පළමුවන පරිච්ඡේදය| රුධිර මළ සිරුර

 වසර පනහකට පෙර, චංෂා හි විදුම් කඳු මුදුන.

පස් කන්දක් මත වාඩි ලා සිටි සොහොන් කොල්ලකරුවන් කිහිප දෙනෙකි.  එම කල්ලියේ සිව් දෙනෙකු සිටියමුත් ඔවුන'තර තිබූ පරිසරය මේ වන විට ගිලී තිබුණේ දැඩි නිහඬතාවයක ය. මෙයට හේතු වී තිබුණේ පොළොව මත තිබූ යම් වස්තුවකි. සියල්ලන්ගේම දෑස් නාභිගත වී තිබුණේ පොළොව මත වැතිර තිබූ එම ලුඔයැං සවල (1) වෙතට ය.

සවලෙහි පස් රඳවගන්නා හිස කොටස තුළ රැඳී තිබුණේ මීට මොහොතකට පෙර සිදු කරන්නට සූදානම් වූ කැණීමක් මඟින් පොළොවෙන් පිටතට ගෙන ආ පස් ස්වල්පයකි. නමුත් පුදුමයටරර කරුණක් නම්, මෙම පස තුළින් දීප්තිමත් රතු දියරයක් නිරන්තරයෙන් කාන්දු වෙමින් පැවතීම ය. එය දිස් වූයේ පාංශු කොටස තුළින් රුධිරය වැගිරෙන්නාක් මෙනි.

“මේක ලොකු ප්‍රශ්නයක්,” භාවිතයට ගත් දුම්කොළ ඉවත දමමින් සිටි ලාඕ යැන්තූ පැවසී ය. “පහළ රුධිර මළ සිරුරක් තියෙනවා. පරිස්සම් නොවුනොත් අපි හැමෝටම එතනම මැරෙන්නයි වෙන්නේ. ”

“අපි පහළට යනවද නැද්ද? එක උත්තරයක් දෙන්න. ඔච්චර වැල්වටාරම් කියවන්න එපා!” එක් ඇසක් පමණක් තිබූ තරුණයෙකු පැවසී ය. “ඔහේගේ ඔය වයසක කකුල් රිදෙනවනම්, පහළට බහින්න එපා. ඒ වෙනුවට මමයි මල්ලියි යන්නම්. ඒ මොකක් උනත් අපි වෙඩි තියනවා.”

කෝපයට පත් විය යුතු නමුත් ඒ වෙනුවට සිනාසෙමින් සිටි ලාඕ යැන්තූ ද ඒ සිනහවෙන්ම ඔහු අසල සිටි රැවුල වවාගත් පුද්ගලයාට මෙසේ පැවසී ය, “ඔහේගේ පුතා පොඩ්ඩක් ආවේගශීලියි. ඒ වගේමයි අහංකාරකමත්. එයාට මේ ගැන තව විස්තර කරන්න. එහෙම නැත්නම්, මොනවහරි දෙයක් වෙන්න පුලුවන්. මේ වැඩේදී, පෙට්ටි තුවක්කුවක් තියෙනවා කියන්නෙ ඒකෙන් කියවෙන්නේ ඔහේලා එකතු වෙලා කියලා."

රැවුල වවාගත් තරුණයා අනෙක් තරුණයා දෙස බැලී ය, “අවජාතකයා, ඇයි තමුසේ ඒ වයසක මනුස්සයාට එහෙම කතා කරන්නේ? ඒ මහල්ලා සොහොන් කැණීම් කරනකොට ඔහේ ඉපදිලාවත් හිටියේ නැහැ.”

"ඇයි මම වැරදිද... වැඩිහිටි සොහොන් මංකොල්ලකාරයෝ පවා රුධිර මළසිරුරු තියෙන එක හොඳයි කියලා කිව්වේ නැද්ද? පල්ලෙහා ගොඩක් නිධාන තියෙනවා ඇති. පහළට නොගියොත්, අපි අනිවාර්යයෙන්ම ඒ ගැන පසුතැවිලි වේවි.".

