දෙවන පරිච්ඡේදය | ශිමෝ නදිය

 සම්පූර්ණයෙන්ම කළු ඇඳුමින් සැරසී සිටි ශිඑ යුන් ශිමෝ නදියේ දිය පහර දෙස බැලීය. ඔහු තම වස්ත්‍රයේ ළය තුළ තිබී තඹ කාසියක් එළියට ගත්තේය.

“හිස වැටුනොත් හැමදේම හොදින් සිදුවේවි, වලිගය වැටුනොත් එසේ නොවේවි” 

හඩ නගමින් දොරෙහි වැදුණු චෝ ෆෙයිගේ පාදය නිසා සරනේරු වලින් ගැලවුණු දොර දූවිලි වළාවක් නගමින් පසෙකට විසිවුණි.

ලී ශෙන් මැද මිදුලේ කඩු හරඹය පුහුණු වෙමින් සිටියේය.ලේ ණයක් අයකරගැනීමට පැමිණි මිණීමරුවෙකු මෙන් සිටින චෝ ෆෙයි දෙසට හැරුනු ඔහු වැඩි විමතියකින් තොරව ඇය ඇමතුවේය. “ෆෙයි, මොකද මේ?”

චෝ ෆෙයි, කුහකයන් ලෙස හදුන්වන්නේ ලී ශෙන් වැන්නන් බව සිතුවාය. ඔහුගේ මුහුණ දුටු පමණින් ෂෝ ෆෙයි කෝපයෙන් ගැහෙන්නට විය. වචයක්වත් නොකී ඇය තම සේබර් තලයෙන් ලී ශෙන්ගේ හිසට පහර දුන්නාය. ඇයට අවශ්‍ය නම් සාකච්ඡා මාර්ගයෙන් ප්‍රශ්න විසදා ගතහැකි වුවද, ඇය තම බලය භාවිතා කිරීමට තීරණය කළ සෑම විටම වචන සමඟ කාලය නාස්ති කළේ නැත.

චෝ ෆෙයි මෙලෙස පළිගනු ඇතැයි අපේක්ශාවෙන් සිටි ලී ශෙන් , ඔහුගේ කඩුවෙන් ඇගේ ප්‍රහාරය වළකා ගත්තේය. තම තමන්ගේ ආයුධ කොපුවත් ගලවන්නේ නැතිව දෙදෙනා ගුටිබැට හත අටක් හුවමාරු කරගත්හ. හදිසියේම ඉදිරි පියවරක් ගත් චෝ ෆෙයි, ඇගේ හෙල්ලයක් වන් කඩුමිටෙන් ලී ශෙන් ගේ ඉණ දෙසට පහර දුන්නාය.ලී ශෙන් පෙරදී මුහුණ දුන් ප්‍රතිවාදියා ද භාවිතා කළ 'දකුණු කඳුකරයට පහර දීම' ඇයද ක්‍රියාත්මක කලාය. ලී ශෙන් දෑස් කුඩා කරගත්තේය.

ච්‍යන්චොං නිකායේ මෙම රුදුරු පියවර නිකායේම බාල ගෝලයන්ට පවා නිසිලෙස ක්‍රියාත්මක කිරීමේ කුසලතාවයක් නොතිබූ නිසා පෙරදී ලී ශෙන්ට එය පහසුවෙන් පරාජය කිරීමට හැකි වුවත්, චෝ ෆෙයි එම පියවර වෙනස් කර ඇති නිසා හෝ ඇගේ සේබර් තලය විශාල වූ නිසා හෝ, ඇගේ අතේ මෙම පැරණි විකාර පියවර වඩාත් භයානක විය.

චෝ ෆෙයිගේ සේබර් තලය බිය උපදවන සුළගක් සහිතව පහර පිට පහර එල්ල කරනවිට, ලී ශෙන්ට තරමක බියක් දැනුනි. ඔහුගේ පෙර ද්වන්ධ සටනේදී ඔහු භාවිතා කළ එම පියවරම හදිසියේ ක්‍රියාත්මක කිරීමට නොහැකි වූ බව දැනගත් ඔහු පහරට මුහුණ දීමට උත්සාහ කළේය. එවිටම යමෙකු “නවත්වන්න!” යැයි කෑගැසීමත් සමගම, හදුනාගත නොහැකි යමක් ඔවුන් අතරට පියඹාවිත් වැටුණී.

චෝ ෆෙයි හිටිවනම නතර වූවාය.ඇය සේබර් තලයෙන් අසලට වැටුණු වස්තුව ඉහළට එසවූවාය. එය ආකර්ශණීය ලෙස පිළිහුඩුවන් යුවලක් එම්බ්‍රොයිඩර් කල ගැහැණු ළමයෙකුගේ පසුම්බියකි. ඔස්මන්තස් රසකැවිළි කිහපයක් චෝ ෆෙයි මල්ල ඔසවන විට බිම පතිත විය.

චෝ ෆෙයි ගෙන් පහර කෑ ලී ශෙන් ගේ හදවත මිනිත්තුවට සැතපුමක පමණ වේගයෙන් ගැහෙමින් තිබුණි. ලැජ්ජාවෙන් මුහුණ රතුකරගත් ඔහු සන්සුන් වීමට උත්සහ කලේය.චෝ ෆෙයිගේ සේබර් තලයේ එල්ලෙමින් තිබූ පසුම්බිය ඩැහැගත් ඔහු, එය අනවසරයෙන් ඇතුළු වූ පුද්ගලයා දෙසට විසිකළේය. “ඔයා මොකද මෙතන කරන්නේ?”

පීච් රෝස පැහැති ඇදුමකින් සැරසී සිටි කුඩා දැරියක් ඔවුන් අතරට දිව ආවා ය. "ඔය දෙන්නා රණ්ඩු වෙන එක නවත්තන්න!" තම කුඩා දෑත් හැකිතාක් පළල් කරමින් ඇය කෑගැසුවාය.

ඇය ලී ෂෙන් ගේ සහෝදරිය වූ ලී යාන් වූ අතර ඇය ඔහුට වඩා අවුරුදු දෙකක් බාල විය.කුඩා ඕව්ලාකාර හැඩැති මුහුණක් සහ දිදුලන ඇස් ඇති ඇය කුඩා සුන්දර දැරියක්‍ ය.පිටතින් පමණක් ආකර්ශණීය වූ ඇය නොසැලකිලිමත් හා බොළද වූවාය.

