පූර්වකථනය

"හරියටම කිව්වොත් දහසය වන ෂෙන් දුර්වල බීරි අන්ධයෙක්"

යන්හුයි නම් ගම්බද පළාතෙහි "සේනාධිනායක ගොඩැල්ල" නම් වූ කන්දකි.  ප්‍රේක්ෂාන්ත වික්‍රාන්ත නාමයක් සතුවූව ද එය සත්‍යවශයෙන්ම කුඩා කසල අට්ටියකි. මදක් දිගින් වැඩි ගෙලක් හිමි ඕනෑම අයෙකුට ඊට ඉහළින් අනෙක් පෙදෙස බැලීමට හැකිවිය.

සේනාධිනායක ගොඩැල්ල මෙහි බොහෝ කලක සිට පවතින්නක් නොවේ. දහහතර වසරකට පෙර මහා ලියැං රාජවංශයේ කෘෂ්ණලෝහ බළ ඇණියක් උතුරේ ම්ලේච්ඡ ගෝත්‍ර දහ අටක් විනාශ කරමින් මහා ගවේෂණයක යෙදුනේලු. ඔවුන් ආපසු යන මග යුන්හුයි පසුකරන අවස්ථාවේ ඔවුන්ගේ යුධ සන්නාහ  මෙහි නික්ෂේපය කලේ මෙහි කුඩා කන්දක් නිර්මාණය කරමින් බවයි සඳහන්.වසරෙන් වසර එකතු වූ පුලින,වර්ෂාව හා සුළඟ විසින් වර්තමානයේ දැකගත හැකි සේනාධිනායක ගොඩැල්ල නිර්මාණය කරන ලදී.

සේනාධිනායක ගොඩැල්ල සම්පූර්ණයෙන්ම මුඩුබිමකි. එහි රෝපණය කෙරූ කිසිවක් ලියලුවේ නැත.වල්පැළෑටි පවා තම උපස්ථියෙන් මෙම ස්ථානය කාන්තිමත් කිරීමට ඉදිරිපත් නොවීය.මෙහි යුවලකට රහසේ රමණයේ යෙදීමට  සිතක් පහල වුව කිසිවකුට නොපෙනී මුවාවීමට තරම් ස්ථානයක් නොවීය. පිහිටි ස්ථානයේම එලෙසම  නොවෙනස්ව පිහිටියේය. කිසිවකුත් ඊට කුමක් කලයුතුදැයි ද නොදත්තේය. වැඩිහිටි පරම්පරාවේ අදහස වූයේ මෙම පාළු බවට හේතුව
කෘෂ්ණලෝහ බළ ඇණිය මරණයේ හා
සාහසික බවේ දුර්ගන්ධයෙන් මුලුමනින්ම වැසී සිටීමයි. කාලය ගෙවී ගියේ අවසානයේ  කමකට නැති කාලකණ්ණි  මගමරුවන් ගේ ගම්බද අවතාර විත්ති මායනය කිරීමේ මූලයක් බවට පත්වෙමිනි. කාලයේ ඇවෑමෙන්  එම ප්‍රදේශයට ගොඩ වන පිරිස කෙමෙන් කෙමෙන් අවම විය.

නමුත් මේ අපරභාගයේදී වයස අවුරුදු දහයක් පමණ වූ කුඩා දරුවන් දෙදෙනෙක් හැංගි හොරා මෙහි බෑවුම දක්වා පැමිණියහ.

එක්  දරුවෙක් උස්වූත් කෘශ වූත් ශරීරයෙන් හෙබි වූ අතර අනෙක් දරුවා  තූල ලඝු ශරීරයෙන් හෙබිවිය. මොවුන් දෙදෙනා එකට තැබූ විට පළායන බත් කෝප්පයක් හා බත්කූරක් මෙන් දිස්විය.

කෘශ ශරීරයක් තිබූ දරුවා කාන්තා ඇඳුම් හැඳ සිටි අතර ඉතා හොඳින් සෝදිසි නොකල හොත් ඔහු සැබවින්ම කුඩා පිරිමි දරුවෙක් බව සනාථ කරගැනීම අපහසුවිය.ඔහුගේ නාමයද සාඔ නියැන් සී (Cao Niang Zi) වූයේ දෛවඥයකු විසින් ඔහුට කාන්තාවකගේ දිවියොතක් තිබෙන නමුත් පිරිමි ශරීරයක් සහිතව උපත ලබා ඇති බවත් දෙවි දේවතාවුන් ඔහුට එම ශරීරයෙන් ඉවත්ව නිවැරදි ශරීරයක නැවත ඉපදෙන්න යැයි අණකරාවි යැයිත් පැවසූ බැවිනි. මේ බස් ඇසූ ඔහුගේ දෙමාපියන් ඔහු ගැහැණු  දරුවකු සේ සලකා එලෙසම හදාවඩාගත්තේ එසේ නොවුනහොත් ඔහු වැඩි කල් ජීවත් නොවේවියැයි ඇතිවූ බිය නිසාවෙනි.

තූල දරුවාගේ නාමය ගෙ පෙන් ෂියාඔ (Ge Peng Xiao) ඔහු ප්‍රාදේශීය ගෝඝාතකයාගේ පුත්‍රයා විය. ඔහු තම නාමයටම ගැලපෙන ආකාරයෙන් දිවිගෙවූ බව කිවහැක්කේ ඔහුගේ  සිරුර  ධනවත් බවේ කාන්තියෙන් දිස්නෙ වැටෙන්නාක් බඳු වූ නිසාවෙනි.

දරුවන් දෙදෙනාම තම හිස පිටතට දමා විපරම් කල නමුත් ඔවුන් තුල හටගෙන තිබූ බිය හේතුවෙන් එහි ළඟාවීමට ඉදිරිපත් නොවීය.

ගෙ පෙන් ෂියාඔ පදම් කල හමෙන් නිමවූ "සැතපුම් සහස්‍රයේ අක්ෂි" ඔහුගේ කුඩා තූල දෑතින් අල්වාගෙන සේනානායක හෙල දෙසට තම ගෙල හැකිතාක් දිගු කරමින් " හිරු බැසයන වේලාව වන විටත් ඔහු නොපැමිණිය හොත්, අයියණ්ඩිය සත්‍යවශයෙන්ම ම්ම්ම්ම් කුමක්ද ඊට පවසන්නේ....කොටි වලිගෙ අල්ලගන්නවා!!"

සඔ නියැන් සී: " ඊට පවසන්නේ තට්ටමට යටින් කූංඥ තබා පාඩම් කරන අතරතුර නිදාගැනීමෙන් වළකින බවයි. දැන්වත් ඔය මනස්ගාත කියවීම නවතා ඔය අක්ෂි මට ලබාදෙන්න."

මේ කුඩා ව්‍යාජ ගැහැණු දරුවා විටෙක තම චරිතය ඕනෑවට වඩා බරපතල ආකාරයෙන් සිතූ බව පෙනුනි.නමුත් අවාසනාවකට මෙන් ඔහු ගමන් කල දිශාව මදක් සිත් අවුලුවන සුලු විය.ඔහු කුලස්ත්‍රියක මෙන් නොව අශිෂ්ට දඟකාර කෙල්ලක මෙන් හැසිරුන බව කිවහැකිය, විශේෂයෙන්ම ඔහුගේ කුකුලකුගේ වන් නිය  භාවිතයෙන් නිතරම අනෙකුන් කොනහගැසීමට උත්සාහ කලේය.

ඔහු ගිනිමරේට අක්ෂි ගෙ සාඔ නියැන් සී ට ලබාදුන්නේ "ඔබ එය ප්‍රවේශමෙන් පරිහරණය නොකර කඩාබිඳ දැමුවොත් මගේ පියාණන් මා මස්පස්තෑලයක් බවට පත්කරාවි!"යි යන්න අන්තුරුද අඟවිමිනි.

මේ "සැතපුම් සහස්‍රයේ අක්ෂි" යනුවෙන් හැඳින්වූ උපකරණය විල්ලේ වවුලන් පස්දෙනෙකුන් කැටයම් කර තිබූ කුඩා තඹ බටයකි.විනිවිද පෙනෙන කාච කිහිපයක්ම ඒ බටය තුලට බස්වා තිබුනු අතර එහි ඇස තබා බැලූ විට සැතපුම් දහයකට එහා සිටි හාවකුගේ ලිංගය වුවද පැහැදිලිව  දැකගැනීමට හැකි විය.

ගෙ පෙන් ෂියාඔ සතු වූ අක්ෂිය විශේෂයෙන්ම සංකීර්ණ වීමට හේතුවනම් එය ඔහුට ඔහුගේ ඔත්තුකරුවකු වූ මුත්‍තනුවන්ගෙන් ලැබීම විය.

