සිව්වන පරිච්ඡේදය | ගෞරවනීය මිනිසුන්

 

කළු හැඳගත් මිනිසා සහ තරුණිය වහාම සටනට එළඹුනහ.පසෙකට වී ඔවුන්ගේ හැකියාවන් දෙස බලා සිටි චෞ ෂීශු සිතුවේ,ඔවුන් දෙදෙනාගේ චලනයන් එක හා සමාන නොවුනත් අනුකම්පා විරහිත භාවයෙන් නම් නියත වශයෙන්ම දෙදනාම එකම මට්ටමක සිටින බවයි.ඔවුන් කිසිසේත්ම ධර්මිෂ්ඨ,භක්තිවන්ත අය ලෙස පෙනුනේ නැත.

චලනයන් දාහතරකට, පහළොවකට පමණ පසු, මිනිසා හදිසියේම ඇගේ ෂැන්සොං ලක්ෂ්‍යයට(1) පයින් ගසමින් ආපසු පැකිලී ගියේය.පිටුපසට නැඹුරු වී මුවින් මෘදු හඩක් නැගූ ඇය, වහාම සතුරාගේ දණහිස ඉළක්ක කොටගෙන පහරදීමට සැරසුනාය.

එහෙත් ඇය මිනිසාගේ කලිසමෙහි සැඟවුනු යමකින් නැගුණු ඝෝෂාවක් අපේක්ෂා නොකළ අතර ඉන් එක්වරම ඇගේ නිකට ඉලක්ක කොටගනිමින් ඊතලයක් ඉදිරියට පැන්නේය.

ඇයද අඩකින් අසාර නොවුනාය,ඒ මොහොතේ සටනෙහි වැඩිවාසි සහිත පැත්තක් ඇති නමුත්, මෙම නීච ක්‍රියාව කිසිසේත්ම ඇයට අනාවැකි කිවහැක්කක් නොවීය.භීතියක් දැනුනත් මෙම ලක්ශය මග හැරීමද නිෂ්ඵල විය. චෞ ෂීශු අත තිබූ ගල් කැටය අවසානයේ ප්‍රයෝජනවත් විය.ඔහු එය කෙලින්ම එන ඊතලය දෙසට ක්ශනිකව දමාගැසුවේ එහි ගමන් මග හරවා යවමිනි.යන්තමින් තරුණියගේ නළල කෙළවර සූරාදමමින් ඊතලය ඇදීගියේය.

අනතුරක් අත්විඳීමෙන් පසු,සාමාන්‍ය පුද්ගලයෙකුට බියක් දැනෙනු ඇත.නමුත් ඇය එසේ නොවුනාය.සිදුවුණු ලැජ්ජාව ඇගේ කෝපය අවුස්සන්නක් විය.ඇය කිසිදු පැකිළීමකින් තොරව සතුරා වෙත කඩාපැන,පහුරුගාමින් ඔහුගේ පාද අස්ථිය අනෙක් පසට ඇඹරුවාය.

කකුල කැඩුණු මිනිසා වේදනාවෙන් කෑගැසුවත් ඔහුගේ ප්‍රහාරකයා එතැනින් නතර වූයේ නැත.ඇගේ දෑතෙහි දැල්වුණු නිල් පැහැ ආලෝකයෙන්,කෲර ලෙස මිනිසාගේ පපුවට ගැසූ ඇය ඔහුව පිටුපසට තල්ලු කර දමා ඔහුගේ කකුල් දෙකම කුඩු කර දැමුවාය.වහාම අළු පැහැයට හැරුණු මුහුණින් යුතුව ඔහු පුළුල් ඇස් ඇති ඇය දෙසට ඇගිල්ල දිගුකළේය."නුඹ දම් ... දම් පැහැ..."

ඔහු කියා අවසන් කිරීමට පෙර මිය ගියේය.

