‍රශ්න දෙක ඇසීමෙන් පසු චං ගං තමා පාලනයෙන් ගිලිහෙමින් සිටින බව දැනගත්තේය.ඔහුට එවලේම තම මුව පියාගැනීමට අවශ්‍යවූ නමුත් ඔහුට අවසානයේ වූ අනවශ්‍ය වැඩිදුර ප්‍රශ්නය වළකාගැනීමට නොහැකි විය.

"ශීලියු කොහෙද?"

මේ ප්‍රශ්නය ඇසීමේදී චං ගංගේ හද දුකෙන් පීඩිතව ගියේය.සියල්ල මෙසේ සිදුවද්දී ඔහු තවමත් වද වූයේ ශීලියු පිළිබඳවයි.ඔහු ඒ පුද්ගලයා සාමාන්‍ය වේශයෙන් සිටින උසස් පුද්ගලයකු බව දැන සිටියද තවමත් ඔහුගේ කන් නෑසීම හා ඇස් නොපෙනීම පිළිබඳ කම්පාවට පත්ව සිටියේය.මේ කලබලයන් අතර ඔහුට කිසියම් අනතුරක් වූයේද? ඔහුට සැඟවීමට ස්ථානයක් ලැබුනේද?

ඔහුට මෙය සිතීම කෙසේවත් නවතාගැනීමට නොහැකි විය. "ඇයි මා බේරාගැනීමට ඇදුරු ශෙන් පැමිණිය්..ඇයි ශීලියු නොපැමිණියේ?"

මරාදැමීමේ හා බෙරිහන්දීමේ හඬ දසත පැතිර තිබුණි. යෝධ සරුංගලයේ සෙවනැල්ල යැන්හුයි ගම්මානය ගිලගනිමින් තිබිණි.භූතයන්ගේ වෙස් ගත් බායිහොං හී  සෑම තැනටම එල්ල විය .ඈතින් යමකුගේ නිවසක් දැවෙමින් තිබුණි.ශෙන් යී දකින කිසිඳු දෙයකින් නොසැලී අයාලේ යන හී මගහරිමින් ඉදිරියට ඇදුණි. "උතුමාණනි, හොඳින් අසුන්ගන්න"

චං ගං සිහි මද තත්ත්වයකින් විමසුවේ: "නුඹ මට කුමක් කියාද ඇමතුවේ?"

ශෙන් යී සන්සුන්ව පිළිතුරු දුන්නේය: "තුදුස් වසරකට පෙර මහෝත්තමයාණන් දකුණේ මුරසංචාරයක යෙදෙමින් ඉන්නාතරතුර අගබිසව දරුවකු කුස දරා තනිව මාලිගයේ රැඳී සිටියා,ඇය නපුරු බලවේගයන්ගේ ගොදුරක් බවට පත්ව සිටියා. ඇය වාසනාවකට ඇගේ සොයුරියගේත් සේවිකාවන්ගේත් උදව් ඇතිව පලාගියා. දකුණ දක්වා එන අතරතුර ඔවුන් සාමාන්‍ය ජනයාගේ කැරැල්ලකට හසුවූ නිසා ඇය උතුමාණන්ට දිවි දීමට නොවිඳි දුකක් නෑ,අවසානයේදී ඇයට මහෝත්තමයාණන්ව නැවතත් කිසිදින දැකීමට ලැබුනේ නැහැ."

"අගබිසවගේ බාල සොහොයුරිය උතුමාණන්වත් රැගෙන පලාගියා, ඉන්පසු ඔබතුමා පිළිබඳ කිසිඳු ආරංචියක් ලැබුණේ නැහැ.මහෝත්තමයාණන් විටින් විට මිනිසුන් ඒ සඳහා යෙදවූ නමුත් එතුමා නිතරම සිතුවේ ඔබතුමාගේ මෙලොව තවදුරටත් නොසිටි බවයි.ඒ වසර තුනකට පෙර ඔබතුමා පිළිබඳ හෝඩුවා කිහිපයක් ලැබීමට පෙරයි.මහෝත්තමයාණන් අපව මෙහි එවූයේ ඔබතුමා නැවතත් කැඳවාගෙන යාමටයි." ශෙන් යී වචන කිහිපයකින් සමාව ඇයදීය."අපගේ අනන්‍යතාවය හෙලිකිරීමට අපට හැකියාවක් තිබුණේ නැහැ, උතුමාණනි කරුණාකර මේ ගැත්තන්ට සමාව ලබාදෙන්න."

චං ගං හට මේ පිළිබඳ සිනහසෙනවාද හඬනවාද යන්න තීරණය කිරීමට නොහැකි විය.ඔහුට හැඟුනේ ඇදුරු ශෙන් ගේ හිස යාන්ත්‍ර තෙල් වලින් පිරී තිබූ බවයි. ඔහු නොසැලකිලිමත්ව ව්‍යාජ කතාවක් ගොතා තිබුණේය.ඔහුට අනුව ශියු නියැං අගබිසවගේ නැගණියයි එසේනම් අගබිසවත් ගෝත්‍රිකයෙක්ද?

