තෙවන පරිච්ඡේදය | පාළු සිද්ධස්ථානය

මරණය පවා හොදින් හුරුපුරුදු චෞ ෂීශු, ජීවිතයේ මේ අවධියේදී කිසිවක් ගැන සැලකිල්ලක් දැක්වූයේ නැත. එබැවින් වහලු ධීවරයාගේ අසභ්‍ය ව්‍යවහාරය ඔහු කනකටවත් ගත්තේ නැත.

යාත්‍රාව සන්සුන්ව ජලය හරහා ගමන් කළේය.ගඟෙන් එගොඩ සිටි තරුණ ස්ත්‍රියක් මධුර ස්වරයෙන් හඬ නැගුවාය.“ජල චෙස්නට්(1) විකුණනවා! ඔබට ටිකක් ඕනෙද?"

කාලය සෙමින් ගත්වන්නාක් මෙන් ගංගාවද මන්දගාමීව ගලා ගියේය.

“මෙතනදි මං මැරුණත්, ඒකත් වටිනවා” චෞ ෂීශු සිතුවේය.

ඔහු පෙන්ලෛ හි අමරණීය කන්ද තරණය කරමින් සිටියදීද එම සිතුවිල්ලම කලින් ඔහුට හරස් විය.නමුත් පසුව ඔහු,ස්වභාවික සුන්දරත්වයෙන් අනූන ජ්‍යංග්නාන් හි සංචාරය නොකළ බව සිහිපත් වූ බැවින් දකුණට පැමිණියේය.මෙම ස්ථානයේදී එම සිතුවිල්ලම නැවත මතුව ආවේය.නොදන්නා හැඟීමක් ඔහු තුළ ජනිත විය.

හපන්නට හා ගිල දැමීමට වෙහෙසෙමින් ඔහු වියළි රොටිය සපාකෑවේය.අනතුරුව හිස පැත්තකට ඇලකරගෙන හාන්සි වී නැවත සිතිවිලි අතර ගිලී ගියේය.අවසානයේ ඔහු ජ්‍යංග්නාන් වෙත පැමිණියත් තවමත් ඔහු සංචාරය නොකල ප්‍රසිද්ධ කඳු තුනක් සහ පූජනීය කඳු පහක්(2) දැකගත හැකි විය.එනිසාම මෙහි නැවතීම අපරාධක් බව සිතූ ඔහු මෙහිම මියයාමට තිබූ සිතිවිලි අත් හැර දැම්මේය.

හදිසියේම, කටේ කෙල හිදුනාක් මෙන් ධීවරයාගේ සාප කිරීම් අවසන් විය.ඔහු පහළට නැමී,නොපැහැදිලි දිශාවකට හිස යොමාගෙන, ඇසිපියවත් නොහෙලා බලාහුන්නේය.ඇතිවූ කුතුහලය නිසාම චෞ ෂීශුද හිස ඔසවා මහල්ලාගේ බැල්ම පසුපස හඹාගියේය.

මහල්ලා ගං ඉවුර දිගේ ඇවිදිමින් සිටින පුද්ගලයන් දෙදෙනෙකු දෙස විමසිලිමත් දෑසින් බලා සිටියේය.ඔවුන් දෙදෙනා පෙරදී ආපනශාලාව අසලදී චෞ ෂීශුට හමුවූ අළු පැහැති ඇදුමින් සැරසුණු කඩවසම් මිනිසා සහ රූමත් තරුණියයි.

ධීවරයා මහලු වුවත් ඔහුට සුවිශේෂී සංජානනයක් ඇත්තෙකු බව බැලූ බැල්මටම පැහැදිලිය.ඔහු දෙස සමීපව බලන්නෙකුට ඔහුගේ නොහික්මුණු හිසකෙස් යටට නෙරා ගිය නළලේ කෙලවරවල් දෙක(3) දැකගත හැකිය.ඝන හා ශක්තිමත් හොදින් වැඩුණු මාංශ පේශීන් ඇති ඔහු තුලින් දිස්වූයේ ඇසට පෙනෙනවාට වඩා වැඩි යමක් ඔහු තුළ පවතින බවයි.