සාඔ නියැන් සී එය උත්තේනයෙන් යුතුව දැඩිව අල්වාගෙන තාරකා දෙසට එල්ලකලේය. "එය ඉතා පැහැදිලියි"

ගෙ පෙන් ෂියාඕ ඔහුගේ වීක්ෂණය
පසුපස යමින් "එහි නාමය 'හෙස්පරස්' එය 'චන් ගෙං' යනුවෙන්ද හැඳින්විය හැකියි. අයියණ්ඩියගේ නාමයමයි! ෂෙන් මහතා අපට ඉගැන්වූවා, මට හොඳින් මතකයි"

සාඔ නියැන් සී මුඛය තදකරගත්තේය " කවුරුන්ද ඔබේ අයියණ්ඩිය?ඔහු ඔබ හා කතාබස් කරනවාද?මදක් බලන්න ඔබ දෙසම ඔබ නිතරම ඔහු ඔබේ අයියණ්ඩිය යැයි පවසමින් ඔහු පසුපස යනවා ,ඔබට ලැජ්ජාවක් නොමැතිද?..මදක් ඉන්න ඒ ඔහුද?"

ගෙ පෙන් ෂියාඔ ඔහු පෙන්වූ දිශාවට නෙත් යොමු කලේය. සැබවින්ම ඒ ඔහු ය.

කඩුවක් අතදරාගත් ගැටවරයකු සේනාධිනායක ගොඩැල්ල මත සිට පහතට බසිමින් සිටියේය.ඔහු දුටු විගස අවතාර කෙරේ තිබූ සියලු බිය අමතක වූ ගෙ පෙන් ෂියඕ ඝණ්ඨාර හඬ නගමින් "අයියණ්ඩී අයියණ්ඩී" යන්න කෑගැසීය.

බාගදා ඔහු මදක් ඉක්මන් වූවා වැඩිය.ඔහු කෙසේ හෝ තම පය පැකිළී  කන්ද පාමුල වැටීමට සමත් විය.ඔහු පිරිවැටී පෙර සඳහන් කල ගැටවරයාගේ කකුල් පාමුල නතරවිය.

ගැටවරයා නිහඬව දරුවාව තමාට පෑගීමෙන් වැළකීමට තැබීමට ගිය පිය නවත්වාගත්තේය.

ගෙ පෙන් ෂියාඕ මඩ තැවරුණු මුහුණේ මදහසක් නංවාගෙන හිස මදක් ඔසවා දත් දෙපලැ පෙන්වමින් වැටුණු තැනින් නැගිටීම පිළිබඳ නොසිතාම "අයියණ්ඩී, මා ඔබ පැමිණෙන තුරු මෙහි අද දවස පුරා බලාසිටියා" යැයි පැවසීය.

ගෙ පෙං ෂියාඕ දකින වාරයක් පාසා මේ ගැටවරයාගේ සිතුවිල්ල වූයේ දහස් ගණන් ඌරන් මරාදැමූ  ගෝඝාතක ගෙ හට ඉතා හොඳ නේත්‍ර තිබූ සැබෑ දක්ෂයකු බවයි. ඒ කුමක් නිසාද යත් මෙතරම් කාලයක් ගෙවී ගිය පසුත් ඌරකු යැයි සිතා ඔහු වැරදීමකින් තම පුත්‍රයා ඝාතනය කර නොතිබීම පුදුමසහගත කාරණාවක් විය. ඔහු සැබවින්ම කුමක් සිතුවද, චන් ගෙං මෙවැනි දෑ  ඔහුගේ මුහුකුරා ගිය චරිත ස්වභාවය හෙතුවෙන් හඬනගා නොපැවසුවේය.

සැබෑ සොහොයුරකුට සමාන හැසිරීමකින් යුතුව ඔහු ගෙ පෙං ෂියාඕ නැවත දෙපයින් සිටුවා ඔහු පිරිසිදු කිරීමට උත්සාහයක යෙදෙමින් "ප්‍රවේශමෙන්, කුමටද ඔබ දිවයන්නේ?කුමක්ද ප්‍රශ්නය?"යැයි ඇසුවේය.

ගෙ පෙන් ෂියාඕ: "චන් ගෙං අයියණ්ඩී!ඔබේ පියාණන් විගසින් ආපසු පැමිණේවි,ඉතින් අප පන්තියට නොයා
යැන් කැවිලි වෙනුවෙන් තරඟ කරමු!! අපට නිසැකවම අර රිළවුන් පැරදවීමට හැකියි.

චං ගෙන් ගේ පියා,සැබෑම පියා නොවුනද පුරපති විය.

ඔහුට වසය දෙකක් හෝ තුනක් වන විට ඔහුගේ වැන්දඹු මෑණියන් විසින් මොහු මෙහි රැගෙන ආවේ ඥාතීන්ගේ පිහිට පතායි.නමුත් ඔවුන් කලකට පෙර මේ ප්‍රදේශයෙන් නික්ම ගිය බව ඇය නොදත්තාය.මේ වන විට බිරිඳ මෙළොව හැරගොස් සිටි දරුවන්ද නොසිටි ෂූ , ෂියු මෙනෙවිය විවාහ කරගත්තේය.

පුරපති ෂූ ම්ලේච්ඡ ගෝත්‍රයන්ගෙන් ලැබීමට තිබූ වාර්ෂික පඬුරු එකතු කිරීමට මිනිසුන් කිහිපදෙනෙකුන් සමඟ පිටව ගියේය. ඔහු තව දින දෙකකින් හෝ තුනකින් නැවත පැමිණේවී.

මේ ගම්මානය ඉතාම දිළිඳු ගම්මානයක් විය.මෙහි දරුවන්ගේ ආහාරය සඳහා එතරම් දෙයක් නොවුනේය . ඒ නිසාම වාර්ෂික මුර සංචාර නිමවා ආපසු යන සෙබළුන් ම්ලේච්ඡ ගෝත්‍රයන්ගෙන් ලබාගත් කේජු හා වේළන ලද මාංශ රැගෙනවිත්  මග දෙපස තැන තැන දැමුවහ. දරුවන්ද ඉතාම උද්‍යෝගයෙන් මේ කැවිලි ලබාගැනීමට පොරකෑහ.එය  "යැන් කැවිලි දබරය" නම් විය.

එය "දබරයක්" වූ නිසාවෙන් තකතීරු කුඩාවුන් කිහිපදෙනෙක් දරුණු මුෂ්ටි පහර කිහිපයක් එල්ලකිරීම පුදුමයට කාරණයක් නොවීය.වැඩිහිටියන්ද කිසිවකුගේ අණ්ඩක් නොබිඳෙන තාක් ඔවුන්ගේ ක්‍රීඩාව කිරීමට ඉඩලබාදුන්හ. ඒ හේතුව නිසාම දරුවන්ද කුඩා කල්ලි ගැසීම ආරම්භ කලහ.ඉක්මනින් එය ඉතා බැරෑරුම් කටයුත්තක් මෙන් පෙනෙන්නට පටන්ගත්තේය.

මෙවැනි දෙයකදී චං ගෙන් තමාගේ පිළට එකතුකරගැනීමට හැකි ඕනෑම කල්ලියක් පැරදවීම අතිශය දුෂ්කර කාර්යයක් විය.

චං ගෙන් කුඩා කල සිට පටන් සටන් කලාව හොඳින් ප්‍රගුණ කලේය.ප්‍රත්‍යන්ත දේශසීමාව අසල ග්‍රාමයෙහි සෙබළුන්ගෙන්ද හමුදාමය පවුල් වලින්ද අඩුවක් නොවීය. චලන කිහිපයක් උගත් දරුවන් විශාල ප්‍රමාණයක් සිටියද බොහෝදෙනාට එය ඉතා අපහසු කටයුත්තක් විය, එමනිසා ඔවුන් මූලික ලිහිල් චලන කිහිපයක් පමණක් උගත්තේය.නමුත් චං ගෙන් පටන්ගත්දා  සිට සෑමදිනම විස්මයජනක අධිශ්ඨානයකින් යුතුව සේනානායක ගොඩැල්ලෙහි තනිව පුහුණුවීම් හි නියැලුණි.

මේ වන විට ඔහු තවමත් තුදුස් වියේ පසුවුවද  කිලෝග්‍රෑම තිස්දෙකක් බරැති කඩුවක් එකතින් දැරීමේ හැකියාව ඔහු සතුවිය. ඔහු තම ශක්තිය පිළිබඳ දන්නා නිසාම කුඩාදරුවන්ගේ ගුස්ති ඇල්ලීම් නිතරම මගහැරියද කුඩා කොලු පැංචන් ඔහු කෙරෙහි අමුතු ආකාරයේ බියක් දැක්වූහ.