මේ රූමත් එහෙත් කුරිරු තරුණිය නිසා මහලු කාන්තාවට මරණ බිය දැනෙන්නට විය.සරල මනසක් ඇති පිරිමි ළමයා ඊට හාත්පසින්ම වෙනස්ව, ධීවරයා වෙත කඩිමුඩියේ දිවයමින් ඔහුව ඇමතුවේය.“ලී මාමා, ඔබට කොහොමද? ඔබට…"

මහල්ලා තුළ තවමත් හුස්ම ඉතිරිව තිබිණ.ඔහුගේ මුළු ශක්තියෙන්ම ඔහු පිරිමි ළමයාගේ අත් අල්ලා ගත්තේය.බාලයා ඔහුව වැළඳගෙන ඔහුට නැගී සිටීමට උදව් කිරීමට උත්සාහ කළේය. දම් පාටින් සැරසුණු යුවතිය,ඔවුන් අසලට පැමිණ මහලු මිනිසාගේ ඇසිපිය ඉහළට ඔසවා බලා, නළල රැලි ගන්වා ගත්තාය.“මේ තුන් ගෙන්ග්(2) මරණ විෂ.ඔහුව බේරගන්න බැහැ දැන්...මට කණගාටුයි!”

ඇගේ ඍ ජු හා නොසැලකිලිමත් ප්‍රකාශයෙන් කෝප වුණු පිරිමි ළමයා ඇගේ දෑත් ඉවතට තල්ලු කරමින් ඇයට කෑගැසුවේය, “විකාර කියන එක නවත්වන්න!”

මිනීමරු චේතනාව ඇගේ සිනහ මුසු ප්‍රකාශය මත නැවත මතු විය.නමුත් හදිසියේම යමක් මතක් වූ ආකාරයෙන් ඇය එය යටපත් කර ගත්තාය. “ මේ බලු පැටියට හොද,නරක වෙන්කරලා තේරුම්ගන්නවත් බැහැ”, දෑත් පපුව ඉදිරිපිට හරස් කොට ගත් ඇය උපහාසයෙන් යුතුව පැවසීය.

ඇය දෙස සුළු මොහොතක් බලාසිටි ධීවරයාගේ දෑස්, සියල්ලන්ම ගැන විමසිලිමත් වෙමින් අවසානයේ චෞ ෂීශු දෙසට හැරී නතර වූයේය.පිළිමයේ පාමුල සිටගෙන සිටි චො ෂීශුගේ, හිසෙහි ඇලුණු පිදුරු කැබලිත් සමග ඔහුට තිබුනේ තමාටම සිනහ උපදවන දසුනක් විය.මහලු මිනිසා ඔහු දෙසට හැරුනේ යමක් පැවසීමටය.

සියල්ලන්ගේම බැල්ම මහල්ලා හඹාගියේය.තරුණිය සිනාසුනාය, "ආහ්! මගේ ගැලවුම්කාරයා කව්ද කියල මම කල්පනා කලා, ඒ ඔබ බව නම් විශ්වාස කළ නොහැකියි! මම ඔබට වයින් මිලදී ගත්තා, ඔබ මට සටන් කිරීමට උදව් කළා; ඉතින් අපි සමානයි දැන්!"

ඇය පැවසුවේ එම කරුණු දෙක කවදා හෝ සමාන විය හැකි ලෙසිනි, නමුත් චෞ ෂීශු ලස්සන ගැහැණු ළමයෙකු සමඟ තර්ක කිරීමට තරම් ළාමක නොවනු ඇත.ඔහු සිනාසෙමින්, මහලු මිනිසා වෙත ගොස්, ඔහු අසලින් වාඩිවූයේය., "නාකි හාදයා! ඔබ මටද කතා කරන්නේ?"

"මම... මම ඔබේ රිදී ආපසු දෙන්නම්,” ධීවරයා පවසන්නට විය. “ ඔබේ බෝට්ටු සවාරිය නොමිලේ, ඔබ උදව් කළ යුතුයි... මට උදව් කරන්න..."

