නවවන පරිච්ඡේදය | ඔබ අන්ධයි!

 චෙන් ගොං ඇසුවේ, "ඇයි?"

ෂෙන් ච්‍යාඕ පැහැදිලි කළේය, “ඔබ මේ මොහොතේ ඔවුන්ව හඳුනාගැනීමට උත්සාහ කරන විට ඔවුන් ඔබ ගැන සැලකිලිමත් නොවූ අයුරු මට වැටහුණා. අපි එන විට පවා ඔවුන්  නිශ්ශබ්දව සිටියා. ඉතින්, ඔවුන් අපෙන් ආරක්ෂා වෙනවා හෝ අප සමඟ කතා කිරීමට අකමැති බව පැහැදිලියි.කවුරුන් වුවත් ඔබේ පැතුම ඉෂ්ට නොවේවි කියලා මට බයයි.”

ෂෙන් ච්‍යාඕ පැවසූ දෙය සත්‍ය බව පිළිගැනීමට සිදු වුවද චෙන් ගොං තරමක් අසතුටට පත් විය.“හම්ප්! මම දන්නවා, මේ මිනිස්සු හැමෝම මම වගේ පහත් පන්තියේ අයව පහත් විදියට සලකනවා. නමුත් මම කවදා හෝ ඔවුන් සියල්ලන්ව පාගලා දමන දවසක් ඒවි. එදාට ඔවුන්ට මා ඉදිරියේ දණින් වැටෙන්න සිද්ධ වේවි! ”

චෙන් ගොන්ගේ හදවතේ ඇති වූ තුවාලය ඔහු හැදී වැඩෙන විට අත්විඳින ලද කරදර,වේදනාවන් නිසා සිදු වූ බවත්, ඔහුට වචන කිහිපයක් පැවසීමෙන් එයට පිළියමක් යෙදිය නොහැකි බවත් ෂෙන් ච්‍යාඕ දැන සිටියේය. ඒ නිසා ඔහු, ඔහුත් සමඟ කතා කිරීමට තවදුරටත් උත්සාහ කළේ නැත.

මේඝ තරණ ආරාමය කෙතරම් චාම්ද යත්, එහි නිර්මාංශ ආහාර පවා සරල ලෙස සකස් කොට තිබුණි. සුදු සහල් කොන්ජි බඳුනක් සහ කුඩා අතුරු කෑම කිහිපයක් විය. අතුරු කෑම භික්ෂූන් වහන්සේලා විසින්ම සාදන ලද ඒවා වූ නමුත් ඒවා ඉතා රසවත් විය.

ෂෙන් ච්‍යාඕ තරමක් සෙමින් ආහාර ගත් නමුත් චෙන් ගොං වේගවත් විය. සය සහයෝගිතා සංධානයේ අය සමඟ ඔහුට ඇති සම්බන්ධය ශක්තිමත් කර ගැනීමට නොහැකි වූ නිසා ඔහු සිටියේ නරක මනෝභාවයකිනි. නැවත පැති කාමරයට යාමට පෙර ඔහු කඩිමුඩියේම කටවල් කිහිපයක් මුවට ඔබාගත්තේ මනෝභාවය දුරු කරගැනීමට එය පිළියමක් වූවාක් මෙනි.

ඔහු පිටව ගොස් වැඩි වේලාවක් යන්නට මත්තෙන් ඔවුන් සමඟ එකම කාමරයේ නැවතී සිටි පුද්ගලයන් සිව්දෙනාගෙන් දෙදෙනෙක් ද රාත්‍රී ආහාරය සඳහා පැමිණියහ.

ෂෙන් ච්‍යාඕට යම් ආලෝකයක් දැකීමට හැකි වුවද, ඔහුට තවමත් දේවල් පැහැදිලිව දැකගත නොහැකි විය. ඊට අමතරව, ඔහු වැඩි වේලාවක් බලා සිටියහොත් ඔහුගේ දෑස් රිදුම් දෙන්නට වූ අතර, ඒ නිසා ඔහු සිටියේ බොහෝ දුරට තම දෑස් පියාගෙන ය. වෙනත් විකල්පයක් නොමැති නම් පමණක් ඔහු දෑස් භාවිතා කළේය.

මේ මොහොතේ, ඔහු නොපැහැදිලි ලෙස රූප හතරක් දුටුවේය. එයින් රූප දෙකක් කාන්තාවන්ට අයත් බව ඔවුන්ගේ ඇඳුම් වලින් විනිශ්චය කරන විට පෙනෙන්නට තිබුණි. ඉතිරි දෙදෙනා මීට පෙර හමු වූ කාමර හවුල්කරුවන් ය. ඔවුන් ඔහු දෙසට පැමිණ තවත් දිගු මේසයක වාඩි වූහ.

ෂෙන් ච්‍යාඕ හට තත්වය ගැන යම් අදහසක් තිබුණි.සය සහයෝගිතා සංධානය මෙම ගමනේදී ඉතා වැදගත් භාණ්ඩ කිහිපයක් රැගෙන යන බව ඔහු දැන සිටියේය. ඒ නිසා සිව්දෙනාම එකම වේලාවේ රාත්‍රී ආහාරයට මෙහි පැමිණීම වෙනුවට පැති කාමරයේ  දෙදෙනෙක්ව තබා එය මුර කිරීමට ඔවුන් හට සිදු විය. පොඩි භික්ෂූන් දෙනමගේ කුටිය ණයට ගත්තේ මෙම  ගැහැණුන් දෙදෙනා විය යුතු ය.