චං ගෙන් කුඩා දරුවාගේ වදන් පිළිබඳ එතරම් නොසිතා සිනහාසීය, "මා තවදුරටත් කුඩාදරුවකු නොවේ,මා කුමටද කැවිලි ඇහිඳින්නේ?"

ගෙ පෙන් ෂියාඕද පසු නොබැස්සේය. "මා දැනටමත් ෂෙන් මහත්මයා දැනුවත් කලා.ඔහුත් සම්මතකලා අප මේ දින දෙක තුන විවේක ගැනීම."

චං ගෙන් ගෙ පෙන් ෂියාඕ ගේ බොළඳ වදන් පිළිබඳ තැකීමක් නොකොට ඔහුගේ බරැති කඩුව පයේ ගට්ටමින් දෑත හිස පිටුපසට කොට බැඳ සෙමින් සෙමින් පා තැබුවේය.

ඔහු ඉගෙනගන්නවාද නැද්ද, කඩු හරඹ පුහුණු වනවාද නැද්ද යන්න තමාටම නිශ්චය කිරීමට හැකිබවත් ෂෙන් මහතා ඔවුන්ට විවේක ලබාදීම පිළිබඳ ඔහුට අදාලත්වයක් නොමැති බවත් ඔහුගේ කල්පනාව විය.

ගෙ පෙන් ෂියාඕ : "තව, ෂෙන් මහතා සොළොස්වැනි මාමණ්ඩියගේ ඖෂධ වෙනස් කරන්නේලු,එම නිසා ඊට අවශ්‍ය ඖෂධ පැළෑටි රැගෙන ඒමට පිටවයාවි.ඔබට යාමට ස්ථානයකුත් නොවන නිසා අපත් සමඟ පැමිණීමෙහි ඇති වරද කුමක්ද?විශාල කඩුවක් ඒ මේ අත වැනීමෙහි ඇති විනෝදය කුමක්ද?"

ඊට නම් චං ගෙන් සවන් යොමුකලේය."සොළොස්වැනි මාමණ්ඩිය ආපසු පැමිණියේ මෑතකදී නොවේද? කෙදිනද ඔහු නැවතත් රෝගාතුරවූයේ?"

ගෙ පෙන් ෂියාඕ : " ආහ් මම දන්නේ නැහැ, ඇරත් ඔහු සැබවින්ම ඔහු රෝගාතුරව නොසිටි දිනක් තිබේද?"

"මා ඔහුගේ තත්ත්වය පරීක්ෂා කිරීමට යනවා" චං පෙන් කුඩා ලුහුබඳින්නන් එළවා දමමින් පැවසීය." විගසින් නිවසට යන්න, දැනටමත් ඔබලා ප්‍රමාදයි,නැවතත් රාත්‍රී ආහාරය මගහැරුනොත් ඔබගේ පියාණන් ඔබට නැවතත් පහර දේවි."

ගෙ පෙන් ෂියාඔ : "අයියණ්ඩි එය..."

චං පෙන් හට මොහුගේ එය හෝ මෙය පිළිබඳ කැමැත්තක් නොවීය . කුඩා පිරිමි දරුවන්ගේ මෙම වයසට පසු වන සෑම වර්ෂයක්ම ඉතා වැදගත් විය. උස පමණක් නොව පරිණත භාවයද වසයත් සමඟ වෙනස් වීය. චං ගෙන් ගෙ පෙන් ෂියාඕ වැනි කුඩාවුන් හා කල්ගෙවීම නොසුදුසු ක්‍රියාවක් විය.

ඔහු විදග්ධ ලෙස ඔහුගේ උසත් පාදයන්හි දිගත් භාවිත කරමින් ශීඝ්‍රයෙන් බොහෝ දුර ඈතට ගමන් කලේය.

කුඩා බතලයා මෙහි පැමිණීම නිරර්ථක කාර්යයක් විය, ඔහුට කිසිසේත්ම ගැටවරයා නම්මාගැනීමට හැකි නොවීය. ඔහු සෝ සුසුමක් හෙලා අනෙක් පස හැරී සාඔ නියැං සී දෙස රවා බැලුවේය. "ඔබට කුමක්වත් පැවසීමට නොහැකිද!"

සාඔ නිං සී ගේ මුහුණ තද රත්පැහැයට  හැරී තිබිණි. දෑස් වශීකෘතව ඇත. ගෙ පෙන් ෂියාඕ කෙරෙහි මොහොතකට පෙර තිබූ කෝපය මුළුමනින්ම අතුරුදහන්ව ඇත. ඔහු තම පපුව ඉතා තදින් අල්වමින් මල්වර විය පසුකරනා කාන්තාවක මෙන් හැසිරුණේය.
"ආහ් චං පෙන් අයියණ්ඩිය පියනැගීම අන් බොහෝ දෙනෙකුගේ පිය්නැගීමට වඩා සිත්ගන්නා සුළුයි." යන්න සුසුම් ලමින් පැවසීය.

ගෙ පෙන් ෂියාඔ : "......."

මේ කොලුවාව තවදුරටත් පිටතට රැගෙන පැමිණීම කලනොහැකියි.

ගෙ පෙන් ෂියාඕ සඳහන් කල "ෂෙන් මහත්මා" සහ "සොළොස්වැනි මාමණ්ඩිය" සහෝදරයින් වූහ. සැබවින්ම ඔවුන්ට චං ගෙන් හා බැඳුනු ඉතිහාසයක්ද විය.

වසර දෙකකට ඉහතදී, චං ගෙන් මෙතරම් නොවැඩී සිටියේය. ඔහු හොරෙන්ම නගර ද්වාරයෙන් පිටතට ගියද අවාසනාවන්ත ලෙස අතරමංවූ අතර  ෂෙන් සොහොයුරන් එම ස්ථානය පසු නොකරන්න වෘක රැළක් අතින් ඝාතනයට ලක්වීමට ඉඩ තිබුණි.

ෂෙන් මහත්මා ඔහු සතු වූ ඖෂධ කුඩු වර්ගයක් භාවිතකර වෘකයන් එම ස්ථානයෙන් පළවාහැරියේ කුඩා චං පෙන් ගේ දිවිගලවාගනිමිනි. ඉන්පසු
ෂෙන් සොයුරන් යන්හුයි හි ම නවාතැන් ගත් අතර පුරපති ෂූ ඔවුන්ට
හිස් අංගනයක් ලබා දුන්නේ තම පුතුගේ දිවිගලවා ගැනීමට තුති පිදීමක් ලෙසයි.

වැඩිමහල් සොයුරා වූ ෂෙන් යී අසමත් වූ විද්‍යාර්ථයෙක් විය.ඔහු තවමත් තරුණයෙක් වුවද දිවියේ සියළු ඉලක්ක හා සිහින අතහැරදමා මෙම නිස්සාර භූමියෙහි තවුසකුව වාසය කෙලේය.ගම්මුන් ආචාරශීලීව ඔහුට ෂෙන් මහත්මයා යැයි ඇමතීය.

තවුසකු වීමට අමතරව ඔහු වෛද්‍යවරයකු,චාරුලේඛකයකු, ග්‍රාමීය ශාස්තෘවරයකු හා "චීන සටන් කලා ආචාර්ය" වරයකු හා එවැනි තවත්  භූමිකා රැසකට දායකත්වය දැක්වීය.ඔහුට සුළු තුවාලයකට ප්‍රතිකාර කිරීමේ සිට අශ්වයකුගේ වින්නඹුව වීම දක්වා ඕනෑම දෙයක් සිදුකල හැකි විය.දහවල් කාලයේ දරුවන් රැසකට ඉගැන්වූ අතර සවස්කාලය උදා වූ වහාම එම දරුවන් එළවා දමා තම ඇඳුමේ අත නවා සියළු ආකාරයේ ලෝහ අලුත්වැඩියා කිරීමට පටන් ගත්තේය - ධූමයන්ත්‍ර, සන්නාහ,අභ්‍යාස කිරීමේදී යොදාගත් පඹයන්. මේ සියළු දෑ හේතුවෙන් අනිවාර්යයෙන්ම මෙතෙක් කලකට විසූ අවිවේකීම තවුසා මොහු බව කිවහැකිය.