"ඔහේට කොහෙන්ද මාත් එක්ක එකට එක කතා කරන්න තරම් හයියක් ආවේ?!" රැවුල වවාගත් පුද්ගලයා, පහර දීම සඳහා තම අත ඉහළට ඔසවා සිටි නමුත් ලාඕ යැන්තූ විසින් එය අවහිර කරන ලදි.

“එයාට පහර දෙන්න එපා. එයත් හරියට ඔයා පොඩි කාලේ වගේ. මේකට තමයි කියන්නේ ‘ඉහළ කදම්භය කෙළින් නැත්නම් පහළ කදම්බයත් කෙළින් නැහැ' කියලා!”

තම පියාට බැන වදින බව දුටු එකැස් කොලුවා හිස පහත් කරගෙන සිනාසෙන්නට විය. කැස්සකින් පෙළෙමින් සිටි ලාඕ යැන්තූ මෙය දුටු අතර තනි ඇසක් ඇති පිරිමි ළමයාගේ හිසට ලීයක් මඟින් තට්ටු කොට මෙසේ ඇසී ය, “ඔයා මොකද හිනා වෙන්නේ? රුධිර මළ සිරුරු නිසා ඕනම දෙයක් වෙන්න පුලුවන්. ගිය සැරේ ඔයාගේ මාමා මේ වගේ දෙයක් කැණීම් කරන්න ගිහින් එදා ඉදන් හිටියේ පිස්සු හැදිලා වගේ. එයාට වුණේ මොකක්ද කියලා අදටත් කවුරුත් දන්නේ නැහැ. ඒ නිසා මම මුලින්ම පහළට යන්නම්. තමුන් මට පිටිපස්සෙන් එනවා. අ'ර් යාසි (2) , ඔයා තුඔහාසිය (3) අරගෙන පිරිපස්සෙන් එන්න. සන් යාසි, ඔයා මෙතන ඉන්න. නැත්නම් අපි හතර දෙනාම එකට  බැහැලා මොනවා හරි උනොත් අපිට  බේරෙන්න ක්‍රමයක් නැති වෙයි. ඔයා තුහාඕසිගේ කඹයේ එක් කෙළවරක් අල්ලගෙන ඉන්න. අපි කෑගැහුවාම ඉක්මනින් ඒක එළියට අදින්න."

නමුත් බාලම පිරිමි ළමයා එයට කැමති වූයේ නැත, “මට ඕනෙ නැහැ! ඔයාලා හැමෝම තනියම විනෝද වෙනවා! මම මේ ගැන අම්මට කියනවා! ”

ලාඕ යැන්තූ සිනාසෙමින්, "බලන්න ඉතින්. සන් යාසි තාම ඉස්සර වගේම කරදරකාරයෙක්. කරදර කරන එක නවත්තලා මෙතන ඉන්න. මම ඔයාට පස්සේ රන් පිහියක් හොයලා ගෙනත් දෙන්නම්."

“ඔයා ඒක තනියම හොයාගන්නවාට මං කැමති නැහැ. ඒක මටම තනියම සොයා හොයාගන්නයි මට ඕනෙ. ”

එකැස් තරුණයාගේ කෝපය ඉහ වහා යන්නට විය. තම සොහොයුරාගේ දෙකන්වලින් අල්ලාගත් ඔහු බැන වදින්නට විය, “අවජාතකයා, තමුසෙට ගුටි කන්න ඕනෙද? තමුසේ හදන්නේ හිතාමතාම මාව තරහ ගස්සන්නද?"

බාලම පිරිමි ළමයාගේ මුහුණේ දිස් වූයේ බියපත් පෙනුමකි. වැඩිමහල් සහෝදරයාගෙ කෝපය දුටු ඔහුට ඉන් එහා කිසිවක් පැවසීමට නොහැකි තරමටම එම බිය දැඩි වී තිබුණි. උදව් අපේක්ෂාවෙන් තම පියා දෙස ඍජුවම බැලූ නමුත් අනපේක්ෂිත ලෙස පියා ද ඔහු කෙරෙහි සැලකිල්ලක් නොදක්වන්නාක් බදු පෙනුමකින් යුක්තව ඔවුන්ගේ උපකරණ පිළිවෙලට තැබීමට යමින් සිටියේ ය. ඔහුගේ සහෝදරයා එයින් සතුටු වූ බවක් පෙනෙන්නට තිබූ අතර මෙසේ පැවසීමට ද අමතක නොකළේ ය, “ඇයි තමුසේ ඔච්චර කළකිරිලා වගේ ඉන්නේ? මහලු කෙනා මේ වතාවේ තමුන්ට උදව් කරන්නේ නැහැ. ආපහු ප්‍රශ්නයක් ඇති කරන්න හැදුවොත්, මම තමුසෙට හොඳ පාඩමක් උගන්නනවා!