ඔහු ඔවුන්ගේ කටයුතුවලට මැදිහත් වූයේ නැත. කොන්ජි බඳුන අවසන් කිරීමෙන් පසු ඔහු අත දිගු කළේ තමා අසල තිබූ උණ බම්බු සැරයටිය ගැනීමට ය.

බං ! උණ බම්බු ලීය පැත්තකට ලිස්සා ගොස් බිම වැටී තිබුණි.

ෂෙන් ච්‍යාඕ මදක් නළල රැලි කළේය. ඔහුගේ අත තවමත් ලීයේ ස්පර්ශ වී නොතිබූ නිසා එය එලෙස පෙරළී යාම සිදු විය නොහැකි විය.

"එය අහම්බෙන් මගේ අතේ වැදුණා. කරුණාකර මට සමාව දෙන්න, මහත්මයා” කාන්තාවක් සැරයටිය ගැනීමට නැමී එය ෂෙන් ච්‍යාඕට දෙන අතරතුරදී මෘදු ලෙස පැවසුවාය.

“ගැටලුවක් නැහැ,” ෂෙන් ච්‍යාඕ සැරයටිය අතට ගත්තේය. ඇය දෙස බලා හිස වනා ආචාර කළ ඔහු පිටත්ව යාමට නැගී සිටියේය.

“සෑම හමුවීමක්ම දෛවයේ ප්‍රතිඵලයක් බැවින්, මට මේ ගෞරවණීය මහත්මයාගේ නම දැනගැනීමට හැකිද?” එම කාන්තාව තවදුරටත් කියා සිටියාය.

"මගේ පවුලේ නම ෂෙන්."

"ෂෙන් මහත්මයා නගරයට යනවාද?"

"ඔව්."

“නගරය ඇතුළේ තැබෑරුම් සහ තානායම් බොහොමයක් තිබෙනවා.ඉතින් නගරයට ඇතුළු වී තැනක් සොයා ගන්නේ නැතිව රාත්‍රිය ගත කිරීමට මෙතරම් අබලන් ආරාමයක් තෝරා ගත්තේ ඇයි?”

ඇය පැහැදිලිවම ෂෙන් ච්‍යාඕගේ අනන්‍යතාවය සොයමින් සිටියාය. ඒ වෙනත් අයෙක් නම්, ඔවුන් නිසැකවම ඇයගෙන් ආපසු අසනු ඇත, “ඔබත් මෙහි නැවතී සිටියේ නැද්ද? අනුන්ගේ වැඩවලට මැදිහත් වෙන්න ඔබ කවුද?" නමුත් ෂෙන් ච්‍යාඕට හොඳ ගතිගුණ තිබූ නිසා ඔහු පිළිතුරු දුන්නේ, “අපට ප්‍රමාණවත් තරම් මුදල් නොමැති නිසා නගරය තුළ නවාතැන් ගැනීම අපහසුයි. එය ඇතුළත තානායම් සඳහා විශාල මුදලක් වැය වෙනවා. මේ ආකාරයෙන්, අපට හෙට උදේ පාන්දරම නගරයට ඇතුළු විය හැකි අතර රාත්‍රියේදී නවාතැන් ගැනීමට ද අවශ්‍ය නැහැ ”

ඔහුගේ කටහඬ කන්වලට ප්‍රසන්න විය. ඔහු තුළ නිරායාසයෙන්ම අන් අයට හොඳ හැඟීමක් ඇති කළ දෙයක් තිබුණි; ඔහු සමඟ මිත්‍ර වීම මිනිසුන්ට අවශ්‍ය වූ දෙයකි. ඔහු රළු ඇඳුම් හැඳ සිටියත්, මිනිසුන්ට ඔහුව නොසලකා හැරීම දුෂ්කර දෙයක් වූ අතර ඔහු චෙන් ගොං හා සමාන පුද්ගලයෙකු ලෙස සැලකීම ඊටත් වඩා දුෂ්කර දෙයක් විය.

මේ දෙදෙනා විලාසයෙන් සහ ගතිපැවතුම්වලින් සම්පූර්ණයෙන් නොගැළපෙන අය වූ නිසා එකට ගමන් කරන සගයන් ලෙස එක් වූ විට, අනික් අය ඔවුන්ව සැක කිරීමටත්, වචනවලින් පරීක්‍ෂා කිරීමටත් එය හේතුවක් විය.

කෙසේ වෙතත්, ඔවුන් ඇත්තෙන්ම කිසිම සටන් කලාවක් නොතිබූ සාමාන්‍ය මිනිසුන් විය.

ඔහුගේ පිළිතුර ඉතා සාධාරණ විය. යුන් ෆුයිට එහි කිසිදු වරදක් සොයාගත නොහැකි වූ නිසා ඇය මෘදු ලෙස සමාව අයැද සිටියාය, “කරුණාකර මගේ උඩඟුකමට සමාව දෙන්න. මගේ පවුලේ නම යුන්. යුන් ෆුයි."

ෂෙන් ච්‍යාඕ හිස සැලුවේ, "කරුණාකර ඔබේ ආහාර වේල රසවිඳින්න, යුන් ආර්යාවනි. මම එය ගැටලුවක් නැහැ."

යුන් ෆුයි පිළිතුරු දුන්නේ, "ඔබත් පරිස්සම් වෙන්න මහත්මයා."

ෂෙන් ච්‍යාඕ සැරයටිය ආධාරයෙන් ඔහුගේ මාර්ගය සොයාගෙන දොර දෙසට ගමන් කළේය.