ෂෙන් මහත්මයා සෑම ආකාරයේම ක්‍රියාවන්හි නියැලිණි. ඔහු මුදල් ඉපයීමේ සිට පවුල නඩත්තු කිරීම දක්වා සියල්ල ඉටුකල අතර, ඉවීමේ කටයුතුවලද දක්ෂයෙක් වීය. මේ නිසාම  ඔහුගේ සොහොයුරාට ඉතිරි වී තිබුනේ කාබාසිනියෙක් වීම පමණකි.---ෂෙන් මහත්මාගේ සොහොයුරා කුඩාකල සිටම දුර්වල ශරීරයකින් හෙබි වූ අතර ඔහු " සොළොස්වැනි ෂෙන්" නාමය  දැරීය. ඔහුගේ පවුලේ උදවිය ඔහු එතරම් කල් ජීවත්වේ යැයි බලාපොරොත්තු  නොතිබූ නිසා ඔහුට නම් තැබීමට ඔවුන් එතරම් කරදර නොවී ඔහු නව අවුරුදු උදාවෙන් සොළොස් දිනකට පසුව ඉපදුනු නිසා  "සොළොස්වැනි" යනුවෙන් නම් තැබීය.

දහසය වැනි ෂෙන් හට දවස පුරා කිසිවක් නොකෙරුවේය. ඔහු පාඩම් කටයුත්තක නියැලුණේ නැත, කිසිවක් කියවූයේද නැත,වැඩක් පලක් නොකෙරුවේය. තෙල් බෝතලයක් පෙරළී වැටුණද ඔහු එය ඇහඳීමට දෑත් දිගු නොකලේය. ඔහු කෙසේවත් තම දිවිපුරාවට වතුර පනිට්ටුවක් ඔසවා නොමැත.ඔහු සිදුකල එකම දෙය වූයේ බීමතින් සෑමතැනම ඇවිදීම පමණකි.ඔහු කමකට නැති පුද්ගලයෙක් වූ අතර ඔහුගේ පෙනුම හැර හොඳ යැයි කිව හැකි වෙනත් කිසිඳු දෙයක් නොවීය.

සැබවින්ම ඔහුට මනා පෙනුමක් තිබුනේය.එය නගරයේ විසූ වයස්ගතම පුද්ගලයා වූ අනූවියැති මහල්ලකු විසින් තහවුරු කලේ ඔහු තරම් ශොභාවත් මිනිසකු තමා මින්පෙර දැක නොතිබූ බව පවසමින්.

නමුත් අවාසනාව වූයේ ඔහුගේ පෙනුම කෙතරම් සිත්ගන්නා සුලු වුවද  දහසය වැනි ෂෙන් කුඩාකල අසාධ්‍යලෙස රෝගාතුර වීම හේතුවෙන් සම්පූර්ණයෙන්ම විනාශයට පත්වී සිටියේය.ඔහුට මේ වනවිට අඩි දෙකක් එහා දැකීමට නොහැකි වූ අතර, අඩි දහයක් එහා පුද්ගලයකු ගැහැණියක්ද පිරිමියකුද යන්න වන වග හඳුනාගැනීමට නොහැකි විය.ඔහු මදක් බිහිරි පුද්ගලයකුද විය, සැබවින්ම පැවසුවහොත් ඔහුට යමක් දැන්වීමට අවශ්‍ය ඕනෑම අයකුට මහ හඬ නගා කෑගැසීමට සිදුවිය. ෂෙන් අංගනය පසුකල ඕනෑම අයෙකුට එම ඝන බිත්ති තුලින් ආචාරශීලී ෂෙන් මහත්මා උමතු සුනඛයකුගේ මෙන් හඬකින් කෑගසනු ඇසුණේය.

සමස්තයක් ලෙස ගත් කල සොළොස්වැනි ෂෙන් දුර්වල අඳ බිහිරෙක් විය.

ඔහුගේ තත්ත්වය හා සම්බන්ධතා සැලකූ කල ඔහුට ඉතා සුවපහසුව දිවිගෙවීමේ හැකියාව සතු වුවද මෙම දුක්ඛිත ගම්මානයේ දිළින්දන් හැර ජීවත්වූයේ ඊටත්වඩා දිළිඳු වූ පුද්ගලයින් පමණකි.ඔවුනට ඉතාමත් රම්‍ය දේවතාවියක් අහසින් බැස  පැමිණියද ඇය මෙහි රඳවාගැනීමට තරම්වත් වත්කමක් නොවීය.

මෙහි පළාත්බද චාරිත්‍රය වූයේ ආපසු ගෙවීමට නොහැකි තුරුසක් ඇති වූ විට එම පුද්ගලයාගේ දරු මුණුපුරු පරම්පරාව(ඔහුට හෝ ඇයට දරුවන් සිටීනම්) හෝ ඔහු හෝ ඇය තම පවුලේම කොටසක් සේ සැලකීමයි.

ෂෙන් දෙබෑයන් වෘකයන්ගෙන් චං පෙන් ගේ දිවිගැලවීම ඔහු මොවුන්ගෙන් එකෙක් තම නාමමාත්‍ර පියායැයි සැලකීමට තරම් ප්‍රමාණවත් විය.

ෂෙන් මහතා ඕනෑවට වඩා ඉගෙනීමෙන් වියවුලට පත්වී සිටි අතර චං පෙන් තම දරුවායැයි සැලකීම නිවැරදි නොවන නිසා එය සිදුකල නොහැකි බව පැවසීය නමුත් කිසිවක් පිළිබඳ එතරම් තැකීමක් නොකෙරූ ඔහුගේ වැඩිමල් සොයුරා චං ගෙන් තම "දරුවා" යැයි එවලේම පිළිගත්තේය.

එය මේ අවජාතකයා විසින් එකවර විශාල රත්‍රන් මාලුවකු කිසිඳු ආයාසයකින් තොරව අල්ලාගත්තාක් වැන්න, මෙම කමකට නැති පුද්ගලයා නොවෙනස්ව කමකට නැති පුද්ගලයකු ලෙස මුලු ජීවිත කාලයේම සිටියද චං ගෙන් හට මොහු මියයන තෙක්ම ඔහුට ඇප උපස්ථාන කිරීමට සිදුවේ.

චං ගෙන් තම අංගනය පසුකොට ගොස් ෂන් නිවස්නයට ළඟා විය.

ෂෙන් පවුලේ තනිකඩ පිරිමින් පමණකි, ගැහැනියක ලෙස සැලකිය හැකි කිකිළියකවත් එහි නොවූ නිසා කටකතා පිළිබඳ අනිසි බියක් ඇති කරගැනීමට හේතුවක් නොමැත. එම නිසාම චං ගෙන් මෙහි පැමිණි ඕනෑම අවස්තාවක පැමිණීම නොදන්වාම නිවස්නයට ඇතුළුවිය.

ඔහු අංගනයට පිය තබත්ම ඖෂධයන්හි ගන්ධය හා  අපැහැදිලි ශුන්* තනුවක් ඔහු පිළිගත්හ.

ෂෙන් මහතා අංගනයේ සිට දෙබැම හකුළුවා කෂාය හින්දමින් සිටියේය.
ඔහු ප්‍රඥාවන්ත පෙනුමකින් යුක්ත වූ තරුණයකු වූ අතර කබායක් හැඳ සිටියේය. ඔහු කිසිසේත් මහළු නොවූ නමුත් අචල රැවීම හේතුකොටගෙන මවාගත් නොසන්සුන්කමක් පෙනීමට තිබුණේය.

ශුන් නාදය නිකුත්වූයේ නිවස්නය තුලිනි, ගෙතුල වූ මද ආලෝකය හේතුවෙන් වාදකයාගේ උදාර සිලුවටය කවුළුවේ ඇඳී තිබුනේය.වාදකයා පැහැදිලි ලෙසම අදක්ෂයකු වීය. කෙතරම් උත්සහකලද මෙම තනුව කුමක්දැයි හඳුනාගත නොහැකිවිය. සමහර අවස්ථාවන්වල  ස්වර නිකුත්වූයේද නැති නිසා තනුව නිතරම උස් පහත් වෙමින් පාළුස්වභාවයක් හා මුසුවූ විඩාවක් ගෙනදුන්නේය.

මෙය සංගීතයක් යැයි පැවසීම සත්‍යවශයෙන්ම අපහසු කාරණාවක් විය.චං ගෙන් ඊට මද වෙලාවක් සවන්දී මේ පිළිබඳව පැවසීමට ධනාත්මක යමක් වේදැයි කල්පනා කලේය.ඔහුගේ අවසන් නිගමනය වූයේ මෙය අවමංගල අවස්ථාවක වාදනය කිරීමට කදිම තනුවක් බවයි.

