තෙවන පරිච්ඡේදය | මාරාන්තික නූල් යන්ත්‍රය

 චෝ ෆෙයි හා ලී ෂෙන් යන දෙදෙනාම ශිමෝ නදිය දෙසට තනි තනිව ඇවිද ගියෝය.හතලිස් අටේ බලකොටුවේ හැදී වැඩුණු ඔවුන්ව මුර සංචාරයේ යෙදෙන මුරකරුවන් විසින් හඳුනාගැනීමෙන් බාධා නොවී සැලසුම් කරගත් දඩබ්බර ගමන යෑමට දෙදෙනාටම තමන්ගේම ක්‍රම තිබුණි. 

චෝ ෆෙයිට කිසි විටෙකත් ලී ෂෙන් සමග සහයෝගයෙන් සිටීමට නොහැකි මන්දැයි ඇයට තේරුම්ගත නොහැකි විය. ඒ ඇය ස්වභාවයෙන්ම හුදකලා අයෙකු නිසාද, නැත්නම් මිනිසුන්ට අකාරුණික වීම මවගෙන් උරුම වූ නිසාද කියා නිවැරදිව සිතාගැනීමට චෝ ෆෙයි අපොහොසත් වූවාය.ඇය ලී ශෙන් ගේ වයසේම පසුවූ අතර ඔවුන් හැදී වැඩුණේ හා ලී ජින්රොන් ගෙන් සටන් පුහුණුව ලැබුවේද එකටමය.එනිසා හෝ හොදම මිතුරන් නොවූවත් අවම වශයෙන් ළමාකල මිතුරන් ලෙස හෝ සැලකිය යුතුව තිබුනද , ඔවුන් දෙදෙනාම හැකි සෑමවිටම එකිනෙකා සමග සන්නිවේදනය ප්‍රතික්ශේප කලහ.

සිතුවිලි අතර අතරමංව සැරිසැරූ චෝ ෆෙයි ඇයට නොදැනීම ශිමෝ නදී ඉවුරට පැමිණ සිටියාය. හිසට ඉහලින් වලාකුළු රාත්‍රී සුළගේ පාවී යනවිට සඳ එළිය රන් කැබලි මෙන් ගංගා මතුපිට බැබළුණි.පහතින් ඇති ආගාධය, ඉහල සිට පහල බලන්නෙකුට කරකැවිල්ල ඇතිකරවීමට සමත්විය. 

චෝ ෆෙයි ට ඇය අසලින් ඇසුනු හඩින් හිස හරවා බැලූ ඇය දුටුවේ ලී ෂෙන් ඔහුගේ ඉනෙහි බැදි ගමන් මල්ලක් ලිහමින් පැමිණෙන අයුරුයි.පළමුව ඔ ඉන් ලණු දඟරයක් සහ යකඩ කොක්කක් පිටතට ඇදගත්තේය.ඔහුගේ මල්ලෙහි වූ අනෙක්දේවල් දුටු චෝ ෆෙයි මදක් වික්ෂිප්ත වූවාය."ඔබ ඇයි ඇදුම් ගෙනාවෙ?"

ලී ෂෙන් මදක් පසුබට ව මල්ල නැවත ගැට ගසා එල්ලා ගත්තේය. එහි තිබුණේ ඇඳුම් පමණක් නොව, එහි මුදල් වගයක්, බෙහෙත් ද්‍රව්‍ය සහ පිටු කිහිපයක් නැති වූ තැලී ගිය ගමන් සටහනක් ද තිබී ඇත. ලී ශෙන් ගඟ තරණය කිරීමට අදහස් කළේ හුදෙක් කම්මැලිකම නිසා නොවන බවත්, ඔහු හතලිස් අටේ බලකොටුව හැර යාමට අදහස් කළ නිසාත්, දිගු කලක් තිස්සේ මෙය සැලසුම් කර ඇති බවත් චෝ ෆෙයි ක්ෂණිකව තේරුම් ගත්තාය.

"ඔබට මෙහෙන් යන්න ඕනෙද ? " චෝ ෆෙයි මදක් විශ්මයෙන් ඇසුවාය.

චෝ ෆෙයි නිතරම සිතුවේ ලී තරුණයා හතලිස් අටේ බලකොටුවේ හි සිටි 'දීප්තිමත්ම තරුණයා' බවයි. උතුරේ ද්‍රෝහී අධිරාජ්‍යයාගේ උපක්‍රමවලින් හතලිස් අටේ බලකොටුව හි පෙර නායකයා මරා දැමූ විට, බලකොටුව මෙහෙයවීමේ භාරදූර වගකීම භාර ගැනීමට ලී ජින්රොන්ට සිදු වූයේ වයස අවුරුදු 17 දී ය. වෘකයන්ගෙන් වට වුනු සහ  හතලිස් අටේ බලකොටුවේ හි විවිධ නිකායන්හි වැඩිහිටියන් අතර ඇති වූ ආරවුල් වලින් පීඩා විඳිමට ඇයට සිදු විය. කාලයාගේ ඇවෑමෙන්, මෙය ඇයව අනුකම්පා විරහිත හා තීරණාත්මක නායිකාවක් බවට පත් කල අතර, ඇගේ කෝපය සමඟින් ඇය සමඟ කටයුතු කිරීම වඩාත් දුෂ්කර විය. හතලිස් අටේ බලකොටුවේ හි බොහෝ වැඩිහිටියන්ට ඇය ඉදිරියේ වෙව්ලීම වළක්වා ගත නොහැකි විය. යමෙක් ලී ජින්රොන්ව උඩු යටිකුරු කර ඇයව වියළි මිදි මෙන් මිරිකුවහොත් , කරුණාවේ සහ ඉවසීමේ බිංදු දෙකක් වත් මිරිකා ගත හැකිදැයි සැක සහිතය. ඒවාද එකක් ඇගේ ස්වාමිපුරුෂයා වන චෝ යිටැංටද, අනෙක ඇගේ තරුණ බෑණා සහ ලේලියටද වනු ඇත.