මහලු මිනිසා ඔවුන් පිළිබද විමසිලිමත් වන ආකාරය අනුව, නිසැකවම ඔවුන් දෙදෙනා සාමාන්‍ය අය වියනොහැක.බැලූ බැල්මටම රූමත් යුවතිය සෙල්ලක්කාරියක වූවාය, නමුත් ඇය කිසිවිටෙකත් තම සීමාව ඉක්මවා නොගිය අතර පුරුෂයාට මීටර්(4) කිහිපයක් පිටුපසින් ඇවිදින්නීය.

චෞ ෂීශු එක් බැල්මකින්ම එම තරුණිය එක්කෝ මෙහෙකාරියක් හෝ නැත්නම් උපභාර්‍යාවක් බව වටහා ගත්තේය.

දුශ්ඨ බවේ වයිරම් කිහිපයක් තිබුනත්,චෞ ෂීශු බෙහෙවින් අගය කරන ආකාරයේ සුන්දරත්වයක් ඇයට තිබුණි.නමුත් ඇය ඒ වන විටත් වෙනත් පුද්ගලයෙකුට අයත්ව සිටි නිසා ඔහු ඒ ගැන ඕනෑවට වඩා සිතීම නවත්වා වියළි රොටියට අවධානය යොමු කළේය .

සියල්ලටම අවසානයේ මෙය ජියැන්ගු(5) විය.සංදිග්ධභාවය එහි එක් ප්‍රධාන දෙයක් විය. රාජ සභාවක් කීර්තිය සහ බලය සදහා සටන් බිමක් නම්, ජියැන්ගු සුදු සහ කළු අතර සටන් බිමක් විය. සමහරුන්ට මෙය තේරුම් ගැනීමට නොහැකි වුවද, ඔවුන් මිය යන තුරුම නිදැල්ලේ සරන වීරයෙකු ලෙස ඉතා බැරෑරුම් කොට සැලකූහ. කෙසේ වෙතත් මේ සියල්ල ඔහු වැනි නොනවතින තෘෂ්ණාවෙන් පෙළෙන,නිවාස නොමැති මිනිසෙකු ගැන සැලකිලිමත් වන්නේ ඇයි?

ධීවරයා ශාප කිරීම නැවැත්වූ පසු චෞ ෂීශුට තරමක කම්මැලිකමක් දැනුනි.ඔහු මහල්ලාව උසිගැන්වූයේය. “ඒයි නාකියා, මේ රොටිය මෙලෝ රහක් නෑනෙ.අඩුම තරමේ ලුණු ටිකක් වත් මේකට දාන්න තිබුනා”

චෞ ෂීශුට අවශ්‍ය ලෙසම ධීවරයා නැවත කුපිත වූයේය. “කටේ පුරවගෙන කනගමන් උබ කොහොමද මගුල් කියවන්නෙ? ජරා පෙරේතයා! උබව දවස් තුනක් කුසගින්නෙ තියන්න ඕනෙ අඩුපාඩු කියන හැටි බලන්න....”

මුව විවර කළ මොහොතේම ඔහුගේ අසැබි වදන් නොනවතින ප්‍රවාහයක් මෙන් ගලා එන්නට විය.වඩාත් ජවසම්පන්න ලෙස රොටිය සපමින් චෞ ෂීශු නිර්ලජ්ජිතව සිනාසුණේය.

ගඟ තරණය කිරීමට වැය වන්නේ කාසි කිහිපයක් පමණි.නමුත් චෞ ෂීශු ධීවරයා වෙත රිදී කැබැල්ලක් විසි කළේය.මහළ්ලාට කිසිදු කෘතඥතාවක් දැනුණේ නැත.ඔහු එය අහුලාගත්තේ තෘප්තිමත් නොවූ ණය එකතු කරන්නෙකුගේ මුහුණෙනි. ඔවුන් එගොඩ ඉවුරට ළඟා වන මොහොතේම වදකාර පොඩිඑකා බෝට්ටුවෙන් පන්නා දැමීමට ඔහු සිටියේ නොඉවසිල්ලෙනි.“පලයන් !,මකබෑවිලාම පලයන්! මගේ කාලය නාස්තිනොකර, මට කරන්න වැදගත් වැඩක් තියෙනවා.”