ඔහුගේ මැකී යන රුව දෙස බලා සිටි යුන් ෆුයි ඇගේ ඇහි බැම මදක් රැලි කළා මිස වෙන කිසිවක් පැවසුවේ නැත.

ඇය අසල වාඩි වී සිටි හූ යූ යෝජනා කළේ, “මේ වෙලාවේ මේ දෙන්නා මෙතනට ආපු එක අහම්බයක් නෙවෙයි කියලා මට හිතෙනවා.අනෙක් පිරිමි ළමයා ලොකු දෙයක් නොවේ. නමුත් මේ ෂෙන් කියන පුද්ගලයා අන්ධ බවක් පෙනුණත්, එහෙනම් ඇයි අන්ධ මිනිසෙකු එහා මෙහා යන්නේ? සමහර විට ඔහු අපි රැගෙන යන භාණ්ඩ පිටුපසින් එනවාවත්ද?”

ඔහුගේ නිවුන් වැඩිමහල් සොහොයුරා වන හූ යාන් ඔහු දෙසට දෑස් යොමු කළේය, “ඔබට එය වැටහෙනවානම්  නියෝජ්‍ය නායකතුමියට එය නොවැටහේ යැයි ඔබ සිතනවාද?”

යුන් ෆුයි පැහැදිලි කළේ, “මම ඔහුව පරීක්ෂා කළා. ඔහුට අභ්‍යන්තර චි නැහැ. ඔහු මගේ නම අසා නැහැ. ඔහු බොරුවට රඟපානවා වගේ පේන්නෙත් නැහැ. කොහොම වුනත් අද හවස පරිස්සමෙන් ඉමු. නඟරය ඇතුලේ සෙනඟ වැඩි නිසාත්, කතාබහ වැඩි නිසාත් නඟරය ඇතුලට නොයා සිටීම හොඳ ලෙසයි මට මුලින් පෙනුණේ. නමුත් දැන් පෙනෙන්නේ මේ ක්‍රමයද නිවැරදි නැති බවයි.”

හූ යූ ඇසුවේ, “ඇත්තටම පෙට්ටියේ ඇති දුර්ලභ නිධානය කුමක්ද? අප ගමන් කිරීමට පටන් ගත් දා සිට, කණ්ඩායම් දෙකක් එකින් එක පැමිණ එය අල්ලා ගැනීමට උත්සාහ කළා. දැන්, කොල්ලකරුවන් ද වැඩි වෙනවා. තවමත් මෙහි සිට ජියැන්කාං දක්වා  සෑහෙන දුරක් අපි දකුණට යා යුතුයි. මට බය එකම දෙය භාණ්ඩවලට මොනවා හෝ සිදුවෙයි කියලා. භාණ්ඩය නැතිවීම සුළු දෙයක්. නමුත් සය සහයෝගිතා සංධානයේ කීර්ති නාමය විනාශ වීම නිසැකවම විශාල දෙයක් වනු ඇති."

සංඛ්‍යාවෙන් විශාල නොවූවත් මේ පිරිස සය සහයෝගිතා සංධානයේ ප්‍රභූන් ලෙස සැලකිය හැකිය. ඔවුන්ගේ නියෝජ්‍ය නායිකාව යුන් ෆුයි පවා ගමනට පැමිණීමට තරම් ඔවුන් කෙතරම් දුර්වල විය හැකිද?

එසේ වුවද, සෑම කෙනෙකුම තම ආරක්ෂාව අඩු කළේ නැත.

යුන් ෆුයි හිස වැනුවේ, “නායකතුමා දැඩි නියෝගයක් දුන්නා. අපි එය ජියැන්කාං වෙත කෙසේ හෝ භාර දිය යුතුයි. එතුමා අපව ලුඕ ප්‍රාන්තයේදී මුණගැසෙන බවත්, පසුව අපි සියල්ලන්ම එකට දකුණට යන බවත් පවසා කලින් පණිවිඩයක් එවා තිබුණා."

නායකතුමා තමන්ට වඩා වැඩි දුරකින් නොමැති බව ඇසූ හූ යාන් සහ හූ යූ යන දෙදෙනාම වඩාත් උද්යෝගිමත් විය. සංගමය එතරම් බැරෑරුම් ලෙස ආරක්ෂා කළ පෙට්ටි දෙකෙහි ඇත්තේ කුමක්ද යන්න පිළිබඳව ඔවුහු තම සාකච්ඡාව දිගටම කරගෙන ගියහ.

සය සහයෝගිතා සංධානයේ ශාඛා ලෝන්ග් ගඟේ උතුරු සහ දකුණු යන දෙපසම විහිදී තිබූ අතර, ඔවුන් වසර ගණනාවක් පුරා ගණන් කළ නොහැකි තරම් ව්‍යාපාරික ගනුදෙනු සිදු කර ඇත. ඔවුන් රැගෙන ගිය භාණ්ඩ අතර අධිරාජ්‍ය මාලිගයේ නිධන් පවා විය. නමුත් එවැනි භාණ්ඩ සඳහා පවා ඉහළ නිලධාරීන් මෙතරම් වැදගත්කමක් දක්වනු ඔවුන් කිසි දිනෙක දැක තිබුණේ නැත.

නියෝජ්‍ය නායකතුමිය විසින් පුද්ගලිකවම රැගෙන යාම සහ නායකයා විසින්ම, ඝෘජුවම පැමිණ පිළිගැනීම සිදුවන්නේ පළමු වතාවටය.