ඔහුගේ දෙමාපියන් නිසාම, ලී ෂෙන් ට දැනටමත් හතලිස් අටේ බලකොටුවෙ හි විශේෂ තත්වයක් තිබුණි. ඔහු අන් අය සමඟ සුහදව කටයුතු කළ අතර ඔහු යන සෑම තැනකම ඔහු වටේ රැස්වීමට පිරිසක් සිටියේය. ඔහු දුගඳ හමන පත්තෑවෙකු බවට හැරුනත්, ඔහුගේ 180 ක් පමණ වූ පාද පවා 

ලෙවකෑමට කැමති ගැත්තන්ට  ප්‍රමාණවත් නොවනු ඇතැයි චෝ ෆෙයි සිතුවාය. එසේනම් රාත්‍රියේ පලා යාමට ඔහු දැඩි ලෙස අධිෂ්ඨාන කරගෙන සිටින්නේ ඇයි? 

ලී ෂෙන්ග් තත්පරයක් නිහඬව සිට, "ම්ම්ම්ම්" ලෙස පිළිතුරු දුන්නේය.

චෝ ෆෙයි තරමක් උපහාසාත්මක ලෙස කතා කලාය, "පුදුමයක්, මම වගේ අනවශ්‍ය ළමයෙක් පවා ගෙදරින් පැනලා යන්න හිතුවේ නැහැ."

"මම ඔයාට වඩා වෙනස්." ලී ෂෙන්ග්ට තවදුරටත් තමාව විස්තර කිරීමට අවශ්‍ය නොවීය. වඩාත් හුදකලා ස්ථානයක් සොයා ගත් ඔහු, කඳු බෑවුමෙන් බැසීමට පෙර, කඹය තමා වටා තද කර ගත්තේය. කඹයේ කෙළවර ඉක්මනින් නොපෙනී ගිය අතර ඔහු අතුරුදහන් විය.

ලි ශෙන් සම්බන්ධයෙන් ගත් කල, චෝ ෆෙයි, ලී ජින්රොන් ගේම දරුවා විය. ඇයට ලැබුණු ඕනෑම පහරදීමක් සහ බැණවැදීමක් මවක් තම දරුවාට දෙන ඒවා විය. ලී ජින්රොන්, චෝ ෆෙයිට සැලකුවේ ඇය කප්පාදු කිරීමට අවශ්‍ය තරුණ පඳුරකට මෙනි.අනාගතයේ දී ඇය දර්ශනීය ගසක් බවට පත්වනු ඇතැයි අපේක්ෂාවෙන් වැරදි අතු කපා දැමීමට ඇය පසුබට නොවනු ඇත. නමුත් ඇය ලී ෂෙන් දෙස බැලුවේ කෙසේද?

සුවිසල් ලෝකයේ කඳු වලින් වට වූ මේ කුඩා කොනක සිරවී සිටින බවක් ලී ශෙන්ට දැනුනි. මෙහි සිටින සියලු දෙනාම ඔහුව ගෞරවාන්විතව හැඳින්වූයේ 'ලී තරුණ ස්වාමියා' ලෙසින් වන අතර ඇතැම් වැඩිහිටියන් ඔහු “ පියාගේම අඩිපාරේ යනු ඇතැයි ” ද අපේක්ෂා කලහ.ඔහුගේ මුළු ජීවිතයම අකල් වියෝවකට ලක් වූ නැසීගිය හිටපු නායක ලී ස්වාමියා නමින් හඳුන්වයි. ඔහු අන් අයගේ රැකවරණය සඳහා ඉතිරි වූ බරක් වූ අතර, ස්වභාවික දක්ෂතාවයෙන් ආශීර්වාද නොලත් 'බරක්' විය.

"විශිෂ්ට ස්වභාවික කුසලතාවන්ගෙන් ආශීර්වාද නොලැබෙන, නමුත් ඔහුට පියවරෙන් පියවර ඉදිරියට යා හැකි බැවින් එය එතරම් විශාල දෙයක් නොවේ." එම වදන් මුදු මොළොක් ලෙස ඇසුනද, එය සිතා බලන්න, හතලිස් අටේ බලකොටුවේ හි නායක ලී ජින්රොන් කවදා හෝ කිසිවෙකුට යහපත් වී තිබේද? ඇය ඒ දේවල් පැහැදිලිවම කියා තිබුණේ ඔහු ගැන ලොකු බලාපොරොත්තු තියාගෙන නැති නිසාමයි. ලී ෂෙන් ගේ හකු අධිෂ්ඨානයෙන් තද විය. ඔහුගේ මැණික් කටුවෙහි යකඩ කොක්ක තද කර ගනිමින්, ඔහු කිසිවක් නොබලා පර්වතයේ පහළට පැන්නේය.

චෝ ෆෙයි සුසුමක් හෙලන පමාවෙන් ලී ශෙන් පර්වතයෙන් අඩක් පහලට බැස හමාරය.

අවාසනාවකට මෙන්, ලී ශෙන් ආපසු හැරීමක් නොමැති විට තේරුම් ගත්තේ ඔවුන් සියල්ලන්ම මෙම භයානක කඳු බෑවුම අවතක්සේරු කර ඇති බවයි. මන්ද මෙහි ඇති පර්වතය අයිස් මෙන් ලිස්සන තෙක් වැලි දමා ඇති අතර, කෙනෙකුට අල්ලා ගැනීමට එක ගල් කැබැල්ලක් හෝ නොතිබුණි. ලී ෂෙන්ග්ගේ මුළු සිරුරම කඳු මුදුනේ වැදී, ඔහුගේ ඉණෙහි තිබූ කඩුව පිටතට වැටී, ඝෝෂාකාරී ලෝහමය ගැටෙන හඩක් නැගුණි. මෙම හදිසි කලබලය තරුණ යුවල බියට පත් කළේය.ඔවුන්ගෙන් එක් අයෙක් කඳු මුදුනේ සිට පහළ බලමින් සිටි අතර අනෙකා අවිනිශ්චිත ලෙස අහසේ එල්ලී සිටියහ.

කඳු බෑවුම දිගේ ආලෝක පන්දම් වහාම දැල්වීය. ලී ශෙන්  ආරක්ෂිත බව තහවුරු කොට ගෙන, චෝ ෆෙයි සැඟවීමට විශාල ගලක් පිටුපසට පැනගත්තාය. ඇගේ සිහින් සිරුර නිසා ඇයට සැඟවීමට පහසු විය.

ඔවුන් තෝරා ගත් තරමක් හුදෙකලා ස්ථානය නිසා වාසනාවකට එතැන හඳුනා ගැනීමට ආරක්ෂකයින් අසමත් විය. ටික වේලාවක් ගත වූ විට, චෝ ෆෙයි ඇගේ සැඟවුණු ස්ථානයෙන් පිටතට පැමිණියාය. බිම බලන විට ලී ෂෙන්ග් මීටර් සියයකට ආසන්න ප්‍රමාණයක් බැස ඇති බවත්, වෙව්ලන කොළයක් මෙන් සුළඟේ එහා මෙහා වන බවත් ඇය දුටුවාය.