ඇරත් අධිරජු තම දරුවා නැවත කැඳවාගෙන ඒමට මිනිසුන් දෙදෙනකු පමණක් එවාවිද?අධිරජු අන්ත අසරණ දිළින්දකු වුව, සම්පූර්ණ රාජසභාවේ මහේස්ත්‍රාත්වරුන් හා යුධ සෙන්පතියන් අතරින් දෙදෙනකු පමණක් එව්වේ කුමක් බලාපොරොත්තුවෙන්ද?අනෙක් කාරණය වසර දෙකක් තිස්සේ තම අනන්‍යතා සඟවාගෙන මේ මිනිසුන් දෙදෙනා කලේ කුමක්ද?

මේ කෘෂණ ලෝහ බලඇණියේ අසමසම සෙන්පතියන් දෙදෙනකු ශියු නියැං ගෝත්‍රිකයන් හා සම්බන්ධකම්  පැවැත්වූ බව දැන නොසිටීම විය නොහැකියි. අසල්වැසියන්ව සිටියත්  ඔවුන් ඇයව නොනැවැත්වූයේ මන්ද?

චං ගං ඔහුට තවත් කතාකිරීමට ඉඩක් නොදීය : "නුඹට වැරදීමක් වෙලා"

ශෙන් යී: "උතුමාණනි...."

"නුඹට වැරදිලා !" චං ගං මේ වනවිට ඉතා වෙහෙසට පත්වී සිටියේය,ඔහුට මේ මුසා පැවසීමට පමණක් දන්නා මිනිසුන් දෙදෙනකු හා තවදුරටත් පෑහීමට අවශ්‍ය නොවීය:

"මාව බිමින් තියන්න, මම කුමන කොල්ලකරුවාගේ හෝ සහ ගෝත්‍රික ස්ත්‍රියකගේ අවජාතක දරුවෙක්, කෘෂණ ලෝහ කඳවුරේ සෙනෙවියන් දෙදෙනෙක් මා ගලවාගැනීමට තම දිවි පරදුවට තැබීම අපරාදයක්.ඔබලා වැනි පුද්ගලයන් ඊෆු කරගැනීමට තරම් මා වටින්නෙ නෑ!"

ශෙන් යී මේ අවසන් වාක්‍යය ඇසීමෙන් පසු සුසුමක් පිටකලේය.මේ වචන වලින් සියයට හැත්තෑවක් හෝ අසූවක් ශීලියු වෙත එල්ල වූ බව ඔහු හොඳින් වටහාගත්තේය.ඔහු ඔවුන් අතරමැද සිරවූවා පමණි. චං ගං සම්පූර්ණයෙන්ම වැරදි පුද්ගලයකු මත තම කෝපය පිටකරමින් සිටියේය.

ඔහු  විකාරයෙන් මෙන් ඔබ මොබ ගසමින් තිබූ චං ගං ගේ පාදයක් ඉතා මෘදුලෙස අල්වාගත්තේය."මාගේ නොහික්මුණු බවට කමාකරන්න- ඔබගේ දකුණු පාදයේ සුලැඟිල්ල අනෙකුත් මිනිසුන්ගේ මෙන් නොව මදක් නැවී තිබෙන්නේ නොවේද? එය මහෝත්තමයාණන්ගේ පාදය හා සමානයි, එය මකරාගේ ලේ නෑ කම මොනවට පෙන්වනවා."

චං ගං තම පාදය විගසින් නැවත තමා දෙසට ඇදගත්තේය ,ඔහුගේ හද තව තවත් මිදෙමින් තිබුණි.

තමාගේ සුලැඟිල්ල උපතින් මෙසේ නොවූ බව ඔහුට හොඳින් මතකය.එය මෙලෙස කඩා දැමුවේ ශියු නියැං ය. ඇය ඔහුගේ හැඬීම් හා වැළපීම් ගණනකට නොගෙන කාන්තාවකගේ පාද බැඳ දමන ආකාරයට ඔහුගේ සුළඟිල්ල අඹරා බැඳ දැම්මාය.

මකරාගේ ලේ ඥාතියෙක්?....විකාරයක් මෙයත් බොරුවට ප්‍රබන්ධ කල හැකිද?

                    *********

*ග ෆං රෙන් : 割风刃 (cutting wind blade)

පාඨකයකු විසින් මේ ආයුධයේ රුවක් නිර්මාණය කර ඔහුගේ Weibo ගිණුමෙහි පළ කර තිබූ අතර එය Priest (The original  author of the novel ) තමාගේ weibo ගිණුමෙහි එය නැවත පළකර ඇත.

කාන්තාවන්ගේ පාදය බැඳීම:

පැරණි චීනයේ කුඩා පා ඇති කාන්තාවන් ඉතා පියකරු බවත් විශාල පාද ඇති කාන්තාවන් එසේ නොවන බවත් සැලකූ අතර තම දරුවන්ගේ "රුව රැකගැනීමට" දෙමව්පියන් විසින් ඔවුන්ගේ පාදයන් වෙනස් කර (ඇට කටු කඩන්න එහෙම ඇති ඉතින්..)බැඳ තබා ඔවුන්ගේ පාදයන් කුඩා කරනු ලැබීය.

SHEN YI 

පෙර පරිච්ඡේදය | පසු පරිච්ඡේදය | සියලුම පරිච්ඡේද