එකොළොස් හැවිරිදි කෙල්ලගේ ‘කඩල’ ඇටයක් තරම් මොළයේ තිබුණේ සිතිවිලි දෙකක් පමණි.ඒ “ ෆෙයි පවසන ඕනෑමදෙයක් සැමවිටම නිවැරදි ය” , “සටන් කලාව හැර ෆෙයි කැමති ඕනෑමදේකට මාත් කැමතියි” .

ලී ශෙන් ට හා චෝ ෆෙයි යන දෙදෙනාටම ලීයාන් සමග එතරම් කතාබහක් හෝ ඇය සමග සෙල්ලම් කිරීමට කාලයක් නොවීය. නමුත් ලී ජින් රොන් ඔවුන් දෙදෙනාටම නොසැලෙන ලෙස බැඳී සිටියාය. ඇය තම දිවියේ වැඩි කාළයක් ඔවුන් දෙදෙනා වෙනුවෙන් කැපකලාය.

චෝ ෆෙයි; “ පසෙකට යන්න”

කදුළු පිරි දෑසින් චෝ ෆෙයි ගේ මග අවහිර කරමින් ලී යාන් මෘදු හඩින් ආයාචනා කළාය. “ෆෙයි, අනේ මා වෙනුවෙන්, අයියණ්ඩි සමග සටන් කිරීම නතර කළ නොහැකි ද?”

“ඔබ වෙනුවෙන් කිසිම වටිනාකමක් නෑ මට! අහකට යන්න!” චෝ ෆෙයි කෝපයෙන් පැවසුවාය.

සහෝදරිය වෙත හැරුණු ලී ශෙන් ඇයට වචනයෙන් වචනය අවධාරණය කලාය. “ ලී යාන්, මෙය ඔබට අදාල දෙයක් නෙවෙයි”

ලී යාන් චෝ ෆෙයිගේ ඇදුම තදින් මිරිකාගෙන පසුපසට ඇද්දාය. “කරුණාකරලා නවත්තන්නකෝ...”

ඇගේ එම ඇලෙන සුළු හැසිරීමෙන් චෝ ෆෙයි ගේ කෝපය පුපුරා ගියේය. “පැත්තකට වෙනවා!”

ලී යාන් පසෙකට තල්ලු කල චෝ ෆෙයි ඇගේ ග්‍රහණයෙන් මිදුනාය. චෝ ෆෙයි ගේ අඩක් තරම්වත් උස් නොවූ , සටන් කලාවේද ඉතා දුර්වල ඇය විසිවී බිම වැටුනාය.එතනම වාඩි වූ ඇය මහ හඩින් විලාප දෙමින් හැඩුවාය.

ඇගේ මොරදීම , අවසානයේ චෝ ෆෙයි හා ලී ශෙන් දෙපසට කිරීමට සමත් විය.ඇහිබැම රැලි ගන්වමින් ලී ශෙන් තම කඩුව කොපුව තුල ලා ගත් අතර චෝ ෆෙයි ලී යාන්ට නැගීසිටුවීමට උත්සහ කලාය. “මම ඔබව හිතාමතාම තල්ලු කලේ නැහැ” චෝ ෆෙයිට මෙවරත් පරාජය බාරගැනීමට සිදුවිය. “හොදයි...හොදයි...මම වැරදියි, හරිද? දැන්වත් ඔතනින් නැගිටින්න”

ලී යාන් ඇගේ කුඩා හුරුබුහුටි දෑත් වලින් ඇගේ මුහුණ පිස දැමුවාය.චෝ ෆෙයි දිගුකල අතින් අල්ලාගැනීමට පෙර ඇය ඇලෙන සුළු යමක් ඇගේ දෑතේ ආලේප කලාය.චෝ ෆෙයි අත ගසා දැමුවාය. ලී යාන් සුසුමක් හෙළා චෝ ෆෙයි දෙස බැලුවාය. “නැන්දා ඔබට ගහයි කියලා බය හිතුන නිසා මම ගිහින් මාමට කිව්වා, ඒත් ඔබ මාව තල්ලු කලා මදිවට මම ඔබට උදව් කිරීමට උත්සහ කරනවිට එයටත් අකමැතියි.”

ලී ශෙන්ව මරා දැමීමට තරම් වූ චෝ ෆෙයිගේ මිණීමරු වෙර්‍ර් සහගත ආශාව ලී යාන්ගේ කදුළු වලින් නිවී ගියේය. ඇය අසලින් දණ ගසා ගත් චෝ ෆෙයි සිතුවේ ලී යාන් කමකට නැති අයෙක් නොවෙයි කියාය. ලී ජින්‍ රොන් වැනි කොටි දෙනක් පවා ලී යාන්ට සාන්තූවරියක් මෙන් කරුණාවන්ත වූවාය. ලීයාන් වැනි අය ගැටුම් ඇති වූ සෑම තැනකම මැදිහත් වීමට පිටත් කර හැරියහොත්, ලෝක සාමය පවා ලගාකර ගතහැකි බව ඇය හාස්‍යයෙන් සිතුවාය.

“ඇයි මටත් ටිකක් ඇය වගේ වෙන්න බැරි?” සිතට නැගුණු සැණින් චෝ ෆෙයි එම සිතිවිල්ල යටපත් කර ගත්තාය. ඇය ලී යාන් මෙන් එම්බ්‍රොයිඩර් කළ මල්ලක් දෑතින් ගෙන මිදුල මැද වාඩිවී මහහඩින් විලාප දී හැඩුවොත් ලී ජින්‍ රොන් මුගුරකින් ඇගේ හිසට පහරදෙනු ඇතැයි චෝ ෆෙයිට මැවී පෙණුනි.

ලී ශෙන් තවමත් ඔහුගේ හිරිවැටුණු මැණික් කටුව මෘදුව සම්බාහනය කරමින්, හැගීම් රහිත මුවින් පසෙකින් සිටගෙන බලා සිටියේය. පසුගිය ශීත ඍතුවේ වරක්,කඩු හරඹයේ ඉහළට යාමට දීර්ඝ නිශ්ඵල අරගලයක යෙදුණු ඔහු මනස නිරවුල් කරගැනීමට කන්ද වටා හුදකළාව ඇවිදයන විට, ලී ජින්‍ රොන් ද ඇගේ අසනීප සැමියා සමග ඇවිදීමට පැමිණ ඇතිබව දැක, ඔවුන්ට ආචාර කිරීමට සමීපයට යද්දී , රාත්‍රියේ නිහඩ බව නිසා ඔවුන්ගේ සංවාදයේ වචන කිහිපයක් ඔහුට ඇසුණි.