ඇය ටිකක් ඉවසීමෙන් පර්වතය මත සිටගෙන, තමාට පහළින් ඇති ගංගාව දෙස බලා සිටියාය. හදිසියේම ඇයට,  හතලිස් අටේ බලකොටුව ට ඔබ්බෙන් වූ මහා විශාල ලෝකය දැකීමේ නව ආශාවක් ඇති විය.

කාලෙන් කාලෙට බලකොටුවට සරණ පතා එන මිනිසුන් බොහෝ විට පිටත ලෝකයේ කතන්දර විස්තර කළහ.  හදවත නතර කරන කතා, ඛේදජනක කතා, හැඟීම්බර සහ ව්‍යාකූලත්වයෙන් පිරුණු කතා, සහ අනෙක් ඒවා සම්පූර්ණයෙන්ම හද කම්පා කරවන සුළුය. එවා චෝ ෆෙයි පුදුමයට පත් කළේය. පිටත ලෝකය කෙබඳුද?

 චෝ ෆෙයි හිටගෙන ලී ෂෙන් ගේ ලණුව අතට ගත්තාය. කඹයේ අනෙක් කෙළවරේ කිසිදු ආතතියක් දැනෙන්නේ නැත, ඇය රෙදි පටියකින් තම දිගු කොණ්ඩය පිළිවෙලට ගැට ගසා, අතේ ඇති ලණුව දෑතින්ම අල්ලාගෙන කඳු බෑවුමට පැන්නාය.

ලී ෂෙන් ගේ වැරදි වලින් ඉගෙන ගත් චෝ ෆෙයි ලිස්සන සුළු කඳු මුහුණත අල්ලා ගැනීමට උත්සාහ කළේ නැත. ලී ෂෙන් ට වඩා සැහැල්ලු, ඇය සුළඟේ සර්පිලාකාර බට දණ්ඩක් මෙන් ප්‍රායෝගිකව කඹය දිගේ ලිස්සා ගියාය. ඇය අඩකටත් වඩා පහත් වූ විට, ඇගේ කන් ගලා යන ජලයේ ඝෝෂාවෙන් පිරී ගිය අතර, ඇය ගග අද්දර සිටි ලී ෂෙන් ව දුටුවාය. ඔහු එක් පුද්ගලයෙකුට පමණක් ප්‍රමාණවත් තරම් විශාල වූ පර්වතයක් මත නැගී දැඩි සමාධියෙන් තමා ඉදිරියෙන් ගලා යන ජලය දෙස බලමින් සිටියේය.

චෝ ෆෙයි ගඟ අසලට එල්ලෙන තුරුම කඹය පහත් කළාය. ගඟ දෙස බලමින් ඇය කල්පනා කළාය. "මට පිහිනීමට සිදුවේද? "

*****************

මේ දෙදෙනා නිවසින් පැන යාමට සැලසුම් කරන විට, ලී ජින්රොන් හතලිස් අටේ බලකොටුවේ මුතුන් මිත්තන්ගේ ශාලාවට වේගයෙන් ඇවිද යමින් සිටියාය.

දෑතින් සුවඳ දුම් දාහකයක් අල්ලාගෙන සිටි සුදු හිසකෙස් ඇති මහලු මිනිසෙක් , "ගෞරවනීය ලී ෆෙයි ලින්ගේ මතකය" යනුවෙන් ලියා ඇති පාරම්පරික පුවරුවක් ඉදිරිපිට සිටගෙන සිටියේය. ලී ජින්රොන් දණ නවා මහලු මිනිසාට ගෞරව දැක්වූවාය. "ශිෂු.[1]"

වයෝවෘද්ධ මිනිසා කෝපයෙන් නෙත් යොමා ඇයට නැගිටින ලෙස සංඥා කළේ ඔහුට යම් අපහසුවක් ඇති වූවාක් මෙනි. ඔහු ඝෝෂාකාරී ලෙස පාරම්පරික ශාලාවේ තිබූ භාණ්ඩ සකස් කර , මේසය මත වැටී තිබූ හඳුන්කූරු අළු අතුගාන්නට විය.

ලී ජින්රොන් ගේ ඇස්වල කොන වෙව්ලන්නට වූ අතර, ඇය ඉක්මනින් ඔහු ඉදිරියට ගියාය. "කරුණාකර මට එය කිරීමට ඉඩ දෙන්න."

“ෂූ, ෂූ,” මහලු මිනිසා ඇයව ඉවතට තල්ලු කළේය. "ඔයාලා කැමතියි දේවල් අවුල් කරන්න.මගේ ගමනට බාධා කරන්න එපා."

මහලු මිනිසා සතුටින් කුටිය තුල කඩිමුඩියේ ඉහළට සහ පහළට යන ආකාරය දෙස නිශ්චලව බලා සිටීම හැර වෙනත් විකල්පයක් ලී ජින්රෝන්ට නොතිබුණි.  මුතුන් මිත්තන්ගේ පුවරු හරියටම සමාන දුරක් ඇති වන තෙක් ඔහු ඒවා නැවත නැවත සකස් කළේය.

"මම හොඳින්, ටික වේලාවකට ගොඩබිමට ආවට මාව මැරෙන්නෙ නැහැ," ඔහු පැවසීය. “අද මාර්තු 15 නේද? මම හිතුවා ඔයාගේ තාත්තාව බලන්න එන්න ඕන කියලා."

මෙම මහල්ලා ශිමෝ ගඟේ ආරක්ෂකයා වූ වැඩිහිටි යූ ය.

 “මට පේනවා මෙතන කටයුතු ඔරලෝසු වගේ නිවැරදිවම කෙරෙනවා, හැමෝම තමන්ගේ වැඩ අකුරටම කරනවා. ඔබ පැහැදිලිවම හොඳ කාර්යයක් කරලා තියෙනවා. ” යූ වැඩිහිටියා සැහැල්ලුවෙන් පැවසුවේය.

ලී ජින්රොන්ග් ;  “ඔබට කටකතා ඇසුණාද?”