හූ යාන් සහ හූ යූ මකර දොරටු නිකායේ ශ්‍රාවකයින් වූ අතර ඔවුන්ද සටන්කාමී ලෝකයේ ප්‍රවීණයන් විය. ඊට අමතරව, ඔවුන් තවමත් තරුණ විය. එකින් එක පැමිණි මංකොල්ලකෑමේ කණ්ඩායම් දෙකක් නිසා ඔවුන්ගේ සටන් කුසලතාවය පිළිබඳ ඔවුන් සතුව පැවති ආත්ම ශක්තිය කිසි ලෙසකින්වත් අඩු වූයේ නැත. ඊට පටහැනිව සිදු වූයේ අභියෝගයට මුහුණ දීමට සහෝදරයන්ව තව තවත් උනන්දු වීම ය.

ඔවුන් මෙන් නොව, යුන් ෆුයිට සැබවින්ම ඇති වූ රහසිගත ගැටළු තිබුණි."කුමක් සිදු වුවත් නායකතුමාව  හමුවනතුරු අපි පරිස්සමින් සිටියොත් හොඳයි."

…

එදින රාත්‍රියේදී...

නගරය තුළට වඩා පිටත ප්‍රදේශය බොහෝ නිහඬ විය. කෙතරම් නිස්කලංකද යත් එය තරමක බිය උපදවනසුළු හැඟීමක් ජනිත කරවන්නට තරම් සමත් විය.

කුඩා ආරාමයේ රාත්‍රියෙහි එතරම් විනෝදාස්වාදයක් තිබුණේ නැත.ඒ නිසා සියල්ලෝ කලින්ම නින්දට ගොස් තිබුණි.

හූ යාන් සහ හූ යූ යන දෙසොහොයුරන්ට අමතරව සය සහයෝගිතා සංධානයේ ශාලා කළමනාකරුවන් දෙදෙනෙක් ද සිටි අතර, ඔවුන් දෙදෙනාම සටන් කලාවේදී හූ සහෝදරයන් අභිබවා ගිය අය වූහ. ඔවුන් සිව්දෙනාම නිදාගත්තේ ෂෙන් ච්‍යාඕ සමඟ එකම ඇඳේ ය. මෙවැනි පෙළගැස්මක් සටන්කාමී ලෝකයේ විෂය පථය තුළ පවා ආකර්ෂණීය ලෙස සලකනු ලැබේ. චෙන් ගොං එම ලෝකය ගැන දැන සිටියේ අල්ප වශයෙනි. නමුත් මේ සියලු දෙනාම යම් ආකාරයක පුද්ගලයන් බව ඔහු දැන සිටියේය.

සය සහයෝගිතා සංධානයට සම්බන්ධ වීම සඳහා, ඔවුන් සමඟ මිතුරු වීමට හැකි සෑම ආකාරයකින්ම ඔහු උත්සාහ  කළ අතර සමීප වේ යැයි  බලාපොරොත්තු වූ සෑම උපක්‍රමයක්ම ඔහු උත්සාහ කළේය. කෙසේ වෙතත්, ඔහුගේ දැඩි උත්සාහය අපතේ ගියේ, එය නිෂ්ඵල කරමිනි. ඔවුන් ඔහු වෙත බැල්මක්වත් ඉතිරි නොකළ අතර, ඔහුත් සමඟ කටයුතු කළේ ද අල්ප වූ කැමැත්තකින් පමණි. ඔවුන් සැබවින්ම චෙන් ගොං හා සසඳන විට ෂෙන් ච්‍යාඕ වෙත කාරුණික විය.

උත්සාහයන් කිහිපයකින් පසු චෙන් ගොං අධෛර්යමත් විය. ඔහු ඇඳ මත වැතිර සිටියේ, ඔහුගේ මනස කෝපය සහ තමා තවමත් අවංක නැත යන සිතුවිලි අතර දෝලනය වෙමින් පවතින අතරතුරදී ය. වෙන කිසිවකට නොව සය සහයෝගිතා සංධානයට සම්බන්ධ වී වතුර ඉසීම, පොළව අතුගෑම වැනි කාර්යයන් හෝ කරගෙන යාමට තමන් කැමති බව පැවසුවහොත් ඔවුන් සමහරවිට එයට එකඟ වේ යැයි ඔහු සිතමින් සිටියේ ය.

පුද්ගලයෙකුගේ මනසෙහි සිතිවිලි පටලැවිල්ලක් ඇති විට නින්දට වැටීම ස්වභාවිකවම අපහසු ය. චෙන් ගොං දෙතුන් වතාවක්ම එහාට මෙහාට හැරෙමින් සිටියේ ඇඳේ පෙරළෙමිනි. එවිට ඔහුට එක්වරම දැනුණේ සය සහයෝගිතා සංධානයේ කවුරුන් හෝ තමන් අසළින් ගමන් කළ බවයි.

පුද්ගලයන්ගේ චලනයන් සැහැල්ලු සහ වේගවත් විය. පිටත සිවුරු හැඳගෙන පාවහන් පැළඳ සිටි ඔවුන් ඇසිපිය හෙලන සැණින් නොපෙනී ගොස් තිබුණි. චෙන් ගොංට අමුත්තක් දැනුනි. ඔහුටද නැඟිට හැරී බැලීමට අවශ්‍ය වූ නමුත් හදිසියේම ඔහුගේ පැත්තෙන් අතක් මතු වී ඔහුව ඇඳ මතටම තද කළේය.