චෞ ෂීශු ඔහු තවත් පවසන තෙක් බලා සිටියේ නැත.ඔහුගේ හිස සොලවා අකමැත්ත ප්‍රකාශකල ඔහු නැගිට්ටේය. නමුත් ඔහුගේ මැණික් කටුව මත වූ මහලු මිනිසාගේ ග්‍රහනය තවමත් නොසැලී තිබුනේය, "මට උදව් කරන්න ... මේ දරුවා ෂාඕ පවුලේ තයි හු නිවසට ගෙන එන්න..."

චෞ ෂීශු සුසුම්ලමින් පවසන්නට විය, "අහන්න, නාකි මනුස්සයො..."

ඔහුට බාධා විය. “කුඩා... අනුග්‍රහය,... විශාල කෘතඥතාවකින් යුතුව ආපසු ගෙවිය යුතුයි...”

චෞ ෂීශු හිස ඔසවමින්, නටබුන් වී ඇති සිද්ධස්ථානය දෙස බලා සිටියේය. ඔහු ඔහුගේ වේශ නිරූපණයට ඇති හැකියාව ගැන සිතුවේය.ඔහු තවමත් අසනීප බවක් පෙනෙන්නට නොතිබුණි. ඔහු මෙසේ උපකාර කිරීමට එකඟ වීමට තරම් කරුණාවන්ත යැයි මිනිසුන් සිතන්නේ කෙසේද?

ධීවරයා ඔහුගේ අවසන් මොහොතේ සිටින බවක් පෙනෙන්නට තිබුණි.ඔහුගේ ග්‍රහණය වඩාත් ශක්තිමත් නමුත් හුස්ම හිරවෙන්නට විය. දුර්වල වූ හඩින් ඔහු ගොත ගැසුවේය.“කරුණාකර..., මෙය කුසල් රැස්කර ගැනීමට හැකි මාර්ගයක් කියා සිතන්න! ඔබ මිය ගියත් දරුවන් නොමැති වුවත් ඔබේ පරම්පරාව වෙනුවෙන්.... ඔබේ ඊළඟ ජීවිතය..වෙනුවෙන්..."

ඒ වදන් අකුණු සැරයක් මෙන් චෞ ෂීශුට වැදුණු අතර ඔහුගේ පපුවේ තිබූ ඇණ, නැවතත් ක්‍රියාකාරී වූයේ මාංසයට තව තවත් කිඳා බැසීමට අවශ්‍ය මෙනි.ඊළඟ ජීවිතය ?...මේ ජීවිත කාලය පුරාවටම කළ පව් අවුරුදු තුනකින් මරණයත් සමඟ සම්පුර්ණයෙන්ම ගෙවෙනු ඇත, නමුත් ... නමුත් තවමත් ඊලග ජීවිතයකුත් තිබේ!

බොහෝ වේලාවකට පසු, චෞ ෂීශු සුසුම්ලමින්, රිදී කැබැල්ල ඔහුගේ අත්ලෙහි කිහිප වතාවක් එහා මෙහා පෙරළමින් හිද එය ඔහුගේ සාක්කුවට දමා ගත්තේය.

ධීවරයාගේ අඳුරු ඇස් දීප්තිමත් විය.ඔහුගේ තොල් වෙව්ලන්නට විය. නොබෝ වෙලාවකින්ම ඔහුගේ දෑස්වල ආලෝකය සෙමෙන් අඩු විය.චෞ ෂීශුව ග්‍රහණය කොටගෙන සිටි හස්තය ලිහිල් වී කම්මැලි ලෙස එල්ලී වැටුනේය. කෙසේ වෙතත්, ඔහු තවමත් යමක් පවසන්නට උත්සහ කරන බවක් පෙනෙන්නට තිබුණි.

චෞ ෂීශු ඔහුගේ කන වැඩිමහල්ලාගේ මුඛයට සමීප කළේය, ඔහු බිඳුණු ලෙස මුමුණන්නට විය.“ඔබ කලයුතුමයි... එසේ නොකලොත්... මම... මම පරම්පරා දහඅටක් හොල්මන් කරන්නම්, ඔබේ... මුතුන් මිත්තන්…”

චෞ ෂීශු නැවත වාඩි වූයේය.හිස එක් පසෙකට බර වී,ධීවරයා අවසන් හුස්ම හෙළන විට ඇත්තෙන්ම ඔහුට වචන අහිමි විය.කුඩා පිරිමි දරුවාගේ මුවින් වේදනාත්මක ඉකිබිදුම් නැගෙන්නට විය. සේවිකාවක මෙන් සැරසී හුන් මහලු කාන්තාවද හඩමින් ඔහු අසලට වී සිටියාය.