යූ වැඩිහිටියා නවවැනි වතාවටත් පාරම්පරික ශාලාවේ සෑම දෙයක්ම නැවත සකස් කළේය.සියල්ල ගැන ඔහු තෘප්තියට පත් වූ විට අවසානයේ ඔහු සැනසුම් සුසුමක් හෙළා ලී ජින්රොන්ට සිනහවක් පෑවේය.“ඇයි මම කටකතාවලට ඇහුම්කන් දෙන්නේ, මොකද කටකතා සැබෑවට වෙන දේවල්ද? "

ලී ජින්රෝන් ඇගේ කටහඬ පහත් කළාය "කටකතා සියල්ලම පවසන්නේ ශාඕ චොංකුන් මාරාන්තික ලෙස රෝගාතුරව සිටින බවත්, වැඩි කලක් රැඳී නොසිටින බවත්ය."

"ඒක නේද ඔයාට ඕන?" වැඩිහිටි යූ විමසුවේය, “මට තවමත් මතකයි ඔබ වසර ගණනාවකට පෙර උතුරු අගනුවරට එරෙහිව සටනට නායකත්වය දුන් අයුරු. අධිරාජ්‍ය ආරක්ෂකයින් 3,000 කට ඔබව නැවැත්විය නොහැකි වුනා.ඔහුගේ එම බල්ලන් හත්දෙනා නොවන්නට ඔබට මැර ශාඕ චොංකුන් මරා දැමීමට පාහේ තිබුණා.ඒසේනම් ඔහු මේ වන විටත් ඉබාගාතේ යන අවතාරයක්. දැන් ඔහු මේ තත්වයට වැටී සිටින විටත් ඔබ කලබල වන්නේ ඇයි? ”

ලී ජින්රොන් සිනාසුනාය, “කාලය වෙනස් වෙලා.මේ වගේ කටකතාවක් දැනටමත් හතලිස් අටේ බලකොටුවෙ කැළඹීමක් ඇති කරන්න සමත්වෙලා.මේ කතාවෙ යම් නොගැලපීමක් තියෙනවා.මට පුදුමයි..."

"ප්‍රශ්නයක් ද? " වැඩිහිටි යූ අතරමැදින් කතාව නැවතූ ලී ජින්රොන් ගෙන් විමසුවේය.

ඇයගේ ප්‍රතිචාරය එය තහවුරු කිරීමක් හෝ ප්‍රතික්ෂේප කිරීමක් නොවීය."සමහරවිට මම වයසට ගිහින් ඇති", ඇය සිනාසෙමින් පැවසුවාය.

මහලු විය පිළිබඳ එවැනි කතා ඇසීමට වැඩිහිටි යූ කැමති වූයේ නැත. උඩු රැවුල පවා අතෘප්තියෙන් රැලි ගන්වමින් ඔහු මහ හඬින් ඝෝෂා කළේය. නමුත් ඔහු ප්‍රතිචාරය දැක්වීමට පෙර, මුර සංචාරයේ යෙදී සිටි එක් ගෝලයෙක් “ලී මෙනෙවිය” කියා හඬගසනවා ඔවුන්ට ඇසුණා.

ලි ජින්රොන් ක්ෂණයෙන් හැරී බැලුවාය.

ලී යාන් දුටු ඇය මදක් පුදුමයට පත් වුණාය. "ලී යාන් , 

කුමක්ද සිදුවූයේ? "

'රාත්‍රියේදී ශිමෝ ගඟ තරණය කිරීමට' ලී ෂෙන් ගෙනා අභියෝගය හුදෙක් හිස් ප්‍රලාපයක් නොවන බව ලී යාන් මුලදී සිතුවාය. චො ෆෙයි නිසි ප්‍රතිචාරයක් නොදැක්වූ නිසා, ඇය ඒ ගැන කිසිවක් නොසිතා සිටියාය.

කෙසේ වෙතත්, පසළොස්වන දින රාත්‍රියේ පමණක්, තම සහෝදරයා සහ තම ඥාති සහෝදරිය අතර ඇති නොතේරෙන අමුත්ත ඇයට වැටහුණි. තම සහෝදරයා ඔහුගේ දේවල් අසුරමින් සිටිනු දුටු විට, අවසානයේ ඇයට වැටහුනේ ඔහුට ගඟ තරණය කිරීමට අවශ්‍ය වූවා පමණක් නොව, ඔහු හතලිස් අටේ බලකොටුව හැරයාමට සැලසුම් කර ඇති බවයි. 

ලි යාන් සැලසුම කඩාකප්පල් කිරීමට හැකි වදකාරියක් බව දැනුණු ලී ශෙන් රහසින් ඔවුන්ව නිරීක්ෂණය කරමින් සිටි ඇයව අල්ලාගෙන, පූර්වාරක්ෂාවක් ලෙස ඇයව ඇගේ කාමරයේම තදින් බැඳ තැබුවේය. පසුදා උදෑසන ඇය පෙනීසිටීමට අපොහොසත් වූ විට, මිනිසුන් ඇය සොයා එහි පැමිණීමට වැඩි වේලාවක් ගත නොවනු ඇත. නමුත් ලී ෂෙන් ඇගේ සහෝදරයා විය. ඇය අරගල කළහොත් ඇගේ සම ඝන කඹයෙන් තුවාල වෙනු ඇතැයි සිතූ ඔහු පළමුව සිහින් සහ සිනිඳු නූලක් භාවිතා කර ඇයව ගැට ගසා ඇත. 

නමුත් ඔහු ලී යාන්ගේ නොපසුබට උත්සාහය සහ තරුණ ගැහැණු ළමයෙකුගේ නම්යශීලීභාවය අවතක්සේරු කර තිබුණි. 

ඇගේ පිළිකුල්සහගත සහෝදරයා පිටව ගිය පසු, ලි යාන් කෙසේ හෝ අවසානයේ ඇඳ කණුවලට බැඳ තිබූ ඝන කඹයෙන් මිදීමට සමත් විය.ඇයට සිහින් නූලෙන් මිදීමට නොහැකි වූ අතර, ලී ෂෙන් ඇගේ මුඛයට පිරවූ මුඛවාඩම නිසා කෑගැසීමට ද නොහැකි විය. උත්සාහය අත් නොහරිමින් ඇය බිම දිගා වී පෙරළුණාය. මුර සංචාරයේ යෙදී සිටි ගෝලයෙක් සිතුවේ තමාට වල් ඌරෙකු හමු වූ බවයි.කඩුව කොපුවෙන් මුදා වල් ඌරාට පහරදීමට සැරසුණු  විට , ඔහුගේ පාමුල පෙරළීම නැවැත්වූ 'වල්ඌරා' රතු ඇඳුමකින් සැරසී සිටින බව දුටු ඔහු ඇයව නිදහස් කිරීමට ඉක්මන් විය.