ලාඕ යැන්තූ ඔහුගේ උරහිසට ගසා කෑ ගැසුවේ මේ මොහොතේදී ය, "කොල්ලනේ, අපි අපේ උපකරණ අරගමු!" එසේ පැවසූ ඔහු සුළි සුළඟක් බදු වේගයකින් උපකරණ හැර අනෙකුත් අනවශ්‍ය දෑ ඉවත දමන්නට විය.

පැය භාගයකට පසු, කෙළවරක් නොපෙනෙන සොහොන් කොල්ලකරුවන්ගේ උමගක් තනා අවසන් කොට තිබුණි. ඉඳ හිට වාතාශ්‍රය ලබාගැනීමට පැමිණි සොහොයුරා හැරෙන්නට වෙනත් කිසිදු ශබ්දයක් බාල පිරිමි ළමයා හට උමග තුළින් ඇසුණේ නැත. නොඉවසිලිමත් වූ ඔහු උමග තුළට කෑ ගැසුවේ ය, “සීයා, ඔයා තාමත් හාරනවද?”

තත්පර කීපයකට පසු උමග ඇතුළත අන්ධකාරයෙන් ද සිහින් කටහඬක් ඇසුණි, “අපි දන්නේ නැහැ.. ඔයා ... ඔතනම ඉන්න ... ලණුව ආරක්ෂා කරන්න! ”

ඒ ඔහුගේ සහෝදරයාගේ කටහඬ ය. එවිටම, ඔහුට ලාඕ යැන්තුගේ කැස්සෙහි ශබ්දය ද ඇසිණි, "සද්ද කරන්න එපා ... ඇහුම්කන් දෙන්න! මොකක්හරි තියෙනවා ! ”

ඉන් පසු පැවතියේ මාරාන්තික නිශ්ශබ්දතාවයකි.

පහළ තත්වයෙහි කුමක් හෝ වැරද්දක් තිබෙන බව දැන සිටි නමුත් බාලම පිරිමි ළමයා යළිත් කතා කරන්නට බිය විය. එහෙත් ඊලඟ මොහොතේ එක්වරම ඔහුට යම් ශබ්දයක් ඇසෙන්නට විය. එය යමෙකු උමග තුළින් බඩ ගා යන ශබ්දයක් වැන්නකි. පිටතට ඇසුණේ මැඩියෙක් සිහින් හඬින් කෑ ගසන්නාක් මෙන් ශබ්දයකි.

එවිටම ඔහුට ඇසුණේ තම වැඩිමහල් සහෝදරයාගේ කටහඬ ය.පහළ සිටි ඔහු කෑ ගසන්නට විය, "සන් යාසි, අදින්න!"

පසුබට නොවූ බාලම පිරිමි ළමයා තුහාඕසිගේ කඹය ඉක්මනින් ඉහළට අදින්නට විය. නමුත් සිදු වූයේ නොසිතු දෙයකි. එක්වරම ලණුවේ බර වැඩි වන්නාක් මෙන් දැණුනු අතර යමෙකු පහළ සිට ලණුව අල්ලගත්තාක් මෙන් දැනෙන්නට විය. මේ වන විට බාල පිරිමි ළමයා ද ලණුව යම් කිසි දුරක් ඉහළට ඇද තිබුණි. ප්‍රතිවිරුද්ධ බලවේගය සොහොන් කොල්ලකරුවන්ගේ උමග ඇතුළත සිට කඹය ඒ දෙසට ඇදීමට පටන් ගත්තේ මේ මොහොතේදී ය. මෙවැනි දෙයක් සිදු වනු ඇතැයි ඔහු කිසිදිනක සිතා තිබුණේ නැත. එනිසා ක්ෂණික ප්‍රතිචාරයක් දක්වන්නට නොහැකි වූ ඔහු ද උමග තුළට වැටෙන්නට ආසන්න විය. එහෙත් ඊලඟ මොහොතේ ක්ෂණිකව ප්‍රතිචාර දැක්වූ ඔහු සිය ඉක්මන් බුද්ධිය මෙහෙයවා වහාම කඹයෙහි කෙළවර තම ඉණ වටා ගැට ගසාගත් අතර පසුව ඔහුගේ පිටුපස අංශක තිහක කෝණයකට ආසන්න වන තෙක් මුළු සිරුරම පිටුපසට ඇල කළේ ය.මෙය ගමේ අනෙක් පිරිමි ළමුන් සමඟ කඹ ඇදීමේදී භාවිතා කළ උපක්‍රමයකි. ඔහුගේ මුළු බරම ලණුව මතට යෙදවෙන පරිද්දෙන් භාවිතා කළ මෙම උපක්‍රමය නිසා තරුණයෙකුට පවා ඔහුව පරාජය කිරීමට නොහැකි විය.