විවේකීව රොටිය සපමින් සිටි චෞ ෂීශු යාත්‍රාවෙන් පිටතට ආවේය. “ඔහේට පුනර්භවයට යන්න සිදුවෙලාද? , ඇයි මේ හදිසි?”ඔහු තවමත් හපන අතරේම විමසීය.

ධීවරයාගේ ඇස් පීරිසි තරම් විශාල විය.ඔහුට කොළුවාගේ මුළු පවුලටම සහ මුතුන් මිත්තන්ට ශාප කිරීමට අවශ්‍ය බව පෙනුණත් හදිසියේම යමක් මතක් වූ ඔහු කෝපය යටපත් කරගෙන අවලාද නගමින් එපිටට යාත්‍රා කලේය.

මහලු ධීවරයාගේ හැසිරීම, ඔහුගේවෙනත් කුමන හෝ ව්‍යාපාරයක් වෙනුවෙන් කල වෙස්වලා ගැනීමක් පමණක් නම් එය විශිෂ්ඨය.නමුත් ඔහු සැබැවින්ම ධීවරයෙකු නම් එය ඔහු අන්ත දුප්පතෙකු කරනු ඇති බව නොඅනුමානයි.

නොපෙනී යන යාත්‍රාව දෙස බලා සිටි චෞ ෂීශු ප්‍රබුද්ධ ශේෂ්ඨත්වය පිලිබද නිරපේක්ශ සැලකිල්ලෙන් හිතාමතාම මිමිණුවේය. “හුකපන්”

චෞ ෂීශු ඔහුගේ ජීවිතයෙන් වැඩි කාලයක් ශිෂ්ඨ සම්පන්නව ගතකලත්, සමාජයේ පිරිහුණු පහත් ප්‍රජාව සමඟද මුසු වී සිටියේය.නීරස ලෙස සෑමවිටම කොන්ෆියුසියස්(6) කොන්ෆියුසියස් කියා දොඩවන ඉහල පැලැන්තියේ උගත් ප්‍රජාවගේ මුවින් කිසි දිනක නොහොබිනා වචනයක් පිටවන්නේ නැත.

අවිචාරයෙන් හැසිරී එම සාපයට පිටුපෑමෙන් ඔහුට මහත් උද්‍යෝගයක් දැනෙන්නට වූයේ වසර ගනනාවක් තිස්සේ පැවති කලකිරීම් ඒ සමග සම්පුර්ණයෙන්ම පහව ගියාක් මෙනි.

අසභ්‍ය වචනයෙන් අපහාස කිරීම ඔහුට එතරම්ම විනෝදජනක වූ නිසා සිනාසෙමින් ඔහු නැවතත් තනිවම බැණ වැදුනේය."ජරාව කන අවජාතකයා! මගෙ සල්ලි ගත්තට තමන්ගෙ රාජකාරියවත් හරියට කරන්න බැරිවුණා "

අසැබි වදන් පිලිබද ගැඹුරින් සිතාබලන විට ඒවා වඩාත් මිහිරි හා නිදහස් බව ඔහුට දැනුණු අතර, එය ඔහුගේ මනෝභාවය බෙහෙවින් ඉහළ නැංවීය.තෘප්තිමත් වූ ඔහු ගං ඉවුර දිගේ ඇවිද ගියේය.