ලී ජින් රොන් කනස්සලු හඩින් චෝ යීටෑන් ඇමතුවාය.“මේ දරුවට ස්වභාවිකවම කුසලතා ලැබී නොතිබුනත්, ඔහුට පියවරෙන් පියවර ඉදිරියට යා හැකි නිසා එය එතරම් දෙයක් නොවෙයි නමුත් ඔහුගේ නොසැලකිලිමත් කමනිසා, ඔහුගේ අවධානය නිවැරදි දේවලින් වෙනතකට යොමුවිය හැකියි. ඒත් මම දන්නේ නෑ එයාට මේක කොහොම කියන්නද කියලා..."

ලී ජින් රොන්ට ප්‍රතිචාර වශයෙන් චෝ යීටෑන් යමක් පැවසුවද, එයට අවධා නය දීමට තරම් හොද මනෝභාවයක් ලී ශෙන් ට නොවීය. ඔහුගේ නැන්දණියගේ වදන් ඔහුගේ හදවතට අනුකම්පා විරහිතව ඇණුනු වානේ කටුවක් බදු විය.

ලී ජින් රොන්ග් ඔහුගේ නම නොකීවත් , ඒ තමා ගැනම බව ලී ශෙන් සහසුද්දයෙන්ම දැනගත්තේය.චෝ ෆෙයි සටන් කලාවන් පුහුණු වන අතරතුර ඇගේ අවධාණය වෙනතකට යොමුවූවා නම්, ලී ජි රොන් ඇයට එය පහදන්නේ කෙසේද යන්න ගැන කරදර වනවා වෙනුවට චෝ ෆෙයිට හොදටම පහර දෙනු ඇත.අනෙක් අතට ඒ, හැමවිටම නොසැළකිලිමත්, බොළද , සටන් කළාව ගැන කොහෙත්ම උනන්දුවක් නොවූ පුංචි ලී යාන් ගැන වීමද කොහෙත්ම විය නොහැක්කක් විය.එසේනම් ඇගේ ඒ වදන් ලී ශෙන්ග් ගැනම වන්නේය.කෙසේවෙතත් ලී ශෙන්ට දරාගැනීමට නොහැකි වුනේම,ඔහුගේ ස්වාභාවිකවම දක්ශතා නොමැතිකම පිළිබදව ලී ජින් රොන් ගේ තක්සේරුවයි.උපතින්ම ආශිර්වාද ලැබූ, සෑමවිටම ඇදහිය නොහැකි තරම් තරගකාරී හා දක්ශ , සෑමඅයෙකුගේම ප්‍රශංසාවට සුදුසු අද්විතීය අයෙකු ලෙස තමා ගැන සිතා සිටි ඔහුව, "විශිෂ්ට ස්වභාවික කුසලතාවන්ගෙන් ආශීර්වාද නොලබන" අයෙකු ලෙස හැදින්වීම ඔහු දරාගන්නේ කෙසේද?

ලී ජින් රොන්ගේ අවධානයට ලක් නොවී එදින රාත්‍රියේ එතනින් පිටව ආයේ කෙසේදැයි මතකයක් ඔහුට නොවීය.එතැන් සිට එම වචන ලී ශෙන් ට නොනවතින පීඩාවක් විය.

ලී ශෙන් ට පුදුම නොවී සිටීමට නොහැකි විය. “මම ස්වභාවිකවම දක්ශයෙකු නොවේ නම්, එවිට චෝ ෆෙයි ?”

පෙර නොවූ අමනාපයක් බදු හැගීමක් ඔහුට ඇතිවිය. චෝ ෆෙයි පරාජය කලයුතු යැයි ඔහුට හැගුණි. නමුත් ඔහු ඇයව ගැටුමකට පොළඹවා ගැනීමට කොතරම් උත්සාහ කළද , ඇය ඔහුව දැඩි ලෙස ප්‍රතික්ශේප කළාය. ඔවුන්ගේ දෛනික පුහුණුවීම් අතරතුර පවා ඇය ඇගේ සීමාව දැන සිටියාය. ඔහු හිතාමතාම ප්‍රතිපහර දීමට ඇයව පෙළඹවූවද, ඔහු දෙස විමසිල්ලෙන් බලා ඔහුව මගහැර ඇය පසුබැස ගියාය.චෝ ෆෙයි ගේ මෙම දඩබ්බර හැසිරීම නිසා ලී ශෙන් තුල වූ තරගකාරිත්වයේ හැගීම උමතුවක් බවට පත්විය.

එමනිසාම, ලී ශෙන් චෝ ෆෙයිව මේ වතාවේ හිතාමතාම කුපිත කර තිබුණි.

ලී යාන් ව එක් අතකින් අල්ලා ඉහලට ඇදගත් ලී ශෙන් ඇගේ ඇදුමේ දූවිලි නොසැලකිලිමත් ලෙස පිස දැමුවේය. මිත්‍රත්වයේ කුහක වෙස් මුහුණකින් හැගීම යටපත් කරගත් ඔහු චෝ ෆෙයි වෙත අර්ධ කෝපාව්ශ්ඨ සිනහවක් පෑවේය. “ දැන් ඔබ මා සමග අමනාපයෙන් සිටින්නේ මාමණ්ඩි ගෙන ඒමට මම උදව් නොකළ නිසාද? , මට එසේ කිරීමට අවශ්‍ය නොවුනා නෙවෙයි. නමුත් මේ වතාවේ ඔබේ නපුරුකම බොහෝ දුරදිග ගියා.සන් මහතා ඔබට උපදෙස් දුන්නේ ඔබේම යහපතට නොවේද? ඔහු ඇත්තටම නුසුදුසු දෙයක් කීවාද? ගැහැනු ළමයින් ඇත්ත වශයෙන්ම නිශ්ශබ්දව හොදින් හැසිරිය යුතුයි.දවස පුරාම කෑගසමින් සටන් කිරීමෙන් ඔබට ඇති ප්‍රයෝජනය කුමක්ද? ඔබ අනාගතයේ විවාහ වීමට සිටියත් හතලිස් අටේ බළකොටුවේ බිහිසුණු කීර්තිය නිසා කව්ද ඔබට හිරිහැර කිරීමට තරම් එඩිතර?

එක් ඇහිබැමක් ඉහලට එසවූ ඇය සීතල ලෙස සිනාසුණාය. “ ඇයි ඔබ ඔය අදහස ඔබේ නැන්දණීයට කියන්නෙ නැත්තෙ? ඇය ඔබේ ඔය ස්ත්‍රීත්වයට අනුව ලැජ්ජාශීලී, කෝමළ ගැහැනියක්ව දවස පුරාම කුටියට වෙලා එම්බ්‍රොයිඩර් වැඩ කරනවනම් කෙතරම් අපූරුද? මමත් අනුමත කරනවා ඒක.”