චෞ ෂීශු හා යුවතිය මදක් ඔවුන්ගෙන් පසෙකට වූහ.ගැහැණු ළමයාගේ විශාල දෑස් ඉබාගාතේ ගිය අතර ඇය පහත් හඩින් හඩ අවදිකලාය, "මගෙ ස්වාමියා කිව්වා ඔබ පෙනෙනවට වඩා වෙනස් කියලා, නමුත් මම ඇත්තටම ඒක කලින් දුටුවේ නැහැ. ඔබ කුමන නිකායෙන්ද? ඔබේ නම මොකක් ද?"

චෞ ෂීශු ළයාන්විතව පිළිතුරු දුන්නේය, “මේ අදක්ෂයා චෞ… චෞ ෂු, සෑම තැනම හුදකලාව ඇවිදින රස්තියාදුකාරයෙක්.ඇත්ත වශයෙන්ම, තරුණ නෝනා, ඔබේ නම දැන ගැනීමේ ගෞරවය මට ලැබුණෙ නෑ”

ඇය හිස වනමින් ඔහුගේ හිසේ සිට පාදාන්තය තෙක්ම ඉහල පහල බැලුවාය. “ඔබේ පෙනුම අසනීප වුණු අවතාරයක් වගේ නොවුනනම් , ඔබ ඇවිදින්නෙ කතාබහ කරන්නෙ ඔය ආකාරයට නොවුනානම්, ඔබ ඇත්තටම මගේ ස්වාමියා විස්තර කල ආකාරයටම පෙනෙන්නට තිබුණා,මම ගු ෂියෑං"

ඇය මීට පෙර චෞ ෂු ගැන අසා නොතිබුණි.ඒ හැරුණු කොට ඔවුන් හමු වූයේ ද අහම්බෙන් පමණි.එබැවින් එකිනෙකා සමඟ සම්පූර්ණයෙන්ම සත්‍යවාදී වීමට හේතු නොතිබුණි.නමුත් ඇය එය එතරම් ගණන් නොගෙන පිරිමි දරුවාගේ උරහිසට තට්ටු කළාය , “ඔහු දැනටමත් මියගිහින්,ඔබ ඔහුව නිසි ලෙසින් භූමදානය කළයුතුයි...කියන්න,තවත් අය ඔබ පසුපස ලුහුබඳිනවාද? ”

පෙරදී ඇගේ ඍජු හා රළු අදහස් ප්‍රකාශය නිසා තවමත් කෝපයෙන් සිටි පිරිමි දරුවා දෑස් හැරියේය.ඔහු තුළ පිරී තිබූ ශෝකය සහ කෝපය සමනය කර ගැනීමට ක්‍රමයක් නොතිබූ නිසා ඔහු ඒ සියල්ලම ඇය වෙත යොමු කළේ ඇය විසින් ඔහුව ඝාතනය කලා මෙනි.

ගූ ෂියෑං ඇහිබැම ඔසවා බැලුවාය.මෙම දැරියට දක්ෂතා තිබූ නමුත් තවමත් සටන් ශිල්පිනියකගේ ප්‍රමාණවත් වයසට එළඹ නොසිටියා සේම ඇය අධර්මිශ්ඨ හැගීම්වලින් මූර්තිමත්ව සිටියාය.කුඩා කොළුවාගේ කෝපය ඇය වෙත එල්ල වීම නිසා පහර දීමේ චේතනාවෙන් ඇය අත එසවූ නමුත් චෞ ෂීශු ඇයව අල්ලා ගනිමින් බාධ කලේය.