චං ගෙන්ගේ පියසටහන් ඇසුණු ෂෙන් යී හිස ඔසවා මදසිනහවකින් ඔහුට සංග්‍රහ කොට අනෙක් පස හැරී "දෙවියනේ අපට අනුකම්පාකොට අපගේ දිවි බේරාදෙනු මැන,ඔබතුමාගේ මේ තනු හේතුවෙන් අප නිසැකයෙන් ඉතා ඉක්මනින් මරණයට පත්වේවි!! චං ගෙන් මෙහි පැමිණිලා" යැයි උස් හඬින් පැවසීය.

ෂුන් තනුව වයමින් සිටි පුද්ගලයාගෙන් කිසිඳු ප්‍රතිචාරයක් නොවීය. ඔහුගේ බිහිරිතාව හේතුවෙන් නිසැකවම ෂෙන් යී පැවසූ කිසිවක් ඔහුගේ කනවැකී නොමැතිබව සිතිය හැක.

ආපසු හැරුණු ෂෙන් මහත්මාගේ මුහුණ අසූචි වැළඳූ පුද්ගලයකුගේ මෙන් විය.

ඇසෙන ආකාරයට වයන්නා ඉතාමත් ජවසම්පන්න වූ අතර රෝගාතුර වීමට කිසිඳු ඉඩක් නැත. චං ගෙන් ගේ බියට පත් හදවත මදක් සන්සුන්විය." මා හට ගෙ පෙන් ෂියාඕ ගෙන් දැනගන්න ලැබුනා ඔබ සොළොස්වැන්නාගේ ඖෂධ වෙනස් කිරීමට සූදානම් වනබව.කුමක්ද සිදුවූයේ?"

ෂෙන් මහතා පීඩාවට පත්වූ සෙයක් පෙන්වමින් බුබුළුදමමින් තිබූ කෂාය දෙස නෙත් යොමා සිටියේය. "එය එතරම් දෙයක් නොවේ ඍතු වෙනස්වීමේදී යොදාගන්නා ඖෂධ ද වෙනස් කලයුතුයි,ඔහු එතරම්ම දුර්වලයි...ඔබ පැමිණියේ නිසි වේලාවේයි.ඔහුට යමක් හමුවී තිබෙනවා .මා ද ඒ කොහෙන්දැයි දන්නේ නැහැ . මම එය හෙට උදෑසනින්ම ඔබහට පෙන්වීමටයි සිතා සිටියේ- නමුත් ඔබ දැන් මෙහි පැමිණි නිසා ගොස් එය මදක් පරීක්ෂා කර බලන්න".

චං ගෙන් හොඳින් හින්දවූ ඖෂධ බඳුනක් රැගෙන ඔහුගේ තරුණ අපත්‍යීකාරක පියාණන්ගේ කුටියට ඇතුලුවිය.

ෂෙන් ෂිලියු ගේ කුටිය තුල වූයේ මඳ ආලෝකයක් නිකුත් කෙරූ පහනක් පමණකි; එයින් නිකුත් වූ ආලෝකය කුඩා මෑ ඇටයක් තරම් විය ඒ කුඩා කණාමැදිරියකු සේ දිස්විය.

හේ කවුළුව අසල අසුන්ගෙන සිටියේය.මුහුණේ විශාල පෙදෙසක් අඳුරේ ගිලීතිබූ අතර කුඩා කොටසක් පමණක් ආලෝකයට නිරාවරණය වී තිබුණේය. දැකගත හැකිවූ  ආකාරයට ඔහු අඩනින්දේ පසු විය.ෂෙන් ෂිලියු ඉසකේ ගැටගසා තිබුණේ නැති නිසා ඔහුගේ මුහුළස සෑමතැන විසිරී තිබුනේය. ඉඳිකටුවකින් ඕනෑකමින් ම අඳින ලදැයි සිතිය හැකි ආකාරයේ  මියුරුවක් දක්වන සිවංගුරු පැහැගත් කුඩා ලප දෙකක් නෙතඟෙහි  හා කන්පෙත්තෙහි විය.

කුටියේ තිබූ ඉතාම කුඩා ආලෝකය මේ උපන් ලප වඩාත් දීප්තිමත්ව ඒවායේ සැබෑ අලංකාරය පෙන්වීමට පමණක් ප්‍රමාණවත් විය.

මද ආලෝකය ඔහුගේ ආකර්ශනය වෙනදාටත් වඩා දෙතුන් ගුණයකින් තිව්‍ර කල බව කිවහැකිය.

ඕනෑම අයෙක් තමාට ඉතා හුරුපුරුදු  වුවද අලංකාර දෑ අගය කලේය.
චං ගෙන් හට මොහු දුටු විය  ස්වාසයන් නැවතීම මෙතෙක් කලක් පසුවූ පසුද නවතාගැනීමට නොහැකි විය.ඔහු සීඝ්‍රයෙන් ඇසිපිය ගැසුවේ තමා ඉදිරියේ තිබෙන ඒ මුළාකරනා සුලු ලේ රත්පැහැ ගත් ලපය තම දර්ශන මාත්‍රයෙන් ඉවත් කිරීමට මෙනි.

ඔහු උගුර පාදා උස් හඬින් : "ෂිලියු,ඖෂධ පානය කරන්න" යැයි පැවසීය.

මේ ගැටවරයා තම හඬ වෙනස්වන අවධියක පසුවීම හේතුවෙන් මේ බිහිරා හා කතාකිරීම මදක් අපහසු කාර්යයක් විය. වාසනාවකට මෙන් මෙවර ෂෙන් ෂිලියු හට ඔහුගේ හඬ ඇසුනේය.ඒත් සමඟම ඕනෑම අයකුට මුත්‍රා කිරීමට දැඩි අවශ්‍යතාවක් ඇතිකිරීමට සමත් ෂූ තනුවේ හඬ වියැකී ගියේය.

ෂෙන් ෂිලියු දෑස් හකුළුවා දොරකඩ සිටින චං පෙන් දෙස බැලුවේය,"ඔබගේ ආචාරශීලීබව අමතකව ගොසින්ද? ඔබ කා හටද ඇමතුවේ?"

යතාර්ථයනම් ඔහු චං පෙන්ට වඩා සත් අවුරුද්දක් පමණ වැඩිමහල් තවමත් තනිකඩ තරුණයෙකි.ඔහු තමාගේ කමකට නැති භාවය පිළිබඳ හොඳින් දැනසිටි අතර ඒ හේතුව නිසාම කාන්තාවක් විවාහකරගැනීම පිළිබඳ හේ නොසිතුවේය.නමුත් එක්වරම තමාට ඇති දැඩි කිරීමට සිදු නොවූ දරුවකුගේ පියාණන් බවට පත්වීමෙන් පසු ඔහුට කුමක් නැතත් එම දරුවා තදින් තම ග්‍රහණයට හසුකොට තබාගැනීමට අවශ්‍ය විය.ඒ සඳහා කිසිවක් කිරීමට හැකියාව නොතිබූ ඔහුට ඒ සඳහා භාවිත කිරීමට හැකිවූයේ තමා ඔහුගේ පියාණන් බව තරයේ කියා සිටීම පමණයි.

චං ගෙන් ඔහු ගැන නොතකා ඖෂධ බඳුන ප්‍රවේශමෙන් ඔහු ඉදිරියේ තැබීය. " උණුවෙන්ම පානය කරන්න; දැන් බොහෝ පමාවෙලා,මෙය පානය කිරීමෙන් පසු මදක් හාන්සි වෙන්න"

ෂෙන් ෂිලියු ඔහුගේ ෂූ වාද්‍යභාණ්ඩය පසෙකින් තබා ඖෂධ බඳුන අතට ගත්තේය,

 " කෙතරම් අකෘතඥද, මාගේ පුත්‍රයා ලෙස ජීවත් වීම සුවදායක ජීවිතයක් නොවේද? මා කෙතරම් ආයාසයක් දැරුවාද ඔබට ඉතා හොඳින් සැලකීමට?"

ඔහු අපහසුවකින් තොරව ඖෂධ බඳුන හිස්කලේය.නොවැරදීම මෙය මොහුට ඉතා හුරුපුරුදුය.ඔහු එය පානය කිරීමෙන් පසු චං පෙන් ලබාදුන් ජල බඳුනෙන් උගුරු දෙකක් පානය කර කට සෝදාහැරියේය .
"අද චංග්‍යැං හි සල්පිළක් තිබුනා.මම ඔබට පුදුමසහගත දෙයක් මිළදී ගත්තා. මෙහි පැමිණෙන්න."