එය චෙන් ගොංට හොඳ ආරම්භයක් ලබා දුන්නේය. එවිට තමාව නැවැත්වූයේ ෂෙන් ච්‍යාඕ බව ඔහුට වැටහුණි.

“පිටතට යන්න එපා. මෙතනම ඉන්න." ෂෙන් ච්‍යාඕ අඩු හඬකින් කීවේය.

චෙන් ගොං පිළිතුරු දුන්නේ, “මම දොර මදක් විවෘත කර දොර අතර හිඩැසෙන් බලන්නම්. එහෙම ගැටලුවක් නොවේවි.”

ඔහු වාක්‍ය ඛණ්ඩය අවසන් කරනවාත් සමඟම ඔවුන්ට ඇසුණේ පිටතින් පැමිණි කෑගැසීමේ හඬවල් සහ රණ්ඩු සරුවල් හඬ ය.

චෙන් ගොන්ගේ නොසන්සුන්තාවය මෙන්ම උද්වේගයද එක්වරම නැඟී සිටියේ තමා නැවතත් තම පරිකල්පන ලෝකයට එක් පියවරක් ළං වූ බව හදිසියේම වටහා ගත් බැවිනි.

කෙසේ වෙතත්, ඔහුගේ ඇඟිලි හදිසියේම හිරිවැටීමට පෙර ඔහුගේ දෑත් යන්තම් දොර විවර කළා පමණි. මහා ඝෝෂාවක් සමඟ මුළු දොරම පුළුල් ලෙස විවෘත වූ අතර සුළි කුණාටුවක් මෙන් පිටතින් සුළඟක් ගසාගෙන පැමිණියේ ය!

චෙන් ගොන්ට මාර්ගයෙන් ඉවත් වීමට ප්‍රමාණවත් කාලයක් නොතිබුණි. ඔහු වේදනාවෙන් කෑගසමින් පිටුපසට ඇද වැටුණි. ඔහුගේ යටි පැත්ත ඇඳේ කෙළවරේ වැදී, ඔහුගේ කෑගැසීම දෙතුන් ගුණයකින් වැඩි වූ කෑගැසීමක් බවට පත් වූයේ නිහඬ රාත්‍රිය පුරා ඔහුගේ කටහඬ පැතිර යද්දී ය.

නමුත් මෙය අවසානය වූයේ නැත. ක්ෂණයකින් පැමිණි අතක් මඟින් ඊළඟ මොහොතේ, යමෙකු ඔහුගේ උගුරෙන් ඉතා තදින් අල්ලාගෙන සිටියේ ය!

පුද්ගලයා ඔහුගේ අතින් ඔහුව සැහැල්ලු ලෙස එසවූ අතර, චෙන් ගොං කැමැත්තකින් තොරව ඔහු පසුපස "පියාඹා ගියාක්" මෙන් ඇදී ගියේ ය. ඔහුගේ දෘෂ්ටිකෝණය වෙනස් වූ එම හැරීමත් සමඟම ඔහුගේ දෑසට හසු වූයේ කාමරයේ ඇතුළත දර්ශනය නොව, පිටත දර්ශනය ය.

චෙන් ගොන්ගේ දෑස් භීතියෙන් විසල් වූ නමුත් ඔහුට කිසිඳු හඬක් නැගීමට නොහැකි විය.අවසානයේදී බොහෝ අපහසුවෙන් දෙපා ස්ථාවර කරගත් විට ඔහුට ඇසුණේ කවුරුන් හෝ සිනහසෙන ශබ්දයකි. “තුන්වන තරුණ ගුරුතුමනි, ඔබ මෝඩයෙක්ද? මේ කොල්ලා සටන් කලාව ගැන කිසිත් නොදන්නා බව කීමට එක බැල්මක් පමණක් වුවත් ප්‍රමාණවත්. ඔහු සය සහයෝගිතා සංධානයේ කෙනෙක් නොවෙයි. ඔහු අල්ලා ගැනීමෙන් ඇති ප්‍රයෝජනය කුමක්ද?”

"කුමක්ද? ඔහු සය සහයෝගිතා සංධානයේ නොවේද? මකබෑවිලා පලයන්! ඔහුව අල්ලා ගැනීම එතරම් පහසු යැයි දැනීම පුදුමයක් නොවෙයි! ඉතින් මට අහුවුණේ වැඩකට නැති කුණු ගොඩක්ද!

අනෙකා ශාප කරමින් තම ග්‍රහණය තවත් තද කළ අතර, චෙන් ගොංට කෙතරම් වේදනාවක් දැනුනේද යත්, ඔහුගේ ඇස්වලින් කඳුළු ගලන්නට විය.

'එය අවසානයි! මාව මරන්නයි යන්නේ!'

ඔහු මෙම කාරණය වටහා ගැනීමත් සමඟම, ෂෙන් ච්‍යාඕට සවන් නොදීම ගැනත්, නිහඬව කාමරය තුළ සැඟවී සිටීම වෙනුවට එබී බැලීමට යාම ගැනත් ඇත්තෙන්ම පසුතැවෙන්නට පටන් ගත්තේය.

මරණය දැන් ඇත්තටම ළංව තිබුණත් සටන්කාමී ලෝකය තවමත් ඔහුගෙන් බොහෝ දුරස්ථ විය.

මඳ වේලාවකට පසු, චෙන් ගොංගේ ගෙලෙන් තියුණු වේදනාවක් පුපුරා ගියේය. එය ඔහුගේ උගුර කුඩු වීමට ආසන්න බවට ලකුණකි.