නිසැකවම, මේ ක්‍රමය මඟින් උමග තුළ ඇති දෙයට එරෙහිව තම සිරුර චලනය නොකර තබාගැනීමට ඔහුට හැකි විය. දෙපාර්ශ්වයම දිගින් දිගටම අරගල කළ නමුත් කිසිවකුට ජයග්‍රහණය ලබා ගැනීමට නොහැකි විය. තත්පර දහයකට වඩා වැඩි කාලයක් මෙම අරගලය පැවතුණි. ඒ මොහොතේදී එක්වරම උමග දෙසින් වෙඩි හඬක් ඇසුණු අතර, පසුව ඔහුගේ පියාගේ කෑ ගැසීම ද ඇසුණි, "සන් යාසි, දුවන්න!!!"

කඹය ලිහිල් වන බවක් ඔහුට දැනුණු අතර පසුව තුහාඕසිය හූෂ් හඬකින් සිදුරෙන් පිටතට පැමිණියේ ය. එහි යමක් එල්ලී ඇති බවක් පෙනුන ද දැන් ඒ දෙස බලන්නට තරුණයාට සිහියක් හෝ කාලයක් තිබුණේ නැත. පහළින් යමක් සිදුවන්නට ඇති බව දැන සිටි ඔහු තුහාඕසිය අල්ලාගෙන වේගයෙන් දුවන්නට විය.

සැතපුම් කීපයකට වැඩි දුරක් යන තුරුත් ඔහු නතර වීමට තරම් එඩිතර වූයේ නැත. බොහෝ දුරක් දිව ගිය ඔහු තම දෑතෙහි තිබූ තුහාඕසිය දෙස බැලීමට තම දෑත් දිගු කළේ ය. එකෙණෙහිම ඔහුගේ මුවින් බියපත් කෑ ගැසීමක් පිට විය. ලේ වැගිරෙමින් තිබූ කපා දැමූ අතක් තුහාඕසිට සම්බන්ධව පැවතුණි. ඒ අතෙහි හිමිකරු හඳුනාගත් ඔහුට මුවින් පිට වූ හැඬීම වළක්වා ගත නොහැකි විය. එය පැහැදිලිවම ඔහුගේ සහෝදරයාගේ අත විය. මිය ගොස් නොතිබූ නමුත් සහෝදරයාගෙ එක් හස්තයක් අහිමිව ඇති බව එයින් සනාත වුණි.

මෙය වැටහෙනවාත් සමඟම ඔහුට දත්මිටි කෑම වළක්වා ගැනීමට නොහැකි විය. ඔහුට අවශ්‍ය වූයේ ආපසු ගොස් තම පියා සහ සහෝදරයා බේරා ගැනීමට ය. නමුත් ආපසු හැරී බැලූ ඔහු දුටුවේ ලේ රතු පැහැති යම් කිසි දෙයක් තමා පිටුපස වකුටු වී තමා දෙස බලා සිටින ආකාරයයි.