ලී ශෙන්ග් අමුතු සිනාවක් සමග චෝ ෆෙයිට පිලිතුරු දුන්නේය.“නැන්දණීයගේ අවසාන නම ‘ලී’ වුණූ නිසාත්, වෙනත් උරුමක්කරුවන් නොවූ නිසාත්, එකළ එල්ල වී තිබූ තර්ජනය නිසාත් ඇය හතලිස් අටේ බලකොටුවේ නායකත්වය දරනවා.ඒත් අපි කොහොමද මේ කරදර වලට චෝ මෙනෙවියව පටලන්නෙ නේද?”

චෝ ෆෙයි මදක් හැරී ලී ශෙන් දෙස කෙලින් බැලුවාය. “ හොදයි, මමත් අකමැතියි වගකීම් රහිත දුර්වල පරාජිතයෙක් මට කරදර කරනවට”

චෝ ෆෙයිගේ එම වදන් ලී ශෙන්ගේ ඇතුලාන්තයේ වේදනාකාරීම ස්තානයට පහර දුන්නේය. ඔහුට හැඟීම් පාලනය කර ගැනීමට නොහැකි වූ අතර, ඔහුගේ මුහුණ අදුරු විය. “ චෝ ෆෙයි , ඔබ පරාජිතයෙකු ලෙස හඳුන්වන්නේ කාවද?”

තව දුරටත් සටන් කිරීමට නොයා වාග් සංග්‍රාමයක යෙදීමට අපේක්ශා කල චෝ ෆෙයි ඇගේ සේබර් තලය උරහිසෙහි එල්ලා ගත්තාය. “ එසේ හැදින්වූයේ එය අදාල ඕනෑම අයෙකුට. ඒක බල්ලෙකු, ඌරෙකු,මීයෙකු වැනි සතෙකු අරඹයා වෙන්නත් පුළුවන්,”

ලී ශෙන් අත රැදි කඩුව දැඩිව මිටමොළවාගෙන මද වේලාවකින් අත ලිහිල් කර ආවේගය පාලනය කරගත්තේය. “ ඔබ හැමවිටම සර්ව සම්පූර්ණ කෙනෙක් කියලනෙ ඔබ සිතා සිටින්නෙ, ඇයි අපි හොදම කෙනා කව්ද කියලා බලන්නෙ නැත්තෙ?”

චෝ ෆෙයි ඔහු දෙස උපහාසාත්මකව හැරී බැලුවාය, “හොදයි! නමුත් මේ වෙලාවෙ මට එකග වෙන්න බැහැ, ඔබේ සහෝදරිය කේලම් කීවොත්, ලී නෝනා මාව පණපිටින් හමගහයි!”

“ඇය එසේ නොකරාවි!” ලී යාන් විරෝධය පෑමට මුව විවර කිරීමට පෙර ලී ශෙන් කඩිමුඩියේ පැවසුවේය. “මම ශිමෝ නදිය හරහා යනවා. මා සමග එන්න තරම් ඔබ එඩිතරයිද?”

“ ශිමෝ ගග තරණය කිරීම” හතලිස් අටේ බළකොටුවේ ගෝලයින් අතර ප්‍රසිද්ධ ප්‍රකාශයකි. එය “ මම ඔබව මරනවා" සහ "මම ඔබට යම් දවසක කෑම වේලකින් සංග්‍රහ කරන්නම්" වැනි ප්‍රකාශනයකි. කිසිවෙක් එය බැරෑරුම් ලෙස සැලකුවේ නැත.

මෙම ප්‍රකාශනය පිටුපස දිගු කතාවක් ඇත. වසර ගණනාවකට පෙර හතලිස් අටේ බළකොටුවේ අභ්‍යන්තර කැරැල්ලේදී, නිකායන් තුනක් එක්ව ලී ශෙන්ගේ පියා මරා දැමූ බැවින් බළකොටුවේ ආරක්ශාව හීන විය. පසුගිය වසර කිහිපය තුළ, දකුණේ සහ උතුරේ රාජවංශයන් අතර මතභේද ඇති වීම සහ විවිධ පාර්ශවයන් බලය සඳහා තරඟ කිරීම නිසා හතලිස් අටේ බළකොටුව අසංඛ්‍යාත සරණාගතයිට හා අපරාධකරුවන්ගේ රැකවරණය බවට පත් විය. එබැවින් බලකොටුවට අනවසරයෙන් ඇතුළුවීම වැළැක්වීම වඩාත් අත්‍යවශ්‍ය විය. ෂූ කදු , බොහෝ කදු හා පර්වත වලින් වටවූ අතර එම කදු අතර අසංඛ්‍යාත නීරීක්ශණ කුළුණු සගවා ඇත. කිසියම් අසාමාන්‍ය යමක් සිදු වූයේ නම්, ඒ පිළිබඳ පුවත වහාම හතලිස් අටේ බලකොටුවට ලැබෙනු ඇත. හතලිස් අටේ බලකොටුව  වෙත ඇතුළු වූයේ කවුරුන්ද, කුමක් කිරීමට සහ කොපමණ කාලයක් සඳහාද යන වාර්තා ඕනෑම අවස්තාවක පරික්ෂා කිරීමට සූදානමින් ඉතා සූක්ෂම ලෙස තබා ඇත.සෑම වැසියෙකුටම තම සම්පූර්ණ නම සදහන් ටෝකනයක් [1] තිබූ අතර වෙනත් පුද්ගලයෙකුගේ ටෝකනය භාවිතා කිරීම තහනම් විය. ආධුනික ගෝලයන්ට කන්දෙන් පිටවීමට ද ඉඩ නොලැබුණි. ආධුණිකත්වය අවසන් කිරීම තීරණය කල හැක්කේ ඔවුන්ගේ ෂිෆු (ගුරුතුමා) ට පමණි. එසේ ෂිෆු ගෙන් අවසර නොලැබූවන්ට පියඹා යෑමට හැකිවුනොත් මිස කන්දෙන් පිටව යාමට නොහැක.

මුළු හතලිස් අටේ බළකොටුවෙහිම මුර සංචාරය නොකළ එකම ස්ථානය (තීන්ත සේදුණු ගංගාව) ශිමෝ ගඟයි. හතලිස් අටේ බලකොටුවට ගිනිකොන දෙසින් පිහිටා ඇති පුළුල්, වේගයෙන් ගලා බසින ගංගාව ඉහළ නෙරාගිය ගල්පර දෙකක් අතරින් ගලා ගියේ ස්වභාවික අගාධයක් නිර්මාණය කරමිනි.