ඉන්පසු ෂෙන් ෂිලියු මේසය උඩ යමක් සෙවීමට නැමීගත්තේය.ඔහුගේ දෘෂ්ටි දුර්වලතාව හේතුවෙන් ඔහු මේසයේ මතුපිට උලාකන්නාක් මෙන් දිස්විය.චං පෙන් හට මෙය තවදුරටත් බලසිටීම අසීරු විය. "කුමක්ද ඔබ සොයන්නේ? මා ඔබට එය සොයා දෙන්නම්"

එය පැවසීමෙන් පසු ඔහුට මැසිවිලි නැඟීම නවතාගත නොහැකිය
"මම දැනටත් වැඩුණු පුද්ගලයෙක්,ඔබට මා වෙත දරුවන්ගේ ක්‍රීඩා භාණ්ඩ රැගෙන ඒමට වඩා කිරීමට කිසිඳු දෙයක් නොවේද?"

ඔබට එතරම් අපතේ යැවීමට කල් තිබේනම් මා හට නිතරම කරදර කිරීමෙන් වැළකී වැදගත් යමක් ඉගෙනීමට ඉඩ නොදෙන්නේ මන්ද?
චං ගෙන් මෙසේ සිතුවද එය හඬනගා පැවසීමට පෙර එම වචන වේදනා ඇති කරාවීයි සිතා මුවින් නොබිනීය.

වසර පුරාම ෂූ බයිහූ නිවසින් පිටත කාලය ගත කලේය. ඔහු ඉතා අවංක පුද්ගලයකු වූ අතර නිතර කතානොකලද  තම සුළු පුත්‍රයා වූ චං ගෙන් හට කරුණාව දැක්වීය.ඒ පිළිබඳ සිතමින් චං ගෙන් තමාගේ දිවියේ තීරණාත්මකම වසර කිහිපය තමාගේ
මේ අනිසි අපත්‍යීකාරක පියා හා ගෙවීය.

ෂෙන් ෂිලියු රස්තියාදුකාරයෙකි; දවස තිස්සේ කාලය කා දැමීම එක්දෙයකි නමුත් ඔහු නිතරම ඔහු හා චං ගෙන් ද  ඇදගෙන යයි!! සල්පිළක් නොවූයේනම්  දුරඟ ධාවනයකි.

දිනක් ඔහු චං ගෙන් හට ලබාදීමට බලුපැටවෙක් රැගෙන ආවේ ෂෙන් ගුරුතුමා භීතියෙන් හීන්දාඩිය දැමීමට සලස්වමිනි. මේ අන්ධ පුද්ගලයාට වෘකයන් හා සුනඛයන් වෙන්කර හඳුනාගැනීමට නොහැකි වූ අතර වැරදීමකින් කුඩා වෘක පැටියකු සුනඛයකු යැයි සිතා රැගෙන විත් තිබුනේය .

වැසිහිටියකු බවට පත්වෙමින් සිටි කුඩා ගැටවරයකුට ඔහුගේ නොහොඹිනා හැසිරීමෙන් විනාශවී නොයෑමට කෙතරම් ධෛර්යයක් අවශ්‍යවීද?

ඔහුට මතක ඇති ආකාරයට ඔහු සෑහෙන බියට පත්විය.

ඔහු ස්වභාවයෙන්ම නොමනා ක්‍රියාවන්ට අකමැති විය, ඔහු කල සියලු දේ සඳහා ඔහුගේම සැලසුමක් වූ අතර සැලසුම ඒ ආකාරයටම ක්‍රියාවට නැංවීය. ඔහු කිසිවකුගේ හිරිහැරයන්ට ලක්වීමට අකමැත්තක් දැක්වීය.ෂෙන් ෂිලියු ගේ කරච්චලය බලවත් උද්දීපයක් විය.

නමුත් එම උද්දීපය එතරම් වේලා නොපැවතුණේ ඔහු සත්‍යවශයෙන්ම පුත්‍රයකු ලෙස තම පියාණන්ට ආලය දැක්වූ නිසාවෙනි.ඔහු වචනයෙන් කෙසේ කීවද කිසිලෙසකින් තම පියාණන්ගෙන් අයුතු ප්‍රයෝජන ලබාගැනීමට නොසිතුවේය.

ඔහු දැඩි ලෙස රෝගාතුර වූ අවස්තාවක ෂූ බායිහු සුපුරුදු ලෙසම නිවසෙහි නොවීය.වෛද්‍යවරුන්ගේ අදහස වූයේ ඔහුගේ තත්ත්වය ඉතා අසාධ්‍ය බවයි.එම අවස්ථාවේ නොකඩවා තෙදිනක් මේ තරුණ අපත්‍යීකාරක පියාණන්  දිවා රෑ නොබලා ඔහු රැකබලාගත්තේය.

ඔහු පිටතට ගිය සෑම අවස්තාවකම, කෙටි හෝ දීර්ඝ ගමනක් වුව, කුමන ආකාරයේ ක්‍රියාවක් සඳහා පිටව ගියද ඔහු නැවත පැමිණුනේ චං ගෙන් සඳහා කැවිලි හා කුඩා සෙල්ලම් භාණ්ඩද රැගෙනයි.චං ගෙන් මෙවැනි දෑ පිළිබඳ ඇල්මක් නොදැක්වුවද තම යීෆූ නිතරම තමා පිළිබඳ සිතීම ඔහුගේ සතුටට කාරණාවක් විය.

කෙටියෙන් පැවසුවහොත් චං පෙන් මේ ෂෙන් ෂිලියු දකින සෑම අවස්තාවකම පාහේ කිපුනද ඔහු නොදැක සිටීම අපහසු කාරණාවක් විය.

චං ගෙන් තනිව කල්පනාකරන්නට වූයේ ෂන් ෂිලියු සටන්කාමී පුද්ගලයකු නොවුනද, ප්‍රඥාවන්තයකුද නොවුනද අවම වශයෙන් කිසියම් වැඩක් පලක හෝ නියැලීමට ඔහුට නොපුළුවන් වුවද අනාගතයේ යම් අයකු මොහුගේ කඩවසම් බවට රැවටේවිද යන්නයි.

තම යීෆූ කෙදිනක හෝ විවාහ වී ඔහුගේම දරුවන් සදාවි;එවිටත් ඔහුට තම අපත්‍යීකාරක පුත්‍රයා පිළිබඳ මතක තිබේවිද?

මේ පිළිබඳ සිතූ සෑම අවස්තාවකම ඔහුගේ සිත විස්තර කල නොහැකි හැඟීමකින් පිරෙයි. ඔහුට ෂෙන් ෂිලියූ ගේ මේසය මත තිබී ඝනකයක හැඩයකින් යුතු මංජුසාවක් හමුවිය.ඔහු තමාගේ සිතුවිලි පසෙකලා එය ෂෙන් ෂිලියු වෙත රැගෙන ගියේය "මෙයද?"

ෂෙන් ෂිලියු, "එය ඔබ සඳහායි.විවෘත කර බලන්න"

මෙය කැටපෝලයක් විය හැක,එසේත් නොමැතිනම් කේජු, කුමක් වුවත් වැදගැම්මට ඇති යමක් විය නොහැකිය - චං පෙන් බලාපොරොත්තු විරහිතව මංජුසාව විවෘත කරමින් බැනවැදුනි, " ඔබ මුදල් ඉතිරිකිරීමට උගත යුතුයි, අපට වැඩිපුර මුදල්හදල් තිබුනත්, ඇරත් මම..."

මීළඟ නිමේෂයේ ඔහු මංජුසාව තුළ තිබූ දේ දැක මුව වසා දෑස් අයාගත්තේය.

එහි අඟල් සතරක් පමණ පළලැති කුඩා කිණිසි සතරක් පමණ රැඳවිය හැකි ලෝහමය අත් පළඳනාවක් විය.ඒවායෙහි තලය අද්විතීය ශිල්ප කෞෂල්‍යයක් මුහු කරමින් නිමවා තිබූ *සිසාඩයකුගේ පියාපත් මෙන් තුනී   *ශියු ජොං සී යැයි කිව හැකිය.

ඔහු අසාතිබූ ආකාරයට හොඳම වර්ගයේ ශියු ජොං සී ලෝහමය අත් අළඳනාවෙන්  මුදාහල විට අඩි ගණනක් එහා තිබූ එක් රෝමකූපයක් ඇසිපිය ගසන සැනින් දෙකඩ කරන්නේලු.

චං ගෙන් විස්මයට පත්ව සිටියේය.
"මෙය....කෙසේද ඔබට මෙය ලැබුනේ?"