තරුණයා පරිපූර්ණ මෝඩයෙක් නොවී ය. ඔහු මීට පෙර බොහෝ සොහොන් ගෙවල් වෙත පියා පසුපස ගොස් තිබූ අතර අමුතු දේවල් රාශියක් දැක තිබුණි. පොළොව යට ඕනෑම දෙයක් සිදුවන්නට හැකි බව ඔහු ද දැන සිටියේ ය. වැදගත්ම දෙය වූයේ කලබල නොවී ප්‍රායෝගික වීම ය. අවතාරයක් කෙතරම් භයානක වුවත්, එය ජීවමාන පුද්ගලයෙකුට වඩා බලවත් නොවන බව දැනගත යුතු ය. එය හ'යිෂියොන්ග් හෝ බයිෂියොන්ග් (4) වේවා , ඕනෑම දෙයක් භෞතික විද්‍යාවේ නියමයන්ට අවනත විය යුතු ය. වෙඩි උණ්ඩයක් මඟින් එය විනාශ කළහොත් බිය වීමට කිසිවක් නැත.

එසේ සිතමින් ධාවනය කළ සිත සන්සුන් කරගත් ඔහු පසුබැසීමට පටන් ගත්තේ ය. තම ඉන පටියෙන් පෙට්ටි තුවක්කුව ඇදගත් ඔහු ඉක්මනින් වෙඩි කිහිපයක් එල්ල කිරීමට සූදානම් විය. එම ලේ-රත් පැහැ වස්තුවෙන් යම් චලනයක් ඇති වන තුරුම, ඔහු වෙඩි වරුසාවක් එල්ල කරන්නට වූයේ නොනවත්වමිනි.

නමුත් මේ මොහොතේ එම රත් පැහැ ගත් වස්තුව එක්වරම නැගිටිනු ඇතැයි ඔහු සිතුවේ නැත. සමීපව බැලූ කුඩා පිරිමි ළමයාට, ඔහුගේ හිස හිරිවැටී ඇති බවත්, ඔහුගේ බඩ කැළඹී ඇති බවත් දැනෙන්නට විය. ඒ පැහැදිලිවම සම ගැලවී ගොස් තිබූ පුද්ගලයෙකි! ඔහු ලෙයින් මිරිකා ගත්තාක් මෙන් රුධිරයෙන් වැසී ගොස් තිබුණි. එහෙත් එවන් පුද්ගලයකුට තවමත් එම තත්ත්වය තුළ ඇවිදීමට හැකිවීම ඇත්තෙන්ම ආශ්චර්යයක් විය. රුධිර මළකඳක සැබෑ මුහුණ මෙයද?

කල්පනා සයුරේ ගිලී සිටි ඔහු එයින් මිදුණේ එක්වරම ඉදිරියට නැමී ඔහු දෙසට දිව ආ රුධිර මළ සිරුර දැකීමෙනි. මළ සිරුර දෙස මුහුණට මුහුණලා බලා සිටි ඔහුට ඒ මුහුණෙන් හමා ආ රුධිර ගන්ධය සහ එහි හානිකර වූ ගන්ධය නාසයට මනා සේ දැනෙන්නට විය. එම අවස්ථාවෙන් ප්‍රයෝජන ගත් තරුණයා පසුපසට ඇද වැටුණේ ඉතා ආසන්නයේ සිට එම දේහයේ පපුවට වෙඩි උණ්ඩයක් එල්ල කරමින්ම ය. දුර කෙතරම් සමීප වීද යත්, එය උණ්ඩ සියල්ලෙහිම එකතුවෙන් සැදුම්ලත් විශාල පහරක් මෙන් දිස් වූ අතර, එම රුධිර මළ සිරුරෙහි රුධිරය සෑම තැනකම පියාසර කළේ ය. එනිසා පියවර කිහිපයක් පසුපසට යන විට තරුණයාට දැනුණේ නිම්හිම් නැති ජයග්‍රාහී සතුටකි. උද්දාමයට පත් ඔහු නැවත වරක් තම තුවක්කුව එම මළ සිරුරෙහි හිස වෙතට එල්ල කොට කොකා ගස්සන්නට සූදානම් වූ නමුත් පෙර මෙන් වෙඩි ශබ්දයක් නිකුත් නොවූ අතර ඇසුණේ 'ක්ලික්' යන ශබ්දයක් පමණි.

තුවක්කුව හිරවෙලා!