ගංගාවේ ජලය කොළ හෝ නිල් පැහැ නොවී කළු පැහැයෙන් දිස් විය.එම නිසාම පිළිබඳ දේශීය ජනප්‍රවාද රාශියක් ඇත. දුර සිට එදෙස බලන්නෙකුට එය එය ගල් පර්වත අතර ඇති දැවැන්ත කළු අගස්ති මැනිකක් මෙන් දිස්විය. මෙම ගල්පරවලින් අනවශ්‍ය පදුරු හා ශාක ඉවත්කරවා තිබූ නිසා , එය ගලා බසින ජලය පුරා විහිදුණු දැවැන්ත දර්පණ දෙකක් මෙන් විය. එතැනින් තරණය කල නොහැකි වූවා මෙන්ම එසේ කිරීමට උත්සාහ කරන ඕනෑම අයෙකු ක්ෂණයකින් දැක ගත හැකි විය.

අසමසම ච්‍යංගොන්[2] කුසලතා ඇති අයෙකුට වුවද, පහතින් ගලා බසින ජලය තරණය කිරීම සඳහා ප්‍රපාතයෙන් බැසීමට සමත් වුවද, ජ්‍යෙෂ්ඨ නිකායික නායකයෙක් සෑමවිටම ගඟේ හදවතේ බදු එම ස්ථානයේ ආරක්ෂාවට සිටියේය. චෝ ෆෙයි ඔහුගේ වයස කීයද, ඔහු කොහෙන්ද පැමිණියේ කියා දැන සිටියේ නැත. ඇය කුඩාකල සිටම ඔහු සිටිබව ඇයට මතකය. මිනිසුන් ඔහුව හැඳින්වූයේ ‘වැඩිහිටි යූ’ යනුවෙනි. ඔහු බොහෝ උගුල් වලට නායකත්වය දුන් හතලිස් අටේ බලකොටුවේ ආරක්ෂක වළල්ලෙහි පුරාවෘත්ත චරිතයක් විය.

චෝ ෆෙයිට සිහිපත් වූයේ ඇය කුඩා වියේදී හතලිස් අටේ බලකොටුවේ එතරම් තද පාලනයක් නොතිබූ බවයි.අවාසනාවන්ත මෝඩයන් කිහිප දෙනෙකු ගඟ තරණය කිරීමට මෝඩ උත්සහයක් ගෙන තිබුණි. ඊලග දවසේ වැඩිහිටි යූ විසින් ඔවුන් සෑම කෙනෙකුම උඩු යටිකුරු කර ගැටගසා තිබුණි.එහි පැමිණී ලී ජින්‍ රොන් එම ගෝලයන් පහළට ගන්නා ලෙස උපදෙස් දුන් අතර, නැවත ගඟෙන් එතෙර වීමට සමත් වන ඕනෑම කෙනෙකුගේ ආධුනිකත්වය එදායින්ම අවසන් කලහැකි බව හාස්‍යයෙන් පැවසුවාය.

ඇගේ එම වදන් පරම්පරාවෙන් පරම්පරාවට උද්යෝගිමත් තරුණ ගෝලයන් ගඟෙන් එතෙර වීමට උත්සාහ කිරීමට පෙලඹවූ, නමුත් ඔවුන් සෑම කෙනෙකුම පරාජය වී ආපසු පැමිණියහ.

ලී ශෙන්ගේ හාස්‍යජනක අභියෝගය හමුවේ චෝ ෆෙයි නළල රැලි කරගත්තේ ඔහු අනවශ්‍ය ලෙස කරදරයක් සොයනවා වැනි හැඟීමකිනි. ලී ශෙන්ග් චෝ ෆෙයිට කපටි බැල්මක් හෙලුවේය. “ඔබ බියයි නම් ඒක අමතක කරන්න. මම එහෙම කියනව ඔබට කවදාවත් ඇහුණෙ නෑ කියලා හිතාගන්න”

ප්‍රතිලෝම මනෝවිද්‍යාව සමහර විටකදී ඇත්තෙන්ම, ප්‍රතිලෝම මනෝවිද්‍යාව ක්‍රියා කරයි. තමන්ව කුපිත කරන බව දැන ගත්තත්, කෙනෙකුට කෝපයක් ඇතිවීම වළක්වා ගත නොහැකී. ඇත්ත වශයෙන්ම, සාමාන්‍යයෙන් එවැනි උපක්‍රමවලින් තමන් පීඩාවට පත් නොවන බව කෑ ගසා කියන්නන් වඩාත් කෝපයට පත් වූ අයයි. මධ්‍යම රාත්‍රියේ වැඩිහිටි යූට බාධා කිරීමට චෝ ෆෙයි ට කිසිදු උනන්දුවක් නොතිබූ අතර, ඇගේ තාර්කික මනස ඇයට පැවසුවේ ලී ශෙන් උමතුවෙන් බවයි. නමුත් ඇයට ඔහු කී ‘බය’යන්න ඉවතලිය නොහැකි විය.

නොදැනුවත්වම ගින්නට පිදුරු එක්කරමින් ලී යාන් හඩ අවදි කලාය. “ඔහුව නොසලකා හරින්න, ෆෙයි. කිසිම කෙනෙක් මධ්‍යම රාත්‍රියේ ශීමෝ ගගෙන් එගොඩ වෙලා නෑ. ලී ශෙන් ඔබට පිස්සුද?”

“මේ ලෝකය කොතරම් විශාලද? එහි සාගර කොතරම් විශාලද? මේ ලෝකය අසමසම ස්වාමිවරුන්ගෙන් පිරී තිබෙනවා. හතලිස් අටේ බලකොටුව වැනි කුඩා ස්ථානයක, වෙනත් කිසිවෙකු එය තරණය නොකළ පමණින්, එයින් අදහස් කරන්නේ මට එසේ කිරීමට නොහැකි බව ද? හොදයි එහෙනම්,මම පළමුවැන්නා වන්නම්!” ලී ෂෙන්ග් අහංකාර අහංකාර සිනහවක් නගමින් පැවසීය.

එබඳු නිර්භීත වචන පවසන සෑම අයෙක්ම නිසැකවම එසේ නොවේ. ඔවුන් පවසන දේ යථාර්ථයෙන් තරමක් දුරස්ය. ලී ෂෙන් සුළු වශයෙන්වත් අද්විතීය සටන්කරුවෙකු නොවීය. නමුත් මෙවැනි වදන් වලින් තමා විශිෂ්ඨයෙක් බව අන් අයට ඒත්තු ගැන්විය හැකිය.