සිය මැණික් කටුව වටා අයිස් වැනි සීතල අතක් මෘදු ලෙස එතී ඇති බව ගූ ෂියෑං හට දැනුනි.ග්‍රහණය සම්පූර්ණයෙන්ම වේදනා රහිත වූ අතර ග්‍රහණය කරගෙන සිටි තැනැත්තා ඊට කිසිදු ශක්තියක් භාවිත කොට ඇති බවක් පෙනෙන්නට තිබුනේ නැත.නමුත් ඇයට චලනය වීමට හෝ ඈත් වීමට නොහැකි විය.

ඇයට මෙම අසනීප පෙනුමැති මිනිසා වෙත විශ්මය ජනක බැල්මක් හෙළීම වළක්වා ගත නොහැකි විය.ඇය සිතන්නට වූවාය. ‘ස්වාමියා මේ තැනැත්තා පිලිබදව කතාකලේ ද බෙහෙවින්ම ගරුසරු ඇතිවයි.ඔහු මා සිතුවාට වඩා අද්භූත ය. මම ඔහුට පහර දුන්නොත් මම සාර්ථක වේවිද කියා සැකයි ’

ඇය තමාගේම සීමාවන් දන්නා දක්‍ෂ තැනැත්තියක බැවින් ඇගේ අදහස වෙනස් කරගත්තාය. “ඔබට ගෞරවයක් ලෙසයි එය කරන්නේ” යැයි චෞ ෂීශු දෙසට සිනහවක් පාමින් පැවසූ ඇය දෑත් ඉවත් කර ගත්තාය.

ඉක්බිති කුඩා තරුණයා දෙසට හැරුණු ඇය ඔහුට බැණ වැදීමට පටන් ගත්තාය, "මෝඩ කොළුවො! මේ සහෝදරී මෙතන පසුකරයමින් හිටියෙ.ඔබේ තත්වය ගැන අනුකම්පාවෙනුයි මම ඔබට උපකාර කලේ.ඒ නිසා මා ඔබේ මුළු පවුලම හෝ වෙනත් කෙනෙක් ඝාතනය කළා වගේ සලකන්න එපා.ඔබට සහනයක් අවශ්‍ය නම් ඝාතකයින්ගෙන් පළිගැනීමට උත්සාහ කරන්න.කදිමයි! ඔබට පුළුවන්, මළ මිනියක් උඩ වැටීගෙන අඬන්නයි මේ හොඳ ඉවසිලිවන්ත සහෝදරියට හිරිහැර කිරීමට පමණයි”

මෙම දැරිය දක්ෂ විය හැකි නමුත් ඇය නිසැකවම කරුණාවන්ත නොවේ.

චෞ ෂීශුට වෙනත් කළහැකි දෙයක් නොවූයෙන් ඔහුව කෙටියෙන් සනසන්නට වූයේය.නමුත් ඔහුව පුදුමයට පත් කරමින්, කුඩා තරුණයා ඇගේ වදන් නිසා තුෂ්නිම්භූත ව හිද එක්වරම තම මුළු ශක්තියෙන් කඳුළු පිස දමා දණින් වැටුණේය.ඔහු හඩ නැගෙන සේ ඔහුගේ හිස දෙපාරක් බිමට ගසා, පහත් හඬින් පවසන්නට වූයේය., “ඔබ මට පැවසූ දේ නිවැරදියි සහෝදරී, මම ඔබට ලොකු අසාධාරණයක් කළා.”

ඔහු තදින් දත්මිටි කමින් සිටි අතර ඔහුගේ මුහුණේ මාංශ පේශී තවත් තියුණු දාර සහිතව ඉලිප්පී තිබුණි.ඊට හාත්පසින්ම වෙනස්ව, ගූ ෂියෑං ගොළු වූවාය, ඇගේ කොට්ටම්බා මෙන් විශාල දෑසින් ඇසිපිය සළමින් අඩි භාගයක් පමණ ඇය පසුබැස්සාය, "මම- මම පැවසූ දෙයින් ඔබ මා ඉදිරියේ මෙලෙස දණගැසීමක් අදහස් කලේ නැහැ, නැගිටින්න, ඉක්මනට නැගිටින්න."