ඔහුගේ ලොකු මාමා විසින් මෙම පැරණි පෙට්ටි තුවක්කුව සොයාගෙන තිබුණේ රණශූරයෙකුගේ සොහොනක සිදු කළ කැණීමක් මඟිනි. එය වසර ගණනාවක් තිස්සේ භාවිතා කොට නොතිබූ අතර අවාසනාවකට මෙන්, පසුගිය වසර කිහිපය තුළදී ද ඔහු තම පියා සමඟ එහෙ මෙහෙ දුවමින් සිටියා විනා එය නඩත්තු කිරීමට කාලයක් ලැබී නොතිබුණි. සාමාන්‍ය කාලවලදී එය භාවිතයට අවශ්‍ය වූ අවස්ථා තිබුණේ  බොහෝ සුළුවෙනි. මෙවැනි මොහොතකදීම එය හිර වනු ඇතැයි කවුද බලාපොරොත්තු වෙන්නේ?

එහෙත් මෙම තරුණයාගේ නොපසුබට උත්සාහය ශක්තිමත් ය. පහසුවෙන් අත් නොහළ ඔහු තුවක්කුව හොඳින් ක්‍රියා නොකරන බව දුටු විගස තම අත පසුපසට ගෙන සිය මුළු ශක්තියෙන් තුවක්කුව එම රුධිර මළ සිරුර දෙසට වීසි කළේ ය. එය මග හැරී තිබුණ ද එසේ නැති වුව ද යන්න ගැනවත් සැලකිල්ලක් නොදැක්වූ ඔහු සිය හිස හරවා වේගයෙන් දිව ගියේ ය. ආපසු හැරී බැලීමටවත් එඩිතර නොවූ ඔහු තමන් ඉදිරියෙන් තිබූ විශාල ගසක් දුටු අතර වහා ඒ දෙසට දිව යන්නට වූයේ ලේ රත් පැහැ ගත් එම පුද්ගලයාට ගස් නගින්නට බැරි වේ යැයි සිතමිනි. එහෙත් ගස වෙත ළඟා වීමට ආසන්නව තිබියදී එක්වරම පය පැකිලී ගිය ඔහු බිම ඇද වැටුණි. ඔහුගේ මුළු මුහුණම පොළෝ තලය සිප ගත් අතර නාසය සහ මුඛය ලේ රුධිරයෙන් පිරී තිබුණි.

තරුණයා තදින් පොළොවට ගැසුවේ සිතේ ඇති වූ දැඩි කෝපය නිසා ය. ඇයි ඔහු මේ තරම් අවාසනාවන්ත වුණේ?

මේ අවස්ථාවේ තමා පිටුපසින් හමන සුළඟේ ශබ්දය ශ්‍රවණය වූ ඔහු සිතුවේ යම රජු තමන් කැඳවාගෙන යාමට පැමිණ ඇති බව ය. 'මම මැරෙනවා, එහෙම වෙද්දෙන්,' ඔහු දැඩි ලෙස සිතුවේ ය. එනිසාම බිම වැතිර සිටි ඔහු නැගිටීමටවත් කරදර නොවූ අතර එම ඉරියව්වෙන්ම වැතිර සිටියේ ය.

නමුත් සිදු වූයේ අනපේක්ෂිත දෙයකි. රුධිර මළ සිරුර ඔහුව කිසිසේත් නොදැක්කාක් මෙන් ඔහු මත පා තැබුවේ ය. එහි ලේ වැකි පා සටහන් ඔහුගේ පිටෙහි කැටයම් වී තිබුණි. රුධිර  මළ දේහය පුදුම සහගත ලෙස බරින් වැඩි ව තිබූ අතර, එහි බර අඩු වූ සැණින්, පිරිමි ළමයාගේ උගුරට අනින්නාක් මෙන් දැනෙන්නට විය. උදරයේ තිබූ ආමාශයික තරලය ඉහළට පැමිණෙන්නට තරම් ආසන්නව පැවතිණි. එපමණක්ද නොව, ඔහුගේ පිටෙහි පා සළකුණු තිබූ ස්ථානයෙහි  කැසීමක් ද හට ගත් අතර දෑස් අඳුරු විය. තම ශරීරයට විස ඇතුළු වී ඇති බව වටහාගැනීමට ඔහුට අපහසු නොවී ය. එමෙන්ම එය ඉතා අධික මට්ටමින් සිදු වූ විෂ වීමකි. තුෂ්නිම්භූතව සිටි ඔහු ඊලඟට දුටුවේ වැඩි ඈතක නොවූ තම සොහොයුරාගේ කපා දැමූ අත මගින් යමක් අල්ලාගෙන සිටින ආකාරයකි.