ලී ශෙන්ග් තමාට සමච්චල් කරමින් හතලිස් අටේ බලකොටුවට එපිටින් ඇති ලෝකය පිලිබද පැවසීමෙන් චෝ ෆෙයිට නොසන්සුන් වීමට නොහැකි විය. “හොදයි, කවදාද?”

“මීළග රැයේ අටේ කාර්තුවට පෙර” චෝ ෆෙයිගේ ප්‍රකෝපකාරී ස්වරය නොසලකා හරිමින් ලී ශෙන් පැවසීය.

 “ඕහ්, පහළොස්වෙනිදා. විශිෂ්ඨ තේරීමක්නෙ. සද එදින දීප්තිමත් වේවි. ඔබ එහි කෑගැසුවොත් වැඩිහිටි යූට පැහැදිලිවම ඔබව පෙනේවි.”මද සිනාවක් නගමින් පැවසූ චෝ ෆෙයි ඇය යනවාද නැද්ද තහවුරු නොකර ඇගේ සේබර් තලයද එල්ලාගෙන පිටව ගියාය. ඇය යාමට පෙර ලී යාන්ගේ උරහිසට මිත්‍රශීලී මෘදු තට්ටුවක් දැම්මටද අමතක නොකලාය.

ලී ෂෙන්ගේ අවාසනාවට, පහළොස්වැනිදා වළාකුළු පිරි රාත්‍රියක් වීමට අහස තීරණය කර තිබුණි.

********

එය අඳුරු සහ සුළං සහිත රාත්‍රියකි.ශිඑ යුන් ගස් මුදුන්වල පත්‍ර අතර වකුටුවෙමින් සැගවී සිටියේය. ඔහුට අතේ දුරින්, කුරුල්ලෙකු සහ උගේ පැටවුන් ඔහුගේ කූඩුවේ හොඳින් නිදාගෙන සිටියේ ගසේ සිටි ආගන්තුකයා ගැන සම්පූර්ණයෙන්ම නොදැන ය.

හතලිස් අටේ බලකොටුවේ රාජකාරියේ නියුතු ආරක්ෂකයින් දෙදෙනෙකු පමණක් ඝන වනාන්තරය හරහා පැමිණියහ.හතලිස් අටේ බලකොටුවේ වැසියන් රුධිරයෙන් සම්බන්ධ නොවූවත්, නිසැකවම පැරණි මිතුරන් වූ අතර එකිනෙකා සමග යහපත් සම්බන්ධයකින් හා අවබෝධයකින් සිටියහ.යම් දුරක සිටියදී බැල්ම හුවමාරු කරගත් ඔවුන් එක් අයෙකු ප්‍රධාන කඳු පාර සෙවීමට යන අතර අනෙකා අතුරු මාර්ගය සොයන බව ක්ෂණීකව වටහා ගෙන දෙපසට ගියෝය.

වේගයෙන් හමා ගිය ආගන්තුක සුළගකින් අවදි වූ කුරුල්ලා,මුරකරුවන් දෙදෙනා ඈතට ගිය පසු, තම හිස පැත්තට හරවා, විමසිලිමත් ලෙස ශිඑ යුන් දෙස බැලුවේය. ශිඑ යුන්  පිළිමයක් මෙන් නිශ්චලව සිටියේය. අසල ඇති අමුතු දෙය ගසෙන් ම හටගත් එකක් බව තක්සේරු කළ කුරුල්ලා කෙළින්ම නැවත නින්දට ගියේය.

හදුන්කූරු නිවීයන කාලයකදී[3] මුරකරුවන් දෙදෙනා හදිසියේම වනාන්තරයෙන් පිටතට පැමිණ, ඔවුන් ආරම්භ කළ ස්ථානයේදී නැවත එක් වූහ. ඔවුන්ගේ පෙර සංචාරය හදිසි ආක්‍රමණිකයන් සිටියහොත් ඔවුන්ව පොළඹවා ගැනීමේ උත්සාහයක් වශයෙන් කල ව්‍යාජ එකකි.

වටපිට සොයාබැලීමෙන් කිසිවක් සොයාගත නොහැකි වූ විට බාල ආරක්ශකයා අනෙත් ආරක්ශකයා ඇමතුවේය. “අයියණ්ඩි සමහර විට අපි වැරදියට තේරුම් ගත්තා වෙන්න ඇති.”

වැඩිමහල්ලා පිලිතුරු දුන්නේය. “ සමහරවිට අපි ඒක එක් වරක් පමණක් දුටුවා නම් එය අහම්බයක් විය හැකී නමුත් මේක දිනපතා වෙන දෙයක්නෙ. අපි දෙන්නෙක් ඉන්නවා මෙතන , ඇස් හතරකට වරදින්න පුළුවන්ද? යමක් තිබිය යුතුමයි. කව්රුන් වුවත් මෙම පුද්ගලයා ච්‍යන්ගොංහි අතිශයින්ම දක්ෂ විය යුතුය. ඔහු පසුගිය දින කිහිපය පුරාවටම නැවත නැවතත් හතලිස් අටේ බලකොටුව වටා ගමන්කලා. ඔහු සැලසුම් කරන්නේ කුමක් දැයි අපි දන්නේ නැහැනෙ.කොහොම උනත් අපි මුලින්ම ආපහු ගිහින් ඉතුරු අයට කියන්න ඕනේ අද රෑ ඔහු ගැන සීරුවෙන් ඉන්න කියලා. ඔහු ඇත්තටම පැමිණියේ අපිට කරදර ඇති කිරීමට නම්, අපට ඔහුව අල්ලා ගැනීමට නොහැකි වුවත්, ඔහුට ඉතිරි අයෙගෙනුත් බේරෙන්න නොලැබේවි කියා මම හිතනවා. ඉදිරියෙන් මුරපොලවල් 108 ක් ඇති නිසා ගේ කුරුල්ලෙකුට පවා නොදැනුවත්වම පියාසර කිරීමට නොහැකි වේවි.”

ආරක්ශකයන් දෙදෙනා පිටව ගොස් තවත් පැයක් පමණ ගත වූ පසු, සඳ වලාකුළු වලින් වැසී අතුරුදහන් වූ පසු, අවසානයේ සිඑ යුන් ගේ බැල්ම වෙනස් විය. ඔහු සැණෙකින් ගසෙහි සිට පිහාටුවක් ලෙස බිම මතට පාවී ගියේය.