ලී ජින්රොන් දුටු විට, කැළඹුණු දැරිය මුළු රාත්‍රිය පුරාවටම අල්ලාගෙන සිටි දේ හඬ නඟා කීමට පෙර ගැඹුරු හුස්මක් ගත්තාය: “ඒ පිස්සා ලී ෂෙන්, ෆෙයිව ඔහුත් එක්ක ශිමෝ ගඟට ඇදගෙන ගියා! එයා ගෙදරින් පැනලා යනවා කියලා මම නැන්දණියට කියනවා කිව්වාම එයා මාව බැඳලා දැම්මා!"

ලී ජින් රොන් අන්ද මන්ද විය: "මොකක්ද?"

 “නැන්දා, වැඩිහිටි යූ ඇත්තටම අවුරුදු දහසක් වයසැති විශාල කැතම කැත මත්ස්‍ය ආත්මයක් කියලයි මිනිසුන් කියන්නේ...ඔහු ඔවුන්ව අල්ලා ගත්තොත්, ඔහුන්ව ගිලදමාවි ද? "

ඇයට සවන්දීගෙන සිටි වැඩිහිටි යූ ට කැස්සක් පිටවිය.

කාමරයේ වෙනත් අයෙකු සිටින බව වටහාගත් ලී යාන් මිටි මහලු මිනිසා දෙස හැරී බැලුවාය. “මට දැනගන්න පුළුවන් ද ඔබ කව්ද කියලා?" මදක් ලැජ්ජාශීලී වූ නමුත් ආචාරශීලීව ඇය විමසුවාය.

මඳ සිනහවකින් මහලු මිනිසා පිළිතුරු දුන්නේය “ලොකුම ලොකු කැතම කැත මත්ස්‍ය ආත්මයක්” 

ලී යාන්: "..."

හිතුවක්කාරයින් දෙදෙනාගේ විගඩම් හමුවේ කෝපයෙන් ඇගේ පපුව පිච්චෙනවා සේ ලී ජින්රොන්ට දැනුනි. වැඩිහිටි යූ බැරෑරුම් ලෙස ඇයව ඇමතුවේය. “ජින්රොන්, මේ  තරහා ගන්න වෙලාවක් නොවේ.දරුවන් ආපසු ගෙන්වාගන්න ඉක්මනින් කවුරුන් හෝ යවන්න. අද රෑ ගඟේ කවුරුවත් මුර කරන්නේ නැහැ. 'යන්ත්‍රය' ක්‍රියාත්මකයි."

එයත් සමග ලී ජින්රොන් ගේ භාව ප්‍රකාශනය වෙනස් විය. ඇය වේගයෙන් හැරී පිටව ගියාය.

*************

සුළඟ මෙන් නිශ්ශබ්ද,සැහැල්ලු, ගලා යන ජලය මෙන් සිනිඳු චින්ගොං විශේෂයක් පවතින බව කියනු ලැබේ. කිසිදු හෝඩුවාවක් ඉතිරි නොකර, එයට ගමන් කළ නොහැකි ස්ථානයක් නොමැත. අවාසනාවකට මෙන්, මෙම අසමසම කුසලතාව ඇති පුද්ගලයා අද රාත්‍රියේ සොරෙකු විය. අන්ධකාරයේ වැසී ගිය, ඔහුගේ විචිත්‍රවත් චිංගොං සංදර්ශනය අගය කිරීමට කිසිවෙක් නොසිටිනු ඇත.

දිගු කඹයකින් හෝ යකඩ කොක්කකින් සන්නද්ධව සිටි ශිඑ යුන් සුමට ප්‍රපාතය දිගේ ඒකාකාර වේගයකින් ලිස්සා ගියේය. ඔහු දිගටම පහළට ගමන් කිරීම සඳහා ඔහුගේ ඉරියව්ව සකස් කර ගැනීමට පෙර, ඔහුගේ බැසීම කඩාකප්පල් කිරීමට ප්‍රපාත මුහුණතේ ඇති කුඩා ගැටිත්ත පවා ප්‍රමාණවත් විය. ඔහුගේ අඳුරු ඇඳුම් සම්පූර්ණයෙන්ම අඳුරු කඳු මුහුණතට මුසු විය.

ශිඑ යුන් ඔහුගේම හැකියාවන් ගැන අතිශයින්ම නිහතමානී විය. ඔහුගේ චින්ගොං එතරම් උත්කෘෂ්ට නැතැයි ඔහුගේ හැඟීම විය.ඒ ඔහුට තවමත් වලාකුළු, මීදුම් මත දිවයාවට නොහැකි නිසාය.[2] අඩුම තරමින් ඔහුට ගංගා මතුපිටට පා තබන විට පවා අයිස් සහිත සීතල සුළඟේ ඔහුගේ කකුල හිරිවැටෙන බවක් ඔහුට දැනුනි.

ඔහුගේ වාසනාවට ගඟට ආසන්න ප්‍රදේශය පර්වත මුහුණතේ ඉහත තරම් හිස් නොවීය. ශිඑ යුන් නියමිත වේලාවට ඉදිරියට නෙරා ගිය පර්වතයක් අල්ලා ගැනීමට සමත් විය, අත් සහ පාද දෙකෙන්ම ජීවිතයට ආදරයෙන් ඔහු එයට ඇලී සිටියේය.එය ඔහුව පහලට වැටීමෙන් බේරා ගත්තේය.

ශිඑ යුන් ගඟට ඉහලින් පිහිටි කුඩා බැම්මක් මෙන් වූ පර්වතය මතට නැගගෙන, සිනහමුසු මුහුණින් තම හිර වූ මාංශ පේශී ලිහිල් කිරීමට උත්සාහ කළේය. එක්වරම, ගං මතුපිටින් හඬක් ඇසුණු අතර, ඔහු ශබ්දය ඇසුණු දෙසට හිස හරවා බැලුවේය.ඔහු පුදුමයට පත් කරමින්, ගඟෙන් එගොඩ සිට පුද්ගලයන් දෙදෙනෙකු අවට විපරම් කරමින් සිටියහ!