දවස පුරාම එහෙට මෙහෙට ඇවිදිමින් සිටි චෞ ෂීශු රාත්‍රිය උදාවන විට නගර මායිමට ළගා වූයේය.ඔහුගෙන් වහනය වන දුගද ඔහුටම තවදුරටත් දරාගත නොහැකි තැන ඔහු පොකුණක් සොයාගෙන හොඳින් සෝදා ගත්තේය. අවම වශයෙන් ඔහු නිසි මිනිසෙකු මෙන් සිටිය යුතුය. ඔහු එක් රැයක් නවාතැන් ගත හැකි ස්ථානයක් සොයා ඇවිද්දේය.අවසානයේ අත්හැර දැමූ, අබලන් සිද්ධස්ථානයක් සොයාගත් ඔහු පිදුරු වලින් එහි ඇඳක් සාදා බුදු පිළිමයේ පාමුල නිදාගත්තේය.

මැදියම් රැයේ කිසිදු හිරිහැරයකින් තොරව ඔහු නිදාසිටි අතර අසල වූ අඩිපාරේ මිනිසුන්ගේ ඝෝෂාවන් නොවන්නට, උදේ වන තුරු සිහිනයක් හෝ නොමැතිව හොදින් නිදාගැනීමේ හැකියාව තිබිණි.

හදිසියේම, අවට පැතිරයන ලේ දුගදක් සමග කැලිසේයාවන් තුනක් සිද්ධස්ථානයේ දොරකඩින් මතුවිය.දෑස් විවර කල චෞ ෂීශු නළල රැලි ගන්වා ගත්තේය.

තොප්පියක් පැළද සිටි තුවාල ලැබූ තැනැත්තා නව යොවුන් වියේ පිරිමි ළමයෙකුගේ සහාය ඇතිව සිද්ධස්ථානයට ඇතුල් වූයේය. කොලුවා තුළ මූලික කුංෆු කිහිපයක් තිබුණු නමුත් එහි ශක්තිය තවමත් අස්ථායී විය.අසනීප වූ ගොනෙකු මෙන්, ඔහු හුස්ම හිරවී සිටි අතර, තුවාලකරුට දැඩි පරිශ්‍රමයකින් උපකාර කළේය.තුන්වැන්නා සේවිකාවක් මෙන් ඇඳ පැළඳ සිටි මහලු කාන්තාවකි. බෑගයක් අතැතිව ඇය ඔවුන් පිටුපසින් ඇවිද ආවාය.

බාලයා තුවාල වූ සතෙකු මෙන්, සුපරික්ශාවෙන් සිද්ධස්ථානයට ඇතුල් වූයේය.ඔහුගේ විමසිලිමත් දෑස් පූජාසනය පුරා දිව ගියත්, ප්‍රතිමාවේ සෙවණැල්ල යට සිටි චෞ ෂූශුව ඔහු දුටුවේ නැත. තොප්පිය පැළද සිටි තැනැත්තා දෙසට හැරුණු ඔහු කොදුරමින් කතා කලේය. “ලී මාමේ, අපිට ටික වෙලාවක් මෙතන සැගවෙන්න පුලුවන්, ඔබේ තුවාලේ...”

ඔහු කතාකරමින් සිටි තැනැත්තා ඔහුගේ උපකාරය සමග පොරබදමින් සිටි නිසා ඔහුට වාක්‍යය අවසන් කිරීමට නොහැකි විය. නැගී සිටීමට හැකි උපරිමයෙන් උත්සාහ කරමින් තොප්පිය පැළද සිටි තැනැත්තා චෞ ෂිශු සිටි දිශාවට හැරුනේය. "ආ... මේ හාදයා..."

ඔහු පසුපසට වී හිස ඔසවන විට චෞ ෂීශුට ඔහුව පැහැදිලිව හදුනාගත හැකිවිය.තුවාලකරුවා ඔහුට පෙර හමුවූ මහළු ධීවරයාය.ඔහුගේ පිටෙහි ලෙයින් තෙත්වුණු අසිපත් තුවාලයක් තිබිණි. ෂීශු වහාම කෙළින් වාඩිවූයේය. "ඒ ඔබ!"