අවුරුදු විස්සක් පමණ වූ තරුණයාගේ දෑස් අවට සද එළිය උරාගත් නිසල විල් දෙකක් මෙන් නිස්කලංකව දීප්තියෙන් බැබළෙන්නට විය. මොහොතක් සිතන්නට ගසට හේත්තු වූ ඔහු තම පපුව දෙසට අත දිගු කර තම සිවුරෙන් හස්තයක ප්‍රමාණයේ ටෝකනයක් ඇද ගත්තේය. අධිරාජ්‍ය අධිකරණයේ ඕනෑම නිලධාරියෙක් එය දුටු විට කම්පනයට පත් වනු ඇත. "ස්වර්ගයේ පුත්‍රයා විසින්, ජාතිය සමෘද්ධිමත් වේවා"[4] අධිරාජ්‍යයාගේ අධිරාජ්‍ය ජේඩ් මුද්‍රාවේ එම වචන කොටා ඇත!

ශිඑ යුන් මෙම අමුතු ටෝකනය පිටතට ගෙන නොසැලකිලිමත් ලෙස ඉහල පහල විසි කළේය. මිනිසුන් දෙදෙනා තමාට මුණගැසෙනු ඇතැයි පැවසු 'ආරක්ෂක මුරපොලවල් 108' ගැන ඔහු අංශු මාත්‍රයක්වත් සැලකිලිමත් වූ බවක් නොපෙණුනි. ඔහු පිණී වලින් පිරුණු කොළයක් උදුරා, ඔහුගේ වියළි මුඛයට පිනි යොමු කිරීමට එය අඩකින් නැවීය. පසුව බර රහිතව ඔහුගේ පාද ගස් අතු අතර තබමින් ප්‍රතිවිරුද්ධ දිශාවට උඩ පැන පැන ගියේය. ඔහුගේ ගමන ඔහු පසුකර ගිය තැන් වල තිබූ අතු කොළ වල පිනි සොලවන්නට තරම්වත් ප්‍රමාණවත් නොවීය.

මෙය ‘සුළග සමග පාද තැබීම’ නම් වූ ජනප්‍රිය ච්‍යන්ගොං පියවරක් වූ අතර 'මල් සහ ගස් අතර වියමන' සහ 'හිම මත පාවෙන'[5] වැනි අතිශය දුෂ්කර පියවරවල් වලට සමානය. එවැනි තරුණයෙක් ඒ වන විටත් ච්‍යන්ගොංහි ප්‍රවීණයෙකු වීම ඇත්තටම විශ්වාස කල නොහැක්කකි.

පුදුමයට කරුණ නම්, ඔහු ප්‍රධාන කඳුකර මාර්ග හෝ අතුරු මාර්ග නොගත් අතර, ඒ වෙනුවට හතලිස් අටේ බලකොටුව වටා රවුමට ගමන්කිරීමට තෝරාගැනීමයි. ශිඑ යුන් හතලිස් අටේ බලකොටුවට පැමිණීයේ විශේෂිත පුද්ගලයෙකු බැලීමට සහ යමක් ඔහුට භාර දීමටය. හතලිස් අටේ බලකොටුවට ඇතුළු වීම අතිශය දුෂ්කර බව ඔහු දැන සිටියේය. ඔහු බලකොටුවට ඇතුල් වීමට අවසර ඉල්ලුවානම් ඔහුව ප්‍රතික්ශේප කිරීම පමණක් නොව බියකරු ගෝග්න් ( ග්‍රීක ප්‍රවාද වල එන බැල්මෙන් අන්‍යයන් ගල් බවට පත් කරන්නිය) ලී ජින්‍ රොන් ඔහුව කපා කොටා එළිමහන් ගින්නක් මත පුළුස්සනු ඇත. ඔහුට බලහත්කාරයෙන් ඇතුළුවීම ඊටත් වඩා කළ නොහැක්කකි. ද්‍රෝහී මැර සාඕ චොංකුන්ට පවා එසේ කිරීමට නොහැකි විය බලහත්කාරයෙන් ඇතුල්වීමට උත්සහ කර ඔහු මෙන් මැරයෙකු වීමට ශිඑ යුන් සිතුවේ නැත.

ඔහුට අසීමිත ඉවසීමක් තිබූ අතර සම්පූර්ණ මාස හයක් හතලිස් අටේ බලකොටුවෙන් පිටතට වී බලා සිටියේය. පළමු මාසය තුළ ඔහු සංචාරක වෙළෙන්දෙකු ලෙස පෙනී සිටියේය. එය බාහිර ලෝකයෙන් වෙන්ව පැවතියද, හතලිස් අටේ බලකොටුවට තවමත් බාහිර වෙළෙන්දන්ගෙන් යම් සැපයුම් මිලදී ගැනීමට සිදු විය. ශිඑ යුන් එම ස්ථානයේ භූගෝලීය පිහිටීම මෙන්ම ප්‍රදේශවාසීන්ගෙන් උකහාගත් සියලු ආකාරයේ ඕපාදූප වලින් ලී ජින් රොන් ප්‍රිය කළ ඩම්ප්ලිං වල රසය පවා හොඳින් දැන සිටියේය.

මාසයකට පසුත්, ඔහුට තවමත් බලකොටුවට ඇතුළු වීමට නොහැකි වුවද හතලිස් අටේ බලකොටුව වෙත භාණ්ඩ බෙදා හැරීමේ රැකියාවක් ලබා ගැනීමට ඔහු සමත් විය. ඔහුට ඔහුගේ භාණ්ඩ රැගෙනයාමට අවසර ලැබුණේ බලකොටුවේහි මායිමට පමණක් වන අතර, භාණ්ඩ ලබා ගැනීම සඳහා ඔවුන්ගේම අය ඔහුව මුණගැසීමට ආහ. නමුත් අවම වශයෙන්, මෙය ශිඑ යුන්හට හතලිස් අටේ බලකොටුවේහි ප්‍රධාන දොරටුව හඳුනා ගැනීමට අවස්ථාව ලබා වූ අතර, ඔහු එදිනම රාත්‍රියේ නැවත් පැමිණියේය. කෙසේ වෙතත්, ඔහු එහි ආරක්ෂාව අවතක්සේරු කර ඇති අතර, ඔහු පසුපස හඹා ආ අයවලුන් දුෂ්කරතාවයන්ට ඇද දැමීමෙන් පමණක් ඔහු බල්ලෙකු මෙන් දඩයම් කිරීමට පෙර ගැලවුනේය.