ඔහු වෙව්ලන්නට විය. ගඟේ භාරකරු ආපසු පැමිණ තිබේද?

එම ශබ්දයට හේතුව අන් කිසිවෙක් නොව චෝ ෆෙයි ය. සුලු මොහොතක් කඹයේ එල්ලී සිටි ඇයට ජලයේ යමක් අමුතු බව පෙනුනි. ඇය තම ඇඳුම තුලින් බෝධි බීජයක් ගෙන වතුරට විසි කළාය. බීජය ජලයට වැටී ශබ්දයක් ඇති කළේය. චෝ ෆෙයි ගේ දෑස් දීප්තිමත් විය. ඇය නිවැරදියි.නිසැකවම ජලයට යටින් යමක් තිබිය යුතුමයි.

ලී ෂෙන් ගේ ඇහිබැම අවිනිශ්චිතතාවයකින් රැලි ගැසුණි.  ඔහු දෙසට බැල්මක් හෙළූ චෝ ෆෙයි කඹය අත හැර ඇය බීජය දැමූ ජලය මතට පැන්නාය. ලී ෂෙන් මුලදී තිගැස්සී ගිය නමුත් පසුව ඇය ජලය මතුපිට දැඩිව 'සිටගෙන' සිටින බව තේරුම් ගත්තාය.

චෝ ෆෙයි පියවර කිහිපයක් සඳහා ජලය මතුපිට සැහැල්ලුවෙන් ගොස්, සුළු මොහොතකින් ගඟ මැදට ළඟා වූවාය.

ගඟෙන් එතෙර ඉවුරේ එල්ලී සිටි ශිඑ යුන් සමීපයට එන රූපය දෙස හොඳින් බැලීමට ඔහුගේ දෑස් අඩවන් කර ගත්තේය. ඒ තරුණ ගැහැණු ළමයෙකු පමණක්ම බව ඔහු ප්‍රතික්ෂේප කළේය. ඔවුන් දෙදෙනා මධ්‍යම රාත්‍රියේ හොර රහසේ අනර්ථයක් කිරීමට යන හතලිස් අටේ බලකොටුවේ තරුණ ගෝලයන් විය හැක.

හතලිස් අටේ බලකොටුවේ කුහුඹුවෙකුවත් අවදි කිරීමට අවශ්‍ය නොවූ ශිඑ යුන් පර්වතය මත සැපපහසු 

වෙන් වාඩි වී , හැකි ඉක්මනින් මෙම පාදඩයන් දෙදෙනාට පහර දෙන තෙක් බලා සිටියේය.

තරුණ ගැහැණු ළමයා පුදුම සහගත ලෙස කඩිසර වූ අතර,ඇය වක්  අසිපතක් දෑතේ රදවාගෙන සිටියාය. දුර සිට, ඇය උස හා සිහින් විය. ඇගේ හිසකෙස් කෙළවර මීදුමෙහි සෙලවෙමින් තිබූ අතර ශිඑ යුන් කෙතරම් හොදින් එබී බැලුවත් සිහින් බෙල්ල සහ උල් වූ නිකට හැර ඇගේ මුහුණේ ඉරියව් දැකීමට නොහැකි විය.

ටික වේලාවක් බලා සිටි ශිඑ යුන් තීරණය කළේ ඇය ජල ශාක ආත්මයක් බවයි.[3]

ඔහු මෙලෙස නිගමන වලට එළඹෙන විට, චෝ ෆෙයි ගඟ මැද යමක් සොයා ගත්තාය.ගංගා ජල මතුපිටට යටින් ඇති යෝධ වස්තුව මුහුදු රකුසෙක් මෙන් අඳුරු ජලයේ නිහඬව සැඟවී සිටි සංකීර්ණ ගල් වැටියකි. මීදුමෙන් වැසී ගිය මණ්ඩපයක් ගඟ මධ්‍යයේ, මෙම මුහුදු රකුසෙක් වැනි පාශාන වැටියේ හිස මුදුනේ පිහිටා තිබුණි.

වේගයෙන් ගලා යන ජලය හරහා, යටින් ඇති මුහුදු රකුසා නොසන්සුන් ලෙස චලනය වන බවක් චෝ ෆෙයිට දැණුනි.

චෝ ෆෙයිගේ ගේ කොඳු ඇට පෙළ දිගේ ඉහලට හිරිවැටීමක් දිව ගියේය.ඇය ඉක්මනින්ම හිස හරවා ලී ශෙන්ට කෑගැසුවාය.  "මොකක්හරි අවුලක් තියෙනවා ,ඉක්මනට ආපහු හැරෙන්න!"

ජනප්‍රවාදගත වැඩිහිටි යූ කොතැනකවත් නොපෙනී සිටීමත්, ජලය යට සැඟවී ඇති එවැනි අසාමාන්‍ය වස්තුවක් සොයා ගැනීමත් සමඟ, ඒ වන විටත් ලී ෂෙන්ග් තුළ නොසන්සුන්තාවයක් ඇති වීමට පටන් ගෙන තිබූ නමුත්  , ඔහු ඉක්මන් පසුබැසීමකට සූදානම්ව නොසිටියේය. කෙසේ වෙතත්, චෝ ෆෙයි ගේ අනතුරු ඇඟවීම ඔහුගේ ඉදිරියට යාමට ඇති ආශාවට ප්‍රතිවිරුද්ධ බලපෑමක් එල්ල කලේය. 

ලී ශෙන් ට ඒ මොහොතේම ඔහුගේ ලොමු ඩැහැ ගන්වමින් මෘදු ලෝහමය කෙඳිරිල්ලක් ඔහුට පිටුපසින් ඇසුණි. ඔහුගේ කිනිස්සන් යුගලයෙන් එකක් කලින් ගඟට වැටුණු නිසා ඔහු වෙත එන ඕනෑම දෙයක් අවහිර කිරීමට ඔහුගේ තනි කිනිස්සට සිදුවිය.

මහ හඬක් නගමින් පැමිණි එය ඔහුගේ කිනිස්සේ ගැටුණේය.ගැටුමේ බලය නිසා ඔහුගේ අතින් කිනිස්ස ගිලිහී ඔහු වතුරට ඇද වැටුණේය. ඔහුගේ පිටුපසින් රෙදි ඉරී යන හඬක් ඇසුණි .ඔහුගේ ගමන් මල්ල හරි අඩකට බෙදී, එහි තිබූ සියල්ල වතුරට විසිරී තිබුණි.