ධීවරයා කටුක ලෙස සිනාසුණේය, "අපොයි, ඇත්තටම මේ හිඟන්නා ..."

ඔහු අවසන් කිරීමට පෙර පැකිලී ඉදිරියට විසිවුණු අතර තරුණ පිරිමි ළමයා කඩිමුඩියේ ඔහුට සහාය වීමට උත්සහ කලේය.නමුත් බාලයා එතරම් ශක්තියක් නොවූ නිසා, ඔහු “ලී මාමා...” යැයි හඬා වැලපෙමින් තුවාලකරුත් සමග දෙදෙනාම බිම ඇද වැටුණහ.

ධීවරයාගේ සිරුර ගැහෙන්නට විය. ඔහුගේ තුවාලය පරීක්ෂා කර බැලූ චෞ ෂීශු නළල රැළි ගන්වා ගත්තේය. රුධිරයේ සාමාන්‍ය රතු පැහැය සමඟ මිශ්‍ර වූ අමුතු දම් පැහැයක් තිබු අතර එහි බලපෑමෙන් ඔහුගේ තොල් මාරාන්තික ලෙස සුදුමැලිව තිබුණි.

මහලු මිනිසා සිනහ වීමට උපරිම උත්සාහයක් ගෙන පහත් හඬින් කතා කළේය. “පුතේ!, ඔබ දැන්ම අඩන්න පටන් ගත්තද ? මම තාම මැරිලා නෑ..."

කාන්තාව ද කඳුළු පිසිමින් සිටියාය “ලී මහත්තයා, ඔබට කුමක් හෝ සිදු උනොත් අපේ තරුණ ස්වාමියාට මොකක්ද වෙන්නෙ”

ඔහු ඇය දෙස බලා, ඉතා අපහසුවෙන් ආශ්වාස කරමින්, බාලයා වෙත වෙවුලමින් කොදුරන්නට වූයේය. "මම... අනාගතයක් නැති කෙනෙක් විතරයි... ඒත් මම ගොඩක් කාලෙකට කලින් ඔබේ පියාට ණයයි, මගේ ජීවිතයෙන් හැර මට මේ ණය ගෙවන්න ක්‍රමයක් නැහැ. ...” ඔහුට නැවතත් ගැහෙමින් කහින්නට විය, “දරුවෝ!, මේක හොඳින් මතක තබා ගන්න...”

සිද්ධස්ථානයට පිටතින් ඇසුණු අඩි ශබ්ධය නිසා මතක තබා ගත යුතු දේ කොළුවාට කියන්නට ඔහුට නොහැකි විය.කළු ඇඳුමින් සැරසුණු මිනිසෙක් දොරින් ඇතුල් වූයේය. පිහියකින් කැපූ කැළලක් තිබූ ඔහුගේ මුහුණ වසා ගැනීමටවත් ඔහු උනන්දු වූයේ නැත.උගුලකට හසුවුණු මීයන් තිදෙනෙකු දුටුවාක් මෙන් ඔහුගේ මුඛය විකෘති ලෙස ඇඹරී ගියේය."අපූරුයි! මෙතරම් දුර පලාඑන්න හැකිවුණා”

දෙතොල් සපාගත් වනම බාලයා, ඉණෙහි බැද තිබූ අසිපත කළු හැඳගත් මිනිසා වෙත එල්ල කරමින් කඩාපැන්නේය. “මං උබව මරනවා”

ඔහුගේ විස්මිත ගම්‍යතාවයට ප්‍රමාණවත් තරම් දක්ෂතා නොතිබීම සැබැවින්ම අවාසනාවක් විය. ඔහු කෙතරම් බලාපොරොත්තු සහගත ලෙස පෙනුනත්,ඔහුගේ චලනයන් අවුල් සහගත වූ අතර ඔහුගේ අද්දැකීම් නැති බව පෙන්නුම් කළේය.සුළු පහරකින්ම නිරායුධ වූ ඔහුගේ කුසට වැදුණු පහරින් මීටර් කිහිපයක් පසුපසට විසිවී ගොස් වැටුණේය. දැළි කුණු තවරාගෙන වැටුණු තැනින් නැගීසිටි ඔහු කිසිදු බියකින් තොරව නැවතත් කෑගසමින් හිස් අතින්ම සටනට එළඹියේය.