ඉන්පසු ඔහු නැවත අවධානය යොමුකර හතලිස් අටේ බලකොටුව වටා මාස තුනකට වඩා වැඩි කාලයක් රවුම් ගසමින් සහ අවට කඳුකරයේ ඇති හා ගුල් ගණන පවා ඔහු හොඳින් දන්නා තෙක් එහි මායිම් ප්‍රවේශමෙන් පරීක්ෂා කළේය. ඔහුගේ උත්සාහය අවසානයේ සාර්ථක වූයේ කඳුකරයේ එතරම් මුරපොලවල් නොමැති එකම කොටස වන ශිමෝ ගංගාව සොයා ගැනීමත් සමඟය.

'ප්‍රධාන පාර අසල වැවෙන පෙයාර්ස් ගෙඩිය කටුක බව නිසැකයි' [6]යන හිතෝපදේශය ශිඑ යුන් හොඳින් දැන සිටියේය. එහි වටපිටාව නිරීක්ෂණය කිරීමෙන් පමණක්, මෙම මහා ගංගාව තරණය කිරීමට තරම් දක්ෂ සටන්කරුවන් සැලකිය යුතු පිරිසක් තවමත් සිටින බව ඔහු විශ්වාස කළේය. ලී ජින් රොන් එය අනාරක්ෂිතව තැබීම ගැන එතරම් විශ්වාසයෙන් සිටියේ නම්, එහි යමක් තිබිය යුතුමයි.

ශිඑ යුන් දිනපතාම ගඟ අසල රවුම් ගසමින්, බලමින් සිටියේය,නමුත් ඔහු බැසීමට ඉක්මන් නොවීය.

ගඟ මැද කුඩා මණ්ඩපයක් විය. රාත්‍රියේ එතුල ආලෝකයක් දැල්වෙනු දැකිය හැකිවිය.එය ඇතුළත කවුරුන් හෝ සිටින බව අඟවයි. එහෙත් හාස්‍යජනක ලෙස අද රාත්‍රියේ මණ්ඩපය අඳුරු විය. ශිඑ යුන් තීරණය කළේය: අද තමයි රාත්‍රිය! එසේ තීරණය කල ඔහු කඳු මුදුනෙන් බැසීමට පටන් ගත්තේය.

සම්පූර්ණයෙන්ම කළු ඇඳුමින් සැරසී සිටි ශිඑ යුන් තීන්ත සේදීමේ ගංගා (ශිමෝගාංගා) වේ දිය පහර දෙස බැලීය. ඔහු තම වස්ත්‍රයේ ළය තුළ තිබී තඹ කාසියක් එළියට ගත්තේය.“හිස වැටුනොත් හැමදේම හොදින් සිදුවේවි , වලිගය වැටුනොත් එසේ නොවේවි” ශිඑ යුන් සිතුවේය.

ශිඑ යුන් කාසිය ඉහලට විසිකරන විටම, තමාට නුදුරින් ජලයට යම් බර වස්තුවක් වැටෙන ශබ්දයක් නිම්නය වටා ඝෝෂාකාරී ලෙස දෝංකාර දෙනු ඔහුට ඇසුණි. අවට පර්වතවල මුර සංචාරයේ යෙදී සිටි ආරක්ශකයින් වහා ප්‍රතිචාර වශයෙන් සිය පහන් දල්වා , ශිඑ යුන් ගේ අවධානය වෙනතකට යොමු කලේය. තද සුළගක් එම මොහොතේම හමා ගිය අතර කාසිය ඔහුට අත්හැරී ගියේය. කාසිය පහළ පොළව දෙසට වැටී ගල් දෙකක් අතර රැදුණී. එය සම්පූර්ණයෙන්ම අහිංසක බවින් හිස හෝ වලිගය නොවී ප්‍රකෝපකාරී ඉරියව්වක සිරවී තිබුණි. “මොන මගුලක්ද?”

_____________________

පරිවර්තන සටහන්

[1] ටෝකනය-යමෙකු හඳුනාගැනීම සඳහා සහ පිටවීම/ඇතුල්වීම පහසු කිරීම සඳහා භාවිතා කරන අයිතමයකි.පහත පින්තූරයේ මෙන්.

[2]ච්‍යන්ගොං - පාද පමණක් යොදාගෙන කිසිදු උපකාරයකින් තොරව විශාල උසකට යාමට හැකිවන සටන් කලා ශිල්පීය ක්‍රමයක්ය. සටන් කලා ප්‍රබන්ධවල ච්‍යන්ගොං භාවිතය අතිශයෝක්තියට නංවා ඇති අතර, සටන් කලාකරුවන්ට අධිමානුෂික වේගයකින් සහ සැහැල්ලුවකින් ගමන් කිරීමට හැකියාව ඇති අතර, ජල පෘෂ්ඨයන් මත ලිස්සා යාම, උස් බිත්ති හා ගස් මත ඉහළට දිවයාම වැනි ගුරුත්වාකර්ෂණ විරෝධී චලනයන් සිදු කල හැකි බව දක්වා ඇත.

[3] හදුන්කූරු නිවීයන කාලය - පුරාණ චීනයේ මිනිසුන් කාලය මැනීම සඳහා හඳුන්කූරු දැල්වීම භාවිතා කළහ.

[4] අධිරාජ්‍ය ටෝකනය - මෙයින් අදහස් කළේ පුරාණ චීනයේ  මෙම මුද්‍රාව අයිති තැනැත්තාට ජාතියට නායකත්වය දීමට ස්වර්ගයේ ආශීර්වාද ලබා ඇති බවයි. මෙය කැටයම් කර ඇති භාණ්ඩ සාමාන්‍යයෙන් අධිරාජ්‍යයාට පමණක් අයත් විය.

[5] 'මල් සහ ගස් අතර වියමන' සහ 'හිම මත පාවෙන'- මේවා වෙනත් මෙම ඝනයේම නවකතා වලින් ප්‍රකාශිත ජනප්‍රිය චලනයන් වේ.

[6] 'ප්‍රධාන පාර අසල වැවෙන පෙයාර්ස් ගෙඩිය කටුක බව නිසැකයි' - මෙය චීන හිතෝපදේශයක් වන අතර, එයින් අදහස් වන්නේ, පැහැදිලිව හා පහසු ලෙස පෙනුනත්, වෙනත් කිසිවකු විසින් එය නොගත් බැවින්, එය වඩාත් දුෂ්කර විය යුතු බවයි.

පෙර පරිච්ඡේදය | සියලු පරිච්ඡේද | මීළඟ පරිච්ඡේදය