ෂෙන් ෂිලියු : "ශ්ශ්ශ් ෂෙන් යීට ඇසෙන්න දෙන්න එපා,මෙය සෙල්ලම් භාණ්ඩයක් නොවේ ඔහු මෙය දුටුවොත් නිසැකයෙන්ම දොස්නගාවි - ඔබ මෙය භාවිත කරන ආකාරය දන්නවාද?"

ෂෙන් ඇදුරුතුමා අංගණයේ මල්පැළයන්ට සාත්තුකරමින් සිටියේය.ඔහුට කන් නෑසීමේ දෝෂයක් නොවීය.ඔහුට නිවස්නය තුළ සිදුවූ කතාබහ හොඳින් ඇසුණු අතර ඔහුට තම අනුන්ද තමා මෙන්මැයි සිතන බිහිරි සොහොයුරාට කුමක් කරන්නදැයි සිතාගත නොහැකිවිය.

චං ගෙන් නිතරම ෂෙන් යී පසුපස යමින් ලෝහ සන්නාහ පිළිබඳ උගත්තේය.ඔහු පහසුවෙන්ම ලෝහ අත් පළඳනාව පැළඳගත්තේය; එවිටයි ඔහු දැනගත්තේ එහි ඊටම ආවේණික වූ අංගක් ඇති බව.

ශියු ජොං සී සෑදීම පහසු කටයුත්තක් නොවීය,ඇරත් මෙය ඉතා දුර්ලභ අංගයක් විය.වෙළඳපොළේ තිබූ බොහොමයක් අත් පළඳනා ඉතා පැරණි  හමුදා සෙබළුන් විසින් නැවත නැවතත් පරිහරණය  කරන ලද ඒවා විය.නමුත් ෂෙන් ෂියු රැගෙන ආ අත් පළඳනාව ගැටවරයකුට සරිලන ප්‍රමාණයේ ඉතා කුඩා එකක් විය.

චං ගෙන් එකවර තෝන්තුවිය; ඔහු ඇසීමට සැරසෙන්නේ කුමක්දැයි ෂෙන් ෂිලියු හොඳින් දත්තේය , " මට වෙළෙන්දෙක්ගෙන් භාවිතයට නොගත හැකි භාණ්ඩයක් පිළිබඳ ඇසීමට ලැබුනා, එහි කිසිඳු වරදක් නොවේ ප්‍රමාණයෙන් මදක් කුඩා වීම පමණයි වරද,නමුත් කිසිවකුත් එය මිළදී ගැනීමට ඉදිරිපත් නොවූ නිසා ඉතා සුළු මුදලකට මට එය ලබා දුන්නා. මට එය භාවිත කිරීමට නොහැකියි. ඔබ එය තබාගෙන අවශ්‍ය ආකාරයට පාවිච්චි කරන්න. අන් අයට හිරිහැරයක් නොකිරීමට වගබලාගන්න."

චං ගෙන් තම ප්‍රසාදය දැක්වූයේ කලාතුරකිනි: "ස්තූතියි.."

ෂෙන් ෂිලියු :" කාහටද ස්තූති කරන්නේ?"

චං ගෙන් ඉතා ඉක්මනින් පිළිතුරු ලබාදුන්නේය. " යීෆු!"

"ඔබට අවශ්‍ය දේ කරදෙන ඕනෑම අයකුට යටත්වනවානේ?අවජාතකයා !!" යැයි සිනහමුසු මුහුණෙන් පවසමින් චං ගෙන් ගේ කරවටා අතක් දමා ගත්තේය.
"දැන් නිවස බලා පිටත්වන්න,අත්හල ආත්මයන්ගේ මාසයේදී පමාවනතෙක් එළිමහනේ රැඳෙන්න එපා"

ඔහු ඊට මදවේලාවක් සවන් යෙවීමෙන් අනතුරුව තනිව සිතන්නට විය, එදින සැබවින්ම ඇසල මස පසළොස්වැනි දින විය.

ඔහු අප්‍රධාන දොරටුවෙන් පිටව තම නිවස කරා ඇදුනේය.ඔහුට දොරකඩින් ඇතුල්වෙත්ම ෂිලියු විසින් වාදනය කල තනුව ඉතා හුරු බව පසක්විය. එය සෘතියෙන් පිට වැයුවද එය "සොං ශී" නම් භූමදානයකදී වයන ගීතයෙහි තනුවට ඉතාම සමීප විය.

"ඊට කම් නැතිද?" හේ නිහඬවම සිතුවේය.

චං ගෙන් නිවසබලා පිටත් කෙරූ ෂෙන් ෂිලියු දොර සොයාගැනීමට මහත් පරිශ්‍රමයක් දරා අවසානයේ එය හමුවූ පසු කකුලෙන් තදකොට දොර වසා දැමුවේය.

මෙතෙක් වේලා අංගණයේ රැඳී  සිටි ෂෙන් ඇදුරුතුමා හිස් හැඟීමකින් යුතුව ඔහුට නැවත නිවස්නය තුළට යාමට උදව්කලේය.

ෂෙන් ඇදුරුතුමා: "අනර්ඝම ලෝහයෙන් කල අත් පළඳනාවක්,එය තුල තිබෙන කිණිසි ත්‍රිත්වයමය චියු
තියෑන් ඇදුරුතුමා අතින්ම නිමවූවන්.ඔහු මියගිය පසු ඔවුන් එවා නිපදවීම හා විකිණීම සම්පූර්ණයෙන් නැවැත්වූවා....ප්‍රයෝජනයක් නොවන භාණ්ඩ?"

ෂිලියුගෙන් පිළිතුරක් නොවීය.

ෂෙන් ඇදුරුතුමා : "හොඳයි , ලැජ්ජාවීමට කාරණයක් නොවේ- ඔබට සත්‍යවශයෙන්ම ඔහු ඔබගේම පුත්‍රයා ලෙස හදාවඩා ගැනීමට අවශ්‍යද?"

"සැබවින්ම මට එයයි අවශ්‍ය,මා ඔහුට ප්‍රියයි ,ඔහු ඉතා යහපත් හා දයබර දරුවෙක්" ෂිලියු අවසානයේදී පැවසීය. "ඒ පුද්ගලයාගේ සිතෙහි මෙවැනි අදහසක් නිසැකවම ඇති.මට ඔහු මාගේ උරුමකරු ලෙස නම් කිරීමට හැකිවුවහොත් එය ඒ මිනිසුන්ට සහනයක් වේවි.ඔහුට මීටවඩා ඉතා සුවපහසු දිවියක් ගෙවීමටද හැකියි.

ෂෙන් ඇදුරුතුමා මදකට නිහඬව සිට තම හඬ අවදි කලේය." මුලින්ම ඔහු ඔබට වෛරනොකර සිටිය යුතුයි. ඔබට ඒ පිළිබඳ බියක් නැතිද?"

ෂෙන් ෂිලියු සිනහසෙමින් කබායේ වාටිය ඔසවාගනිමින් නිවස්නයට ඇතුළු වීමට දොර විවර කලේය.

"මා හට වෛර කරන පුද්ගලයන් ඕන තරම් සිටිනවා" යැයි නිර්ලජ්ජිතව පැවසුවේය.

මේ රාත්‍රියේ ආලෝකයෝ ගංගාවේ පාවී ගියහ; ආත්මයන් ප්‍රත්‍යාගමනය කලෝය.

චං ගෙන් අළුයමට පෙර නින්දෙන් අවදිවිය.ඔහුගේ සිරුර ඉතා උද්‍යෝගිමත් තත්ත්වයකට පත්වී තිබුණේය.ඔහුගේ ඉණකඩ තෙත්වී ඇත.

මේ පිළිබඳව කියාදීමට යමෙක් සිටියද ඕනෑම ගැටවරයකු මෙවැනි ත්‍රාසයකට හා ආකූලත්වයකට තම දිවිය තුළ එක්වරක් හෝ පත්වෙයි.

නමුත් චං ගෙන් ආකූලත්වයට හෝ සංත්‍රාසයට පත්නොවීය.ඔහු උදාසීන බවකින් යුතුව සයනය මත මදවේලාවක් අසුන්ගෙන සිටියේය.ඉන්පසු නැගීසිට වෙනදා මෙන්ම පිරිසිදු විය.ඔහුගේ මුහුණෙහි සුළු පිළිකුලක සේයාවක් ඇඳී තිබුණේය.

ඔහු සීතල ජල බඳුනක් රැගෙනවිත් තවමත් වැඩෙමින් තිබූ තම සිරුරෙහි හිසේ සිට පාදාන්තය තෙක් හොඳින් අතුල්ලන්නට විය.ඉන්පසු සයනය අද්දර ඉතා පිළිවලට නවා තිබූ ඇඳුම් හැඳ වෙනදා මෙන්ම තම ඉගැනීම් කාර්යයන්හි නියැලුණේය.