ධීවරයාටද නැගී සිටීමට අවශ්‍ය වූ නමුත් දැඩි ලෙස තුවාල වී හුන් ඔහු වහාම ආපසු ඇද වැටුණි.

සතුරා සීතල සිනහවක් පෑවේය, "මේ හාවා උත්සාහ කරන්නෙ දෂ්ඨ කරන්න" ඔහු පහරදීම වැළැක්වූ අතර, වකුටු කරගත් ඇගිලිවලින් පිරිමි ළමයාගේ පිට මැදට පහර දීමට සැරසුනේය. සඳ එළිය වැටුණු එම ඇඟිලි මිනිස් මස් හා ලේ වලින් සෑදී ඇති බවක් නොපෙනුණි, ඒවා මරාගෙන මැරෙන පහරක් එල්ල කිරීමට සූදානම්ව දුර්වල නිල් පැහැයෙන් දිලිසෙමින් තිබිණි.

චෞ ෂීශු මුලදී සිතුවේ අනවශ්‍ය ලෙස ඔහු මීට මැදිහත් නොවී සිටිය යුතු බවයි.නමුත් ඔහු සමග ‘එකම බෝට්ටුවේ’ සිටි මෙම ධීවරයා සමග ඔහුට නොවැළැක්විය හැකි ඉරණමක් තිබුණා සේම මරණයට මුහුණ දීමට නොහැකි තරම් පිරිමි ළමයා වයසින් කුඩා වූයේය.ඔහු වහාම කුඩා ගලක් අත්ලේ ගුලි කරගත්තේය.ඉන් පහර දීමට සැරසෙන විට හදිසියේම යමෙකුගේ සියුරු සන් හඩක් (7) ඇසෙන්නට විය.

කළු හැඳගත් මිනිසා තැතිගැන්මෙන් එක්වරම සමතලා බිම මත පෙරලුණු අතර කිසිවක් අල්ලාගෙන නොසිටි පිරිමි දරුවා ගුවනින් විසිව ගියේය.

මීට මොහොතකට පෙර කළු හැඳගත් පුද්ගලයා සිටි ස්ථානයේ නෙළුම් මලක හැඩැති සැගවුණු ආයුධයක්(8) වැටී තිබුණි.

ඔවුන්ට සියුම් කාන්තා කටහඬක් ඇසෙන්නට විය. “කව්රුන්ද මේ මහ රෑ වැඩිහිටියන්ටයි ළමයින්ටයි හිරිහැර කරන්නේ? කෙතරම් සාහසිකයෙක්ද. ”

කාන්තා කටහඩ හුරුපුරුදු බව දැනුණු චෞ ෂීශු තිගැස්සුණේය.වහාම අත්ලෙහි තිබූ කුඩා ගල් කැටය විසිකර දැමූ ඔහු නිශ්ශබ්ධව සිදුවන දේ නැරඹීමට ආපසු තම තාවකාලික සයනය වෙත ගියේය.

කළු හැදගත් සතුරාගේ දෑස් ගැහෙන්නට විය.කෝපයෙන් සහ නින්දා සහගතව ඔහු ගිගිරුවේය. “වේශ්‍යාව!, සැගවී සිටින තැනකින් එළියට වරෙන්”

යුවතිය සිනහසෙමින් දොරකඩ පෙනී සිටියාය.චෞ ෂීශුට ඇයව හඳුනාගන්නට හැකිවිය.ඒ තැබෑරුම අසලදී වස දෙන බවට ඔහුට තර්ජනය කල දම්පැහැ වස්ත්‍රයෙන් සැරසුණු සුන්දර තරුණියයි.මෙහි රැස්ව සිටි පිරිසෙන් අඩක්ම ඔහුට පෙරදී හමුවුනු අය බව දුටු ඔහු සිතුවේ අද වැටුණේ කුමන පටලැවිල්ලකට ද කියාය.