එහෙත් මොහොතකට පසු අනපේක්ෂිත ලෙස ඔහුව මරා දමන්නට සිතූ පුද්ගලයා විස්මයාර්ථ හඬක් න‍ඟමින් අත ඉවතට ගත්තේ ය. චෙන් ගොං මත ඇති වූ පීඩනය වහාම ලිහිල් විය. ඔහු දණින් වැටී නොනවත්වා කැස්සේ ය. ඔහුගේ හිසේ සිට පාදය දක්වාම දුර්වල බවක් දැනෙන්නට විය.

මුරොන් ෂුන් චෙන් ගොංව මරා දමන්නට සැරසෙන විටත් ඔහු දැන සිටියේ, මේ කිසිවක් බැරෑරුම් ලෙස නොසලකන තවත් පුද්ගලයෙක් කාමරය තුළ සිටි බව ය.නමුත් ඔහු බලාපොරොත්තු නොවූ දෙය නම්, ඔහු පිරිමි ළමයාව අවසන් කරන විට එම පුද්ගලයා ඔහුට හොර රහසේ පහර දීමෙන් ආරම්භක පියවරක් ගැනීමට එඩිතර වනු ඇති බව සිතීම ය.

උණ බම්බු සැරයටිය පිහාටුවක් මෙන් සැහැල්ලු විය. එය පැමිණි බවට හෝඩුවාවක්වත් තිබුණේ නැත. මුරොන් ෂුන් මුලින් සිතුවේ ඔහුට එය පහසුවෙන් අල්ලා ගත හැකි බවයි. නමුත් ඔහුගේ අත ලීයෙහි මායිම ස්පර්ශ කරන විට, එය අමුතුම ආකාරයකින් පැත්තකට ලිස්සා ගියේ ඔහුගේ පිටුපස ඇති තීරණාත්මක නිල ස්ථානයක් දෙසට ය.

චෙන් ගොංව අත හැර එය මග හැරීමට පැත්තකට වීම හැර මුරොන් ෂුන්ට කිරීමට වෙනත් විකල්පයක් තිබුණේ නැත.

"ඔබ කව්ද?!" ඔහු තම දෑස් දල්වාගෙන අනෙක් පුද්ගලයාව ඉහළට හා පහළට නිරීක්ෂණය කරමින් සිටියේය.

“අපි සය සහයෝගිතා සංධානයේ සාමාජිකයන් හෝ සටන් කලාකරුවන් නොවෙයි. අපි මෙම ස්ථානයට පැමිණියේ රැය ගත කිරීමට පමණයි. මෙහි සිදුවන ගැටලුවලට අපගේ සම්බන්ධයක් නැති නිසා, කරුණාකර ඔබේ අත ඉවතට ගෙන අපට යන්න දෙන්න ඔබට පුළුවන්ද?” ෂෙන් ච්‍යාඕ පැවසීය.

රාත්‍රියේ ප්‍රමාණවත් ආලෝකයක් නොතිබූ නිසා ඔහුට මුරොන් ෂුන්ව නොපෙනුණි. අනෙකා කොහිදැයි ඔහුට අනුමාන කළ හැකි වූයේ දළ වශයෙන් පමණි. ඔහු ඒ දෙසට තම දෑත් ඔසවා ආචාර කළේ ය.

නමුත් මුරොන් ෂුන් එක බැල්මකින්ම එය සොයා ගත්තේය: "ඔබ අන්ධයි!"

…

එක් රාත්‍රියක් ඇතුළත, කුඩා 'මේඝ තරණ' ආශ්‍රමය තුළ කැළඹීම ප්‍රබල ලෙස ඉහළ ගොස් ඉදිරියට යමින් පැවතුණි.

යුන් ෆුයි ප්‍රහාරයක් කල්තියා අපේක්ෂා කර තිබුණද, එදින රාත්‍රියේ තත්වය ඇය අපේක්ෂා කළාටත් වඩා බොහෝ සෙයින් වැඩි විය.

ඇය පසුපසට ඇදී යන විට අත්ලකින් පහර දුන්නේ ඇගේ වස්ත්‍රයේ අත් පවා ඉහළට කරකැවී සුළඟේ ලෙළ දෙන විටදී ය. ඉරියව්ව අලංකාර සහ සම්පූර්ණයෙන්ම සුරංගනාවියක් බඳු විය. අනෙක් අයගේ ඇස්වලට පෙනෙන්නේ ඇය අලංකාර ලෙස නර්ථනයේ යෙදෙමින් සිටින බවකි. ඇගේ අත්ලෙහි ඇති බලය ගැන ඔවුන් කිසිවිටෙකත් සැක නොකරනු ඇත.

යුන් ෆුයිගේ ප්‍රහාරය පහසුවෙන් දියකර හරිමින් ඇගේ ප්‍රතිවාදියා ඔහුගේ දෑත් ඉහළට එසවී ය. නමුත් යුන් ෆුයි පැහැදිලිවම දුටුවේ විලෝ කොළ තරම් සිහින් සිකාඩා පියාපත් තල දෙකක් ඔහුගේ අත්වලින් ලිස්සා ගොස් තිබූ බවයි. තලවල ආලෝකය ඉක්මනින් පියාසර කර අතුරුදහන් විය.නමුත් ඇගේ අත්ලෙන් නිර්මාණය කරන ලද දරුණු ශක්තිය සමඟ, එය කිසිවෙකුට දැකීමටත් පෙර විසුරුවා හැර තිබුණි. විසුරුවා හැරියද එයට ඇවැසි වූ ශක්තිය ඉතා විශාල විය.