තදින් ඇසිපිය ගසා පෙනීම තියුණු කරගැනීමට උත්සාහ කළ ඔහු, එය දෙසට සමීප බැල්මක් හෙලූ අතර, හස්තයෙහි ග්‍රහණයට හසු වී තිබුණේ පැරණි සේද කැබැල්ලක් බව සොයා ගත්තේ ය. එය පිටතට ගෙන ඒම සඳහා තම සහෝදරයන් මෙතරම් මංමුලා සහගත වූවානම් එය කිසිසේත්ම සාමාන්‍ය දෙයක් නොවන බවට ඔහුගේ සිතට මොහොතකින් වැටහිණි. අනෙක් කරුණ නම්, තම සහෝදරයන්ට කුමක් සිදු වීදැයි ඔහු තවමත් දැන සිටියේ ද නැත. තමන් මිය ගියහොත් ඔවුනට එය සොයා ගත හැකි වන පරිද්දෙන් එම සේද රෙදි කැබැල්ල තවත් හොඳින් බලාගැනීමට ඔහු වඩාත් උත්සුක විය. එලෙස වූවොත් තම සහෝදරයාගේ හස්තය නිකරුණේ අහිමි නොවූ බවත්, තමන් ද නිකරුණේ මිය ගොස් නොමැති බවත් පසක් වනු ඇත.

මෙසේ සිතමින් සිටි ඔහු තම සොහොයුරාගේ කපා දැමූ අත වෙත ළඟා වීමට බඩගාමින් දඟලමින් ද උත්සාහ කරන්නට විය. අවසානයේ දී එය වෙත ළඟා වීමට ඔහු සමත් විය. තම සොයුරාගේ තදින් ගුලි වී තිබූ හස්තය බලහත්කාරයෙන් විවෘත කර, සේද කැබැල්ල පිටතට ගෙන, පසුව එය ඔහුගේ කමිසය තුළට ඔබා ගැනීමට ඔහුට හැකි විය.

ඊලඟ නිමේශයේදී ඔහුට තම කන් දෙක තුළිත් ගිගුරුම් හඬක් ඇසෙන්නාක් මෙන් දැනෙන්නට විය, දෑස් ද අපහැදිලි පටලයකින් වැසී ඇති බවක් දැනෙන්නට විය. දෑත් සහ පාද සීතල වීමට ආරම්භ වෙමින් පැවතිණි. මින් පෙර අවස්ථාවලදී ලබා තිබූ අත්දැකීම් මත පදනම්ව, ඔහුගේ කලිසම ද මේ වන විට මුත්‍රා සහ අසූචි වලින් වැසී තිබිය යුතු විය. මළ සිරුරු විෂ වීමෙන් මිය ගිය මිනිසුන් මුහුණ දී තිබුණේ ඉතාමත් අප්‍රසන්න මරණවලට ය. මේ මොහොතේ දී ඔහුගේ විශාලතම බලාපොරොත්තුව වූයේ එහා ගමේ තරුණියගේ දෑස්වලට ඔහු දැන් සිටි අවස්ථාව දැකීමට නොහැකි වීම ය

ඔහුගේ සිතුවිලි ජාලය අවුල්සහගත වෙමින් පැවති අතර මොළය විසින් ඔහුට සවන් දීම නවත්වා දමා තිබුණි. නමුත් මේ සියල්ලම මධ්‍යයේ ඔහුට ඒ හඬ යළිදු වතාවක් නොපැහැදිලි ලෙස ඇසෙන්නට විය. මොළය විසින් දහසකුත් ක්‍රියාවන් ඇණ හිටවා තිබුණ ද එම ශබ්ද තරංග මඟ හැරීමට හැකි වී තිබුණේ නැත. ඒ, සොහොන් කොල්ලකරුවන්ගේ උමග තුළ දී ඇසුණු ඇඟ කිළිපොළා යන අමුතු සිහින් ශබ්දය යි.