චං ගෙන් අනෙකුන්ගේ සිහින පිළිබඳ නොදත්තේය.

නමුත් ඔහුනම් කිසිඳු ආකාරයක *වසන්ත සිහිනයක් නොදුටුවේය.ඔහු දුටුවේ මිනිසුන් මිදිය හැකි ආකාරයේ හිමකුණාටු පමණකි.

එදින සුළඟ සුදුපැහැ මවිල් මෙන් , කෲර ලෙස හමාගියේ ඔහුගේ තුවාල වලින් පිටවූ ලේ ගලායාමට පෙර මිදීමට ලක්කරමිනි. වෘකයන්ගේ හඬ ඈතින් මෙන්ම ඉතා ළඟින්ද ඇසුණේය.
ඔහුට තවදුරටත් ඔහුගේ රුධිරයේ මල බැඳුණු ගන්ධය නොදැනුනේය, සෑම ආශ්වාසයක් පාසා වේදනාව තිව්‍ර වූ අතර එම මිශ්‍රස්වාදී ගන්ධය යමකුගේ ඇටමිඳුළු දක්වාම ගමන් කලේය. චං ගෙන් ගේ සියලු අවයව දරදඬු වී තිබූ අතර ඔහුගේ පෙණහලු දැවෙමින් තිබුණි.ඔහු මේ හිම තමා ගිලගනීවි යැයි සිතුවේය.

නමුත් එවැන්නක් සිදුනොවීය.

ඔහු නැවත අවදිවනවිට කවුරුන් හෝ  තම සිරුර පිට කබායකින් ඔතා රැගෙන යමින් සිටියේය.

ඔහුට  මේ මිනිසා සුදු පැහැ කබායක් ඇඳසිටි බවත් ඔහුගේ සිරුරෙන් ඖෂධයන්හි සුගන්ධයක් විහිදුනු බවත් මතකයේ රැඳීතිබුණි.ඔහු චං ගෙන් සිහිලැබූ බව දුටුවිට කිසිත් නොපවසා මුද්‍රිකාපානයකින් මදක් ඔහුට ලබාදුන්නේය.

එය කිනම් මුද්‍රිකාපානයක්දැයි ඔහු නොදත්තේය.එය නැවතත් පානය කිරීමට අවස්තාවක්ද ඔහුට නොලැබුණේය.ඔහු දන්නා එකම දෙයනම් නගරයෙන් පිට අළෙවි කල ශඔ දාඔ සී මෙතරම් ප්‍රබල නොවීය.එය තම උගුරෙන් පහළට ගින්දර යවන්නාක් වැනි විය. ඔහුගේ සර්වාංගයේම රුධිරය දැවීමට එක් උගුරක් පමණක් ප්‍රමාණවත් විය.

ඒ පුද්ගලයා ෂිලියූ ය.

එය අතිශයින්ම විචිත්‍රවත් විය.සිහිනයේ  තමා රැගෙන යාමෙන් ෂිලියුගේ  දෑත් තම සිරුරෙහි ඇති කෙරූ සංවේදනය පහව නොගියේය.චං ගෙන් හට මෙය වටහාගැනීමට අපහසුවිය.ඔහු රෝගාතුර පුද්ගලයකු නොවේද? එතරම් භයානක හිම සහිත ශීතලක එතරම් දැඩි ජවසම්පන්න දෑත් ඔහු සතුවන්නේ කෙසේද?

චං ගෙන් තම අතෙහි පළඳා තිබූ ලෝහ පළඳනාව දෙස නෙත් යොමුකලේය.ඔහු මෙය කිනම් ද්‍රව්‍යකින් නිපදවා තිබුණේදැයි නොදත්තේය.රාත්‍රියක් මුළුල්ලේ තම සිරුරට තදවී තිබුණද එය මදක් හෝ උණුසුම් නොවීය.ලෝහයේ ශීතලත් සමඟ ඔහු නිහඬවම තම දැවීයන රුධිරය නිවීයන තෙක් ඔහු බලාසිටියේය. වසන්ත සිහිනයක තම අපත්‍යීකාරක පියාණන් දැකීම පිළිබඳ තමාටම නින්දාසහගත ලෙස ඔච්චම් කරගෙන වෙනදා මෙන්ම පහනක් දල්වා ඉගෙනීමේ කටයුතු කෙරෙහි සිත් යොමු කෙලේය.

එක්වරම ඈතින් යමක් ගැටෙන හඬක් ඇතිවිය. භූමිය හා කුඩා පැල්පත් කම්පනයට පත්විය.මද වේලාවකින් පසු ඔහුට දිනගැනීම මතක්විය. මේ "යෝධ සරුංගලය" උතුරේ මුරසංචාරය ආපසු නිමවා පැමිණෙන දින විය යුතුය.

"යෝධ සරුංගලය" යනු අඩි පන්දහසකට වැඩි දිගින් යුතු යාත්‍රාවකි.එය තට්ටු දෙකකින් නිමවී "රක්ත වරල්" දහස්ගණනකින් සමන්විත වූ යාත්‍රාවක් විය. යෝධ සරුංගලය උඩ්ඩනය කිරීමේදී මේ  'රක්ත වරල්' සියල්ල එකවර වාශ්ප පිටකලේ සිහිනයක බඳු රූ මවමිනි.සියලු 'රක්ත වරල්' *ජිලිජුන් දහණය කරමින් ලා දම්-රත් පැහැයට හුරු එලියක් විහිදෙව්වේ කුඩා දීප්තිමත් ආලෝක කදම්බ මිලියනයක හැඩ මවමිනි.

ම්ලේච්ඡ  ගෝත්‍රයන් පඬුරු ගෙවීමට පොරොන්දු වී යටත් වූ පසු තුදුස් වසරක් මුළුල්ලේ සෑම වසරකම මුල් මාසයේ පසළොස්වැනි දින සියලු දේශසීමාවන්ගෙන් පිටතට මේ යෝධ සරුංගල් දවස් ගණනින් නික්මුණේය.ඒවා මඟින් සෑම ම්ලේච්ඡයකුම ඉතා හොඳින් නිරීක්ෂණය කිරීමේ හැකියාවද ලැබිණි.

නිවර්තනය හා සෝදිසිකිරීම්  පමණක් නොව උතුරේ ගෝත්‍රන්ගෙන් ලැබෙන පඬුරු,ප්‍රධාන ලෙස ජිලිජුන්, අගනගරය වෙත යැවීමද යෝධ සරුංගලයේ කාර්යයක් විය.

මේ යෝධ සරුංගල්හි අවම වශයෙන් ජිලිජුන් රාත්තල් මිලියනයක් පටවා තිබුණේය.නැවත පැමිණෙන  යෝධ සරුංගලය පිටව යන යෝධ සරුංගලයට වඩා බරෙන් වැඩි විය.ඕනෑම අයකුට රක්ත වරල් නිකුත් කෙරූ සරොස් පිඹිලීම සැතපුම් තිහක් තුල වුව පැහැදිලිව ඇසීමට හැකියාව ඇත.

සෑම වසරකම මුල් මාසයේ මුර සංචාරය ආරම්භ වන අතර පිටත්වූවන් නැවත පැමිණෙන්නේ පිටත්වීමේ සිට සයමසක් ගතවූ තැනය.
     
     
                       *********

*යීෆූ : adoptive  father /අපත්‍යීකාරක පියාණන්

* ෂියු ජොං සී - Xiu Zhong Si
                          කබායේ අතෙහි සඟවා ගතහැකි ආයුධ විශේෂයක්

*වසන්ත සිහිනය - Spring dream
අනුරාගී සිහින

*ශඔ දඔ සී - Shao Dao Zi මුද්‍රිකාපාන වර්ගයක් (වයින් වර්ගයක්)

*ජිලිජුන් - Zhilijun මේ විශ්වයේ සියලු දේ සඳහා  භාවිත කරනා ඉන්ධන වර්ගය.

*සිසාඩයා - කෘමි විශේෂයක්

*ෂුන් - Xun Instrument . මෙය ආදි චීනයේ භාවිත කල මැටියෙන් තැනූ බටනලාවක් වන් වාද්‍ය භාණ්ඩයකි.

Cao Niang Zi නාමයෙහි තේරුම Grass Lady යන්නයි එම නිසා එය ගැහැණු දරුවකුට වඩාත් සුදුසුයි.

සියළුම පරිච්ජේද | පසු පරිච්ජේදය