'මේ ප්‍රතිවාදියා භයානකයි', යුන් ෆුයි වටහා ගත්තා ය.

“ 'වලාකුළු විසින් මල් වැස්සක් රැගෙන යයි. නමුත් කෙනෙකුගේ ඇඳුම් මත පෙත්තක්වත් ඉතිරි නොවෙයි.'[1] ඔබව සය සහයෝගිතා සංගමයේ නියෝජ්‍ය නායිකාව ලෙස හැඳින්වීමට ඉතා සුදුසුයි. පිටස්තරයින් සියල්ලෝම පවසන්නේ යුන් ෆුයි යනු කාන්තාවක් බවත්, එබැවින් බොහෝ විට රූකඩයක් වනු ඇති බවත්. නමුත් එලෙස පැවසූ සියල්ලන්ටම නියෝජ්‍ය නායක යුන්ගේ හැකියාව අත්විඳීමට කිසිදා අවස්ථාවක් නොලැබෙන්නට ඇතැයි මම සිතනවා!”

ඔහුගේ වදන් අවසන් වෙනවාත් සමඟම හඬක් නැති වාත ධාරාවක් යුන් ෆුයි දෙසට පලසක් මෙන් පෙරළී ගියේය. ඇගේ මුහුණ මදක් වෙනස් විය. ඇය මුරොං චින් සමඟ මුලින් සටන් කරන විට පැවති සන්සුන් භාවය තවදුරටත් එහි තිබුණේ නැත.

නෙළුම් මල් වැනි හැඩැති අත්ල මුද්‍රාවක් නිර්මාණය කරමින් ඇගේ දෑත් සුළඟට ගසාගෙන ගියේ ය. දෑත්වලින් ගෙන යන ලද අභ්‍යන්තර චි කෙළින්ම ඉහළට නැඟුණු අතර පසුව එය සැණෙකින් පැතලි බිත්තියක් මෙන් බවට පත් වී පිටතට තල්ලු විය.

වාත ධාරාවන් දෙක වේගයෙන් එකිනෙක ගැටුණි. අනෙක් පුද්ගලයාගේ අභ්‍යන්තර චී මෙතරම් වේගයෙන් වෙනස් වනු ඇතැයිද, අනපේක්ෂිත ස්වරූපයකට පරිවර්තනය වේ යැයි ද යුන් ෆුයි මුලදී කිසිසේත්ම සිතුවේ නැත. සියුම් ඉඳිකටු මෙන් වූ ඒවා හිඩැසක් සොයා ගත හැකි ඕනෑම තැනකට තල්ලු විය. සෑම විවරයක් හරහාම ඇතුල් විය. ඇගේ අත්ල එය වෙත ළඟා වූ වහාම, සම හරහා ඇගේ මස් තුළට සීතල රැල්ලක් විනිවිද ගොස් ඇති බවත්, පසුව එය කෙලින්ම ඇගේ අස්ථි තුළට විනිවිද ගිය බවත් ඇයට දැනුනි.

ඇගේ දෑත් ඉවත් කිරීමට දැනටමත් ප්‍රමාද වැඩි ය. අනෙක් පුද්ගලයා පැහැදිලිවම ඇයට ප්‍රතිචාර දැක්වීමට අවස්ථාවක් ලබා දී තිබුණේ නැත. ඔහුගේ අභ්‍යන්තර චී වසන්තයේ දී ගංගාවක වඩදිය බාදිය මෙන් එක් රැල්ලකට පසු තවත් රැල්ලක් ලෙස ස්ථරයෙන් ස්ථරය ඉදිරියට තල්ලු විය. යුන් ෆුයි හට සැඟවුණු අභ්‍යන්තර තුවාල කිහිපයක් තිබුණත් ඇය එය පෙන්වීමට අකමැති වූයේ එසේ කිරීමෙන් ඇය දුර්වල වී ඇති බව අනෙකාට පෙනෙන නිසා ය. නමුත් ඇය එම ප්‍රහාරයෙන් පසුපසට ඇදී ගියා ය.

ඇය බිමට පතිත වන විටත් ඇගේ පපුවේ යම්කිසි තද වේදනාවක් දැනෙන්නට විය. ඇගේ උගුරෙන් ලේ රසක් ආවත් එය කෙළ ගසනවා වෙනුවට කිසිවක් සිදු නොවූවාක් මෙන් ඇය එය ගිල දැමුවාය. "ඔබ කවුද මහත්මයා?"

යුන් ෆුයිගේ රුව තවමත් සාමාන්‍ය ලෙසින් සිටින බව දුටු අනෙක් පුද්ගලයා පුදුමයේ හඬක් නිකුත් කරමින් යම් විස්මයක් මුසු වූ අගය කිරීමක් හෙළි කළේය: “චී රටේ සිටින සියලුම මිනිසුන්ගෙන්, මගේ මෙම අත්ල ප්‍රහාරය ගැනීමට හැකි අය සිටින්නේ කිහිප දෙනෙක් පමණයි. ඔබ ඇත්තෙන්ම දක්ෂයි.”

"ඔබ කවුද, මහත්මයා?" යුන් ෆුයි නැවත වරක් ඇසුවා ය.