කම්මැලි ලෙස දර්ශනය නරඹමින් සිටි ශිඑ යුන් ගැස්සී ගියේය. ඔහු ගඟ තරණය කිරීමට නරකම කාලය තෝරාගෙන ඇති බව ඔහුට වැටහුණි. එහි භාරකරු නොසිටි වෙලේ එසේ කිරීමට සිතීම ඇති භයානකම කාලයයි. භාරකරු නැතිවීමත් සමඟ ජලයේ සිටි ම්ලේච්ඡ මෘගයා නිදහස් කර ඇත!

"ඒ මොකද්ද?" ලී ෂෙන් ඇසුවේ වෙව්ලමිනි.

වැඩිහිටි යූ විසින් දකීවි යැයි නොතැකූ චෝ ෆෙයි ඇගේ ඇඳුම් අතරින් පන්දමක් ඉවතට ගෙන එය දැල්වීය. ගිනිදැල් ඇගේ වටපිටාව ආලෝකවත් කරන විටම ඇසුණූ සියුම් සඩ දෙසට ඇය තම අසිපත දිගු කළාය. ඇයගේ වක් අසිපතෙහි ගැටී ඉතා සියුම් 'නූලක්' නැවතී තිබුණේ ඇයගෙන් අඟල් කිහිපයක් ඔබ්බෙනි. මෙම ‘සියුම් නූලෙහි’ කෙළවර දෙක මීදුමෙන් වැසී තිබූ නිසා එය කුමකින් සම්බන්ධ වී ඇත්දැයි ඇයට කිව නොහැකි විය. නමුත් එය සිරුරේ ගැටුනොත් කැපී යා හැකි බව නම් ඇයට වැටහුණි.

අතිවිශාල බලවේගයක් මගින් 'සියුම් නූල' ඉදිරියට තල්ලු කරමින් සිටි අතර, චෝ ෆෙයි නහර ඉලිප්පුන දෑත් සහිතව ඇගේ අසිපතෙන් එය ඇයගෙන් ඈත් කිරීමට උත්සාහ දැරුවාය.ගතවී තිබුණේ සුළු මොහොතකි, එහෙත් බලවේගයෙන් තමාව වට්ටන්නට ආසන්න බව ඇයට ඒ වන විටත් දැනෙන්නට විය. නූලට එරෙහිව ස්ථාවර වීමට ඇගේ වක් අසිපත භාවිතා කරමින්, ඇය එක්වරම නූල අත්හැර වාතයට පැන්නාය. අවසානයේ ඇගේ තලයෙන් නිදහස් වූ මාරාන්තික නූල ඇය පසුකර ගොස් මීදුම තුළ නොපෙනී ගියේය.

ශිඑ යුන් ගේ භාව ප්‍රකාශය බරපතල වූ අතර ඔහු මිමිණුවේය"ඔවුන් භාවිතා කරන්නේ මාරාන්තික නූල් සහිත යන්ත්‍රයක්!"

ශිඑ යුන්ට ඔහුගේ දැනුමේ ප්‍රමාණය පෙන්වීමට වැඩි කාලයක් ලබා නොදුන් ගඟේ සිටි රකුසා වේගයෙන් ලෝහමය කෙඳිරිලි මාලාවක් නිකුත් කළේ ගඟේ සිටි තරුණ දෙදෙනා සර්කස් ක්‍රියාවක් කරනවාක් මෙන් ඉහළට සහ පහළට පැනීමට ඔවුන්ට බල කරමිනි. කෙසේ වෙතත්, ඔවුන් පසුබැසීමට ද ප්‍රමාද වැඩිය. ඔවුන්ගේ පාදවලට යටින් ඇති ගල් මාරු වීමට පටන් ගෙන ඇත!

මෙම ජලජ රකුසා නොදැනුවත්ව අමුත්තන් දෙදෙනෙකු විසින් අවදි කරන ලද දැවැන්ත රූකඩයක් බඳු විය. පිහියක් වැනි තියුණු නූල්, ඉහළින් , පහළින් සහ ජලයෙන් ගමන් කරමින් ඉහළට හා පහළට නටන්නට විය.චෝ ෆෙයි  ඔවුන්ට පිටුපසින් ඇති මාර්ගය දෙසට තම පන්දම එල්ල කලාය.බැබළෙන ගිනිදැල් ආලෝකයෙන් ඔවුන් ඉදිරියේ ඇති මාර්ගය දිලිසෙන නූල් තට්ටුවකින් වැසී ඇති බව දුටු ඇය භීතියට පත්වූවාය. ඔවුන්ට ආරක්ෂිතව ආපසු යා හැකි මාර්ගය මුද්‍රා තබා තිබූ අතර, ඔවුන් දෙදෙනා මකුළු දැලක සිර වූ අවාසනාවන්ත මකුණන් දෙදෙනෙකි මෙන් විය.

"වතුර යටට යන්න!" ලී ෂෙන් කෑගැසුවේය. 

කඳුකරයේ ඇළ දොළ බහුලව තිබූ නිසා හතලිස් අටේ බලකොටුවේ හැදී වැඩුණු ළමයින් පිහිනීමට දැන සිටියහ. නිරායුධව, වමට සහ දකුණට යමින් නූල් තමාව සූරාගෙන යන නිසා තමා ඉතාම කණගාටුදායක දසුනක් බව ලී ශෙන් දැන සිටියද, ඔහුට ගරුත්වය නැතිකර ගැනීමටද අවශ්‍ය නොවීය. ඔහුගේ පළමු ප්‍රතිචාරය වූයේ ජලය හරහා පැන යාමයි. ඔහු එසේ කිරීමට පෙර, "වතුරට පනින්න එපා" යැයි ප්‍රතිවිරුද්ධ ගල්තලාවෙන් නාඳුනන්නෙකු කෑ ගැසීය.

ගඟේ සිටි දෙදෙනා බියෙන් තුශ්නිම්භූතවූහ.චෝ ෆෙයි ඇගේ හිස කෙලින් ආ නූලක් වළක්වා ගත්තද ඒ වෙනුවට ඇගේ කොණ්ඩය ගැඹුරට කැපී ගියේය."කවුද ඔතන ඉන්නේ!" ඇය බියෙන් කෑගැසුවාය.