කුඩා තරුණයාටද නොදැනෙන පරිද්දෙන් චෞ ෂිශු,ඔහුට නැගී සිටීමට උපකාර කිරීමට මදක් පහළට නැමුණේය. “මුලින්ම අපි වයසක ලී සහෝදරයා වෙනුවෙන් භූමදානයක් කළ යුතුයි.” චෞ ෂීශු යෝජනා කළේය. “දේවල් බලා ගැනීමට ඔහු මාව විශ්වාස කළා.එනිසා මම ආරක්ශිතව ඔබව රැගෙන යන්නම්.ඒත් ඔබ දෙදෙනාට හදිස්සි නැත්තම් මෙතන ටිකක් විවේක ගෙන මට කියන්න මොකද වුණේ කියලා."

කොළුවා ඊට ඔහුගේ කැමැත්ත මුමුණමින් පැවසූ පසු චෞ ෂීශු ඔහුට මහලු මිනිසා භූමදාන කිරීමට සිද්ධස්ථානය පිටුපස ස්ථානයක් සොයා ගැනීමට සහය වූයේය.ඇගේ හදවත කැළඹී ඇති බව දැනුණු ගූ ෂියෑං ලී කැබැල්ලක් ගෙනැවිත්, ඇගේ ඉණෙහි තිබූ කිනිස්සක් ඇද එයින් ලීය සොහොන් ගලක් ලෙස කැටයම් කළාය. "ඔහුගේ නම මොකද්ද?" ඇය ඇසුවාය.

මදක් කල්පනා කල කුඩා තරුණයා පවසන්නට වූයේය. “ඔහු අපට කීවේ ඔහුගේ වාසගම ලී කියා පමණයි, ඔහු මගේ පියාට ණය ගැති නිසා ඔහු තමන්ගේ ජීවිතය පරදුවට තබා අපට පැන යාමට උදව් කලා. මම එයාට කියන්නේ ලි මාමා කියලා... එයාගේ ඇත්ත නම මොකක්ද කියලා මම ඇත්තටම දන්නේ නැහැ.”

චෞ ෂීශු සුසුමක් පිට කළේය.ජියැන්ගු හි මිනිසුන් කෙසේ හෝ, ඔවුන්ට සුදුසු යැයි පෙනෙන පරිද්දෙන් ඔවුන්ගේ ණය ආපසු ගෙවති.ඉදින් නමක් තබා යාමට අවශ්‍යතාවයක් තිබේද?

ගූ ෂියෑං හිස පහතට නවාගෙන ලී සොහොන් ගලෙහි “ගෞරවනීය ලී මාමා වෙනුවෙන්” ලෙස කැටයම් කලාය. ඇය එය දෙස බලා, සෑහීමකට පත් වූ විට චෞ ෂිශුට දුන්නාය. "ඔබ මොකක්ද සිතන්නේ?"

චෞ ෂීශු සොහොම් ගල දෙස බැලූ මොහොතේම එහි “මාමා” යන්නෙහි එක් පහරක් අඩු වී ඇති බව දුටුවේය.විනෝදය සහ ශෝකය මුසු හැගීමක් ඔහුට දැනෙන්නට විය.සරල සොහොන ඉදිරිපිට එය තැබීමට පෙර ඔහු තම ඇඟිල්ලෙන් අතුරුදහන් වූ අකුරු කොටස එකතු කළේය.

කුඩා තරුණයා කඳුළු වළක්වාගැනීමට උත්සාහ කරමින් තුන් වරක් දණින් වැටී නමස්කාර කිරීමෙන් අනතුරුව නැඟිට පිටුපස කෙලින් තබාගෙන සිටගත්තේය.

-----------------

1        ෂැන්සොං ලක්ෂ්‍යය - පපුවේ මද්‍ය ලක්ශය

2        ගෙං - කාලය මැනීමට භාවිතකරන මිණුමක්, ගෙං එකක් පැය දෙකකට සමාන වේ.