යුවතියගේ ස්වාමියා පෙනෙන්නට සිටියේ නැත.ඇය අහිංසක ලීලාවෙන් දොරට හේත්තු වූවාය. " ලැජ්ජාවක් නැති අවජාතකයා! මරණයේ දොරකඩ සිටින අයෙකුවත් ඉතිරි නොකර පහරදෙන්න තරම් නුඹට කොහෙන් ආව හයියක්ද?”

‘මරණයේ දොරකඩ සිටින තැනැත්තා’ ලෙස හැදින්වූ පැය කිහිපයකට පෙර රළු ලෙස සාප කරමින් ක්‍රියාශීලීව හුන් මහළු ධීවරයා නිහඩවම ක්ලාන්තව කඩා වැටී හුන්නේය.

-----------------

1 - චෙස්නට් ලෙස හැඳින්වුවද, ජල චෙස්නට් කිසිසේත්ම පළතුරක් නොවේ.එය ආසියාවේ වගුරු බිම්වල වැඩෙන අල එළවළුවකි.

2 - ප්‍රසිද්ධ කඳු තුන : හ්වංෂන්, ලූෂන් සහ යැන්දොංෂන් , පූජනීය කඳු පහ: නැගෙනහිර මහා කන්ද තායිෂාන්, බටහිර මහා කන්ද හුආෂන්, දකුණු මහා කඳුකරය හෙංෂාන් (හූනන් හි), උතුරු මහා හෙංෂාන් (ෂාන්සි හි) සහ මධ්‍ය මහා කන්ද සොන්ෂාන්.

3 - නළලේ දෙකෙළවර ඉදිරියට නෙරා ඇති පිරිමින් වඩාත් ප්‍රවේශම් සහගත හා අවබෝධයෙන් කටයුතු කරන්නන් බවත්,මූල්‍ය කටයුතුවල දක්ෂයින් බවත් අතීතයේ විශ්වාස කෙරිණි.

4 - one zhang - ජං එකක් මීටර් 3.3 ක් පමණ වේ.

5 - jianghu - මෙම යෙදුමේ වචනාර්ථයෙන් " ගංගා සහ විල් " යන අර්ථය ඇති අතර, එහි සැබෑ අර්ථය ඊට වඩා පුළුල් ය. සටන් කලා ලෝකය සහ එම ප්‍රජාවේ මිනිසුන්ගේ ආරවුල් , කුමන්ත්‍රණ, රහස් , සාපරාධී පාතාලය සම්බන්ධ මනඃකල්පිත කථා සිදුවන "මිථ්‍යා ලෝකයක්" පිළිබඳ අදහසක් මින් පිළිබිඹු වේ. බොහෝ චීන wuxia , ප්‍රබන්ධ සහ ආදර මනඃකල්පිත කථා සකස් කර ඇති පරිසරය ආමන්ත්‍රණ්‍ය කෙරෙන චීන යෙදුමක් ලෙස හැදින්විය හැක.

6 - ඉගැන්වීමේ කලාව වෘත්තියක් ලෙස ස්ථාපිත කිරීමට මූලික වූ චීනයේ පළමු ගුරුවරයා ලෙස කොන්ෆියුසියස්  ලෙස හැඳින්වේ . ඔහු කොන්ෆියුසියස්වාදය ලෙස හඳුන්වන ජීවන රටාවේ පදනම වූ, සදාචාරාත්මක සහ සමාජීය සම්මතයන් ස්ථාපිත කළේය.වැඩිහිටියන්ට ගරු කිරීමද කොන්ෆියුෂියානු පරමාදර්ශයකි.

7 - whistle

8-暗器 (ànqì), යම් ආකාරයකින් සඟවා ඇති ආයුධ (බොහෝ විට අයිතිකරුගේ ඇඳුම්වල සඟවා ඇත).