සොරාට රහසේම හතලිස් අටේ බලකොටුවට යාමට අවශ්‍ය වූ නමුත් මෙම තරුණ යුවල තමා ඉදිරිපිටම මිය යන අයුරු ඔහුට බලා සිටිය නොහැකි විය."ස්වර්ගය ඇත්තටම මගේ පැත්තේ නොවේ, එය කර්මයක් විය යුතුය. මොනවා උනත් මම අහු උනොත් එහෙමයි.නැතොත් එහෙමයි" තමාවම ධෛර්යමත් කරගනිමින් ශිඑ යුන් සිතුවේය.

ශිඑ යුන් අත්ලෙන් සංඥා දැල්ලක් ගෙන එය අහසට විසි කළේය. දැඩිලෙස දීප්තිමත්ව එය පිපිරී නොගිය නමුත්,එය ආරක්ෂක භටයන්ගේ අවධානය ආකර්ෂණය කර ගැනීමට ප්‍රමාණවත් තරම්ය.සංඥා දැල්ලේ  පිපිරීම චෝ ෆෙයිට සහ ලී ෂෙන් හට පහත ඇති දේ පිළිබඳ පැහැදිලි දර්ශනයක් ලබා දුන්නේය. එම දැවැන්ත පාෂාණ අතර, ඉතා සියුම් නූල් දස දහස් ගණනක් සංකීර්ණ ලෙස සම්බන්ධ වී, ජලයට යටින් මාරාන්තික සහ නිහඬ දැලක් සාදා ඇත. එම දැල ගඟට බැසීමට එඩිතර වන ඕනෑම කෙනෙකු ක්ෂනිකව ඇඹරුණු මස් බවට පත් කරනු ඇත.

ලී ෂෙන් ගේ අත් පා දැඩි විය. ඔහුගේ මුළු සිරුරම සිසිල් කරන ලද අයිස් කුට්ටියක් මෙන් කැටි වී තිබුණි.“පොඩි කොල්ලො, මම ඔයා නම් ඉක්මනින් ඔතනින් යනවා. ඔබ දැනටමත් සිටගෙන සිටින්නේ එහි එක් ප්‍රධාන ලීවරයක් මතයි" සෙලවීමට නොහැකිව, වෙව්ලමින් සිටි ලී ශෙන් ට නාදුනන කටහඬ උපදෙස් දුන්නේය. 

ශිඑ යුන් ඔහුගේ වාක්‍යය අවසන් කරන විටම, ලී ශෙන් ට දැනුණේ ඔහුගේ පාදවලට යටින් ඇති ගල තමාව ජලයේ ගිල්වීමට සැරසෙන බවයි. ඔහු දෙවරක් නොසිතා චෝ ෆෙයි දෙසට පැන්නේ, ආගන්තුකයා "පරිස්සමින්!" කියා කීමටත් පෙරය.

දියෙන් මතුවුණු සියුම් නූලක් නිරායුධව සිටි ලී ශෙන් දෙකඩ කිරීමට ඔහු වෙතට පැන්නේය.ලී ෂෙන් බියෙන් හැකිලී ගියේය. නූල ඔහුව ස්පර්ශ කිරීමට මොහොතකට පෙර, එය හදිසියේම මැද ගුවනේ නතර විය. ලී ෂෙන් ආරක්ෂිතව අසල තිබූ ගලක් මතට බැස්සේය.

නතර වූ ඔහුගේ හදවත අවසානයේ නැවතත් දුවන්න පටන් ගත්තේය. හිස හරවා බැලූ ඔහු දුටුවේ, අසිපතෙන් නූල දැඩිව පිටුපසට තල්ලු කිරීමට වෙරදරන චෝ ෆෙයි වය.

ශිඑ යුන් කඳු බෑවුමෙන් ඉවතට පැන, සුළඟක් මෙන් පාවී ගොස් ගග මධ්‍යයට ගොඩ බැස්සේය. “ජල ශාක ආත්මය…ආහ්, මම කිව්වේ, පුංචි දුව, දැන් ඒකට යන්න දෙන්න! ඒ දේ මනුෂ්‍ය ශක්තියෙන් වළක්වන්න බැහැ!”

ඔහුගේ උපදෙස් නොමැතිව වුවද, කෙසේ හෝ තවදුරටත් නූල අල්ලාගෙන සිටීමට චෝ ෆෙයිට අපහසු විය. ඒ වන විටත් ඇගේ දෑත්වල සම පැලෙන්නට ආසන්න බව ඇයට දැනෙන්නට විය. චෝ ෆෙයි පියවර කිහිපයක් පසුපසට ගොස් සම්පූර්ණයෙන්ම වාගේ පසුපසට නැමෙමින් ඇගේ කඩුව ඉවත් කර ගත්තාය. ඇයට මීටර් කිහිපයක් දුරින් ගොඩ බැස්ස සම්පූර්ණයෙන්ම කළු ඇදුමින් සැරසුන අමුත්තා , ඔවුන් වටා ඇති නූල් ආලෝකමත්ව පැහැදිලිව දැකීමට දීප්තිමත් ගලක් [4] අල්ලා ගත්තේය.

“නූල් අල්ලන්න එපා,” මිනිසා මෘදු ලෙස කීවේය. "මාව අනුගමනය කරන්න."

පරිවර්තන සටහන්

[1] කෙනෙකුගේ සහෝදරයා සඳහා භාවිතා කරන යෙදුමකි.

[2] 腾云驾雾 – චීන පුරාවෘත්තවල, වලාකුළු මත නැගී ගමන් කිරීමට දෙවිවරුන්ට හැකියාව ඇත.

[3] චීන ජනප්‍රවාදයේ, සියලුම වෘක්ෂලතා සහ සත්ත්ව විශේෂවලට ආත්මයන් ඇති බව කියනු ලබන අතර, වසර ගණනාවක් පුරා ධ්‍යානවේදය හැදෑරීමෙන් පසු මේවාට මිනිස් ස්වරූපයක් ගත හැකිය.

[4] 夜明珠 - පුරාණ චීනයේ දී, දීප්තිමත් පාෂාණ සමහර විට ආලෝකකරණය සඳහා භාවිතා කරන ලදී. ඉතා දීප්තිමත් නොවූවත්, මේවා පන්දම් හෝ ගින්නක් අවශ්‍ය වෙනත් දේවලට වඩා පහසු විය. සාමාන්යයෙන් ඒවා තරමක් දුර්ලභ හා මිල අධික විය.