යමක් වැරදී ගොස් ඇති බව ඔහුට නොපැහැදිලි ලෙස දැනුණි. මෙතරම් කාලයක් රුධිර මළ සිරුරත් සමඟ ඇති වූ අරගලය මධ්‍යයේ නෑසී ගොස් තිබූ එම ශබ්දය යළිත් ඇසෙන්නේ ඇයි? එය විය හැකිද...ඔහු මේ දැන් දුටුවේ රුධිර මළ සිරුරක් නොවේද? එසේනම් ඔහු දුටුවේ කුමක්ද?

සිතාගැනීමටවත් නොහැකි තරම් ශෝකයක් දැනෙමින් තිබෙන්නා වූ තම හිස ප්‍රත්‍යාවර්තව එසවූ අතර විශාල අමුතු මුහුණක් පොළෝ බිමට ආධාර වී තමා දෙස බලා සිටිනු දුටුවේ ය. අක්ෂි ගෝලයේ කණිනිකාවක් හෝ කළු ගෝලයක් නොමැති එම දෑස් සම්පූර්ණයෙන්ම හිස් ලෙස තිබූ අතර ඒවායේ ජීවයේ ගිනි පුපුරක්වත් දකින්නට තිබුණේ නැත.

****

පරිවර්තන සටහන්:

(1) Luoyang shovel (ලුඔයැං සවල) = චීන පුරාවිද්‍යාවේ වැදගත්ම මෙවලමකි. ඔබ එය ගෙන, එයින් පොළොවෙහි පස් හාරා පසුව එය ඉහළට ඇද, යමක් හමු වී ඇත්දැයි බලන්න. සවල බිමෙන් ඉවතට ගන්නා අතරතුර, සවල හිසෙහි අභ්‍යන්තර පෘෂ්ඨයට පස් සිලින්ඩරයක් සවි කර පිටතට එසවනු ලැබේ. මෙයින් පසෙහි ව්‍යුහය, වර්ණය, ඝනත්වය සහ අන්තර්ගතය විශ්ලේෂණය කිරීමෙන්, පුරාවිද්‍යාඥයින්ට පාංශු තත්ත්වයන් තක්සේරු කළ හැකි අතර, ඉපැරණි සොහොනක් භූගතව තිබේදැයි තීරණය කළ හැකි ය.

(2) මෙය එකැස් තරුණයාට පවසන ආමන්ත්‍රණයකි. Er Yazi (අ'ර් යාසි) යනු "දෙවන දරුවා" වැනි අර්ථයක් සහිත වචනයකි. සන් යාසි යනු "තුන්වන දරුවා" යන්න ය. එනම් එකැස් තරුණයාගේ බාල සහෝදරයා ය.

(3) Tuhaozi වචනාර්ථයෙන් "පාංශු මූසිකය" ලෙස පරිවර්තනය කරයි. එය තියුණු කැණීමේ මෙවලමක් වන නමුත් එහි කාර්යභාරය වන්නේ හෑරීම නොව පස පිටතට ප්‍රවාහනය කිරීමයි. සාමාන්‍යයෙන් දෙපැත්තේ ලණු ඇත. නමුත් සමහර ලණු එක් කෙළවරක පමණක් බැඳ ඇත. වල ඇතුලත සිටින අය කැණීම් කරන විට පිටත සිටින අය එම කැණීම් කළ පස් පිටතට අදිනු ලබයි.

(4) Hei=කළු, bai=සුදු, xiong=දුෂ්ට, නපුරු, අසුබ, භයානක, ආදිය. Heixiong සහ baixiong යනු "Ghost Blows Out the Light" (aka "Candle in the Tomb") යන පද වේ. මගේ සිතුවිලි අනුව ඔවුන් සොහොනෙන් පිටතදී, හමු වූ විට කළු හෝ සුදු හිසකෙස් වැවෙන දරුණු සොම්බි (අවතාර) වර්ගයකි. (මම මේකෙන් යනවා ). හඳුනාගැනීමේ පහසුව උදෙසා හයිෂියොන්ග් සහ බයිෂියොන්ග් ලෙස ම තැබුවෙමි.