අනෙක් පුද්ගලයා උඩඟු ලෙස ඔහුගේ අත් පිටුපසට තබාගෙන සමච්චල් කළේය, “ඔබ සහ ඔබේ මිනිසුන් දැන් චී ප්‍රදේශය තුළ සිටින අතර චීවල භාණ්ඩ රටින් පිටතට ප්‍රවාහනය කිරීමට උත්සාහ කරමින් සිටිනවා. චී අධිකරණය මේ ගැන අවධානය යොමු කළ යුතු නොවේද? මෙම අයිතමය මෙහි තැබීමට සය සහයෝගිතා සංධානය එකඟ වන්නේ නම්, මම තවදුරටත් ඔබට කරදර කරන්නේ නැහැ. ඔබ සැමට ආරක්ෂිතව චී රට හැර යා හැකි බවට මම සහතික වෙනවා!

ඔහු චී අධිකරණය ගැන සඳහන් කිරීම ඇසූ යුන් ෆුයිගේ හදවත ගැහෙන්නට වූ නමුත් ඇය ඉක්මනින්ම යථා තත්වයට පැමිණ, “ඔබ චී වලින්ද? එසේනම් ඔබ මුරොං චිං ද?!

යැන් රාජවංශයේ විනාශයෙන් පසු, මුරොං වංශය රාජවංශ කීපයක්ම ගෙවී යන තුරුත් තැනින් තැන සැරිසරමින් සිටිය හ. මුරොං වංශයේ වත්මන් කුලදෙටුවන් වන මුරොන් චිං,එහි අධිරාජ්‍යයා වන ගාඕ වෙයිට සේවය කරමින් මුරොං වංශය අධිරාජ්‍ය පවුලෙන් පැවත එන්නෙකු බව අනෙක් අයට පැවසුවද, ඇත්තෙන්ම ඔහු චී වල හෙංචයියෙකු මිස වෙන කිසිවෙකු නොවී ය. අනෙක් අය ඔහු ඉදිරියේදී ඔහුට හොඳ ගෞරවයක් සහ ප්‍රශංසාවක් පෙන්වූයේ ඔහු චී රටේ අංක එකේ ප්‍රවීණයෙකු ලෙස කීර්තියක් දැරූ බැවින් ඔහුගේ අනුග්‍රහය ලබා ගැනීමට පමණි.

එය වෙන දිනයක් නම් මුරොන් චිං පැමිණිය ද ඔහු සමඟ සටන් කිරීමට යුන් ෆුයි බිය වන්නේ නැත. නමුත් දැන්, ඔහු පැහැදිලිවම ඇය රැගෙන යන භාණ්ඩ පසුපස පැමිණි බව පෙනුණු අතර එය ලබා ගැනීමට දැඩි ලෙස අධිෂ්ඨාන කරගෙන සිටියේය. එයින් අදහස් වන්නේ…

"ලියු චින්'ය සහ ශැන්යුඇන් ෂින්චෙන් කොහෙද?!" ඇය සමඟ ගමනේ යෙදී සිටි අනෙක් ශාලා කළමනාකරුවන් දෙදෙනා ගැන විමසූ විට ඇගේ මුහුණ මදක් වෙනස් විය.

ප්‍රශ්නය ඇසුණු හූ යාන් ද තිගැස්සී ගියේය. ඔහු පිළිතුරු දුන්නේ, “ශාලා කළමණාකරු ලියු සහ ශාලා කළමනාකරු ශැන්යුඇන් යන දෙදෙනාම භාණ්ඩ මුර කරන පැති කාමරයේ සිටිනවා. කිසිවක් නොතිබිය යුතුයි ..."

යුන් ෆුයි පැවසුවේ, “චී රටේ ශ්‍රේෂ්ඨ, ප්‍රමුඛතම විශේෂඥ මුරොන් වංශයේ කුලදෙටුවන්, හොර රහසේ කරන ප්‍රහාර සඳහා යටත් නිලධාරීන් පවා රැගෙන එනු ඇතැයි මම අපේක්ෂා කළේ නැහැ. මෙම ප්‍රවෘත්තිය කවදා හෝ පිටතට ගියහොත් නිසැකවම අනෙක් අය මෙයට සිනාසෙනු ඇති! ”

මුරොන් චිං සමච්චලයට ලක් කළේය, “උප සභාපති යුන් පෞද්ගලිකවම පැමිණි නිසා මම අහංකාර ලෙස ක්‍රියා කිරීමට එඩිතර වන්නේ කෙසේද?අනෙක් දෙයනම් අද රාත්‍රියේ මෙතන සිටින්නේ අපි විතරක් නොවෙයි...  අඳුරේ සැඟවී ඉන්නේ මොන මීයාද? පිටතට පැමිණීමට කාලය හරි!”

පරිවර්තකගේ සටහන්:

[1]  මල් වැස්සක්...:  මුල් රේඛාව “云拂花雨不留衣”, යුන් ෆුයිගේ නම (云拂衣) ගැන ලියා ඇති කාව්‍ය පේළියකි, එය ඇගේ සැහැල්ලු බව සහ නිපුණතා සඳහා කියමනක් සහ ප්‍රශංසාවක් විය.

මෙහි "ඇකියුපොයින්ට්" ලෙස දක්වා ඇත්තේ "නිලය" ලෙස අප සාමාන්‍ය  ව්‍යවහරයේදී හඳුන්වන ශරීරයේ ඇති නිල ස්ථාන ලෙස සලකන්න.

පෙර පරිච්ඡේදය | සියලු පරිච්ඡේද | මීළඟ පරිච්ඡේදය